Zerusale â ngia noh (Mk 11:1-11: Lk 19:28-40; Zh 12:12-19)
1 Zerusale amâ hnia nahta Bethapha, Ôli tlâh lâta a vy ei ta, Zisu ta a pachupazy pano tuah ta,
2 ama hnohta, “Nama hmiakô liata khih lâta vawh ula, alâ buhpa, a kiapâh ta a taw chhaota thlai nama hmô aw, pathlâ ula a vaw chhi teh u.
3 Ahyrai ta nama hnohta khâparai reih ei sala, “Abeipa ta a khoh,” tah aw eichi ta, ano chata thlai a cha pasai aw ei,” tah ta.
4 He he hrohsopa pakah ta;
5 Moh te, na beipa cha a reisipa ta,alâ chô liata, alâ taw chô lia tlaita kiapa ta nâ lâ a vy awna tahpa ta.Zaio sawchanônô cha chho teh,”tahpa ta a reipa kha a vaw tlô thei nawpa ta.
6 Chatanacha a pachupazy cha vawh ei ta, Zisu ta a chhopa hawhna khata tao ei ta;
7 alâ nata a taw cha a vaw chhi ei ta, ama chôta pohzy padia ei ta, a chôta a kiah haw.
8 Zawpi hluhpi ta lâthlôh liana chata ama pohzy phaw ei ta, a hrohpazy ta thobuhzy chhawpa ta lâthlôh liata phaw hra ei ta.
9 Chatawhcha zawpi Zisu hmialâ a siepa nata a hnôh lâta a zipazy chata, “Davi Sawchapawpa hnohta Haozana! Abeipa moh ta a vypa cha reithaipa ta y mawh sy! Chônôchai ta Haozana y se!” tahpa ta awh ei ta.
10 Zerusale liata a ngia nahta, a khihpi ta, “He chyhsa he ahy e a châ?” tahpa ta a chalyu hôlô ei ta.
11 Zawpizy chata, “He he hrohsopa Zisu, Kalili râh liata Nazari khih tawhtapa a châ,” tah ei ta.
Achhyna-o a pathai(Mk 11:15-19; Lk 19:45-48; Zh 2:13-22)
12 Zisu Khazohpa achhyna-o liata a ngia ta, cha liata hmo a chaleituhpa nata zuahtuhpa zydua cha papua ta, tâkâ a rituhpa tlâhkhaizy nata pivaw a zuahtuhpa dyuchhaizy chhao cha chati pathlah ta.
13 Ama hnohta, “Ei o cha thlahchhâna o ama tah aw, tahpa ropa châ tlôh ta; nâmo deikua chata parutuhpazy lôpu ta nama tao,” tah ta.
14 Achhyna-o liana chata mochaopazy nata pheisypazy a hnohta a vy ei ta, âmo a patlâhsa.
15 Châhrasala theihthaipa beizy nata Ryhpa pachutuhpazy chata a hmonoâhpa taopazy nata hawtipazy ta achhyna-o liata, “Davi Sawchapawpa hnohta Haozana!” tahpa ta ama awpa ama hmô nahta ama hie hâh ngaita ta;
16 a hnohta, “He sahlao biereipazy he na thei ma?” tah ei ta. Zisu ta ama hnohta, “Thei chah â; ‘Hawsaihzy nata sâhpi a pazy haipazy pakah liata a puapa chata reithaina a paki haw’, tahpa he reih beih eichi ma?” tah ta.
17 Âmo cha Zisu ta siesai ta, khihpi tawhtapa cha Bethani lâta sie ta, cha liana chata a rie haw.
Theiku liata chhie a sapa(Mk 11:12-14, 20-26)
18 Khihpi lâta a kua heih nota, a no vaw di ha ta.
19 Lâthlôh kiah liata theiku kô hmô ta, kei pangai ta, a hna dei leipa ta cha khâpahmah ta hmô leipa ta. Thokô hnohta, “Chhâzaw ta vaw pathei khao khah y,” tah ta. Chatawhcha theiku cha thlai uah pâ ha ta.
20 A pachupazy chata cha cha ama hmô nahta, “Kheihtazie e, theiku cha thlai a uah thlâh ha tly?” tahpa ta ama noâh kaw ta.
21 Zisu ta ama hnohta, “Hmeihseihta ta, ei cha tah ei chuh, ngiapâna hneipa ta alôhleipa ta nama y vei khiahtala, theiku chô liata tahpa hawh dei tah aw veih eichi, he tlâh hnoh chhao heta, ‘A pasie la, tilaipi liata a thy teh,’ nama tah khiahta cha, nama tahpa hawhta a vaw y aw.
22 Ato ngiapâna chôta thlahchhâna ta nama hiapa maih cha nama hmô aw,” tah ta.
A biehneina ama hiahri(Mk 11:27-33; Lk 20:1-8)
23 Zisu achhyna-o liata a ngia ta, a pachu nona chata, theihthaipa abeizy nata vâtlâh machâzy cha a hnohta a vy ei ta, a hnohta, “Ahy bie ta e, he hmozy he na tao, ahy e bie châ pie?” tah ei ta.
24 Zisu ta ama hnohta, “Kei chhaota bie kawh kha ei cha hiahri hra aw ei; cha cha eina chho khiah eichi la, kei chhaota ahy bie ta ma he hmozy he ei tao ei cha chho aw ei.
