Bâtituhpa Zawhana ta a pachupazy a tuah (Lk 7:18-33)
1 Zisu ta a pachupa pahrawhleinozy bie a pie khai nahta, cha tawhna chata pachu awpa nata bie chho awpa ta ama khihpizy lâta sie ta.
2 Zawhana ta Krista hmotaopazy cha lô-o liata a vaw pahno nahta, a pachupazy tuah ta,
3 a hnohta, “A vy awpa cha na châ ma, a hropa eima hâ aw ma?” tah ei ta.
4 Zisu ta âmo chhy ta, “Sie ula, nama hmôpa nata nama theipa he Zawhana va chho teh u;
5 mochaopazy ama mo pavâh ta, pheisypazy ama phei ta sie ei ta, aphawhpazy pathaisapa ta y ei ta, nahpâpazy nah pavâpa ta y ei ta, athihpazy pathyupa ta y ei ta, dyhchhiepazy hnohta Thâtihpha chhopa ta a y haw.
6 Ahyrai ei chôta palôh châ leina a hmô leipa cha ama nohlao na,” tah ta.
7 Cha sahlao cha ama sie nahta, Zisu ta zawpi hnohta Zawhana thâtih reih pathao ha ta: “Râhpathohpa liata khâpa mo awpa ta nama pua? Lothi thlih ta a chalyusapa ma?
8 Cha leipa ta khâpa mo awpa ta e nama pua? Chyhsa poh-naipa a bupa mo awpa ta ma? Chyhsa poh-naipa a bupazy cha abei ozy liata ama y.
9 Cha khiahtala khâpa mo awpa ta e nama pua? Hrohsopa mo awpa ta ma? A châna ei cha tah ei chuh, hrohsopa hlâta ano cha a rôhnah viapa a châ.
10 Ano cha Khazohpa châbu ta,‘Moh teh, ei lyuhchâpa na hmia lâta ei tuah,ano chata na hmia lâta na lâpi a chhuahdy aw!’tahpa ta a reipa kha a châ.
11 Hmeihseihta ta, ei cha tah ei chuh, chanô sapa hryta Bâtituhpa Zawhana hlâta rôhnah viapa ta a puapa y veih ei; châhrasala vârâh Khihnarâh liata chyhsa nawh chaipa cha ano hlâta a rôhnah via.
12 Bâtituhpa Zawhana daihti tawhta atahmâ taihta vârâh Khihnarâh cha thata adyupa ta y ta, a dyuhtuhpazy chata tahraruana ta ama la tyh.
13 Hrohsopa zydua nata ryhpa bie chata Zawhana a vaw yna taihta ama chhochhielie tyh.
14 Nama zo khoh khiahta cha he he Elaiza a vy awpa cha a châ.
15 Ahyrai thei nawpa ta nahkhao a hneipa ta cha, thei ei se.
16 “He chhâzy he khâpa nata ma ei pakho aw? Hawtizy sôhdaona su liata atyuh ei ta, ama viasazy ama aw ngâpa a lyu.
17 Ramo cha tôpa pi ta, lâh leipa eichi ta;cha chakhei pi ta, pachârôh tlôh eichi va.’
18 Zawhana cha a vy ta nie leipa ta, doh hra leipa ta, ‘Ahripa a hnei he,’ tah ei ta;
19 Chyhsa Sawchapawpa a vy ta, nie ta, doh ta, ‘Moh teh u, rihkawhpa nata parihmâhpa, chhiekheituhpazy nata moleipazy viasa hu!’ tah tlôh ei ta. Sona cha a hmotaona tawhta a dona zie â lâ,” tah ta.
Molei ro leipa khihpizy hupona(Lk 10:13-15)
20 Chatawhcha ama ro leipa vâta hmonoâhpa a tao hluh chaina khihpizy cha ra ta.
21 “Kôrazi, na hu a po na! Besaida, na hu a po na! Nâmo liata hmonoâhpa taopazy kha Tyre nata Sidaw khih chôta taopa châ sala, latho poh a bupa ta nata buhchâh liata atyuhpa ta amâ rôh ha bâ aw.
22 Châhrasala ei cha tah ei chuh, ryurei nota cha nâmo pasa taopa hlâta Tyre nata Sidaw pasa tao awpa a zie tlao a y via aw.
23 Nâ Kapynia, avâ taihta palyupalihpa ta na y aw ma? Athihpa khih lâta chhipa châ tlôh aw chi ta. Nâma liata hmonoâhpa taopa cha Sawdawma liata nama pasa tao awpa châ sala, atahmâ taihta a y thlâh ha aw.
24 Châhrasala ei cha chho ei chuh, ryurei nota cha nama taopa hlâta Sawdawma râh taopa a zie tlao a y via aw,” tah ta.
Ei hnohta a vy ula, a pahâ teh u(Lk 10:21-22)
25 Cha nona chata Zisu ta reih ta, “Hy ei Paw, avâ nata alei Beipa, nâ ta he hmozy he chyhsa sopa nata novâhpazy hnohta phih chi ta, hawsaihpazy hnohta na phuahpa vâna heta ei châ ly na.
26 A châ tlyh, ei Paw, cha hawhpa cha na kho viapa lâ châ tlôh ta.
27 Ato zydua ei Paw ta eina pie haw; Paw dei leipa ta cha ahy hmahta Sawchapawpa he pahno veih ei, Sawchapawpa nata ama hnohta Sawchapawpa ta a pahnosapa dei leipa ta cha ahy hmahta Paw pahno veih ei.
28 Nâmo hriapasapa nata phaohripa zydua saih u, ei hnohta a vy teh u, cha pahâsa vâ ei na.
29 Ei raopakypa a ky ula, ei hnohta a chu teh u; areisi nata pathipalôh nônaipa ei châ, nama thlahmihpazy châta pahâna nama hmô aw.
30 Ei raopakypa pha ta, ei phao chhao a hua tlôh ta,” tah ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |