Chyhsapa moleina kyh
1 Alei chô liata chyhsa ama pôh nata, sawchanôzy ama sa nona chata,
2 khazohpazy sawchapawpenawh chata chyhsa sawchanôzy cha hmipha ngaitapa ta hmô ei ta; ama khopa maihzy cha lahpinô ta hnei ei ta.
3 Chatawhcha ABEIPA chata, “Ei thlahpa cha chyhsapa hnohta chhâzaw ta y aw vei, ano chhao cha thi theipa châ tlôh ta, kô za kha nata syno cha a hroh aw,” tah ta.
4 Cha nohzy liata nata cha hnôhlâ chhao chata mopahreihpa sahlao cha alei liata y ei ta; amozy cha khazohpazy sawchapawzy nata chyhsa sawchanôzy châ ei ta. Âmozy cha hlâno ta riahphapazy, chyhsa mohpathâpazy kha ama châ.
5 ABEIPA chata alei liata chyhsa moleizie cha thata a châ tahpa, nata a palôhrupa pachânazie chhao cha moleipa sai a châ tahpa pahno ta.
6 Chatawhcha alei liata chyhsapa a vaw tao hawpa vâta, ABEIPA cha a ngiapachhi ta, a palôh pasa kaw ta.
7 Chatawhcha ABEIPA chata, “Chyhsapa ei taopa he alei chô tawhtapa ei pahleipadia aw, chyhsa zy, sa zy, alyh thaipazy nata aruapa liata a zawpa pavawzy taih heta, ei tao hapa vâta ei ngiapachhina,” tah ta.
8 Naw deikua chata ABEIPA modypa ta y ta.
Naw ta balyh a tao
9 Hezy he Naw chhâzy cha a châ. Naw cha chyhsa sia ngaitapa châ ta, ano chhâ liana chata seina hnei leipa a châ; Naw cha Khazohpa nata charei khoh tyh ei ta,
10 Chatawhcha Naw chata sawchapaw pathôh Sema nata Hama nata Zaphetha sa ta.
11 Chatawhcha alei he Khazohpa mohmô ta rao khai ha ta, a iekhyhna ta bie ta.
12 Khazohpa ta alei he moh ta, rao khaipa ta pahno ta; sapa zydua ta alei liana heta ama yzie rao khai haw tlôh ta.
13 Chatawhcha Khazohpa ta Naw hnohna chata, “Sapa zydua chhâna cha ei hmiakô ta a vaw tlô haw; âmo vâta alei he a iekhyhna ta bie khai tlôh ta; cha vâna chata alei dua ta ei pahleipadia aw na.
14 Na châta kaophy tho ta balyh tao teh; balyh liana chata chhôhpadâhpazy na tao awpa châ ta, a chhôh lâ nata a khôtho lâna cha kaophy chathlih na hnia khai awpa a châ.
15 He he na taona zie awpa cha a châ: balyh doh lâ cha dy za thôh châ sala, ahâ lâ dy sypangawh châ sala, â sâhna lâ cha dy sythôh châ mawh sy.
16 Balyh liana chata opy na tao awpa châ ta, a chô lâ dy kha a cha luahpa ta palohpa a châ aw; chatawhcha balyh chhikao cha a kâ lâ na tao awpa châ ta; a ry lâ chhâ, a chhâh nona nata, a chhâh thôhna hneipa ta na tao awpa a châ.
17 Keima tlaita sapa zydua hrona husona a hneipa maih cha avâ ry tawhtapa pahleipadia awpa ta alei liata tipa-ua ei patlôsa aw; alei liata hmo to a ypa he ama thi khai aw.
18 Châhrasala ei biehraina cha na chôta ei pa-isa aw; balyh liata nâ ngia awpa a châ, nâ â ngia aw chi ta, na sawchapawzy, na lahpinô nata na sawchapawzy, lahpinôzy chhao, na hnohta amâ ngia khai hra aw.
19 Chatawhcha sapa zydua liata hrona a hneipa maih hry tawhtapa chi to miano lymâ ta, na hnohta pahro awpa ta balyh liata nâ chhi awpa a châ; a chapawpa nata a chanôhpa lymâ ta ama châ awpa a châ.
20 Pavawzy âmo chi yzie haw chyu ta,sahrozy amo chi yzi haw chyuta alei liata alyh thaipa maihta, âmo chi yzie hawh chyu ta, chi to miano lymâ ta na pahro awpa ta na hnohta amâ vy awpa a châ.
21 Nie theipa to la la, na hnohta soh hra teh, chatanachata nâ nata âmo châta niepa a châ aw,” tah ta.
22 Naw chata Khazohpa ta a hnohta bie a piepa zydua hawhna tlai chata tao haw ta.