Athaona Bo 28
1 Aisika chata Zakaw cha aw ta, byhnâ awpa ta, bie pie hra ta, a hnohta, “Kana laihsa hry liatahpa he lahpinô ta na hnei awpa châ vei.
2 Thyu la, Padanara liata na nô paw Bethuel lâta sie la; cha liatahpa cha na nô rilâhpa Laba sawchanôzy hry liatahpa lahpinô ta hnei teh.
3 Khazohpa Atotaotheipa chata byhnâ cha piepa ta, chi hluhpi na vaw châ thei nawpa ta, chi hluhpi cha pathlasapa ta, cha papôhsa mawh sy.
4 Na khichhaina râh Khazohpa ta Abaraha a piepa he, na pahrâ nawpa ta Abaraha byhnâ cha patosa hra mawh sy, nâ nata na pathlazy chhao,” tah ta.
5 Chatanachata Aisika chata Zakaw cha pasiesa ta; Padanara râh liata, Zakaw nata Esaw nô Rebeka rilâhpa, Suria chyhsa Bethuel sawchapawpa Laba lâna chata sie haw ta.
Esaw ta lahpinô hropa a hnei
6 Chatawhcha Esaw chata Aisika ta Zakaw byhnâ awpa ta lahpinô hnei awpa ta Padanara lâta a pasiesa tahpa nata byhnâ a aw nota, “Kana laihsa hry liatahpa he lahpinô ta na hnei awpa châ vei,” tahpa ta bie a pie tahpa nata,
7 Zakaw ta a nô nata a paw bie angiahpa ta Padanara lâta a sie haw tahpa pahno ta.
8 Chatanachata Esaw chata Kana laihsazy chata, a paw Aisika palôh patlâh veih ei, tahpa pahno haw ta,
9 Esaw cha Ishmael lâta vawh ta, Abaraha sawchapawpa Ishmael sawchanônô Mahala, Nebaiô sietanô cha a lahpinô châta a lahpinô hnei chiehpazy tho ta hnei baichha heih ta.
Bethel liata Zakaw mâsapa
10 Zakaw cha Besheba tawhta pua ta, Harana lâ pangai ta.
11 Chatawhcha kheihawhpa su tlyma kei tlô ta, noh a tla hawhpa vâta cha liana chata a rie ta. Cha su liata alô miakha cha la ta, a lahuah ta soh ta, cha su liana chata a mô awpa ta a zia ta.
12 Chatawhcha mâ sa ta, pachâ teh, alei chô liana heta hleidy a vaw dao ta, a pawhmao chata a vâ pha ta; a chô liana chata Khazohpa vâlyuhchâpazy kiahpa ta chô ei ta.
13 Chatawhcha a chô lâna chata, ABEIPA a duah ta, “Kei he ABEIPA na mahpaw Abaraha Khazohpa nata Aisika Khazohpa cha ei châ; nâ ziana alei kha, nâ nata na pathlazy ei cha pie aw ei.
14 Na pathlazy cha alei liata dohlei zie ta y aw ei ta, notla lâta zy, nochhi lâta zy, chho lâta zy, paipatla aw chi ta; nâma liata nata na pathla liana chata khizaw liata pho to ama hu a hie aw.
15 Na hnohta y nata na siena maihta cha vaih lymâ aw na ta, he râh liana heta ei cha pakuasa heih aw; na hnohta ei reipa he, ei tao hlâ lei ta cha, cha siesai aw va na,” tah ta.
16 Zakaw cha a môpa a vaw hra ta, “He su liana heta ABEIPA cha a y tlai na; vaw pahno leipa na ta,” tah ta.
17 Chatanachata chi ta, “He su he chi a chhih kaw dia! He he su hropa châ vei hi, Khazohpa o na a châ hih, he he avâ chhikao na a châ hih,” tah ta.
18 Zakaw cha mydi ta thyu ta, alô a lahua a sopa cha la ta, lôbô châta bô ta, a chô liana chata sathaw hry ta,
19 Cha su moh châta Bethel bi ta; a khih moh deikua cha, cha hlâta cha Luza a châ.
20 Chatawhcha Zakaw chata, “Ei pâ o lâta thlahlôhpa ta ei di heih nawpa ta Khazohpa ei hnohta ypa ta,
21 he ei siena lâpi liata na vaihpa ta, ei nie awpa viahchhâ nata a bu awpa chysia eina pie awpa khiahtala, ABEIPA cha ei Khazohpa châ aw ta,
22 he alô lôbô châta ei bôpa chhao he Khazohpa o a châ aw; chatawhcha eina pie awpa chi zydua liata su hrawh liata su kha cha ei cha pie tlai aw,” tahpa ta bie taih haw ta.