Athaona Bo 25
Ketura chôta Abaraha pathlazy (Tr.1:32-33)
1 Abaraha chata lahpinô hropa hnei ta, a moh cha Ketura châ ta.
2 Ano chata Zira zy, Zôkasa zy, Meda zy, Midia nata Ibaka nata Shua zy sapa ta.
3 Zôkasa chata sawchapawpa Sheba nata Deba sa ta. Deba sawchapawpa cha Asahuri zy, Leumi zy châ ei ta.
4 Midia sawchapawpazy cha Epha zy, Ephera zy, Hanôka zy, Abida nata Elada zy ama châ. Cha zydua cha Ketura sawzy ama châ.
5 Abaraha chata a hneipa zydua Aisika pie ta.
6 A nôtho sahlao sawchapawpazy deikua cha lymâzy pie ta, ano a hroh chhôhta a sawchapawpa Aisika tawhtapa cha nochhi râh lâna chata pasiesa chyu ta.
Abaraha thina nata pabuna
7 Abaraha hro chhôh cha kô za kha nata sysari nata kô pangawh châ ta.
8 Abaraha chata a thlahpa pathlie ta, sâpawhpa pawpi ngaitapa ta hroh ta, thi haw ta, a chieheihzy lâna chata chhihthapa ta y haw ta.
9 A sawchapawpa Aisika nata Ishmael chata Hiti chyhsa Zôhara sawchapawpa Ephraw lyu liata Mamre dadyta Makapela lôpu liana chata pabu ei ta,
10 cha lyu cha Abaraha ta Hiti mozy liata chalei ta. Cha liana chata Abaraha cha pabu ei ta, a lahpinô Sara chhao.
11 Chatawhcha Abaraha thi tawhna chata Khazohpa ta a sawchapawpa Aisika cha byhnâ pie ta. Aisika cha Belahairô kiahpâh liana chata pahrâ ta.
Ishmael pathlazy (1 Tr. 1:28-31)
12 Hezy he Abaraha sawchapawpa Ishmael, Sara seichanô Izi chyhsa Hakara ta Abaraha châta a sapa pathlazy cha ama châ.
13 Hezy he ama moh chyu nata ama pathlazy lymâ hawhta Ishmael sawchapawpazy moh cha a châ; Ishmael saw tuapa cha Nebaiô châ ta; a nawhtazy cha Keda zy, Adbel zy, Mibasa zy,
14 Misama zy, Dumah zy, Masa zy châ ei ta.
15 Hada nata Tema, Zetu, Naphi nata Kedema châ hra ei ta.
16 Chazy cha Ishmael sawchapawpazy châ ei ta, chazy cha ama khih lymâ hawhta nata ama riehmo lymâ hawhta ama moh ropa châ ei ta, ama chi lymâ hawhna cha abei pahrawhleino châ ei ta.
17 Ishmel hro chhôh kô cha he he a châ, kô za kha nata sythô nata kô sari a châ, a thlahpa pathlie ta thi ha ta, a chiheihzy lâna chata chhithapa ta y haw hra ta.
18 A sawchapawpazy cha Havila râh tawhta Asuria râh pangaipa ta Izi râh dady Shura taihta pahrâ ei ta, a uhnawhpazy adaihna lâ chhâhta y ta.
Esaw nata Zakaw pina
19 Hezy he Abaraha sawchapawpa Aisika pathlazy cha ama châ: Abaraha chata Aisika sata,
20 Aisika ta Padanara râh liata Suria chyhsa Bethuel sawchanônô Suria chyhsa Laba sietanô Rebeka cha lahpinô ta a hnei nona chata kô sypalihpa châ ta.
21 Chatawhcha a lahpinô cha saw leipa a châpa vâta, Aisika chata ABEIPA lâta thata hiapa ta; chatawhcha ABEIPA ta a hiana cha nahthlie ta, a lahpinô Rebeka cha saw phaoh haw ta.
22 A saw phaopazy cha a py chhôh liana chata a tu ei ta; ano chata, “He hawhta a châ tlôh khiahta cha, khâpa vâta ma ei hro thlâh ha tly? tah ta. Chatanachata ABEIPA hiahri awpa ta sie ha ta.
23 Chatawhcha ABEIPA chata a hnohta, “Na chhi liana chata chi no y ei ta, na py chhôh tawhna tlai chata pho no a pachhaih aw ei ta; pho kha cha pho khapa hlâna chata a thatlô via aw ta, a uhthei viapa chta a seihnai viapa a chakao aw,” tah ta.
24 Chatawhcha a saw a sa tina chata, a chhi liana chata maphieh vaw châ ta.
25 A hmiatuapa cha phu saih ha ta, poh hmi hawhta hmithihpa hnei ta; chatanachata moh cha Esaw bi ei ta.
26 Cha khai tawhna chata a nawhta vaw pih heih ta, a ku ta Esaw phei ngavâhhmaothy cha patu thlâh ha ta; chatanachata a moh cha Zakaw bi ei ta. Chatawhcha Rebeka ta a moh a sa nona chata, Aisika cha kô sycharupa châ ta.
Esaw ta a ryutona a zuah
27 Hawtizy cha vaw laiseih ei ta, Esaw cha râh a khie thai ngaitapa, lyurâhpa chyhsa a châ.
28 Aisika chata Esaw tawhta sakhih sa a nie tyhpa vâta dao kaw ta; Rebeka deikua Zakaw dao via ta.
29 Eikha cha Zakaw chata abie pati a chhoh no ta, Eaw cha lyurâh lâ tawhta vaw tlô ta, a tha chhâ kaw ta.
30 Chatawhcha Zakaw hnohna chata, “Ngiachhiepa ta na abie saihpa pati chhopa kha na paniesa tua, ei tha a chhâ kaw!” tah ta. (Chavâta a moh cha Edôma ama bi).
31 Zakaw chata, “Na saw tuapa châna na chaleisa tua la,” tah ta.
32 Esaw chata, “Thi daihmâ tlôh na ta, saw tuapa châna he ei châta khâpa a phahnai aw?” tah ta.
33 Zakaw chata, “Ei hnohta chhie a sakhâh tua teh,” tah ta. Chatawhcha a hnohta chhie a sakhâh ta, chatanachata a saw tuapa châna cha Zakaw hnohna chata zuah haw ta.
34 Chatawhcha Zakaw chata Esaw cha viahchhâ nata abie pati cha pie ta, niepa ta doh ta, thyu ta sie haw ta. Cha hawhna chata Esaw chata a saw tuapa châna cha a panawhsa.