Mathai 1

Zisu Krista a vaw pathlana zie

1 He he Zisu Krista a vaw pathlah pachhuahna zie cha a châ, ano cha Davi pathla châ ta, ano cha Abaraha pathla a châ.

2 Abaraha cha Aisika paw châ ta, Aisika cha Zakaw paw a châ; Zakaw cha Zudah nata a unawhpazy paw châ ta.

3 Zudah cha Pereza nata Zere paw châ ta (ama nô cha Tamari a châ); Pereza cha Hezrôna paw châ ta, Hezrôna cha Rama paw a châ;

4 Rama cha Aminada paw châ ta, Aminada cha Nashôna paw a châ; Nashôna cha Salmôna paw châ ta,

5 Salmôna cha Bôaza paw a châ (Rahabi cha a nô a châ); Bôaza cha Ôbeda paw châ ta (Ruthi cha a nô a châ); Ôbeda cha Zese paw châ ta,

6 Zese cha Abei Davi paw a châ.Davi cha Sawlawmaw paw châ ta, (a nô cha Uriah lahpinô châ chiehpa a châ);

7 Sawlawmaw cha Rehôbaw paw châ ta, Rehôbaw cha Abizah paw a châ; Abizah cha Asa paw châ ta,

8 Asa cha Zehôsapha paw a châ, Zehôsapha cha Zôrama paw châ ta, Zôrama cha Uziah paw a châ;

9 Uziah cha Zawtha paw châ ta, Zawtha cha Ahaza paw a châ; Ahaza cha Hezekiah paw châ ta,

10 Hezekiah cha Manase paw a châ; Manase cha Amôsa paw châ ta, Amôsa cha Zôsiah paw a châ;

11 Zôsiah cha Zekôniah nata a unawhpazy paw châ ta, cha nona chata Izarel sahlao cha Babylaw lâ a chhipa ama châ.

12 Babylaw lâ seita amâ chhi tawhna chata: Zekôniah cha Shaltiel paw châ ta, Shaltiel cha Zerubabel paw a châ;

13 Zerubabel cha Abinada paw châ ta, Abinada cha Eliakima paw a châ; Eliakima cha Azôra paw châ ta,

14 Azôra cha Zadôka paw a châ; Zadôka cha Akima paw châ ta. Akima cha Eliuda paw a châ;

15 Eliuda cha Eliaza paw châ ta, Eliaza cha Mathana paw a châ; Mathana cha Zakaw paw châ ta,

16 Zakaw cha Zawsi paw a châ; ano cha Mari vahpa, ano cha Zisu Mesiah ama bipa nô cha a châ.

17 Chatanachata chhâ zydua cha Abaraha tawhta Davi taihta chhâ hrawhleipalih châ ta, Davi tawhta Babylaw lâ seita amâ chhina taihta chhâ hrawhleipalih châ heih ta, Babylaw lâta seita amâ chhina tawhta Mesiah pina taihta chhâ hrawhleipalih a châ.

Zisu Krista vaw pina

18 Zisu Krista vaw pina zie cha he hawhna heta a châ. Zawsi ta a nô Mari a pahawh ta, amâ pahly hlâna chata Thlahpa Pathaihpa ta saw a paphaosa tahpa pahno ta.

19 A vahpa Zawsi, chyhsa siapa chata phuah khoh leipa ta, a ru lâta phih a chhuah ta.

20 Châhrasala he hmo he a pachâ hai no ta, Abeipa vâlyuhchâpa cha a hnohta a mâ lâta a vaw luah ta, Davi sawchapawpa Zawsi y, Mari na lahpinô ta hnei awpa chi khâ, a saw phaopa cha Thlahpa Pathaihpa ta a paphaosapa châ tlôh ta.

21 Sawchapawpa sa aw ta, a moh cha Zisu na bi aw, a chyhsazy ama moleinazy tawhta a pachha awpa vâta,” tah ta.

22 He hmo zydua he Abeipa ta hrohsopa pakah ta,

23 Laihsakôpa cha saw phaoh aw ta sawchapawpa a sa aw,a moh cha Imanuel ama bi aw,”(cha cha Khazohpa eima hnohta a y, tahna a châ), tahpa ta a reipa kha a vaw pakisa theina awpa ta.

24 Zawsi cha a vaw hra ta, Abeipa vâlyuhchâpa ta bie a piepa hawhna cha tao ta, Mari cha lahpinô ta hnei ha ta.

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Mathai 2

Mathai 2

Chyhsa sopenawh ta ama vaw tly

1 Herawda a bei nota Zudia râh Bethlehe khih liata Zisu a vaw pih nahta nochhi lâ tawhta chyhsa sopazy Zerusale lâ a vy ei ta,

2 “Zuzy abeipa a vaw pihpa cha khataih liata e a y? Nochhi lâta ano awhsi* hmô tlôh pi ta, ano a naoh awpa ta eimâ vy,” tah ei ta.

3 Cha cha Abei Herawda ta a theipata nahta ano nata Zerusale liata chyhsa zydua chhao ama nôpo ta.

4 Theihthai beipazy nata Ryhpa pachutuhpa zydua awpakhy ta, Krista pina awpa cha khataih liata a châ tahpa âmo hiahhri ta.

5 Âmo chata, “Zudia râh Bethlehe liata; hrohsopa ta:

6 ‘Nâ Bethlehe, Zudia râh liatahpa,Zudia râh ryureituhpazy hry liata chyh chai cheita aw va chi;na chhôh tawhta ryureituhpa pua tlôh aw ta.Izarel ei chyhsazy a vaihtuh awpa cha,tahpa ta ropa châ tlôh ta,’tah ei ta.

7 Chatanachata Herawda ta chyhsa sopazy cha aru lâta aw ta, khatita ma awhsi cha âlâ tahpa âmo hiahhri pasia ta;

8 Bethlehe khih lâta âmo pasiesa ta, “Sie u la, hawsaih cha a phapata ta tlua teh u, ano cha nama hmôpata nahta a thâtih thlai na vaw chho teh u. chatanachata kei chhao siepa ta ano ei naoh thei hrana awpa ta,” tah ta.

9 Abeipa bie cha pahno ei ta, sie haw ei ta; nochhi lâta awhsi ama hmôpa kha ama hmia lâta sie lymâ ta, hawsaih yna chô a dady hlâ lei cha âmo chhihtha lymâ ta.

10 Awhsi cha ama hmô nahta thaphapa ta aly ngaita ei ta.

11 O chhôh cha amâ ngia nahta, a nô Mari hnohta hawsaih cha hmô ei ta, a bôhpa ta ano hnohta hmosaipa ngôh zy, deiryh zy, myr zy pie ei ta.

12 Ama mâ ta Herawda lâ kua lei awpa ta chhopa ta ama ypa vâta, lâpi hropa lâta ama khih lâ kua haw ei ta.

Izi râh lâ amâ râkhei

13 Ama sie tawhna khata, Zawsi hnohta Abeipa vâlyuhchâpa cha a mâ lâta a luah ta, “Thyu la, hawsaih nata a nô a chhi la, Izi râh lâta a râ syulyu teh, ei cha chho heih hlâ lei cha cha liana chata y thlâh ha teh; Herawda ta hawsaih pahleipadia awpa ta a tlua awpa vâta,” tah ta.

14 Zawsi cha thyu ta, a zo ta hawsaih nata a nô cha a chhipa ta Izi râh lâ cha a râ haw ta,

15 Herawda a thi hlâ lei cha cha liana cha y ei ta. Abeipa ta hrohsopa pakah ta, “Ei sawchapawpa cha Izi râh tawhtapa ei aw aw.” a tahpa kha a tlô theina awpa ta.

Hawsaihzy ama thie

16 Herawda ta chyhsa sopazy ta ama dôpa a pahno nahta a thata a hiehâh ta, chyhsa tuah ta, a sopenawh tawhta a daihti bi liahsa a pahnopa hawhna khata Bethlehe khih nata a chheipâh zydua liata chapaw hawti kô no tawhta a ry lâ zydua cha thie khai awpa ta bie pie ta.

17 Hrohsopa Zeremiah ta:

18 “Ramâ liana cha ao theipa ta y ta, chana nata mâchhiesana aozy, Rakheli chata a sawzy chakhei ta; ama y khao leipa vâta a thlahlôh thei vei,” tahpa ta a reipa kha a vaw tlô haw.

Izi râh tawhta ama vaw kua

19 Herawda a thi tawhta Abeipa vâlyuhchâpa ta Izi râh liata Zawsi hnohta a mâ ta â luah,

20 “Thyu la, hawti nata a nô a chhi la, Izarel râh lâta sie teh. Hawti hrona la a chhuahpazy kha ama thi haw,” tahpa ta chho ta.

21 Chatawhcha Zawsi cha thyu ta, hawti nata a nô a chhi ta, Izarel râh lâta sie ha ei ta.

22 Châhrasala Arkhela a paw Herawda vyuhpa ta Zudia râh chôta a bei tahpa a pahno nahta cha lâta siepa cha chi ha ta, a mâ ta chhopa ta a ypa vâta Kalili lâta a sie haw.

23 Khih miakha Nazari ama tahpa liana cha va y ha ta, “Ano cha ‘Nazari chyhsa’ ama tah aw,” tahpa ta hrohsopazy pakah ta ama reipa kha a vaw tlô theina awpa ta.

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Mathai 3

Mathai 3

Bâtituhpa Zawhana biechhona (Mk 1:1-8; Lk 3:1-9. 15-17; Zh 1:19-28)

1 Cha nona chata Bâtituhpa Zawhana chata Zudia râhpathohpa liata biechho awpa ta a vy ta,

2 “Ro teh u, vârâh Khihnarâh cha a hnia ha tlôh ta,” tah ta.

3 Hrohsopa Isai ta a reipa kha ano he na a châ.“Râhpathohpa liata chyhsa awhpa ao chata:Abeipa lâthlôh a chhuahdy ula a lâpizy patlâh teh u,’ tahpa ta,”a reipa kha.

4 Cha Zawhana chata râraoseihpa hmi poh a bu ta, a chai cha savo chaisaina a sai ta; a pati cha khawsu nata kheihti a châ.

5 Cha nona chata Zerusale nata Zudia râh liata chyhsa zydua nata Zawdâh chavah chheipâh liata chyhsa zydua puapa ta ano lâta a vy ei ta,

6 ama moleinazy palâhâhpa ta Zawdâh chavah liata ano liata bâti châ ei ta.

7 Pharisaizy nata Saduasizy a hluhpi ta bâti châ awpa ta a vypa a hmô na ta, ama hnohta, “Vâzi pathla saih u! Hiehâhna a vaw tlô awpa he a râsai awpa ta ahyma zikyu châ râ ei?

8 Ro moh phaoh tlâh châpa ta pathei teh u,

9 ‘Abaraha pathla eima châ mâ tâh,’ tahpa ta a pachâ khah u; Khazohpa ta he alôzy he Abaraha pathlazy ta a paduasa thei na, ei cha tah ei chu.

10 Atahmâ chhao tlai tho thari liata zy ahrei sopa a châ haw. Chavâta tho to thei phapa ta a pathei leipa maih thlupa ta mei liata ama thy tyh.

11 “Keima ta la rona châta ti ta ei cha bâti ei, châhrasala ei hnôh lâta a vy awpa cha keima hlâta rôhnah via ta, a pheiky a cheipa tlâh chhao châ va na; ano chata Thlahpa Pathaihpa nata mei ta a cha bâti aw ei.

12 Ano ku liata barah y ta, a sawhri zie pasia aw ta, apâh liana chata a sâh khô aw ta, a sihpa deikua cha mei thi thei leipa liata a rao aw,” tah ta.

Zisu bâti châna(Mk 1:9-11; Lk 3:21-22)

13 Cha nona chata a hnohta bâti châ awpa ta Zisu Kalili râh tawhta Zawdâh liata Zawhana lâta a vy ta.

14 Zawhana deikua chata, “Nama bâti awpah tlao ei byuh, ei hnohta tlao nâ vy ma?” tahpa ta thlyu a chhuah ta.

15 Zisu ta a hnohta, “Atahmâ a ryh tah thlâh ha teh; he hawhta siana zydua pakipa he ei châta a ngiahpa na a châ,” tahpa ta a chhy ta. Chatanachata Zawhana cha a ryh tah haw ta.

16 Zisu bâti a châkhai pata nahta ti tawhta thlai pua ta, ano chata avâ a vaw pahy ta, Khazohpa Thlahpa cha vachhuh hawhta za chô ta, a chô ta a chopa hmô ta;

17 Avâ tawhta ao ta. “He he ei Sawchapawpa kyh ei pachâ ngaitapa, ei ly ngaitapa cha a châ,” tah ta. 

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Mathai 4

Mathai 4

Zisu reipasaona a tyhna (Mk 1:12-13; Lk 4:1-13)

1 Cha khai tawhta Zisu cha ahripa reipasaopa ta y awpa ta râhpathohpa lâta Thlahpa chhihthapa ta y haw ta.

2 Chatawhcha noh sypalih nata zâ sypalih pati nie leipa ta a y tawhta a no vaw di ha ta.

3 Reipasaotuhpa cha a vy ta a hnohta, “Khazohpa Sawchapawpa na châ khiahtala he alôzy he viahchhâ lâta a vaw lie awpa ta bie pie teh,” tah ta.

4 Ano deikua chata, “Chyhsapa he viahchhâ deita ta hroh aw vei ei, ‘Khazohpa pakah ta bie to a puapa deita tlao ama hroh aw,’ tahpa ta ropa a châ,” tahpa ta a chhy ta.

5 Cha khai tawhna chata ahripa ta khihpi pathaihpa lâna chata a chhi ta, Khazohpa achhyna-o laki pazaopa liana chata soh ta,

6 a hnohta, “Khazohpa Sawchapawpa na châ khiahtala nâmasasyh ta a pathla teh."‘Ano ta a vâlyuhchâpazy cha pavaisa aw ta,’‘Ama ku ta cha chalo aw ei ta,chata leipa ta la na phei alô liata nâ chhuh pathlei aw na,’tahpa ropa châ tlôh ta,”tah ta.

7 Zisu ta a hnohta, “‘Abeipa, na Khazohpa pasia khah y,’ tahpa ropa a châ hra na,” tah ta.

8 Chatawhcha ahripa chata tlâh sâhpa lâta a chhi heih ta, a hnohta khizaw khihnarâh zydua nata ama rôhnahna zydua cha pamosa ta;

9 a hnohta, “A khu lâta paopa ta einâ naoh khiah chi tala, he hmo zydua he ei cha pie aw,” tah ta.

10 Chatanachata Zisu ta a hnohta,Sâtâ a râ teh! ‘Abeipa na Khazohpa nâ naoh awpa a châ,ano deita na chakao awpa a châ!’tahpa ropa châ tlôh ta,”tah ta.

11 Chatawhcha ahripa chata siesai ha ta, vâlyuhchâpazy a vy ei ta ano ama chakao haw.

Kalili liata chakaona â thao(Mk 1:14-15; Lk 4:14-15)

12 Zawhana ama patu haw tahpa Zisu ta a pahno nahta Kalili râh lâta a kua haw;

13 Nazari khih puasai ta sie ta, Kapynia khih tilaipi kiah. Zebulawna nata Nathalai bia chhôh liata pahrâ ta,

14 hrohsopa Isai pakah ta.

15 “Tilaipi lâta, Zawdâh haosâ ta,Zebulawna nata Nathalai râh liata Kalili liata Zenitaizy

16 zohna liata atyuhpazy chata khaih ngaitapa hmô ei ta,thina zohna nohpahli râh liata atyuhpazy chôna chata khaihna a vaw khaih haw,tahpa ta a reipa kha a vaw tlô thei nawpa ta.

17 Cha rakha tawhna chata Zisu ta, “Ro teh u, vârâh Khihnarâh cha a hnia ha tlôh ta,” tahpa ta pachu pathao ha ta.

Nga patutuhpa papalih a aw(Mk 1:16-20; Lk 5:1-11)

18 Kalili Tilaipi kiah liata a sie nota, unawh pano, Saimaw, Pity ama bipa nata a unawhpa Adru tilaipi liata sao ama vaw haipa hmô ta; nga patutuhpa châ tlai ei ta.

19 Ama hnohta, “Na zi teh u, chyhsa patutuhpa ta cha tao vâ ei na,” tah ta.

20 Ama saozy thlai siesaipa ta zi haw ei ta.

21 Cha tawhna chata sie lymâpa ta unawh hropa pano, Zebadi sawchapawpa Zami nata a unawhpa Zawhana ama paw Zebadi chhaota, balyh liata saozy ama taopathi haipa ta hmô ta, âmo aw ta.

22 Ama balyh nata ama paw thlai siesaipa ta ano zi haw ei ta.

Zawpi hluhpi Zisu ta a deichhy(Lk 6:17-19)

23 Kalili chheipâh zydua liata, amâ pakhyna ozy liata pachupa ta Khihnarâh Thâtihpha chhopa ta zawpi hryta hri to rai nata pasana to rai a hneipa patlâhsapa ta chahry lymâ ta.

24 Suria râh zydua liata a moh pathâh ha ta, chyhsa a tlâh leipa zydua, tlâh leina nata pasana to a taopazy, ahripa patupazy, riapamiepazy, asypazy a hnohta a vaw chhi ei ta, a patlâsa ei.

25 Zawdâh khô lâ nata Zudia râh nata Zerusale khih nata Dekapôli râh nata Kalili râh tawhta zawpi a hluh ngaitapa ta ano ama zi haw. 

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Mathai 5

Mathai 5

Tlâh liata a biereipa

1 Zisu ta zawpizy a hmô nahta, tlâh lâta kiah ta, a tyuh ta, a pachupazy a hnohta a vy ei ta,

2 bie reih ta, âmo pachu ta:

Nohlaona kyh(Lk 6:20-23)

3 Ama thlahpa liata sipasapazy ama nohlao na,vârâh Khihnarâh ama eih a châpa vâta.

4 Pachârôhpazy ama nohlao na,thlahlôhpa ta ama y awpa vâta.

5 Nônaipazy ama nohlao na,khizaw ryu ama to awpa vâta.

6 Siana khohta nodi dâhphipa zy cha ama nohlao na,ama ao a vei awpa vâta.

7 “Zawngiah thei ngaitapazy ama nohlao na,zawngiahna ama hmô awpa vâta.

8 Pathipalôh pathaihpazy ama nohlao na,Khazohpa ama hmô awpa vâta.

9 Aryhna taotuhpazy ama nohlao na,Khazohpa saw bipa ta ama châ awpa vâta.

10 Siana vâta pasipasaw a taopazy ama nohlao na, vârâh Khihnarâh ama eih a châpa vâta.

11 “Chyhsa ta keima vâta moh pachhiepa ta, taolapa ta nata haipa ta nama chôta moleina to rai ama tao tita nama nohlao na.

12 Aly kaw ula thapha ngaitapa ta y teh u, vârâh liana chata nama châta lymâ a hluhpi a ypa vâta, cha hawhna chata nama hmia lâta hrohso penawh pasipasawh tlôh ei ta.

Alôh nata khaihna(Mk 9:50; Lk 14:34-35)

13 “Khizaw alôh nama châ na, alôh a padâh ha khiahta cha, kheihta e a iah thei khao aw? Khâpa châ hmahta hmâtlâh châ khao leipa ta, thy ta chyhsa phei ta tlypâpa châ deita tlâh a châ.

14 “Khizaw khaihpa nama châ na. Tlâh laki liata khih a ypa cha nyu theipa châ vei.

15 Chyhsa ta meiôh rao sala bai ry ta soh beih vei ei, meiôh tôh liata tlao ama soh tyh, ochhôh liata a ypa zydua chôta a vaw khaih aw.

16 Cha hawhna hra chata nama khaihna cha chyhsa mohmô ta khaih se, chatanachata nama hmophapa taopa hmô aw ei ta, nama Paw avâ liata a ypa ama palyupalih thei aw.

Zisu ta Ryhpa a pachuna

17 “Ryhpa nata hrohsopazy bie pahleipadia awpa ta ei vypa pangiasa khah u; pahleipadia awpa ta a vypa châ leipa na ta, patlôsa awpa ta tlao ei vy.

18 Hmeihseihta ta, ei cha chho ei hih, alei nata avâ a lei hlâ via la, ryhpa bie liata ropa a chyh chaipa ta chhao lei aw vei, ato zydua a tlô khai hlâ lei cha.

19 Ahyrai ta he biepiepa a chyh chaipa liata chhao miakha parao ta, chyhsa a pachu hrapa maih cha vârâh Khihnarâh liata a chyh chaipa ta reih aw ei ta; anodeikuacha ahyrai tao ta a pachusa hrapa maih cha vârâh Khihnarâh liata a rôhnah chaipa ama tah aw.

20 Ryhpa pachutuhpazy nata Pharisaizy siana hlâta nama siana a sia via vei khiahta cha, vârâh Khihnarâh liata a ngia chacheita aw veih eichi tahpa ei cha chho ei hih.

Hiehâhna kyh Zisu pachuna zie(Lk 12:57-59)

21 “Eikhano ta chyhsazy hnohta, ‘Chyhsa thie khah u; ahyrai chyhsa a thiepa maih ryureina cha chipa ta y thlâh haw ei ta,’ ama tahpa nama pahno haw.

22 Kei deikua chata ei cha tah ei chu, ahyrai a unawhpa chôta a pathi-iapa maih cha a thâtih pachiapa châ aw ta; ahyrai a unawhpa, ‘Khâpa hmahta pahnai va chi!’ a tahpa cha ryureina sâhpa* liata a thâtih pachâpa châ aw ta, ahyrai, ‘Ahrupa!’ a tahpa maih cha hriena su mei liata a sie tlâh a châ aw.

23 Chatanachata maisâh liata na hmopiepa na hlâ nota, na unawhpa ta na chô liata ruchhôna a hnei tahpa na thei khiahtala,

24 cha maisâh liana chata na hmopiepa soh la; vaw la, na unawhpa hnohta liahsa paryhpa ta y tua la, cha hnôh lâna chata a vy la na hmopiepa cha hlâ teh.

25 Lâthlôh liata na khotuhpa nata nama sie nota a hnohta a dyh parah teh, chata leipa tala na khotuhpa ta ryureituhpa hnohta cha patusa aw ta, ryureituhpa chata a vaihtuhpa hnohta cha patusa aw ta, lô-o liata cha khô aw ta;

26 hmeihseihta ta, ei cha chho chu, phusâ a chyh chaipa chhao na pie khai hlâ lei cha cha tawhtapa vaw pua cheita aw va chi.

Apheina kyh Zisu reina zie

27 'Aphei khah y,’ ama tahpa nama thei haw.

28 Châhrasala ei cha chho ei chu, ahyrai chanô chôta aohraopa ta a mohpa maih cha cha chanô hnohna chata a pathipalôh ta a phei haw.

29 Na mo chachâh lâta a cha pahluasa khiahtala, thaoh la thy teh; na pôhpa duata hrienasu liata thy châta cha, na sa pachiahpa sâkha leidia cha pha via tlôh ta.

30 Na ku chachâh lâta a cha pahluasa khiahtala, tai la thy teh; na pôhpa duata hrienasu liata sie châta cha na sa pachiahpa sâkha leidia cha pha via tlôh ta.

Amana khy Zisu pachuna zie(Mt 19:9; Mk 10:11-12; Lk 16:18)

31 “‘Ahyrai lahpinô amapa maih, a mana cha a hnohta pie mawh sy,’ tahpa ropa châ tlôh ta.

32 Châhrasala ei cha chho ei chu, ahyrai apheina kyh dei leipa ta a lahpinô a mapa maih cha, apheinô a pachâsa; ahyrai ma chiehpa chanô a hneipa maih cha apheipa a châ hra.

Chhiesana kyh Zisu pachuna

33 “Hlâno ta chyhsazy hnohta, ‘Haipa ta chhiesa khah y. Abeipa lâta na chhiesakhâhna cha tlao patlô teh.’ tahpa a châ.

34 Kei deikua chata ei cha chho ei chu. Chhie rai sa cheita khah u, avâ reipa ta mâ sa hra khah u. Cha cha Khazohpa beidyuchhai châ tlôh ta,

35 alei reipa ta chhiesa hra khah u, cha cha a pheitlyna châ tlôh ta, Zerusale reipa ta chhiesa hra khah u, Abei rôhnah kawpa khihpi châ tlôh ta.

36 Na luh hmâpa ta chhiesa hra khah y, sâbu sâkha hmahta papawhsa thei leipa chi ta, na pavyhsa thei leipa vâta.

37 Châhrasala na biereipa cha ‘A châ’ tlyma, ‘Châ vei’ tahpa tlyma châ se; cha hlâta a hluh via cha moleina tawhta a vypa châ tlôh ta.

Viarithôna kyh Zisu pachuna(Lk 6:29-30)

38 “ ‘Mo vyuhta mo viari, hâh vyuhta hâh viari,’ tahpa ta ama reipa nama pahno haw.

39 Kei deikua ta ei cha chho ei chu, moleipa adyuh khah u. Châhrasala ahyrai ta na baih chachâh lâ a cha chabaih khiahtala, hiakha lâ chhao dao teh.

40 Ahyrai na viahpakao la khoh vâta biepeipa tao sala, na poh chhao pie pâ hra teh;

41 ahyrai me kha sie châ hnawpa hnohna chata a hnohta me no sie teh.

42 Cha hiahpa maih pie la, dyu cha cheipa maih thlyu kha.

Khakhaipa kyhpachâna(Lk 6:27-28, 32-36)

43 ‘Na vaih kyh pachâ la, na khakhaipa a hao mah y,’ ama tahpa namo pahno.

44 Châhrasala kei deikua chata nama khakhaipazy kyh pachâ ula, cha taolapazy châta thlahchhâ teh u,

45 nama Paw avâ liatahpa sawzy nama vaw châ thei nawpa ta, ano chata chyhsa chhiepa nata phapazy chôta ano noh a pachhiesa tyh, chyhsa siapa nata sia leipa chô liata chhao avâ a pasuasa tyh.

46 Nâma kyh cha pachâtuhpazy kyh na pachâ khiahta cha khâpa lymâ e nama hmô aw? Chhie kheituhpazy chhaota cha hawhna chata tah hra veih ei ma?

47 Chatawhcha nama unawhpazy dei namâ naoh khiahta cha khâpa e chyhsa hropa hlâta nama tao pha via hlei? Zenitaizy chhaota cha hawhna hra chata tao hra veih ei ma?

48 Chatanachata nama Paw avâ liatahpa sia pakipa hawhta nama sia paki hra awpana a châ. 

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Mathai 6

Mathai 6

Hmopiena kyh liata Zisu pachuna

1 Chyhsazy mohmô ta nama siana hmopha taopazy cha a chado teh u; chata leipa ta la nama Paw avâ liatahpa hnohta lymâ hnei aw veih ei chi.

2 “Cha hawhna chata ngiachhiena hmozy na pie tita, haiphiahpazy ta apakhyna o liata nata othliahzy liata, chyhsa reithaina ama hlaona awpa ta ama taopa hawhta na hmiakô ta chiahmie patôsa khâ. Hmeihseihta ta, ei cha chho ei chu, ama lymâ cha ama hmô haw.

3 Nâ deikua chata ngiachhiena hmozy na pie tita, na ku chachâh lâta a taopa cha na ku chavei lâta pahno khah se,

4 chatanachata na ngiachhiena hmozy cha a ru lâta y thei aw ta; na Paw a ru lâta cha hmotuhpa chata a cha thô aw.

Zisu ta thlahchhâna a pachuna zie(Lk 11:2-4)

5 “Thlah nama chhâ tita, chyhsa haiphiahpazy hawhta y khah u, chyhsa hmôpa ta ama y theina awpa ta apakhyna o liata zy, othliah ki liata zy, a duahpa ta thlah chhâ khoh tlôh ei ta. Hmeihseihta ta, ei cha chho ei chuh, ama lymâ cha ama hmô haw.

6 Nâ deikua cha thlah na chhâ tita, na chhôhpadâhpa lialiah chaipa liata a ngia la, ochhi khaw la, na Paw a ru lâta a ypa hnohna cha thlahchhâ teh; na Paw a ru lâta cha hmôtuhpa chata a cha chyh ei aw.

7 “Thlah nama chhâ nota, Zenitaizy tahpa hawhta reih chanei thlâhthli khah u; ama rei hluhpa vâta thei hluh via awpa ta pangiasa tlôh ei ta.

8 Âmo hawhta y khah u, Khazohpa nama Paw chata nama hia hlâ chhaota nama khopa pahno thlâh ha tlôh ta.

9 He hawhna heta nâmo cha thlahchhâ teh u:‘Eima Paw avâ liatahpa, Na moh zachhih mawh sy.

10 Na khihnarâh vaw tlô mawh sy.Na khopa la avâ liata ama tahpa hawhta,Alei liatahpa ta tah mawh sy.

11 Atanoh châta eima niepa maniah pie mah y;

12 Hmo maniah a bâhpazy eimâ ngiahthaipa hawhta."Keimo chhao hmo eimâ a bâhpazy maniah a ngiahthai mah y;

13 Reipasaona liata maniah a chhi khah y, Moleipa liata maniah pachha mah y.’

14 Chyhsa ama paraopazy namâ ngiahthai khiahta cha, nama Paw avâ liatahpa chata a châ ngiahthai hra aw ei;

15 châhrasala chyhsa ama paraopazy namâ ngiahthai vei khiahta cha, nama Paw ta nama paraopazy cha ngiahthai hra aw veih ei?

Pati nie leina kyh Zisu pachuna

16 Nie leipa ta nama y tita, haiphiahpazy hawhta nama hmia a pasaih khah u, chyhsazy hmiakô ta ama nie leipa a lâ theina awpa ta ama hmia amâ pachhiesa tyh. Hmeihseihta ta, ei cha chho ei chuh, ama lymâ cha ama hmô haw.

17 Nâ deikua ta nie leipa ta na y tita na luh sathaw a thu la, na hmia a pahlie teh,

18 nie leipa ta na ypa cha na Paw a ru lâtahpa mohmô lia dei leipa ta cha chyhsa mohmô ta a lâ aw va chi; chatawhcha na Paw a ru lâta cha hmôtuhpa chata a cha thô aw.

Avâ liata ryuzy(Lk 12:33-34)

19 Alei liata chhôma-u nata sai-iepa ta niepa ta, a parupazy ta paraopa ta ama paruna liata nama châta ryuzy pachô khah u,

20 châhrasala avâ liata chhôma-u nata sai-iepa ta a nie leina liata nata a parupazy ta paraopa ta ama paru leina liata nama châta ryuzy pachô teh u.

21 Na ryu yna liata na pathipalôh chhao a y aw.

Pôhp khaina(Lk 11:34-36)

22 Pôhpa meiôh cha mo a châ. Na mo a sia khiahtala, na pôhpa zydua ta a cha khaih aw;

23 na mo a rao khiahta cha na pôhpa duata a zoh khai aw. Chatanachata nâma liata khaihna cha zohna châ ha sala, zohna cha a zoh kaluh kaw dia!

Khazohpa nata khizaw sôh(Lk 16:13)

24 “Ahy hmah abei pano chakao pabaoh thei aw veih ei; pakha cha a hao aw ta, a hropa cha kyh a pachâ aw, cha leipa ta pakha cha a pyh aw ta, a hropa cha a mopakhô aw. Khazohpa nata khizaw sôh chakao pabaoh thei veih eichi.

25 “Chavâta ei cha chho ei chuh, khâpa e nama nie aw, khâpa e nama doh aw nama hrona kyh nata khâpa namâ bu aw tahpa ta pôhpa kyh liata pachâ chhie kha u. Niepa hlâta hrona nata chysia hlâta pôhpa pasô via veih eichi ma?

Phahlana nata mohhôhna(Lk 12:22-31)

26 Pavaw avâ liata a zawpazy he pachâ teh u; sâh tu veih ei, hria hra veih ei, sawvâ liata paso hra leipa ei ta, châhrasala nama Paw avâ liatahpa ta âmo a pasa tyh ei. Nâmo cha âmozy hlâta sôh via syulyu veih eichi ma?

27 Nâmo hryta ahy e pachâ chhiepa ta a doh lâta dy kha ta a pasâh via thei?

28 Khazia chysia kyh ta nama pachâ a chhie? Râh liata tlôma-u, laiseih zie he pachâ teh u; hriapasa leipa ei ta, pala so hra veih ei;

29 châhrasala ei cha chho ei chuh, Sawlawmaw tlai chhao a rôhnahna zydua liana cha, cha pawpi sâkha hawhna cha y vei.

30 Râh liata sibiepa atanoh hroh ta a mylâ ta mei liata thypa hmahta Khazohpa ta cha tlatlu ta a tobi khiahta cha, Hy nâmo ngiapâ chyhpa saih u, cha tobi via syulyu veih ei ma?

31 Chatanachata, ‘Khâpa e eima nie aw?’ ‘Khâpa e eima doh aw?’ ‘Khâpa e eimâ bu aw?’ tahpa ta pachâ chhie kha u.

32 Zenitaizy ta he hmo zydua he ama tlua tyh; he zydua he nama Paw avâ liatahpa chata nama byuhpa a châ tahpa pahno thlâh ha tlôh ta.

33 A Khihnarâh nata a siana tlua tua teh u, chatanachata he zydua he a cha baichha aw ei.

34 “Chavâta mylâ châta pachâ chhie kha u, mylâ châta cha pachâ chhi chhypa châ tlôh aw ta. Noh kha châta noh kha pachârôh â daih. 

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Mathai 7

Mathai 7

Seina kyh (Lk 6:37-38. 41-42)

1 Sei kha u, seipa ta nama y leina awpa ta.

2 Nama seipa hawhta cha sei aw ei ta, nama panuapa hawhta ama cha panua hra aw.

3 khazia e na mo liata pako a ypa cha pacha leipa chi ta, na unawpa mo liata a puapa chypata cha na hmo?

4 Kheihta e na unawhpa hnohta, ‘Na mo liata a puapa chyhpa ta kha na palasa teh,’ na tah thei aw, na mo liata pâkô y tlôh ta.

5 Haiphiahpa, na mo liata pâkô kha la tua teh, chatanachata na unawhpa  mo liata a puapa chyhpa ta cha la awpa cha a siapata ta na hmô aw.

6 Izy cha hmo pathaihpa pie kha u; vao hmiakô liata nama taikulôzy thy hra kha u, ama phei ta tly aw ei ta, a châ liehnao aw ei.

Hiana kyh(Lk 11:9-13;6:31)

7 Hiah teh u, chatanachata a cha pie aw ei; tlua teh u, chatanachata nama hmô aw; chakhyh teh u, chatanachata a cha pahypa aw ei.

8 Ahyrai a hiahpa maih piepa châ tyh ei ta, a tluapa maih hmô tyh ei ta, a chakhyhpa maih ama pahypa tyh.

9 Nama hryta ahyma a sawchapawpa ta viahchhâ hiah sala, alô a pie aw?

10 Nga hiah sala, parih a pie aw? 

11 Nâmo moleipazy chi hmahta, nama sawzy hmopha piena cha nama pahno khiahta cha, nama Paw avâ liatahpa chata a hiahtuhpazy hnohta hmophapa kha tluta a hluhpa ta ma a pie aw tly! 

12 Chavâta chyhsa ta nama chôta ama taopa nama khopa hawhta, chyhsa chôta tao hra teh u; cha cha ryhpa nata hrohsopazy bie a châ.

Chhikao buahpa(Lk 13:24)

13 “Chhikao buahpa liata a ngia teh u; leidiana lâta siena chhikao cha kawh ta, a sie nao ta, cha lâta a ngiapa cha ama hluh.

14 Hrona lâ siena chhikao cha buah ta, a sie ru ta, cha lâta a siepa cha ama chyh.

Ama thei tawhta pahnona(Lk 6:43-44)

15 “Hrohso pakheipazy liata a chado teh u, chazy cha mietahkupa vo a bupa ta nama hnohta a vy tyh ei ta, ama chhôh liata deikua cha changie chahraochatôhpazy châ tlôh ei ta.

16 Ama thei ta nama pahno aw. Ahloh liata kre thei ama lyu beih ma, diasai liata theiku ama lyu bei ma?

17 Tho phapa to thei phapa ta ama pathei tyh, tho chhiepa deikua cha thei chhiepa ta a pathei tyh.

18 Tho phapa thei chhiepa ta pathei beih vei, tho chhiepa thei phapa ta pathei beih hra vei.

19 Tho to thei phapa ta pathei leipa cha thlu ei ta, mei liata ama thy tyh.

20 Cha hawhna chata ama thei liata âmo nama pahno khai aw.

Cha pahno veih ei na(Lk 13:25-27)

21 “ ‘Abeipa, Abeipa,’ na tahpa moh maih ta, vârâh Khihnarâh liata a ngia leipa aw ei ta, châhrasala ei Paw avâ liatahpa khopa a taotuhpa leipa ta cha.

22 Cha noh liana chata chyhsa hluhpi ta, ‘Abeipa, Abeipa, na moh ta hmonoâhpa hluhpi tao mapi ma?’ ama tah aw.

23 Chatawhcha ama hnohta, ‘Nâmo moleipa saih u, cha pahno beih veih ei na, na siesai teh u,’ tahpa ta ei chho aw ei.

Abôna su nopazy(Lk 6:47-49)

24 “Chatanachata chyhsa to ei biezy he theipa nata a taopa maih, chyhsa sopa lôpanô chôta o a sapa hawhta a châ;

25 chatawhcha avâ suah ta, tilaipa vaw tlô ta, thlihzy vaw pathli ta, cha o chô liana chata vaw su ta, châhrasala cho leipa ta, lôpanô chô liata bôpa a châpa vâta.

26 Chyhsa to ei biezy thei ta a tao leipa cha chyhsa hrupa leisadi chô liata o a sapa hawhta a châ,

27 avâ suah ta, tilaipa vaw tlô ta, thlihzy vaw pathli ta, cha o chô liana chata su ta, cho ha ta; cha a chopa cha thata a châ,” tah ta.

Zisu biehneina(Lk 1:22)

28 Chatawhcha Zisu ta he biezy he a reih khai nahta, zawpizy ta a pachuna bie cha ama noâh ngaita ta,

29 Ryhpa pachutuhpazy hawhta châ leipa ta biehneipa hawhta âmo a pachupa vâ ei ta. 

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Mathai 8

Mathai 8

Zisu ta aphawhpa a pathai (Mk 1:40-45; Lk 5:12-16)

1 Zisu tlâh tawhtapa cha a zu nahta, zawpi a hluhpi ta ano zi ei ta,

2 aphawhpa pakha a hnohta a vy ta, “Pâpuh, na kho khiahta cha eina pathaisa thei chi na,” tahpa ta a naoh ta.

3 Zisu a ku pazawh ta, hria ta, “Ei khoh-na; pathaihpa ta y teh,” tah ta. Chatawhcha sôkhata aphawhpa cha pathaih ha ta.

4 Zisu ta a hnohta, “Ahy hmahta chho khâ; anodeikuacha sie la, theihthaipa hnohta a kei pamosa la, Mawsi ta hmo pie awpa a raopa kha hiah teh, ama pahnopasiana awpa ta,” tah ta.

Pheisaih zakha hyutuhpa sei a patlâh(Lk 7: 1-10)

5 Zisu Kapynia khih a vaw ngia nahta, pheisaih zakha hyutuhpa a vy ta,

6 “Pâpuh, ei sei sypa ta o liata pachârôh ngaitapa ta a zia thlâh haw,” tahpa ta a haw chaimâh ta.

7 Zisu chata a hnohta, “A vy aw na ta, ei patlâhsa aw,” tah ta.

8 Pheisaih zakha hyutuhpa chata, “Pâpuh, ei o chhôh nâ ngiana tlâh châ vei; châhrasala bie pie la, ei sei cha a tlâh thlâh ha aw na.

9 Kei chhao chyhsa ryta ypa châ na ta, ei ry ta pheisaihzy y ei ta; chyhsa hnohta, ‘Sie la’, tah na ta, sie ta, chyhsa hropa hnohta, ‘A vy teh,’ tah na ta, a vy tyh. Ei sei hnohta chhao, ‘He he tao teh,’ tah na ta, a tao tyh,” tahpa ta a chhy ta.

10 Zisu ta cha bie cha a thei nahta, a noâh ngaita ta, a zituhpazy hnohna chata, “Hmeihseihta ta, ei cha chho ei chuh. Izarel hry liata ahy hmahta he tluta a ngiapâpa he hmô va na.

11 Ei cha chho ei chuh, nochhi nata notla tawhta chyhsa hluhpi a vy aw ei ta, vârâh Khihnarâh liana chata Abaraha zy, Aisika zy, Zakaw zy hnohta atyuh aw ei ta,

12 Khihnarâh sawzy deikua khôtho lâ zohna liata papuapa ta y aw ei ta; cha liana chata cha nata hârie a y aw,” tah ta.

13 Zisu ta pheisaih zakha hyutuhpa hnohna chata, “Sie thlâh ha teh; nâ ngiapâna hawhta na chôta vaw tlô se,” tah ta. Chatanachata a sei cha cha dawh liana tlai chata a vaw tlâ haw.

Pity pihnô a patlâhsa(Mk 1:29-31; Lk 4:38-39)

14 Zisu Pity o liata a ngia nahta, a pihnô chasipa ta a ziapa hmô ta;

15 a ku ta hria ta, a chasipa cha pai ta; ano chakaopâ ha ta.

Zâlâ ta chyhsa hluhpi a patlâh(Mk 1:32-34; Lk 4:40-41)

16 Zâlâ a vaw châ nahta, ahripa ta patupazy a hluhpi a vaw chhi ei ta; bie ta ahripazy cha papua ta, tlâh leipa zydua cha patlâhsa ta.

17 Hrohsopa Isai ta, “Ano ta eima chiehleinazy la ta, eima pasanazy phaoh ta,” tahpa ta a reipa cha a vaw tlô theina awpa ta.

Zisu a zi awpazy(Lk 9:57-62)

18 Zisu ta zawpi hluhpi a kiapâh ta a hmô nahta, haosâ lâ chaka awpa ta biepie ta.

19 Ryhpa pachutuhpa pakha a hnohta a vy ta, “Pachutuhpa, na siena lâ maih ta ei cha zi aw,” tah ta.

20 Zisu ta a hnohta, “Sihâzy ta khaoh hnei ei ta, pavawzy chhaota bu hnei ei ta, Chyhsa Sawchapawpa deikua cha a luh nyuna hnei vei,” tah ta.

21 A pachupazy hryta a hropa ta, “Pâpuh, ei paw pabu tua awpa ta na pasiesa tua teh,” tah ta.

22 Châhrasala Zisu ta a hnohta, “Na zi teh, athihpazy ta âmo athihpazy a pabu ei se,” tah ta.

Thlihpipa a chalihsa(Mk 4:35-41; Lk 8:22-25)

23 Zisu balyh liata a kiah nahta, a pachupazy chata ano zi ei ta.

24 Sôkhata tipo liana chata thlihpipa thata vaw pathli ta, ama balyh cha ti chalâparâpa ta thata su ta; ano deikua cha a mô thlâh ha ta.

25 A pachupazy a vy ei ta pahra ei ta, “Abeipa, miah pachha teh, eima leidia hih,” tah ei ta.

26 Ano chata ama hnohta, “Angiapâ chyhpa saih u, khazia nama chi?” tah ta. Cha khai nah chata thyu ta thlihzy nata tipo cha ra ta; si dia ha ta,

27 Chyhsazy cha ama noâh kaw ta, “He chyhsa he kheihawhpa chyhsa e a châ, thlihzy nata tipo chhaota a bie amâ ngiahpa he,” tah ei ta.

Kadarene liata ahripa patupa a patlâh(Mk 5:1-20; Lk 8:26-39)

28 Zisu haosâ lâ Kadarene* mo râh liata a tlô nahta, ahripa patupa pano, thlâ tawhta vaw puapa ta a vaw tyh ei ta, ahrâh ngâsâ ei ta, cha lâthlôh liana cha ahy hmahta sie ngâh veih ei.

29 Âmo chata, “Khazohpa Sawchapawpa, keimo liata khâpa tao awpa ma na khoh? Noh taipa tlô hlâta maniah taola awpa ta nâ vy mâ?” tahpa ta awh ei ta.

30 Âmo yna tawhta a hla kawpa liata vao zaw a hluhpi ama lao chuah ei ta.

31 Ahripazy chata, “Maniah na papua khiahtala, vao zaw chhôh liatazy maniah pasiesa mah y.” tahpa ta a haw ei ta.

32 Ano chata ama hnohta, “Sie teh u,” tah ta. Chatawhcha vaw pua ei ta, sie ei ta, vao chhôh liata a ngia ei ta; vao zaw zydua cha tilaipi kiah lâta a râpa ta, ti liata tla sao khai haw ei ta.

33 A vaihtuhpazy cha a râ ei ta, khihpi lâna chata sie ei ta, ato zydua chho haw ei ta, ahripa patupazy chô liata hmo a vaw tlôpazy chhao cha.

34 Chatawhcha a khihpi ta Zisu dy awpa ta vaw pua ei ta; ano ama hmô pata nahta, ama râhri puasai awpa ta a haw chaimâh ei ta. 

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Mathai 9

Mathai 9

Asypa a patlâh (Mk 2:1-12; Lk 5:17-26)

1 Zisu cha balyh liata kiah ta, haosâ lâ chaka ta, ano khih lâta a vy ta.

2 Chyhsa thokha ta asypa pakha rakhô liata a ziana chô ta, a hnohta a vaw sy ei ta; Zisu ta amâ ngiapâna a hmô nahta asypa hnohna chata, “Ei saw, thlahlôhpa ta y teh, na moleinazy a ngiahthaipa a châ haw,” tah ta.

3 Chatawhcha Ryhpa pachutuhpa thokhazy chata ama palôhrupa ta, “He chyhsa heta Khazohpa a reipachhie he,” tah ei ta.

4 Zisu ta ama pachânazy pahno ta, “Khazia e, nama pathipalôh liata moleina nama pachâ?

5 Na moleinazy a ngiahthaipa a châ haw,’ tahpa nata ‘Thyu la, phei ta sie teh,’ tahpa he kheihawhpa e a rei a nao via aw?

6 Châhrasala alei chô liata Chyhsa Sawchapawpa ta moleipazy a ngiahthai theina a hnei tahpa nama pahnona awpa ta asypa hnohna chata, “Thyu la, na hmophaw la la, na o lâ sie teh,” tah ta.

7 Asypa cha thyu ta, ano o lâta sie ha ta.

8 Zawpizy chata cha cha ama hmô nahta, chi ei ta, chyhsazy hnohta cha hawhpa biehneina a pietuhpa Khazohpa cha reithai ei ta.

Mathai awna(Mk 2:13-17; Lk 5:27-32)

9 Cha tawhtapa cha Zisu sie lymâ ta, chhiekheina su liata atyuhpa chyhsa pakha a moh Mathai hmô ta; a hnohta, “Na zi teh,” tah ta. Mathai cha thyu ta, zi ha ta.

10 A o liata pati ama dôh hai nona chata, chhiekheituhpazy nata moleipazy a hluhpi a vy ei ta, Zisu nata a pachupazy cha dôhkhei ei ta.

11 Pharisaizy ta cha cha ama hmô nahta a pachupazy hnohna chata, “Khazia e nama pachutuhpa ta chhiekheituhpazy nata moleipazy hnohta a nie?” tah ei ta.

12 Zisu deikua ta cha cha a pahnopa ta nahta, “Atlâhpazy chata dawhty a ngiah leipa ei ta, a tlâh leipazy ta tlao amâ ngiah.

13 Chatanachata, ‘Atheihna khoh leipa na ta, zawngiahna tlao ei khoh,’ tahpa he sie ula vâ chu teh u. Chyhsa siapazy pado awpa ta a zupa châ leipa na ta, moleipazy pado awpa ta a zupa tlao ei châ,” tah ta.

Pati nie leina thâtih hiahrina(Mk 2:18-22; Lk 5:33-39)

14 Chatawhcha Zawhana pachupazy cha a hnohta a vy ei ta, “Khazia keimo nata Pharisaizy heta pati nie leipa ta y tyh pi ta, na pachupazy deikua cha pati nie leipa ta ama y vei?” tah ei ta.

15 Zisu ta ama hnohta, “Myuhneituhpa viasazy cha ama hnohta myuhneituhpa a y chhôhta cha mâchhie ama sa nahta nama pangiasa mâ? Châhrasala myuhneituhpa cha ama hry tawhtapa lana daihti cha a vaw tlô aw, cha tina deikua chata pati nie leipa ta ama y aw.

16 Ahy hmahta poh parohpa liata poh thiehpa baithla beih veih ei, a baithlana chata poh cha hriepa ta, thata a hrie lao aw.

17 Kresawti thiehpa cha savo titheih parohpa liata ryh beih veih ei; chata leipa ta cha tochheih aw ta, kresawti cha a leih aw ta, savo titheih cha a parao aw; châhrasala kresawti thiehpa cha savo titheih thiehpa liata tlao ama ryh tyh, chatanachata â boh rairieh aw,” tah ta.

Ryureituhpa sawchanônô pathyuna nata chanô Zisu pohpai a hriapa(Mk 5:21-43; Lk 8:40-56)

18 Cha bie cha ama hnohta Zisu ta a reih hai nota, ryureituhpa a vy ta, abôhpa ta a naoh ta, “Ei sawchanônô cha atahmâ rô tlai thi ta; châhrasala a vy la, a chô liata na ku pahnieh la, a hroh heih aw,” tah ta.

19 Zisu thyu ta ano zi haw ta, a pachupazy chhao zi hra ei ta.

20 Chanô pakha kô hrawhleino thi lohpa ta a tlâh leipa a hnôh lâta a vy ta, a pohpai hria ta;

21 “A pohpai dei chhao hria aw sala tlâhpa ta ei y aw,” tahpa ta a pachâpa vâta.

22 Zisu a heih ta, ano cha hmô ta, “Ei sawchanô, thlahlôhpa ta y teh; nâ ngiapâna chata a cha patlâh haw,” tah ta. Cha dawh rakha tawhna chata chanô cha tlâh ha ta.

23 Chatawhcha Zisu ryureituhpa o liata a ngia nahta, ramo tôtuhpazy nata zawpi atymâ ngaitapa hmô ta,

24 “Pua teh u, laihsa cha thi vei, a môpa tlao a châ,” tah ta. Âmo chata ano cha pahneisao ei ta.

25 Châhrasala zawpi a papua khai tawhta a ngia ta, a ku ta patu ta, laihsa cha thyu ha ta.

26 Cha râh zydua liana chata cha bie cha pathâh ha ta.

Mochaopa pano mo pavâhna

27 Zisu cha tawhtapa sie lymâ ta, mochaopa pano ta ano zi ei ta, “Davi Sawchapawpa, maniah ngiachhie teh,” tahpa ta ao paro ngaitapa ta awh ei ta.

28 Chatawhcha o liata a ngia nahta, mochaopazy cha a hnohta a vy ei ta; Zisu ta ama hnohta, “He he ei tao theipa ta namâ ngiapâ ma?” tah ta. Âmo chata a hnohta, “Pâpuh y, eimâ ngiapâ na” tah ei ta.

29 Chatawhcha ama mo hria ta, “Namâ ngiapâna hawhta nama chôta tlô se,” tah ta.

30 Ama mo cha vaw pavâh ha ta. Zisu ta ama hnohta, “Ahy hmahta pahno khah ei se,” khâchâ tah ha ta.

31 Châhrasala âmo cha pua ei ta, cha râh zydua liana chata a moh pathâhsa haw ei ta.

Reih pathlie thei leipa a pathlie sa

32 Cha chyhsazy ama pua hai nota, ahripa patupa reih pathlie thei leipa a hnohta a vaw chhi ei ta.

33 Ahripa cha a pua pata nahta reih pathlie thei leipa cha a reih pathlie thei ha ta; zawpizy cha ama noâh kaw ta, “Izarelzy hryta he hawhpa he hmôpa ta y beih vei,” tah ei ta.

34 Pharisaizy deikua chata, “Ahripa beipa chata ahripazy a papua,” tah ei ta.

Zisu ta zawpizy tha a pasa

35 Zisu ta amâ pakhynazy liata pachupa ta Khihnarâh Thâtihpha cha chho ta, pasana to nata chiehleina to patlâhsa ta, khihpi nata khih chyhpa chahry lymâ ta.

36 Zawpizy a hmô nah deikua cha a thapasa ngaita kaw ta, vaihtuhpa hnei leipa mietahkupazy hawhta, ngiarohpa nata paipa ta ama ypa vâta.

37 Chatawhcha a pachupazy hnohta, “Sâh hria awpa hluh kaw ta, châhrasala hriatuhpazy ama chyh;

38 chavâta sâhhria Beipa hnohta sâh hria awpa ta hriatuhpazy a vaw tuah thei nawpa ta hiah teh u,” tah ta. 

Mathai (Matthews)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28