Mara Holy Bible: Athaona

Showing posts with label Athaona. Show all posts

Athaona Bo 50

1 Chatawhcha Zawsi chata a paw hmia a khu thlupa ta, cha ta, sy ta.

2 Zawsi ta ano a chakaotuhpa thohna a thaipa sahlaozy cha, a paw ri thu thei leipa ta tao awpa ta bie pie ta. Chatanachata thohna a thaipa sahlao chata Izarel ri cha thu thei leipa ta tao haw ei ta;

3 a ri tao nawpa ta noh sypalih hryu ei ta, thu thei leipa ta taona chata noh cha zie cha ama hryu tyhpa rai a châ. Chatawhcha noh sysari chhôh cha Izi sahlao chata ano cha chakhei ei ta.

4 Chatawhcha ano ama chakheinanohzy cha a chhâ tawhta, Zawsi ta Phirao chhôhkhazy cha bie a chho ta, “Na hmiakô liata ngiachhiena ei hmô khiahtala ngiachhiepata ta Phirao nahkhao theina liata

5 ei pâ ta, “Ei thi aw na; Kana râh liata ei thlâ ei chao chiehpa liata, cha liana tlai chata na pabu mah y,’ tahpa ta chhie na pasakhâhsa ta, Ngiachhiepata ta ei pâ he na pabusa mah y; ei vy heih aw, a tahna tahpa ta, reih teh u,” tah ta.

6 Phirao chata, “Chhie cha pasakhâhsapa hawhna chata, na paw cha kaw pabu mah y,” tah ta.

7 Zawsi cha a paw pabu awpa ta khy haw ta; Phirao chakaotuhpa zydua, a chhôhkha zydua hry liata machâzy nata Izi râh machâ zydua nata

8 Zawsi chhôhkha zydua nata a unawhpazy nata a paw chhôhkhazy cha a hnohta khy hra ei ta; ama sawnawh chyhpatazy nata ama mietahkupa zawzy nata ama viahchao hrizy deita cha Kôse râh liata siesai ei ta.

9 Chatawhcha ano hnohta talailizy, arâ a kiapazy khy hra ei ta; py lai ngaitapa ama châ.

10 Zawda haosâ liata Atada sawhri châ tlôh ei ta, cha liana chata thata chakhei chaimâh ei ta; noh sari a paw mâchhiesana tao ta.

11 Cha râh liatahpa Kana sahlaozy chata Atada sawhri liata ama athihpa mâchhiesapa cha ama hmô nahta, “He he Izi sahlao a thipa mâchhiesana ru ngaitapa a châ he,” tah ei ta. Chavâta cha su cha Abelamizarai* bi ei ta; cha cha Zawda haosâ ta a ypa a châ.

12 Chatawhcha a sawchapawpazy chata a bie piepa lymâ hawhta taopa ei ta;

13 a sawchapawpazy chata Kana râh liata a ngiakhei ei ta, Abaraha ta pabuna su ryu châta Hiti chyhsa Ephraw liata lyu chhaota a chaleipa, Mamre dadyta Makapela lyu liata lôpu liana khata ama pabu haw.

14 Zawsi cha a paw a pabu khai nata, ano nata a unawhpazy nata a paw pabu awpa ta a hnohta a khy hrapa zydua chhaota Izi râh lâta kua haw ei ta.

Zawsi ta a unawhpazy palôh patlasa ta

15 Chatawhcha Zawsi unawhpazy chata ama paw thipa cha ama pabu nata, “Zawsi ta maniah a hao aw ta, a chô liata hmo eima paraopa zydua phu kha, eima chô liata a kipa ta a la thlyu aw na,” tah ei ta.

16 Zawsi chho awpa ta bie ta ei ta, “Na paw chata, a thi hlâna khata,

17 He tana heta Zawsi hnohta, ngiachhiepa ta na unawhpazy paraona nata ama moleina cha, a ngiahthai mah y, na chô liata hmo la parao taraw ei ta, tahpa ta nama reih awpa a châ,’ tah ta, bie maniah pie ta, ngiachhiepa ta na paw Khazohpa chakaotuhpazy paraona cha a ngiahthai mah y,” tah ei ta. Chatawhcha a hnohta ama chho nona chata, Zawsi cha cha ta.

18 A unawhpazy chhao cha vawh hra ei ta, a hmiakô liata a bôh chyu ei ta, “Moh teh, na chakaotuhpazy eima châ hih,” tah ei ta.

19 Zawsi ta ama hnohta, “Chi kha u, Khazohpa vyuhpa ta a ypa châ va na mâ?

20 Nâmo ta la ei chô liata hmo moleipa tao a chhuah eichi ta; châhrasala Khazohpa chata atanoh hawhna heta chyhsa hluhpi a hrohpa ta pachhana awpa ta hmo phapa ta pachâsa tlao a chhuahpa châ tlôh ta.

21 Chi kha u, nâmo nata nama sawnawh chyhpatazy cha, ei cha pasa lymâ aw ei,” tah ta. Chatanachata ama thlah palôh ta, reikah pha ngaitapa ta chho chyu ei ta.

Zawsi thina

22 Chatawhcha Zawsi cha ano nata a paw chhôhkhapazy chhaota Izi liana chata pahrâ ei ta; Zawsi cha kô za kha nata kô hrawh hroh ta.

23 Zawsi chata Ephrai sawzy chhâ thôhna taihta hmô ta; Manase sawchapawpa Makhia sawzy chhao Zawsi byh chô liata pih ei ta.

24 Zawsi ta a unawhpazy hnohta, “Ei thi aw na; châhrasala Khazohpa ta cha vaw tly thlyu aw ei ta, he râh tawhtapa he a chhipa ta Abaraha zy, Aisika zy, Zakaw zy hnohta chhiesapa ta pie â taihpa, â taihpa râh lâta a cha kaw chhi aw ei,” tah ta.

25 Zawsi chata, Izarel pathlazy cha vaw tly tlai aw ei ta, ei rupazy he, he tawhtapa he namâ kaw sy awpa a châ,” tah ta.

26 Zawsi cha, kô za kha nata kô hrawh a châpa ta thi ta; a ri cha thu thei leipa ta tao ei ta, Izi liata ri byh liata soh haw ei ta.

Athaona

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36	Bo 37	Bo 38	Bo 39	Bo 40
Bo 41	Bo 42	Bo 43	Bo 44	Bo 45	Bo 46	Bo 47	Bo 48	Bo 49	Bo 50

Athaona Bo 49

Zakaw ta a sawzy thâtih a reih chhielie

1 Chatawhcha Zakaw ta a sawchapawpazy aw ta, he tana heta reih ta, “Noh hnôh lâtazy nama chô liata hmo a vaw tlô awpa cha, ei cha chho nawpa ta a vaw pakhy teh u,

2 Nâmo, Zakaw sawchapawpazy saih u, a vaw pakhy ula, nahthlie teh u, nama paw Izarel bie he nahthlie teh u.

3 Rubena y, nâ he ei saw tuapa, ei hmotaotheina, ei thatlôna thei hmiatua chaipa na châ, a sâh chaina nata bie hnei chaina cha, nâ eih a châ.

4 Ti hawhta â i leipa na châ, chônôchaina cha hnei aw va chi, na paw rakhô na kiahpa vâta; cha nona chata cha cha papuapalei chi ta, ei ziana liata na kiapa kha!

5 Simeôna nata Livai he unawh châ ei ta; ama zaozizy cha thisaih palona chaihrai a châ.

6 Ei thlahpa cha ama chhosiena liata a hlao leipa aw ta, ei palôhrupa chhao amâ pakhyna liana chata a hlao hra aw vei; ama pathi-iapa ta chyhsa thie ei ta, ama chhorupa ta viahchao tôhpa thari chhie ei ta.

7 Ama pathi-iana chata chhiesana to mawh y, ahrâh ngaitapa châ tlôh ta; ama hiehâhna chhao chata chhiesana to mawh sy, nôchhie ngaitapa châ tlôh ta! Zakaw sahlao liana chata âmo cha pachhaih aw na ta, Izarel sahlao liana chata ei papai hra aw.

8 Zudah y, nâ cha, na unawhpazy ta ama cha reithai aw ei; na ku cha na khakhaipazy rao liata pahnieh aw chi ta; na paw sawchapawpazy cha na hmiakô liata amâ bôh aw.

9 Zudah he chkeibarôhneipa taw a châ; ei sawchapawpa y, na sa taipa cha kua sai haw chi ta a bôh ta, chakeibarôhneipa hawhta a byu ta, chakeibarôhneipa chanôhpa lyu hra tlôh ta; ahye a pathyu ngâh aw?

10 Ryureina chôhchahrei cha Zudah tawhtapa lei leihpa aw ta, ryureituhpa chôhcharei cha a pathlazy tawhta lei hra aw vei, a hneituhpa a vy hlâ lei ta cha; pho to ta ano bie ama zyh aw.

11 A arâ taw cha krezôh liata hraih ta, A lâ taw cha krezôh phapa liata hraih hra ta, a chysia kresawti liata pasu ta, apo cha kre-thisai liata pasu hra ta;

12 a mokhaohzy cha kresawti ta pasaipa ta y aw ta, a hâhzy cha sâhpiti ta pangyuhpa ta a y hra aw.

13 Zebulawna heta tilaipi kiah liata a pahrâ aw, balyh pahâna ngiakâh a châ aw, a râhri cha Sidawna liata a châ aw.

14 Iskara he alâ chahra ngaitapa, mietahkupa sahdô likawhta a byupa a châ;

15 a pahapa cha a phapa ta pahno ta, râh cha a phapa ta pahno hra ta; chatanachata khâpaleipa a pu awpa ta, a ngiatlâh cha pahnai ta raihriapa ta hrua raruahpa ta, sei ta vaw y haw ta.

16 Dana heta a chyhsazy cha Izarel pho hry liata pho miakha châ hrapa ta ryu a reipa aw.

17 Dana he lâlai liata parih, lâpi liata vâzi, a chô liata a kiahpa a di lâta a tlâhna taihta arâ phei liata a pachu tyhtuhpa he a châ aw.

18 Hy ABEIPA y, na pachhana cha ei hâ thlâh ha na,

19 Kada he, chariah ta a dyuh aw ei ta, Châhrasala ano chata ama phei ngavâhmaothy lâta tlao a tei aw.

20 Asera he a niepa cha pha aw ta, abei niepa pahâh ngaitapazy a papua aw.

21 Nathalai he sasu pathliepa a châ, bie pha ngaitapazy a reih tyh.

22 Zawsi he tho pathei khoh ngaitapa a châ, tikhaoh kiapâh liata tho pathei khoh ngaitapa cha; a pachia pachhuahpazy châta alô pâchhô â zaw pakhô ta.

23 Châtai a kapa sahlao chata ano cha thata riepatheisa ei ta, kâ ei ta, taola ei ta;

24 châhrasala ano libaw cha a pachyu ngaitapa ta y thlâh ha ta, a ku thazy cha thapatlôpa ta y ta, Zakaw chyhsa Thatlôpa ku ta,(Mietahkuvaihtuhpa, Izarel lôpanô moh ta),

25 na paw Khazohpa nâma châbao tuh awpa ta, Atotaotheipa chô lâ, a vâ byhnâzy,a ry lâta a byuh thlâh hapa, ti thu ngaitapa byhnâzy, sâhpi nata chhi byhnâzy ta, nama byhnâ cha aw patupa tlaita, tha patlôpa ta y ta.

26 Na paw byhnâzy heta na pathlatuhpazy byhnâ cha, chhâzaw tlâh chhâna taihta a khô haw; chazy cha Zawsi ku liata y aw ta, a unawhpazy tawhta pananopa ta a ypa luh liana chata a y aw.

27 Benzami he changie zohpa châ ta, myta cha sa taipa nie aw ta, Zâlâ ta a hraona cha a raih aw,” tah ta.

28 Cha zydua cha Izarel pho hrawhleinozy châ ei ta; cha bie chhao cha âmo byhnâ awpa ta ama hnohta ama paw bie reipa a châ, byhnâ awpa ta ama y awpa kyh lymâ hawhta, byhnâ aw pa chyu ta.

Zakaw thina nata pabuna

29 Zakaw cha âmo cha ryu a hi ta, ama hnohta, “Ei chieheihzy hnohta chhihthapa ta y ha aw na ta; Hiti chyhsa Ephraw lyu liata lôpu,

30 Kana râh liata Mamre dady ta, Makapela lyu liata lôpu Abaraha ta pabuna su châta Hiti chyhsa Ephraw liata a lyu chhaota a chaleipa liana khata na pathlatuhpazy hnohta na pabu hra muh vy.

31 Cha liana chata Abaraha nata a lahpinô Sara cha pabu ei ta; cha liana chata Aisika nata a lahpinô Rebeka cha pabu ei ta; cha liana hra chata Liah pabu na ta,

32 lyu nata a chô liata a ypa cha, Hiti pathlazy liata ei chalei,” tah ta.

33 Zakaw chata a sawchapawpazy hnohta, ryu a hi khai nahta, a pheizy cha rakhô liata khaih ta, a thlahpa pathlie haw ta, a chieheihzy hnohna chata pahlyhpa ta y haw ta.

Athaona

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36	Bo 37	Bo 38	Bo 39	Bo 40
Bo 41	Bo 42	Bo 43	Bo 44	Bo 45	Bo 46	Bo 47	Bo 48	Bo 49	Bo 50

Athaona Bo 48

Zakaw Ephrai nata Manase byhnâ a aw pa

1 Cha hnôh lâna chata Zawsi hnohta, “Na paw tlâh vei,” tah ei ta; chatanachata a sawchapawpazy pano Manase nata Ephrai cha a chhi ta.

2 Zakaw hnohta, “Na sawchapawpa Zawsi nâma lâta a vy na,” tahpa ta chho ei ta; Izarel cha a pasosa ta, rakhô liana chata a tyuh ta.

3 Chatawhcha Zakaw ta Zawsi hnohta, “Khazohpa Atotaotheipa cha Kana râh liata Luza khih liana chata ei hnohta a luah ta, byhnâ na aw pa ta,

4 ei hnohta, ‘Chi hluhpi cha pathlasa aw na ta, cha papôh hra aw na ta, chi nanopa ypakhypa lâta ei cha tao aw, chatawhcha he râh he, na hnôh lâta na pathlazy hnohna chata chhâzaw ryu châta ei cha pie aw na,’ tah ta.

5 Chatawhcha na sawchapaw pano, Izi liata na hnohta ei vy hlâta Izi râh liata na sapazy he kei eih ama châ; Ephrai nata Manase hi, Rubena nata Simeôna haw hra ta keima eih ama châ aw.

6 He chyhsazy hnôh lâta saw na hneipazy cha nâ eih ama châ aw; ama ryuto liata cha ama uhtazy moh cha amâ hly aw.

7 Chatawhcha keima kyh la, Padanara tawhta ei vy nona khata Rakheli cha Kana râh liata lâpi liata Ephra cha, â hla kaw chy nota, ei kiahpâh liata thi ta; cha Ephra khih lâpi liana chata pabu haw na ta (cha cha Bethlehe a châ)” tah ta.

8 Chatawhcha Izarel ta, Zawsi sawchapawpazy cha moh ta, “He he ahyzy maw?” tah ta.

9 Zawsi chata a paw hnohta, “Hezy he ei sawchapawpa Khazohpa ta he liata eina piepazy cha ama châ,” tah ta. Ano chata, “Ngiachhiepa ta kei lâta vaw pahnia teh, âmo byhnâ ei aw pa aw na,” tah ta.

10 Izarel mo cha a pawpipa vâta sia leipa ta, hmô thei vei. Chatawhcha vaw pahnia ei ta; ano chata vaw sy ta, a vaw pyh ta.

11 Izarel ta Zawsi hnohta, “Na hmia hmô he, ei hnabei sei khao leipa ta; châhrasala Khazohpa ta na pathlazy hmia taih chhao eina pahmôsa hih,” tah ta.

12 Zawsi chata âmp cha a paw pakhuh likawh tawhtapa cha hnei ta, a hmia a bôhpa ta a naoh ta.

13 Zawsi ta ama pano ta cha-ao ta Ephrai cha a ku chachâh lâta, Izarel ku chavei lachhah ta cha-ao ta, Manase cha a ku chavei lâta, Izarel ku chachâh lâchhâh ta cha-ao ta, a vaw chhi ta.

14 Izarel chata a bâh vâchapiah raruah ta, a ku chachâh lâ chata paza ta, Ephrai a seihnai viapa luh chô liata pahnie ta, Manase cha saw tuapa châ tlôh ta.

15 Zawsi cha byhnâ aw pa ta, “Na pathlatuhpa Abaraha nata Aisika a hmiakô liata ama y tyhna Khazohpa, atanoh taihta ei hroh chhôh zydua liata a pasatuhpa Khazohpa,

16 moleipa zydua liatahpa na chatlaituhpa vâlyuhchâpa chata hawtizy he byhnâ pie mawh sy; chatawhcha ei moh nata nâ pathlatuhpa Abaraha nata Aisika moh cha, âmo mohta bai mawh sy; chatawhcha khizaw liahlia liata zawpi hluh ngaitapa cha awpa ta vaw pôh mawh sy,” tah ta.

17 Zawsi cha a paw ta ku chachâh lâ Ephrai luh chôta a pahniehpa cha a hmô nata a palôh châ khao leipa ta; chatanachata a paw ku Ephrai luh tawhtapa cha Manase luh chôta pasie awpa ta chalo ta.

18 Zawsi ta a paw hnohta, “Ei pâ y, he hawhta châ vei; he he na saw tuapa cha a châ; na ku chachâh lâ he a luh liata tlao pahnieh teh,” tah ta.

19 Châhrasala a paw chata khoh leipa ta, “Ei pahno na, ei sawchapawpa y, ei pahno na: ano chhao pho ta rei khi ta y hra aw ta, ano chhao a rôhnah hra aw; anodeikuacha a nawhta he ano hlâta rôhnah via aw ta, a pathlazy chhao chi nanopa hluhpi ama châ aw,” tah ta.

20 Chatanachata Zakaw ta cha noh liana chata âmo cha byhnâ aw pa ta,“Izarel sahlao chata, ‘Ephrai nata Manase hawhta Khazohpa ta cha paysa mawh sy,’ tahpa ta, nâma moh reipa ta, byhnâ a cha aw pa tyh aw ei,”tahpa ta, Ephrai cha manase hmia lâta paysa haw ta.

21 Izarel chata Zawsi hnohta, “Ei thi daihmâ na, châhrasala Khazohpa cha nama hnohta y aw ta, cha pathlatuhpazy râh lâna chata a cha chhitha heih aw ei.

22 Cha leipa chhao cha na unawhpazy tovyuh hlâta tovyuh miakha a hleipa ta ei cha pie, ei zaozi nata ei libaw Amawna sahlao ku tawhta ei lapa kha,” tah ta.

Athaona

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36	Bo 37	Bo 38	Bo 39	Bo 40
Bo 41	Bo 42	Bo 43	Bo 44	Bo 45	Bo 46	Bo 47	Bo 48	Bo 49	Bo 50

Athaona Bo 47

1 Chatanachata Zawsi ta Phirao cha chho ta a hnohta, “Ei paw zy, ei unawhpazy, ama mietahkupa zawzy, ama viahchao hri zy, ama hneipa zydua chhaota, Kana râh tawhta za tlô haw ei ta; Kôse râh liata ama y,” tah ta.

2 Chatawhcha a unawhpazy hry liatahpa papangawh a chhi ta, Phirao cha pahnosa ta.

3 Phirao chata a unawhpazy hnohta, “Khâpa rai nama hria tyh?” tah ta. Chatawhcha âmo chata Phirao hnohta, “Na chakaotuhpazy he maniah pathlatuhpazy tawhta mietahkupa vaihtuhpazy eima châ,” tah ei ta.

4 Âmo chata Phirao hnohta, “ He râh liata y chy awpa ta eimâ vy; eima râh liata na chakaotuhpazy mietahkupa zawzy châta niepa y tlôh lei khâh ta, chakâhna he Kana râh liata thata y tlôh ta, ngiachhiepata ta cha chakaotuhpazy he Kôse râh liata maniah paysa mah y,” tah ei ta.

5 Phirao chata Zawsi bie a chho ta, “Na paw nata na unawhpazy he na hnohta a vy haw ei ta,

6 Izi râh cha a hôh thlâh ha mâh tâh; na paw nata na unawhpazy cha, râh phapa lia maihta yna su pataosa mah y; Kôse râh liata yna su tao ei se; chatawhcha ama hry liata chyhsa hmo tao thei ngaitapa na pahno chhochhi khiahtala, ei sahroh chô liata hyutuhpa ta tao mah y,” tah ta.

7 Chatawhcha Zawsi ta a paw Zakaw cha a chhi ta, Phirao hmiakô liata paduasa ta, Zakaw ta Phirao cha byhnâ aw pa haw ta.

8 Chatawhcha Phirao chata Zakaw hnohta, “Kô khazie e na châ haw?” tah ta.

9 Zakaw chata Phirao hnohta, “Ei khi tlyna kô rakha cha kô za kha nata kô sythôh châ ta; ei hro chhôh kôzy he chyh ta, riethei â chhih, na pathlatuhpazy ama khi tly nota ama hro chhôh kô chhao a tly hra vei,” tah ta.

10 Chatawhcha Zakaw ta Phirao cha byhnâ aw pa ta, Phirao tawhtapa cha pua haw ta.

11 Zawsi ta a paw nata a unawhpazy cha yna su pataosa ta, Phirao bie piepa hawhta Izi râh liata râh pha chaipa liata Ramese râh liana chata, ryu châta râh pie haw ta.

12 Zawsi ta a paw nata a unawhpazy nata a paw chhôhkhapa zydua cha, ama dykhasanawh yzie hawhta niepa pie ta, pasa haw ta.

Chakâhna chhôhta Zawsi ryureina

13 Cha râh zydua liana chata niepa rai y khao leipa ta; chakâhna thata y tlôh ta, chakâhna vâna chata Izi râh nata Kana râh cha panao haw ta.

14 Chatawhcha Zawsi chata ama sa chaleina mâ ta, Izi râh nata Kana râh liata tâkâ a ypa zydua cha Phirao o lâna chata pangia haw ta.

15 Izi râh nata Kana râh liata tâkâ zydua ama hmo khai nata, Izi mo zydua cha Zawsi hnohta a vy ei ta, “Niepa maniah pie teh; na hmiakô liana heta eima thi thlâh ha aw tlyma? Tâkâ hra, y tlôh va,” tah ei ta.

16 Chatawhcha Zawsi chata, “Nama sahrohzy vaw pie thlâh ha teh u, tâkâ a y khao vei khiahtala nama sahroh mâ ta niepa ei cha pie aw ei,” tah ta.

17 Chatanachata ama sahrohzy cha Zawsi lâta a chhi ei ta; Zawsi ta cha arâ mâ ta zy, mietahkupa zaw mâ ta zy, viahchao hri mâ ta zy, alâ mâ ta zy chata niepa pie lymâ ta: cha kô liana chata ama sahroh zydua mâ ta niepa ta, pasa chyu ta.

18 Chatawhcha cha kô châhdi ta, kô a vaw thieh heihpa liana chata a hnohta a vy heih ei ta, a hnohta, “Eima tâkâ zydua eima hmâh khai hanazie nata eima sahroh zawzy nâma eih a châ hawnazie he, pâpuh y, na mohmô liana heta eima pôhpa nata eima râhzy deita leipa heta cha khâpahmah y khao vei.

19 Na hmiakô liana heta keimo nata eima râh he eima leidia thlâh ha aw tlyma? Keimo he eima râh chhaota niepa châta maniah chalei teh, keimo nata eima râh he Phirao seizy eima châ aw na; chatawhcha thi leipa ta a hrohpa ta eima y theina awpa nata lyurâh he a dâh karo leina awpa ta, sâh chi maniah pie mah y,” tah ei ta.

20 Zawsi chata Phirao châta Izi râh zydua chaleipa haw ta; chakâhna cha ama chô liata thata a tlôpa vâta, Izi chyhsazy chata ama lyu cha zuah chyu tlôh ei ta. Chatanachata râh cha Phirao eih châ khai ha ta; chyhsazy cha Izi râhri hiakha lâ chhâna tawhta hiakha lâ chhâna taihta khihzy liana chata a pasiepasâ chyu ei ta.

22 Theihthaipa sahlao râh deikua chalei leipa ta; theihthaipa sahlao chata Phirao liata tovyuh hnei ei ta, Phirao ta ama tovyuh a piepa cha nie tyh ei ta; chavâta ama râh cha zuah hra leipa a châ.

23 Cha hnôh lâna chata Zawsi ta chyhsazy hnohta, “Pachâ teh u, atanoh he, nâmo sahlao he nama râh chhaota Phirao châta cha chalei haw ei na ta. He liana heta nama châta sâh chi a y hih, alei liata cheih teh u.

24 Chatawhcha sâhria tina chata, Phirao châta su pangawh pachhaihta su kha lymâ nama pie aw, a su palih cha nâmo eih a châ aw, cha cha lyu liata cheih heih awpa nata nâmo nata nama chhôhkhapazy niepa châta zy, nama sawnawh chyhpa ta niepa châta zy a châ aw,” tah ta.

25 Chatawhcha âmo chata, “Nâma ta eima hrona he pachha haw chi ta; eima zibeipa ta maniah ngiachhie sala Phirao chakaotuhpazy eima châ aw,” tah ei ta.

26 Zawsi ta Phirao ta su pangawh liata su kha a hmô lymâ awpa kyh he, Izi râh châta atahmâ taihta ryhpa ta a tao haw; theihthaipa sahlao râh deikua cha Phirao eih a châ leipa a châ.

Zakaw ryuhina bie hnôh chaipa

27 Chatawhcha Izarel sahlao chata Izi râh liata Kôse râh liana chata pahrâ ei ta; cha liana chata a pa-i ei ta, chi hluhpi pathla ei ta, thata pôh ei ta.

28 Zakaw cha Izi râh liana chata kô hrawhleisari y ta; chatanachata Zakaw hro chhôh kô cha, kô za kha nata kô sypalih nata kô sari châ ta.

29 Chatawhcha Izarel thi daihti awpa cha a vaw hnia haw ta, a sawchapawpa Zawsi cha aw ta, a hnohta, “Na hmiakô liata ngiachhiena ei hmô khiahtala na ku cha ei byhpi ry liata chahrao la, na ngiachhiepa ta ei chô liata hmeiseihta ta tao mah y. Ngiachhiepata ta Izi liana heta na pabu cheita kha y,

30 na pathlatuhpazy hnohta ei mô tina chata, nâma ta Izi tawhtapa he nâ sypa ta na puakheipa ta âmo pabuna su liata tlao eina pabu awpa chi a châ,” tah ta. Ano chata, “Na reipa hawhna heta ei tao aw na,” tah ta.

31 Ano chata, “Ei hnohta chhie a sakhâh teh,” tah ta; chhie a sakhâh haw ta. Chatawhcha Izarel cha rakhô luh chô liata a bôh haw ta.

Athaona

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36	Bo 37	Bo 38	Bo 39	Bo 40
Bo 41	Bo 42	Bo 43	Bo 44	Bo 45	Bo 46	Bo 47	Bo 48	Bo 49	Bo 50

Athaona Bo 46

Zakaw nata a chhôhkhazy Izi râh lâ ama sie

1 Izarel cha a hneipa zydua chhaota pua ta, Besheba cha tlô ta, a paw Aisika Khazohpa lâna chata atheihnazy hlâ ta.

2 Khazohpa ta zâ ta a mâ lâna chata Izarel cha bie chho ta, “Zakaw, Zakaw y,” tah ta. Ano ta, “He liata ei y,” tah ta.

3 Ano chata, “Kei Khazohpa, na paw Khazohpa cha ei châ, Izi râh lâta zu awpa cha, chi khâ; cha liana chata chi rôhnah ngaitapa ta ei cha tao aw.

4 Izi râh liana chata na hnohta a zu hra aw na ta, chatawhcha ei cha kaw chhi tlai heih hra aw; Zawsi chata, na thi tita a ku ta na mokhaoh a cha pabiehpa aw,” tah ta.

5 Zakaw cha Besheba tawhta pua ta, Izarel sawchapawpazy chata ama paw Zakaw nata ama sanawh chyhpatazy nata ama lahpinôzy cha, ama kia nawpa ta Phirao ta talaili a paphaopazy liana khata pakiasa ei ta.

6 Zakaw nata a pathla zydua chata Kana râh liata ama hneipa, ama sahroh nata hmodâhzy cha phaoh ei ta, Izi râh cha tlô haw ei ta.

7 A sawchapawpazy, a samohzy, a sawchapawpa sawchanônôzy, a pathla zydua cha Izi râh liana chata a ngiakhei chyu ta.

8 He he Izarel pathla, Izi râh liata a ngiapa Zakaw nata a sawchapawpazy moh cha a châ. Rubena, Zakaw saw tuapa cha.

9 Rubena sawchapawpazy cha : Hanôka zy, Palu zy, Hezraw zy, Kami zy châ ei ta.

10 Simeôna sawchapawpazy cha : Zemuel zy, Zamina zy, Ôha zy, Zakhi zy, Zôha zy, Kana chanô liata a sawchapawpa Saul zy châ ei ta.

11 Livai sawchapawpazy cha; Kasaw zy, Kôha zy, Merari zy châ ei ta.

12 Zudah sawchapawpazy cha : Era zy, Ônana zy, Shela zy, Pereza zy. Zerah zy châ ei ta. Era nata Ônana deikua cha Kana râh liata ama thi haw; Pereza sawchapawpazy cha: Hezraw nata Hanu châ ei ta.

13 Iskara sawchapawpazy cha : Tôla zy, Puvah zy, Iôba zy, Shimrôna zy châ ei ta.

14 Zebulawna sawchapawpazy cha : Sereda zy, Elawna zy. Zalel zy châ ei ta.

15 Cha sahlao zydua cha Liah sawchapawpa, a sawchanônô Dina chhaota, Padanara liata Zakaw a sapapazy cha châ ei ta, a sawchapawzy nata a sawchanô zydua cha sytho nata patho châ ei ta.

16 Kada sawchapawpazy cha : Ziphiô zy, Hakei zy, Shuni zy, Ezavaw zy, Eri zy, Arôdi zy, Areli zy, Asva zy, Isui zy, Beriah sawchapawpazy cha : Heba nata Malakiel zy châ ei ta.

18 Cha sahlao cha Zilpah Laba ta a sawchanônô Liah hnohta a piepa sawchapawpazy cha ama châ; cha sahlao cha Zakaw sapa ta, chyhsa pahrawhleicharu cha.

19 Chatawhcha Zakaw lahpinô Rakheli sawchapawpazy cha Zawsi nata Benzami châ ei ta.

20 Zawsi ta Izi râh liata sawchapawpa Manase nata Ephrai cha sa ta, chazy cha Ôna liata theihthaipa Pawtipha a sawchanônô Asena chata ano a sapa a châ.

21 Benzami sawchapawpazy cha : Bela zy, Bekhera zy, Asabel zy, Kera zy, Naam zy, Ehi zy, Rôsa zy, Mupi zy, Hupi zy, Arda zy châ ei ta,

22 cha sahlao cha Rekheli sawchapawpa Zakaw a sa papazy cha ama châ, ama zydua ta pahrawhleipalih ama châ.

23 Dana sawchapawpa cha Husi châ ta.

24 Nathalai sawchapawpazy cha : Zahazeel zy, Kuni zy, Zeza zy, Shile zy châ ei ta.

25 Cha sahlao cha Bilha, Laba ta a sawchanônô Rakheli hnohta a piepa sawchapawpazy cha ama châ, cha sahlao cha Zakaw sapa ta, ama zydua ta pasari ama châ.

26 Zakaw sawchapawpazy lahpinô sahlao rei leipa ta, Zakaw hnohta Izi liata a ngia hrapa, ano chi a puapa zydua cha, ama zydua ta sycharu nata pacharu châ ei ta.

27 Zawsi ta Izi liata sawchapaw a sapazy cha pano ama châ; Zakaw chhôhkhapa zydua Izi liata a ngiapazy cha sysari ama châ.

Zakaw nata a chhôhkhazy Izi râh liata ama y

28 Zakaw ta Kôse râh lâ lâpi pamosa awpa ta Zudah cha Zawsi hnohta pasiesa tua ta; chatanachata Kôse râh liata a ngia haw ei ta.

29 Zawsi chata a talaili cha a chhuahnoh ta Kôse râh lâna chata a paw Izarel dy awpa ta sie haw ta; chatawhcha a hnohta a pahnosa ta, a pyhpahlypa ta, bohpi a pyhpahlypa ta cha ta.

30 Izarel chata Zawsi hnohta, “A hrohpa ta y chi ta, na hmia ei hmô heihpa vâta, atahmâ cha ei thi khiahtala, thi thlâh ha bâ sah,” tah ta.

31 Zawsi chata a unawhpazy nata a paw chhôhkhazy hnohta, “Sie aw na ta, Phirao chho aw na ta, a hnohta, ‘Ei unawhpazy nata ei paw chhôhkhapazy Kana râh liata a ypazy kha, ei hnohta ama vaw tlô haw;

32 chapawzy cha sahroh a pasatuhpazy ama châpa vâta mietahkupa zawzy nata viahchao hrizy nata ama hneipa zydua ama vaw phaoh khai haw,’ tahpa ta, ei reih aw.

33 Chatawhcha Phirao ta a cha aw tita, ‘Khâpa rai nama hria?” a cha tah tina chata, 34 nâmo ta, ‘Na chakaotuhpazy he maniah pathlatuhpazy tawhta eima hawtita tawhta atahmâ taihta sahroh a pasatuhpa eima châ,’ tahpa ta, chatanachata Kôse râh liata na pahrâ thei aw; mietahkupa a vaihtuhpazy cha Izi chyhsazy ta pasi ngaita tlôh ei ta,” tah ta.

Athaona

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36	Bo 37	Bo 38	Bo 39	Bo 40
Bo 41	Bo 42	Bo 43	Bo 44	Bo 45	Bo 46	Bo 47	Bo 48	Bo 49	Bo 50

Athaona Bo 45

Zawsi cha a unawhpazy â pahnosa

1 Chatawhcha Zawsi cha a kiahpâh liata a duahpa zydua hmiakô liata a sohsi thei khao leipa ta; “Chyhsa zydua kei tawhtapa he papua khai teh,” tahpa ta awh ta. Zawsi a unawhpazy hnohta a pahnosa chhôh zydua a kiahpâh liata ahyhmah a duah leipa ei ta.

2 Chatawhcha thata cha ta. Izi sahlao ta thei ei ta. Phirao chhôhkhazy chhaota thei hra ei ta.

3 Chatawhcha Zawsi chata a uhnawhpazy hnohta, “Zawsi kha ei châ; ei pâ cha a hroh thlâh ha mâ,” tah ta. Châhraala a unawhpazy chata a chhy thei leipa ei ta, a hmiakô liata nôpo ngaitapa ta ama y.

4 Zawsi ta a unawhpazy hnohta, “Ngiachhiepa ta nâ hnia teh u,” tah ta. Chatanachata a kei hnia ei ta, ano chata, “Nama unawhpa Zawsi, Izi liata a ngiakhei awpa ta eina zuapa vâna chi heta,

5 pachârôhpa ta y kha u, nâmo a hao hra khah u; chyhsazy hrona pachha awpa ta Khazohpa ta nama hmia lâta eina vaw tuapa a châ hih.

6 He kô no chhôh heta he râh liana heta chakâhna vaw y haw ta; kô pangawh a bâh ta, cha chhôh zydua alei paliepa he y leipa aw ta, sâhriana chhao y hra aw vei.

7 Chatanachata alei liana heta, chi pathlazy cha pahlôhpa awpa nata pachhana rôhnah ngaitapa ta hropa ta ei cha paysa theina awpa ta Khazohpa ta nama hmia lâna heta eina vaw tuah.

8 Chatanachata he liata na pakiasatuhpa he, nâmo châ leipa eichi ta, Khazohpa tlao a châ; ano chata Phirao paw ta nata a chhôhkha zydua nata Izi râh zydua ryureituhpa ta na tao haw ta.

9 A chatliepa ta ei pâ lâta sie ula, na sawchapawpa Zawsi chata, he tana heta a tah, ‘Khazohpa ta Izi râh zydua hyutuhpa ta eina tao haw, kei lâta a zu mawh sy, vaw hawh kha sy.

10 Kôse râh liata y aw chi ta, ei kiahpâh liana tlai heta na y aw, nâ nata na sawzy nata na samohzy nata na mietahkupa zawzy nata na viahchao hrizy nata na hneipa zydua chhaota;

11 cha liana chata keima ta ei cha pasa aw, chakâh awpa kô pangawh y chy tlôh ta; chata leipa ta la riepatheipa ta na y pathlei aw na, nâ nata na chhôhkhazy nata na hneipa zydua chhao khata,’ kaw tah muh vy.

12 Chatawhcha nâmo tlai nata ei nawhta Benzami moh tlaita, keima pakah tlaita a reipa he nama hmô.

13 Izi liata ei rôhnahna zydua kyh nata hmo nama hmôpa zydua kyh he, ei pâ chho aw eichi ta. Ei pâ cha a chatliepa ta he liata nama zâ chhi awpa a châ,” tah ta.

14 Chatawhcha a nawhta Benzami cha a pyhpahlypa ta chakheipa ta cha ta; Benzami chhaota a hniehpa ta cha hra ta.

15 Chatawhcha a unawhpa zydua cha sy ta, cha thlu chyu hra ta; chatawhna chata a unawhpazy chata bielôhawhpa ta reikhei ei ta.

16 “Zawsi unawhpazy amâ vy,” tahpa cha, Phirao o liana chata vaw pahno haw ei ta, cha chata Phirao nata a chakaopazy cha palysa kaw ta.

17 Chatawhcha Phirao ta Zawsi hnohta, “Na unawhpazy hnohta, ‘He tana heta tah teh, nama sâhzy cha sâh paphaosa ula, Kana râh lâta sie teh u;

18 chatawhcha nama paw nata nama chhôhkhazy cha a zâ chhi ula, kei lâna heta a zu teh u, chatanachata Izi râh liata hmo phapazy he cha pie aw ei na ta, he râh liata hmo a ypa a pha chaipazy he nie vâ eichi,’ tah teh.

19 Bie ei cha pie, ‘He tana heta tah teh u, nama sawnawh chyhpatazy châta nata nama lahpinôzy châta Izi râh tawhna heta talailizy cheih ula, nama paw a chhipa ta a vy teh u.

20 Nama hmodâh chhao pachâ kha u, Izi râh zydua liata hmo phapa maih he, nama eih châ tlôh ta,’” tah ta.

21 Izarel sawzy chata cha hawhna chata tao ei ta; chatawhcha Zawsi ta Phirao bie piepa hawhna chata talailizy ama hnohta pie ta, lâpi châta niepa pie hra ta.

22 Âmo zydua hnohta chysia a patlypazy pie chyu ta; Benzami hnohta chhochhi cha, tâkâ za thôh nata chysia a patlypa zo pangawh pie ta.

23 A paw hnohna chata he hawhna heta paphao ta; alâ pô hrawh Izi liata hmo phapa phaohpa ta nata alâ chanôhpa pô hrawh lâpi liata a paw châta sa nata viahchhâ nata niepa a phaohpa paphao ta.

24 Chatanachata a unawhpazy cha pasiesa haw ei ta; chatawhcha ano chata ama hnohta, “Lâpi liata a hryuh lei awpa ta a chado teh u,” tah ta.

25 Izi tawhtapa cha khy ei ta, Kana râh liata ama paw Zakaw hnohna cha kaw tlô ei ta.

26 Chatawhcha a hnohta, “Zawsi kha hroh thlâh ha ta, Izi râh zydua ryureituhpa a châ,” tahpa ta chho ei ta. Chatawhcha a pahlaw ta, ama bie cha zo tlôh va.

27 Ama hnohta Zawsi bie reipa zydua chho ei ta, chatawhcha a kiana awpa ta talaili Zawsi ta a paphaopazy cha a hmô nata, ama paw Zakaw pathipalôh cha thadâh ngaitapa ta y ta.

28 Izarel chata, “Â daih na, ei sawchapawpa Zawsi cha a hroh thlâh ha na, ei thi hlâta ano ei zâ hmô aw,” tah haw ta.

Athaona

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36	Bo 37	Bo 38	Bo 39	Bo 40
Bo 41	Bo 42	Bo 43	Bo 44	Bo 45	Bo 46	Bo 47	Bo 48	Bo 49	Bo 50

Athaona Bo 44

Nyu a leipa

1 Chatawhcha Zawsi chata a o mohkhâhtuhpa hnohna chata, “Cha chyhsazy sykhao kha ama phao theina taihta sâh ta pabie la, ama tâkâ chyu cha ama sykhao paka liata soh chyu teh,

2 ei nyu, tâkâ nyu kha ama seihnai chaipa sykhao paka liata soh teh, a sâh ty tâkâ chhao khata,” tahpa ta bie pie ta. Ano chata Zawsi bie reipa hawhna chata tao ta.

3 Khih a deih pata nahta, âmo cha ama alâzy chhaota pasiesa haw ei ta.

4 Chatawhcha khih tawhta ama puapa cha lâhlapi ama sie hlâta Zawsi ta a o mohkhâtuhpa hnohta, “Thyu la, chyhsazy kha a kei chadai teh; na pha pata nahta ama hnohta, ‘Kheihtazie ta, hmo phapa hmo pha leipa ta nama thô tly? Khâzia ei tâkâ nyu nama paru tly?

5 Kha nyu kha ei zibeipa Kresawti dona nata a pachaona tlai châ vei mâ? He hawhta nama taopa he nama tao chhei na,’ tah mah y,” tah ta.

6 Chatawhcha a kei chadai ta, pha ta, cha biezy ama hnohta reih ta.

7 Âmo chata a hnohta, “Pâpuh, kheihtazie ta e, he hawhpa bie na reih? Na chakaotuhpazy heta, cha hawhpa hmo eima tao leizie cha!

8 Eima sykhao paka liata tâkâ eima hmôpazy chhao kha, Kana râh tawhta nâ lâta eima vaw phaoh heih khâ; kheihta e na zibeipa o liatahpa tâkâ tlyma, ngôh tlyma, eima paru thei aw tly?

9 Na chakaotuhpazy hry liata ahyrai na hmôna maih cha thi mawh sy, keimo chhaota eima zibeipa chakaotuhpa ta eima y aw na,” tah ei ta.

10 Ano chata, “Nama bie lymâ hawhta châ la vâh, anodeikua cha ahyrai ei hmôna maih cha, ei chakaotuhpa ta y mawh sy, nâmo deikua cha seina hnei leipa ta nama y aw,” tah ta.

11 Cha pata nahta a chatliepa ta âmo sykhao cha alei liata pachhô chyu ei ta, âmo sykhao pahy chyu hra ei ta.

12 Chatawhcha ano chata, ama uhthei chaipa tawhta a thao ta, ama seihnai chaipa taihta tlua ta; nyu cha Benzami sykhao liana chata hmô ta.

13 Cha pata nahta ama chysia cha hrie ei ta, ama alâ cha paphaosa heih chyu ei ta, khih lâna chata kua haw ei ta.

14 Zudah nata a unawhpazy chata Zawsi o cha kei tlô ei ta, ano cha cha liana chata khâ vaw y ta, chatawhcha a hmiakô liata pakhu paneih chyu ei ta.

15 Zawsi chata ama hnohta, “Khâpa hmo e nama tao, keima hawhpa chyhsa heta pachao ama thai tahpa pahno veih ei chi mâ?” tah ta.

16 Zudah chata, “pâpuh, na hnohta khâpa eima reih aw? Khâpa eima cha chho aw? Kheihta e, eima reih aw tly? Khazohpa ta na chakaotuhpazy moleina cha a hmô haw hih; na chakaotuhpazy eima châ haw hih, keimo nata a ku liata nyu ama hmôna chhao hih,” tah ta.

17 Châhrasala ano chata, “Cha hawhna chata ei tao lei awpa zie cha! A ku liata nyu ama hmôpa deita he ei chakaotuhpa ta a y aw; nâmo deikua thlahlôhpa ta nama paw lâ sie teh u,” tah ta.

Zudah ta Benzami a reikhei

18 Cha pata nahta Zudah chata Zawsi cha a kei hnia ta, “Hy pâpuh y, ngiachhiepata ta, na chakaotuhpa he, na nah theina liata bie kawh kha na pareisa la, na hiehâhna cha, na chakaotuhpa chô liana heta pa-iasa kha y; nâ cha Phirao hawh tlaita châ tlôh chi ta.

19 Pâpuh y, Paw tlyma, uhnawhpa tlyma nama hnei ma?’ tahpa ta, na chakaotuhpazy he maniah hiahri chi ta.

20 Chatawhcha keimo ta ei beipa hnohta, ‘Paw pawpi ngaitapa nata a pawpi lâta saw hawtipa ta hnei pi ta, cha uhtapa cha thi ta, a noh sapa liata cha, ano deita y ta, a paw chata ano cha dao kaw ta,’ tah pi ta.

21 Chatawhcha nâ ta, na chakaotuhpazy hnohna heta, ‘Ano cha ei moh ta ei hmô thei nawpa ta ei hnohta a zâ chhi teh u,’ tah chi ta.

22 Pâpuh y, keimo ta na hnohta, ‘Hawtipa chata a paw siesai thei aw vei, a paw a siesai khiahtala a paw cha a thi thlâh ha aw,’ tah pi ta.

23 Nâ ta na chakaotuhpazy hnohna heta, ‘nama seihnai chaipa cha nama hnohta a zu hra vei khiahtala ei hmia na hmô khao aw vei eichi,’ tah chi ta.

24 Na chakaotuhpa ei paw hnohta eima tlô nata, na bie cha chho pi ta.

25 Eima paw chata, ‘Sie heih ula, sâh bâhta chhâ eima châta za chalei heih teh u,’ tah ta.

26 Kei ta, ‘Zu thei khao ma pi. Eima seihnai chaipa he, eima hnohta a hlao hra khiahta deikua cha, eima zu heih aw; eima seihnai chaipa he eima hnohta a hlao vei khiahtala, cha chyhsa hmia cha hmô thei khao aw ma pi,’ tah na ta.

27 Chatawhcha eima paw chata eima hnohta, ‘Ei lahpinô chata sawchapawpa pano eina sapa tahpa nama pahno na.

28 Pakhapa cha, kei tawhta pua haw ta, chaphie khaipa ta a y tlai aw, tah na ta; cha rakha tawhna chata ano cha hmô khao leipa ta y na ta.

29 He chyhsa chhao he kei tawhtapa a chhiepa ta hmo pha leipa a zâ tyh khiahtala ei luh pawhpa he pachârôhna ta thlâ lâta nama pakhôsa aw,’ tah ta.

30 Chatanachata hawtipa he eima hnohta a hlao leipa ta, na chakaotuhpa ei paw hnohta, ei tlô khiahtala, a hrona cha hawtipa hrona nata khâchâ a pazaopa vâta

31 hawtipa he a hlao hra vei tahpa, a pahno pata nahta, a thi thlâh ha aw; na chakaotuhpazy heta na chakaotuhpa eima paw luh pawhpa cha, pachârôhna ta thlâ lâta eima pakhôsa aw.

32 Na chakaotuhpa heta, ‘Na hnohta ei vaw chhi heih leipa khiahtala, chhâzaw ta ei paw liata a maoh ei phaoh aw,’ tahpa ta ei paw liana chata hawtipa kyh liana heta a totuhpa ta a tao haw tlôh na ta.

33 Chavâta ngiachhiepa ta na chakaotuhpa he, hawtipa vyuhpa ta, na chakaotuhpa ta na paysa la; hawtipa he a uhtazy hnohta pakhysa mah y.

34 Hawtipa ei hnohta â hlao leipa ta ei paw hnohta kheihta e ei khy thei aw, ei paw chô liata chhiena a tlô awpa cha ei hmô aw mâh tâh,” tah ta.

Athaona

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36	Bo 37	Bo 38	Bo 39	Bo 40
Bo 41	Bo 42	Bo 43	Bo 44	Bo 45	Bo 46	Bo 47	Bo 48	Bo 49	Bo 50