Ngiana amâ hnaw (Mk 8:11-13; Lk 12:54-56)
1 Pharisaizy nata Saduasizy a vy ei ta, ano pasia nawpa ta avâ tawhtapa ngiana âmo pamosa awpa ta hiah ei ta.
2 Ano chata ama hnohta, [“Zâlâ a vaw châ nahta, ‘Noh a pha aw; avâ saih tlôh ta,’ tah eichi ta.
3 Chatawhcha my nah chata, ‘Atanoh avâ a neih aw, avâ saih ta, panoh tlôh ta,’ tah tyh eichi ta. Avâ yzie chhopasiana pahno eichi ta, daihti ngianazy deikua cha pahno thei veih eichi.]*
4 Chhâ moleipa nata apheipazy ta ngiana tlua tyh ei ta, châhrasala Zawna ngiana dei leipa ta cha ama hnohta ngiana rai piepa châ aw vei,” tahpa ta a chhy ta. Âmo siesai ta, sie syulyu ha ta.
Pharisaizy nata Saduasizy thinô(Mk 8:14-22)
5 A pachupazy cha haosâ lâ ama tlô nahta, viahchhâ ama cheipa my haw ei ta.
6 Zisu ta ama hnohta, “Pharisaizy nata Saduasizy athinô liana chata a vaih ula, a chado teh u,” tah ta.
7 Âmosasyh ta, “Viahchhâ a vaw chei tlôh pi va,” tahpa ta pachia ei ta.
8 Zisu ta cha cha a pahno nahta, “Angiapâ chyhpa saih u, khazia e viahchhâ nama hnei leipa vâta namâ eichhia ngâ tly?
9 Pahnopasia to veih eichi ma? Chyhsa sâh pangawh, viahchhâ tlâ pangawh ta a daih ta, a laipa hrâbyh khazie e namâ huah pahno thlâh ha veih eichi ma?
10 Chyhsa sâh palih, viahchhâ tlâ sari nata nama hrâbyh pabiepa zie chhao kha pahno thlâh ha veih eichi ma?
11 Viahchhâ thâtih nama hnohta reih va na tahpa khazia nama pahno vei? Pharisaizy nata Saduasizy thinô liata deikua chata a chado teh u,” tah ta.
12 Cha khainah chata viahchhâ thinô liata a chado awpa ta chho leipa ta, Pharisaizy nata Saduasizy pachuna liatahpa a chado awpa ta a châ tahpa pahno haw ei ta.
Pity ta Zisu a palâhâhna(Mk 8:27-30; Lk 9:18-21)
13 Zisu Philipi Kaisaria bia a vaw tlô nahta, a pachupazy hnohta, “Chyhsazy ta Chyhsa Sawchapawpa he ahy na a châ ama tah?” tahpa ta hiahri ta.
14 Âmo chata, “Thokha ta Bâtituhpa Zawhana a châ ama tah, thokha ta Elaiza a châ ama tah, thokha ta Zeremiah tlyma hrohsopa ahy tlyma a châ ama tah,” tah ei ta.
15 Ano chata ama hnohta, “Cha khiahla nâmo zaw ahy a châ eina tah eichi?” tah ta.
16 Saimaw Pity ta, “Mesiah cha na châ, Khazohpa hrohpa Sawchapawpa cha,” tahpa ta a chhy ta.
17 Zisu ta a hnohta, “Saimaw Zawna sawchapawpa, na nohhlao na! Sapa nata thisaih ta a cha pahnosapa châ tlôh leipa ta, ei Paw avâ liatahpa ta a cha pahnosapa tlao a châ.
18 Chatanachata nâ Pity,* na châ tahpa ei cha chho, he lôpanô chô liana heta ei awnanopa padua aw na ta, thina hmotaotheina ta pahni leipa aw ta.
19 Vârâh Khihnarâh châhbizy cha pie aw na ta, alei liata khâparai na pakhâpa maih, avâ liata pakhâpa a châ aw, alei liata khâparai na pasaipa maih, avâ liata pasaipa a châ aw,” tah ta a chhy ta.
20 Chatawhcha Zisu ta Mesiah a châ tahpa ahy hmahta chho lei awpa ta a pachupazy cha bie liahsa taih ha ta.
Zisu ta a thi nawpa a reihchhielie(Mk 8:31-9:1; Lk 9:22-27 )
21 Cha khai tawhna chata Zisu ta a pachupazy hnohta Zerusale lâ a khy awpa nata machâzy, theihthaipa beizy, Ryhpa pachutuhpazy ta pasa thata ama pataosa awpa nata, ama thie awpa nata noh thôh noh ta pathyupa ta a y awpa pahnosa pathao ta.
22 Pity ta ano cha a chhi nano ta ra pathao ta, “Abeipa, Khazohpa ta pasai kha se! Cha cha na chôta tlô chachei lei awpa ta,” tah ta.
23 Ano chata Pity lâta a heih ta, a hnohta, “Sâtâ, ei hnôh lâta sie teh! Ei châta a hluana na châ he; Khazohpa hmozy pachâ leipa ta, chyhsapa hmozy tlao na pachâ via he,” tah ta.
24 Chatawhcha Zisu ta a pachupazy hnohta, “Ahyrai ta na zi khohpa ta cha, ama rietheina papeisa leipa ta, kraws pupata na zi se.
25 Ahyrai a hro pabohsa khohpa ta cha a pahlei aw, ahyrai keima vâta a hro a pahleipa maih cha a pabohsa aw.
26 Chyhsa ta khizaw he a pôhpalôhpa ta hnei sala, a hrona pahlei tlôh sala, a châta khâpa e a phahnai aw? Cha leipa ta chyhsa ta a hrona vyuhpa ta khâpa e a pie aw?
27 Chyhsa Sawchapawpa he a vâlyuhchâpazy nata a Paw rôhnahna chhaota a zu tlôh aw ta, cha tina chata chyhsa to ama hmotaopa chyu hawhta a thô sai aw ei.
28 Hmeihseihta ta, ei cha tah ei chuh, he aduahpa hry liana heta, Chyhsa Sawchapawpa a Khihnarâh liata a zupa ama hmô hlâ lei cha thina a padi chachei lei awpa ama y,” tah ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |