Pharisaizy nata Ryhpa pachutuhpazy a reipachhiena (Mk 12:38-40; Lk 11:37-54; 20:45-47)
1 Chatawhcha Zisu ta zawpizy nata a pachupazy hnohta bie reih ta,
2 “Ryhpa pachutuhpazy nata Pharisaizy cha Mawsi dyuchhai liata atyuh tyh ei ta;
3 ama cha chhopa maih cha tao ula, zyh lymâ teh u; ama hmotao hawpa deikua cha tao hra khah u; pachu la pachu tyh ei ta, châhrasala tao tyh tlôh veih ei.
4 Phaohri ngaitapa tao ei ta, chyhsa ngiatlâh liata pahnieh tyh ei ta; âmo deikua cha ama ku parota chhaota pasi kho veih ei.
5 Ama hmotaopa zydua cha chyhsa hmôpa ta tlao ama tao tyh; amâ kypa nata ama khopa cha paphia ei ta, ama pohpai pasihsa ei ta,
6 kyhchhina liata su pha chaipazy, a pakhyna-o liata atyuna pha chaipazy,
7 sôhdaona su liata anaohna zy, chyhsa ta rabai ama tahpa zy pasô kaw tyh tlôh ei ta.
8 Nâmo deikua cha rabai bipa ta y kha u, nama pachutuhpa cha pakha dei châ ta, nâmo zydua cha unawh châ tlôh ei chi ta.
9 Chatawhcha alei chô liata ahyhmah ta paw bi kha u, nama Paw cha pakha dei a châ, avâ liatahpa khih.
10 Pachutuhpa tahpa ta y hra kha u, nama pachutuhpa cha pakha dei a châ, Mesiah chuh.
11 Nama hryta a rôhnah chaipa cha nama chakaotuhpa ta tlao a y aw;
12 ahyrai apasâhsapa maih, ama nawh aw, ahyrai apanawhpa maih palyupalihpa ta ama y aw.
13 “Châhrasala nâmo Ryhpa pachutuhpazy nata Pharisaizy a haiphiahpa saih u, nama hu a po na! Chyhsazy chata vârâh Khihnarâh khaw tyh tlôh eichi ta, nâmo ta a ngia tlôh leipa eichi ta, chyhsazy a ngia awpa chhao pasai hra vei eichi.
14 “Ryhpa pachutuhpazy nata Pharisaizy haiphiahpa saih u, nama hu a po na! Nôhmeizy sôh nie khai eichi ta, alâhâhpa ta a pasihpa ta thlah chhâ eichi ta; cha vâna chata nâmo cha zeina a tha viata nama hmô aw.]
15 “Nâmo Ryhpa pachutuhpazy nata Pharisaizy haiphiahpa saih u, nama hu a po na! Phohlypa pakha chhao tao awpa ta, tilaipi nata tlâh padô tlôh eichi ta, phohlypa a vaw châ pata nahta, ano cha nâmo lie no ta hriena su sawchapawpa ta nama tao tyh.
16 “Nâmo chhihthatuhpa mochaopazy, Ahyrai achhyna-o reipa ta chhie a sapa maih, cha cha khâpahmah châ vei; ahyrai achhyna-o ngôh reipa ta chhie a sapa maih deikua cha patlôpa a châ aw,’ a tahtuhpa saih u, nama hu a po na!
17 Nâmo ahrupa mochaopazy saih u! A kheihawhpa e a rôhnah via, ngôh ma, achhyna-o ngôh pathaisatuhpa cha?
18 Ahyrai maisâh reipa ta chhie a sapa maih, khâpa hmah châ vei; maisâh chô liata hmopiepa reipa ta chhie sapa maih deikua cha patlôpa a châ,’ nama tah.
19 Nâmo mochaopazy saih u! A kheihawhpa e a rôhnah via, hmopiepa ma, maisâh, hmopiepa a pathaisatuhpa cha?
20 Chatanachata ahyrai maisâh reipa ta chhie a sapa maih cha, maisâh nata a chô liata a ypa zydua reipa ta chhie a sa tyh;
21 ahyrai Khazohpa achhyna-o reipa ta chhie a sapa maih cha, Khazohpa achhyna-o nata a chhôh liata a pahrâpa cha reipa ta chhie a sa tyh,
22 ahyrai avâ reipa ta chhie a sapa maih cha, Khazohpa dyuchhai nata a chô liata atyuhpa reipa ta chhie a sa tyh.
23 “Nâmo Ryhpa pachutuhpazy nata Pharisaizy haiphiahpa saih u, nama hu a po na! Chatani zy, sysadi zy, sykathu zy su hrawh liata su kha pie tyh eichi ta, ryhpa bie a byuh viapa ryureina siana zy, ngiachhiena zy, ngâchhihna zy cha tao leipa eichi ta; hezy he nama taopa raina a châ, a hropazy chhao diathlâ leipa ta.
24 Nâmo chhihthatuhpa mochaopa, thlohmiazy adi eichi ta, râraoseipa tlao a palâ tyhpa saih u!
25 Nâmo Ryhpa pachutuhpazy nata Pharisaizy haiphiahpa saih u, nama hu a po na! Nyu nata beikoh a khôtho lâ deikua pasi eichi ta, a chhôh lâ deikua cha karâhneina nata a sohsi thei leina ta bie tlôh ta.
26 Nâ Pharisai mochaopa! Nyu nata beikoh a chhôh lâ cha pasi tua teh, a khôtho lâ chhao a vaw pathaih thei nawpa ta.
27 “Ryhpa pachutuhpazy nata Pharisaizy haiphiahpa saih u, nama hu a po na! Thlâ hlyu ngyuhpa hniapa, a khôtho lâ a ngia ngâsâpa ta a lâ ta, a chhôh lâ deikua cha athihpa ruzy nata a puapa ta a biepa hawhpa cha châ tlôh eichi ta.
28 Nâmo chhao chyhsa mohmô ta a sia ngaitapa ta a lâ tyh eichi ta, nama chhôh liata deikua cha haiphiana nata moleina ta a bie tyh.
29 “Nâmo Ryhpa pachutuhpazy nata Pharisaizy haiphiahpa saih u, nama hu a po na! Hrohsopazy thlâ ozy sa eichi ta, chyhsa siapa thlâzy chhao nama tobi,
30 ‘Eima mahpawzy hro no khata vaw y hra ei sih la, hrohsopazy thisaih ama palona liana chata, a hlao hra aw ma pi,’ nama tah tyh.
31 Chatanachata hrohsopazy thietuhpa sawzy nama châ tahpa nâmosasyh ta nama pahnosa.
32 Nama mahpawzy vaw tao hapa cha tlao patlô lâlao teh u.
33 Parih saih u, vâzi pathla saih u, hrienasu ryureina cha kheihta e namâ khôkhâh thei aw?
34 Chatanachata nama hnohta hrohsopazy, chyhsa sopazy, Ryhpa pachutuhpazy ei vaw tuah aw, thokha thi aw eichi ta, kraws liata nama khaipâ aw, thokha cha namâ pakhyna-o liatazy savori ta chhei aw eichi ta, khi tota nama pasipasaw lymâ aw.
35 Abela chyhsa sia ngaitapa thisaih lona tawhta Khazohpa achhyna-o nata maisâh likawh ta Barakia sawchapawpa Zekaria nama thiepa thisaih taihna khata, alei chô liata chyhsa siapa thisaih ama palopa zydua cha nâmo chô liata a vaw tlô thei aw.
36 Hmeihseihta ta, ei cha chho ei chuh, he zydua he atahmâ ta thyutliazy chô liana heta a vaw tlô thei aw.
Zerusale a chakheina(Lk 13:34-35)
37 “Hy Zerusale, Zerusale, hrohsopazy a thietuhpa, na hnohta a vaw tuapazy alô ta a vaw saotuhpa! Awhpanô ta a taw a mathlaw ry ta a khupa hawhta, na sawzy ei khazie khupa khoh na ta, châhrasala khoh tlôh leipa eichi ta!
38 Nahthlie teh u, nama o cha a ruapa ta siesaipa ta a y haw.
39 Ei cha chho ei chuh, “Abeipa moh ta a vypa cha reithaipa ta y se,’ nama tah hlâ lei cha, atahmâ tawhta na hmô khao veih eichi hih,” tah ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |