Chhihthatuhpazy ta Zisu ama leih (Mk 14:1-2; Lk 22:1-2; Zh 11:45-53)
1 Zisu ta cha bie zydua cha a rei khai nahta, pachupazy hnohta,
2 Noh no rakha tawhta Zawpakhô kyhchhi a vaw y aw tahpa pahno eichi ta, Chyhsa Sawchapawpa he khaipâ awpa ta ama patusa aw,” tah ta.
3 Cha nona cha Theihthai Beichaipa Kaiapha ama tahpa o dôhpachhôh liata theihthai beizy nata vâtlâh machâzy cha apakhy ei ta,
4 Zisu cha pangâh pakhei ta patu ta, ama thie thei nawpa ta a pachia ei ta.
5 Châhrasala, “Kyhchhi chhôhta châ leipa sala, chata leipa ta la vâtlâh hryta atymâna a y pathlei aw na,” tah ei ta.
Bethani liata sathaw thupa a châ(Mk 14:3-9; Zh 12:1-8)
6 Zisu Bethani liata aphawhpa Saimaw o liata a y nota,
7 chanô pakha sathaw rohpahâh ngaitapa ta alabasta ôh a vaw cheipa ta a vy ta, pati a dôh hai nota a luh liata bao ta.
8 A pachupazy chata cha cha ama hmô nahta ama hiehâh ngaita ta, “Khazia e he hawhta a pahleipadia chakhy tly?
9 He sathaw he a mâ hluhpi ta zuah ta, chyhsa a rietheipazy hnohta pie theipa châ tlôh ta,” tah ei ta.
10 Zisu deikua chata cha cha a pahno nahta ama hnohta, “Chanô he khazia e nama patypamâ tly? Ei chô liata hmopha ngaitapa a taopa a châ.
11 Chyhsa rietheipazy cha chhâzaw ta nama hnohta a ypa ama châ mâ tâh, kei deikua cha chhâzaw ta nama hnohta a y awpa châ va na.
12 He sathaw rohpahâh ngaitapa ei pôhpa liata a baopa he pabu awpa ta einâ chhuahdyna a châ.
13 Hmeihseihta ta, ei cha chho ei chuh, khizaw zydua liata khataih liata rai he thâtihpha he ama chhona maihta, he chanô hmotaopa chhao he ano pahno thlâh ha nawpa ta ama reih lymâ aw,” tah ta.
Zuda cha Zisu patupa â ryh a tah(Mk 14:10-11; Lk 22:3-6)
14 Cha khai tawhna chata pahrawhleino hryta Zuda Iskari ama tahpa cha, theihthaipa abeizy lâta vawh ta,
15 “Ano cha ei cha patusa aw ei, khâpa e eina pie aw eichi?” tah ta. Chatawhcha tâkâ sythôh pie ei ta.
16 Cha khai tawhna chata patuna ryhpaona tlua ha ta.
A pachupazy hnohta Zawpakhô pati a dôh(Mk 14:12-21; Lk 22:7-14; 21-23 Zh 13:21-30)
17 Viahchhâ thinô pahlao leipa noh, noh hmiatua chaipa liata pachupazy cha Zisu hnohta a vy ei ta, “Zawpakhô pati nie nawpa ta khataih liata e cha chhuahdypa ei sihla na khoh?” tah ei ta.
18 Ano chata, “Khihpi liata ahy tlyma hnohta vawh ula, a hnohta, ‘Pachutuhpa chata ei daihti a hnia ha ta; ei pachupazy chhaota zawpakhô pati na o liata eima nie aw a tahna,’ va tah teh u,” tah ta.
19 Chatawhcha zawpakhô pati cha a chhuahdy haw ei ta.
20 A vaw zâlâ nah cha pachupa pahrawhleinozy chhaota pati dôh ei ta;
21 ama nie hai nota ano chata, “Hmeihseihta ta, ei cha chho ei chuh, nama hryta pakha heta eina patusa aw,” tah ta.
22 Ama pachârôh ngaita ta a hnohta, “Abeipa, keima ei châ ma?” tah chyu ei ta.
23 Ano chata, “Beikoh liata na chapaolâhpa tlai chata eina patusa aw.
24 Chyhsa Sawchapawpa he a thâtih ama ropa hawh tlai khata a sie aw; châhrasala Chyhsa Sawchapawpa a patusatuh awpa chyhsa cha a hu a po na! Cha chyhsa cha pih leipa sala a châta tlao a pha via aw,” tahpa ta a chhy ta.
25 A patusatuh awpa Zuda chata a chhy ta, “Rabai, kei he ma a châ na?” tah ta. Ano chata a hnohta, “Na reih cha zaw,” tah ta.
Abeipa Zâpati hmâna zie(Mk 14:22-26; Lk 22:15-20; 1 Kaw 11:23-26)
26 Ama nie hai nota, Zisu ta viahchhâ la ta, byhnâ aw ta, pachhaih ta, pachupazy hnohta pie ta, “La ula nie teh u; he he ei sapa a châ,” tah ta.
27 Chatawhcha nyu la ta, alyna bie reih ta, ama hnohta pie ta, “Nama zydua ta, doh teh u;
28 he he ei thisaih, moleinazy a ngiahthai nawpa ta chyhsa hluhpi châta a lohpa biehrai thiehpa chana a châ.
29 Ei cha chho ei chuh, ei Paw Khihnarâh liata nâmo chhaota a thiehpa ei dona noh a tlô hlâ lei la, atahmâ tawhta krezô liata a patheipa he doh heih khao aw va na,” tah ta.
Pity a papha awpa a reih chhielie(Mk 14:27-31; Lk 22:31-34; Zh 13:36-38)
30 Chatawhcha hla ama sa khai nahta, Ôli tlâh lâta pua ei ta.
31 Zisu ta ama hnohta, “Atazâ he nama zydua ta keima liata angiapâna nama pahlei khai aw, ‘Mietahkuvaihtuhpa cha tu aw na ta, mietahkupa hri cha ama pai aw,’ tahpa ropa châ tlôh ta.
32 Châhrasala ei thyu heih tawhta Kalili râh lâta nama hmiakô ta ei sie aw,” tah ta.
33 Pity deikua chata a hnohta, “Ama zydua ta nâ tawhta pao khai hra ei sala, kei la pao cheita aw va na,” tahpa ta a chhy ta.
34 Zisu ta a hnohta, “Hmeihseihta ta, ei cha chho hih, atazâ awh a khoh hlâta nâma ta ei thôh eina papha aw chi,” tah ta.
35 Pity ta a hnohta, “Na thina liata thi hra aw sala, châ papha cheita aw va na,” tah ta. Cha hawhna hra chata pachupa zydua tah chyu ei ta.
Kesemani liata thlah a chhâ(Mk 14:32-42; Lk 22:39-46)
36 Chatawhcha Zisu a pachupazy chhaota Kesemani ama tahpa lâna chata sie ei ta, ama hnohta, “Hao liata thlah ei kei chhâ chhôhta he liana heta a vaw tyuh teh u,” tah ta.
37 A hnohta Pity nata Zebadi sawchapawpa pano a chhi ta, pachârôh ngaitapa ta atymâ pathao ha ta.
38 Chatawhcha ama hnohta, “Ei palôhrupa pachârôh ngaita kaw ta, thina taihta a châ; he liana heta y ula, na vaikhei teh u,” tah ta.
39 Chatawhcha bâhta vawh ta, â khu lâta pao ta, “Hy ei Paw y, tah theipa a châ khiahtala, he nyu he rie na khô se; châhrasala keima rei châ leipa ta, na rei sai tlao châ mawh sy,” tahpa ta thlahchhâ ta.
40 Chatawhcha a pachupazy hnohta vaw kua ta, âmo cha a mô thlâhpa ta vaw hmô ta; Pity hnohta, “Aw! nâmo ta dawh kha chhôh chhâ na vaikhei thei vei eichi ma?
41 Ahrohrua ula thlahchhâ teh u, reipasaona liata namâ ngia leina awpa ta; thlahpa ta la a hoh na, sapa deikua a dadie,” tah ta.
42 Chatawhcha ei nona ta vaw heih ta, thlahchhâ heih ta, ‘’Hy ei Paw, he he doh leipa ta khô theipa a châ vei khiahtala, na rei sai châ se,” tah ta.
43 Vaw kua heih ta âmo cha a môpa ta vaw hmô heih ta, ama mo a ku ngâsâ kawpa vâta.
44 Zisu ta âmo cha siesai heih ta, a ei thôhna châta thlahchhâ heihpa ta a rei hmopa kha reih heih ta,
45 Chatawhcha vaw kua heih ta, a pachupazy hnohta, “Kha namâ mô ngâthlâh ha mâ, a pahâ teh u? Moh teh u, a daihti cha a tlô haw, Chyhsa Sawchapawpa he moleipazy ku ta patusapa ta a y aw.
46 Thyu ula, sie suh vy; moh teh u, nâ patusatuh awpa cha â vaw hnia ha na,” tah ta.
Ama patuna nata ama leih na(Mk 14:45-50; Lk 22:47-53; Zh 18:2-11)
47 A rei hai nota Zuda, pahrawhleino hryta pakha kha a vy ta, a hnohta theihthaipa abeizy nata vâtlâh machâzy nata zawpi hluhpi zaozi nata thothuzy a cheipa ta a vy ei ta.
48 A patusatuh awpa khata ama hnohta pahnona pie ha ta, “Ahyrai ei sypa maih cha, cha chyhsa cha a châ; ano cha patu muh vy,” tahpa ta.
49 Zisu cha thlai pangai ta, “Pachutuhpa, tlâh mah y,” tahpa ta. Ano thlai sy pâ haw ta.
50 Zisu ta a hnohta, “Kaduapâh, nâ vy chhâpa cha tao mah y,” tah ta. Cha pata nahta Zisu cha thlai chahnaochakhipa ta patu haw ei ta.
51 Zisu pachupazy hryta pakha chata a ku paza ta a zaozi phia ta chhawh ta, theihthaipa beipa sei chhawh ta a nahkao pathai haw ta.
52 Chatawhcha Zisu ta a hnohta, “Na zaozi kha a sona liata soh teh; zaozi a hmâhpa maih zaozi ta ama leidia aw.
53 Atahmâ chhao he vâlyuhchâpa sâ charu su hrawhleino hlâta a hluh via, na vaw tuapa awpa ta, ei Paw hnohta a haw thei leipa ta eina pangiasa eichi mâ?
54 Châhrasala cha hawhta tao aw sala, kheihta e Khazohpa Bie he hawhna heta a vaw paki thei aw?” tah ta.
55 Cha dawh liana chata Zisu ta zawpi hnohta, “Phihmâhpa patu awpa hawhta, zaozi nata byuthô chhaota einâ vy hnao eichi tly? Khazohpa achhyna-o liata noh to pachupa ta atyuh tyh na ta, na patu tlôh leipa eichi ta.
56 Châhrasala hrohsopazy reipa a vaw tlô theina awpa ta, he hmo zydua he a vaw y,” tah ta. Cha vâna chata a pachupa zydua cha ano siesaipa ta a râsai khai haw ei ta.
Zisu, Ryureina hmiakô liata(Mk 14:53-55; Lk 22:54-55. 63-71; Zh 18:12-14; 19:24)
57 Zisu patutuhpazy ta Theihthai Beichaipa Kaiapha o liata, Ryhpa pachutuhpazy nata machâzy y pakhyna liana chata ano a chhi ei ta.
58 Pity deikua chata lâhlapi ta ano cha zi ta, Theihthai Beichaipa o dôhna tlôna taihta, a chhâna hmô awpa ta a chhôh a kei ngia ta, seizy hryta a tyuh ta.
59 Theihthaipa beizy nata ryureituhpa zydua cha Zisu ama thie theina awpa ta a leih-na tlua ei ta,
60 pahnokheituhpa pakheipa hluhpi a vy hra ei sala, hmô tlôh leipa ei ta. Ataviapa ta chyhsa pano a vy ei ta,
61 “He chyhsa heta, ‘Khazohpa achhyna-o he phiepa ta noh thôh chhôh ta ei padua heih aw,’ a tah,” tah ei ta.
62 Theihthai Beichaipa cha thyu ta a hnohta, “Achhyna awpa pahno va chi ma? He chyhsazy ta ama cha leih-na he kheihta e a châ?” tah ta.
63 Zisu deikua cha a chalih thlâh ha ta, Chatawhcha Theihthai Beichaipa chata a hnohta, “Khazohpa hrohpa moh ta bie ei cha pie na, Khazohpa Sawchapawpa, Mesiah cha na châ ma maniah chho teh,” tah ta.
64 Zisu ta a hnohta, “Châ chah â. Châhrasala ei cha chho ei chuh, Chyhsa Sawchapawpa he Hmotaotheina chachâh lâta a tyuh ta, vâ meihdo liata a vypa nama hmô aw,” tah ta.
65 Cha pata nahta Theihthai Beichaipa cha a poh hrie ta, “Khazohpa a reipachhie chaimâh tlai na. Pahnokheituhpa khazia eima khoh hlei khao aw? Atahmâ tlai kha Khazohpa a reipachhiena cha nama thei khai mâ tâh.
66 Kheihta e nama pachâ?” tah ta. A chhypa ta, “A thi tlâh a châ na,” tah ei ta.
67 Chatawhcha a hmia liata pachhao ei ta, chhei ei ta; thokha ta,
68 “Ahy e châ chhei maniah chho teh. Mesiah chi cha?” tahpa ta chabai ei ta.
Pity ta Zisu a paphasai(Mk 14:66-72; Lk 22:56-62 Zh 18:15-18, 25-27)
69 Pity cha o dôhpa khôtho lâna cha a tyuh ta. Laihsa pakha a hnohta a vy ta, “Nâ chhao he Zisu, Kalili chyhsa hnohta a ypa na châ he,” tah ta.
70 Ano chata, “Na bie reipa cha pahno va na,” tahpa ta ama zydua mohmô ta a papha ta:
71 tlyhmia a kei pua pata nahta laihsa hropa ta vaw hmô ta, cha liata a ypazy hnohna chata, “He chyhsa he Zisu. Nazari chyhsa hnohta a ypa ma a châ mawh,” tah ta.
72 “He chyhsa he pahno va na,” tahpa ta chhiesapa ta a paphasai heih ta.
73 Buakhata padaita a kiapâh liata a duahpazy chata Pity hnohta, “Nâ chhao ama hry liatahpa na châ tlai na, na reihpathliena liata nâ hno thlâh ha na,” tah ei ta.
74 Chatawhcha Pity chata, “Cha chyhsa cha pahno va na,” tahpa ta chhie a sakhâh ta. Cha khai pata nahta awh khoh pâ ha ta.
75 Pity cha Zisu ta, “Awh a kho hlâta ei thôh einâ papha aw chi,” a tahpa kha a thei ta. Pua ta, thata cha ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |