Bâtituhpa Zawhana thina (Mk 6:14-29; Lk 9:1-9)
1 Cha nona chata Herawda, Kalili râh liata ryureituhpa ta Zisu thâtih thei ta;
2 a seizy hnohta, “He he Bâtituhpa Zawhana cha a châ, athihpa hry liatahpa a thyu heih hih; chavâta he hmotaotheina he ano liata a y,” tah ta.
3 Herawda chata a unawhpa Phili lahpinô Herawdi vâta Zawhana patu ta, chahry ta alô-o liata a khô;
4 Zawhana ta a hnohta, “He chanô he na châta hneipa ta âna na” a tahpa vâta.
5 Herawda ta he vâna heta ano thiepa khoh ta, châhrasala zawpizy chi ta, Zawhana cha hrohsopa a châ tahpa ama pangiasapa vâta.
6 Herawda pina noh a vaw tlô nahta, Herawdi sawchanônô lâh ta Herawda palysa nawpa ta a viasazy hmiakô ta lâh ta,
7 cha vâna chata a hiapa maih pie awpa ta chhiesapa ta bie liahsa a taih ha tlôh ta.
8 A nô ta pasyu ta, a hnohta, “Bâtituhpa Zawhana luh cha he liana heta beihko ta na vaw pie teh,” tah ta.
9 Herawda cha a pei tah ngâsâ ta; châhrasala a viasazy hmiakô ta pie awpa ta bie â taih hapa vâta a hiapa cha pie awpa ta biepie ha ta;
10 chyhsa tuah ta, lô-o liata Zawhana luh cha a pataisa haw.
11 A luh cha beikoh ta vaw cheih ei ta, laihsapa hnohta pie ei ta, ano chata a nô cha a pie haw.
12 Cha khai nah chata Zawhana pachupazy cha a vy ei ta, a pôhpa cha la ei ta, ama pabu haw; chatanachata sie ei ta. Zisu hnohta a thâtih cha ama chho.
Sâh pangawh rih a pabie(Mk 6:30-44; Lk 9:10-17; Zh 6:1-14)
13 Zisu ta cha cha a thei nahta, balyh ta su dâhpa lâta sie nano ha ta. Zawpi ta ama pahno nahta, khihpizy tawhtapa cha ama phei ta siepa ta ano zi haw ei ta.
14 Zisu ngiakâh a pua nahta, zawpi a hluhpi hmô ta; âmo ngiachhie ngâsâ ta, ama hryta a tlâhleipa cha a patlâh ei.
15 Zâlâ a vaw châ nahta, a pachupazy cha a hnohta a vy ei ta, “Su dâhthlohpa liata y tlôh pi ta, zâlâ ha ta, zawpizy he khihzy lâta atahmâ pasiesa la, niepa ama chalei na hâh ta,” tah ei ta.
16 Zisu ta, “Ama sie awpa byuh vei; nâmo ta niepa pie teh u,” tah ta.
17 Âmo chata a hnohta, “Viahchhâ miapangawh nata nga miano dei leipa cha khâpa hmah hnei ma pi,” tah ei ta.
18 Zisu ta, “Ei hnohta vaw cheih teh u.” tah ta.
19 Zawpizy cha sibiepa chôta atyuh awpa ta biepie ta; viahchhâ miapangawh nata nga miano cha a ku ta la ta, avâ lâ uapa ta alyna bie reih ta, viahchhâ cha eichheih ta a pachupazy hnohta, zawpizy hnohta pie awpa ta a hlâ haw.
20 Ama zydua ta nie ei ta, ama rih a bie khai haw. Ama nie laipa chhao hrâbyh hmo hrawhleino a huah ei ta.
21 A niepa zydua cha chanô nata hawtizy rei leipa ta, pitlopa sâhpangawh ama châ.
Tilaipi chôta a sie(Mk 6:45-52; Zh 6:16-21)
22 Zawpizy a pasiesa hai nota a pachupazy cha balyh ta haosâ lâ pasiesa chhielie ta.
23 Zawpizy liahsa a pasiesa khai nahta, ano deita ta thlahchhâ awpa ta tlâh lâ kiah ta. A vaw zâlâ nahta, ano deita ta cha liana cha y thlâh ha ta,
24 balyh cha ngiakâh tawhta a hlapi ta y ta, chalâhparâpa ta phaoh pahai ngâ ta; thlih chhao cha su ngâ ta.
25 Chatawhcha awhkho ta tilaipi chôta ama hnohta phei ta siepa ta vawh ta.
26 A pachupazy deikua chata tilaipi chôta a siepa ama hmô nahta, chi ngâsâpa ta aw ei ta, “Thlahhmihpa na a châ ei aw,” tah ei ta.
27 Châhrasala ama hnohta, “Chi khah u, keima na ei châ, thlahlôhpa ta y teh u,” tahpa ta âmo thlai chho ta.
28 Pity ta a hnohta, “Abeipa, nâma na châ khiahtala ti chô liata nâma hnohta ei vy awpa ta na pasai teh.” tah ta.
29 A hnohta, “A vy teh,” tah ta. Pity cha balyh tawhta thlai chô ta, ti chô liata Zisu lâ pangaipa ta sie ta;
30 châhrasala thlihpipa cha a hmô nahta, chi ha ta, a pamôh pathao ha ta, “Abeipa, na pachha teh,” tahpa ta awh ta,
31 Zisu ta thlai kei paza ta, va patu ta, a hnohta, “Hy angiapâ chyhpa, khazia e nâ lôh vei?” tah ta.
32 Balyh liata amâ ngia nata thlihpipa cha a chalih ha ta.
33 Balyh liata a ypa zydua ta amâ ngia nahta, ano anaohpa ta, “Khazohpa Sawchapawpa na châ hmeihseih tlai na,” tah ei ta.
Kenesare liata tlâh leipa a patlâh(Mk 6:53-56)
34 Haosâ lâ ama chaka nahta, Kenesare râh lâta tlô ei ta.
35 Cha su liata chyhsazy chata ano ama pahno pata nahta, cha chheipâh râh chyhsa zydua cha pahnosa ei ta, tlâh leipa zydua a hnohta a vaw chhi ei ta,
36 a poh pawhmao deita hriapa ta ano hiah chaimâh ei ta; a hriapa mai cha ama tlâh haw.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |