Athaona Bo 4
Kaina nata Abela
1 Chatawhcha Adâh chata a lahpinô Ivy cha pahno ha ta, saw phaoh ta Kaina sa ta, “ABEIPA baona ta chapaw ei vaw hnei haw,” tah ta.
2 Chatawhcha a nawhta Abela sa heih ta. Abela cha mietahkupa a vaihtuhpa ta y ta, Kaina deikua cha alei a palietuhpa ta a y.
3 A noh hropa chata he hawhta châ ta, Kaina chata ABEIPA lâta hlâ awpa ta alei theilâpazy vaw la ta,
4 Abela chhao chata mietahkupa zaw hry liata a patawh tua chaipazy nata a thawhpazy cha vaw la hra ta. ABEIPA chata Abela nata a hmo hlâpa cha aly ta,
5 Kaina nata a hmo hlâpa deikua cha aly hra leipa ta. Chavâta Kaina cha a pathi-ia ngaita ta, a hmia chhie kaw ta.
6 ABEIPA chata Kaina hnohta chata, “Khazia na pathi a ia, khazia na hmia a chhie?
7 Hmo na tao pha khiah cha a pyhpa ta châ aw vei mâ? Na tao pha vei khiah deikua cha, moleina cha sahrâhpa hawhta ochhi thaby liata châ byh ta; a khopa cha nâma lâta châ aw ta, a chô liata bie na hnei awpa a châ,” tah ta.
8 Kaina chata a nawhta Abela hnohta, “Lyu lâ sie ei si y,” tah ta. Lyu liata ama y nota Kaina chata a nawhta Abela cha thyuhnao ta thie ha ta.
9 Chatanachata ABEIPA chata Kaina hnohta, “Na nawhta Abela kha zaw?” tah ta. Ano chata, “Pahno va na, ei nawhta a vaihtuhpa ma ei châ?” tah ta.
10 ABEIPA chata, “Kheihta na tao haw? Na nawhta thisaih ao chata alei tawhta eina aw mâ tâh.
11 Chavâta aleina ku tawhta na nawhta thisaih dao awpa ta a pakah vaw âpa tawhtapa he chhiesapa na châ haw.
12 Alei na palie ti chhaota a phana cha pie khao aw vei, alei liana heta a leilôpa nata viavipa na châ ha bâ aw,” tah ta.
13 Kaina chata ABEIPA hnohta, “Eina hriena chi he pasa ei tao theipa hlâta a ru viana.
14 Pachâ teh, nâ ta atanoh he alei chô tawhta na papua haw tlôh chi ta; na mohmô pha leipa liata nyupa ta y ha aw na ta; alei liana heta a leilôpa nata viavipa vaw châ ha tlôh aw na ta, chavâta ahyrai na hmôpa maihta eina thie thlâh ha aw ei,” tah ta.
15 ABEIPA chata a hnohta, “Chata a châ khiahtala, ahyrai Kaina a thiepa maih cha a lie sari ta a chôta phuh lapa a châ aw,” tah ta. Chatanachata ahyrai ta ama thie lei nawpa ta ABEIPA ta Kaina cha pahnona pie ta.
16 Chatanachata Kaina cha ABEIPA tawhtapa cha pua ta, Idâh nochhi lâta Nawda râh liana chata y haw ta.
Kaina pathlazy
17 Kaina chata a lahpinô pahno ha ta, saw phaoh ta, Enawka sa ta; chatawhcha khih tao ta, a khih moh ta a sawchapawpa moh pachyu ta Enawka bi ta.
18 Enawk chata sawchapawpa Irada sa ta; Irada chata Mehuzael sa ta, Mehuzael chata Methusael sa ta, Methusael chata Lameka sa ta.
19 Chatawhcha Lameka chata lahpinô pano hnei ta, pakha moh cha Adah châ ta, a hropa moh cha Zilah a châ.
20 Adah chata Zabal sa ta; ano cha poh-o liata a ypa sahroh a pasatuhpa sahlao a pathlatuhpa a châ.
21 A nawhta moh cha Zubal châ ta; ano cha totâ nata ramo a tôtuhpa sahlao zydua a pathlatuhpa a châ.
22 Zilah chhao chata Tubalkaina, dawh nata thua chhaichhi to a daihtuhpa sa ta. Tubalkaina sietanô cha Nama a châ.
23 Lameka chata lahpinôzy hnohna chata:“Adah nata Zilah y, ei ao thei ula; Lameka lahpinô saih u, ei bie reipahe nahthlie teh u; Hmah eina paphaopa vâta chyhsa thiena ta, thi eina padôpa vâta satliapa ei thie.
24 Kaina phu hmahta a lie sari ta la awpa khiahta cha, Lameka phu cha a lie sysari nata ei sari ta lapa a châ tlai aw,”tah ta.
Setha Pathlazy
25 Chatawhcha Adâh chata a lahpinô cha pahno heih ta, ano chata sawchapawpa sa heih ta, a moh ta Setha bi ta, “Khazohpa ta Abela vyuhpa ta chi pathla hropa eina raopa haw, Kaina chata ano thie ha tlôh ta,” tah ta.
26 Setha tlai chhao chata sawchapawpa hnei hra ta, a moh ta Enawsa bi ta, cha nona chata chyhsazy ta ABEIPA moh cha vaw pado pathao haw ei ta.