25 Zawhana bâtina kha khataih tawhtapa e? Avâ tawhtapa ma, chyhsapa tawhtapa?” tah ta. Chatawhcha pachâ ei ta, “Avâ tawhtapa,” eima tah khiahta cha, ‘Khazia e a bie nama zo vei?’ maniah tah tlôh aw ta,
26 ‘Chyhsapa tawhtapa,’ eima tah khiahta cha zawpi cha chi tlôh pi; chyhsa zydua ta Zawhana cha hrohsopa ta ama ngiapâpa châ tlôh ta,” tah ei ta.
27 Chatanachata Zisu a chhy ei ta, “Pahno ma pi,” tah ei ta. Ano chhao chata ama hnohta, “Kei chhaota ahy bie ta e, he hmozy he ei tao tahpa cha chho hraw aw veih ei na,” tah ta.
Sawchapawpa pano pakhona
28 “Cha khiah la nâmo ta kheihta e nama pachâ? Chyhsa pakha ta sawchapawpa pano hnei ta; a hmia tuapa hnohna chata, ‘Ei saw, sie la atanoh kresadô liata va hria teh,’ tah ta.
29 Ano chata, ‘Sie aw va na,’ tah ta a chhy ta; châhrasala ataviapa ta a palôh a vaw nano ta, sie ha ta.
30 Chatawhcha pakhapa hnohna chata vawh ta, cha hawhna hra chata tah ta; ano chata, Abeipa ei sie aw,’ tah ta a chhy ta; châhrasala sie tlôh leipa ta.
31 Cha panopa hry liana chata ahy e a paw kho viapa a tao tly?” tah ta. Âmo chata, “A hmia lâtahpa khawh,” tah ei ta. Zisu ta ama hnohta, “Hmeihseihta ta, ei cha chho ei chuh, chhiekheituhpazy nata sihryhpazy chata Khazohpa Khihnarâh tlao a châ ngiakhâh aw ei hih.
32 Zawhana cha chyhsa siapa hawhta nama hnohta a vy ta, ano cha a ngiapâ tlôh leipa eichi ta, châhrasala chhiekheituhpazy nata sihrypazy chata ano cha a ngiapâ ei ta; nâmo ta cha cha nama hmôpa chhaota ano cha namâ ngiapâ thei awpa ta rôh hlei leipa eichi ta.
Kresadô nata lyu mokhâhtuhpa pakhona(Mk 12:1-12; Lk 20:9-10)
33 “Pakhona bie a hropa nahthlie teh u. Chyhsa pakha o hneituhpa y ta, cha chata kresadô tao ta, diahpai ta dôh ta, kresaona khaoh chao ta, o sâhpa sa ta, lyu mokhâhtuhpazy hnohta pathlyusa hlao awpa ta pie ta, râh hro lâta sie ha ta.
34 A thei lyu a daih nah chata, a thei la awpa ta a mokhâhtuhpazy hnohta a seizy tuah ta;
35 lyu mokhâhtuhpazy chata a seizy cha vaw patu ei ta, pakha cha tu ei ta, pakha ama thie, pakha alô ta ama vawh,
36 Sei hropazy a hmia lâtahpa hlâta a hluh viata tuah heih ta; âmo chhao cha ama hmialâ tahpazy ama taopa hawhna khata tao heih ei ta.
37 A chhâ chaina lâ deikua chata, ‘Ei sawchapawpa he cha ama za aw,’ tahpa ta a sawchapawpa cha ama hnohta tuah ta.
38 Châhrasala lyu mokhâhtuhpazy chata sawchapawpa cha, ama vaw hmôpa ta nahta, ‘He chyhsa he ryutotuh awpa cha a châ; a vy ula, thie suh vy, a ryuto awpa he keimo eima hnei na hâh ta,’ a tah ei ta.
39 Chatanachata ano cha patu ei ta, kresadô tawhna chata papua ei ta, ama thie haw.
40 Cha kresadô a hneituhpa cha a vy tita, cha lyu mokhâhtuhpazy chô liana chata kheihta e a vaw tah aw tly?” tah ta.
41 Âmo chata a hnohta, “Cha moleipazy cha riethei ngaitapa ta pahleipadia aw ta, kresadô cha lyu mokhâhtuhpazy a hropa, a lyu daihti maihta a theizy cha a hnohta a pie lymâ awpazy hnohta pathlyusa hlao awpa ta a pie aw,” tah ei ta.
42 Zisu ta ama hnohta, “Khazohpa châ liata;O satuhpazy alô kho leipa kha,cha tlai cha a ki liata alô phahnai chaipa a vaw châ haw;cha cha Abeipa taopa châ ta,eima mohmô liata noâhpa a châ’,tahpa he reih beih veih eichi ma?
43 Cha vâna chata Khazohpa Khihnarâh cha nâmo tawhtapa lapa châ aw ta, a pathei awpa pho hnohta piepa a châ aw, tahpa ei cha chho ei chuh.
44 Ahyrai cha alô chô liata a paopa cha kai aw ta; a vipa chhochhi cha a charoh pazao aw.” tah ta.]
45 Theihthaipa beizy nata Ryhpa pachutuhpazy a pakhona biezy cha ama pahno nahta, âmo thâtih a reih tahpa pahno haw ei ta.
46 Chatawhcha ano cha patupa khoh ei ta, châhrasala zawpizy cha chi tlôh ei ta, hrohsopa ta ama ngiahpa vâta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |