Chi hietuhpa pakhona (Mk 4:1-9; Lk 8:4-8)
1 Cha noh lilaw liana chata o tawhtapa Zisu cha pua ta, tilaipi kiah liata a tyuh ta.
2 Chyhsa hluhpi a hnohta a vy pakhy ei ta, balyh liata kiah ta, a tyuh ta; zawpi zydua cha raphyu liata aduah ei ta.
3 Ama hnohta pakhona bie ta bie a hluhpi reih ta, “Chi hietuhpa cha chi hie awpa ta pua ta.
4 Chi a hie nahta, chi thokha cha lâthlôh kiah liata tla ta, pavawzy a vy ei ta, ama dyh khai haw.
5 Chi thokha deikua cha lôphiariapa alei âpapa liata tla ta, alei â chha leipa vâta thlai kaw pyuh ta.
6 Noh a vaw sa nata pa-uasa ha ta; tharipa a hnei leipa vâta a uah haw.
7 Chi thokha cha ahloh hryta tla ta, ahlohzy cha ama kaw laiseih nata disao haw ei ta.
8 Chi thokha deikua cha alei phapa liata tla ei ta, thokha a lie za kha ta, thokha a lie sycharu nata a lie sythôh ta thei ama pathei.
9 Ahyrai nahkhao a hneipa ta cha thei ei se,” tah ta.
Pakhona ta â chhuahpa(Mk 4:10-12; Lk 8:9-10)
10 Chatawhcha Zisu hnohta a pachupazy a vy ei ta a hnohta, “Khazia e, pakhona bie ta ama hnohta na reih?” tah ei ta.
11 Zisu ta âmo a chhy ta, “Vârâh Khihnarâh bierupa pahno awpa ta pasaipa nama châ, châhrasala âmo châta deikua pasaipa châ vei.
12 Ahyrai a hneipa hnohta pie baichha awpa a châ, a hluhpi a hnei theina awpa ta; châhrasala a hnei leipa deikua cha, a hnei chhôhpa chhao la papa a châ aw.
13 He vâna heta ama hnohta pakhonazy ta bie ei reih, hmô ei ta, hmô tlôh leipa ei ta, thei ei ta thei tlôh leipa ei ta, a pachâna ama pahno leipa vâta.
14 Hrohsopa Isai bie chho chhieliepa ama chôta a vaw tlôpa cha a châ:‘Thei la thei aw eichi ta,a pachâna pahno aw veih eichi,hmô la hmô aw eichi ta,a yzie pahnopasia aw veih eichi.
15 He chyhsazy he ama pathipalôh kuh chha ha ta,ama nahzy pâ ha ta, ama mozy paso ha tlôh ei ta, chata leipa tala ama mo ta hmô aw ei ta,ama nah ta thei aw ei ta,ama pathipalôh ta pahno aw ei ta,keima lâta a vaw heih aw ei ta,âmo ei patlâh aw ei.
16 Châhrasala nama mozy a nohlao na, a hmô theipa vâta, nama nahkhaozy a nohlao na, nama thei theipa vâta.
17 Hmeihseihta ta, ei cha chho ei chuh, hrohsopa hluhpi nata mopathaihpa hluhpi ta nama hmôpa he hmô byuh ei ta, châhrasala hmô tlôh ei va, nama theipazy chhao he thei byuh ei ta, thei tlôh lei khâh ei ta.
Chi hiepa yzie Zisu ta a reipasiana(Mk 4:13-20; Lk 8:11-15)
18 Chatanachata chi hietuhpa pakhona bie cha pahno teh u.
19 Ahyrai ta Khihnarâh bie thei ta, a pachâna a pahno tlôh vei khiahtala moleipa a vy aw ta, a pathipalôh liata tu chiehpa cha a chhu tyh; he he lâthlôh kiah liata chi hiepa cha a châ.
20 Alôphiariapa liata chi tlapa cha, chyhsa ta bie a thei pata nahta alypa ta thlai a pyh ta;
21 châhrasala ano liata thari a thla leipa vâta, buakhata dei y thei ta, bie vâta rietheipasana tlyma, taolana tlyma a vaw y nahta thlai pao ha ta.
22 Ahloh hry liata chi a tlapa cha, bie a theipa cha châ ta, châhrasala hro chhôh khihsana nata hneirôh khona chata disao ta, pathei leipa ta a y tyh.
23 Alei phapa liata chi a tlapa deikua cha ahyrai bie cha thei ta, pahnopasia ta, a thei pathei tlai ta, thokha a lie za kha ta, a hropa a lie sycharu ta nata a hropa a lie sythôh ta a pathei,” tah ta.
Sâh hryta sâhpakheipa
24 Ama hnohta pakhona bie hropa reih ta, “Vârâh Khihnarâh cha chyhsa ta a lyu liata chi phapa hiepa nata pakhopa a châ;
25 châhrasala chyhsazy ama mô chhôhta, a khakhaipa a vy ta, sâh hryta sâhpakheipa hie ta, sie syulyu ha ta.
26 Chizy cha vaw laisei ta a su a vaw tao nahta, sâhpakheipa chhao cha a vaw lâ hra.
27 Lyu hneituhpa seizy cha a vy ei ta, a hnohta, ‘Pâpuh, na lyu liata chi phapa hie va chi mâ? Kheihta zie ta he sâhpakheipazy he a vaw pua?’ tah ei ta.
28 Ano chata ama hnohta, ‘Cha cha khakhaipa ta a vaw taopa a châ,’ tah ta. Seizy chata a hnohta, ‘Cha khiahtala, vawh ei si la, va phia ha ei sih la a ryh na tah ma?’ tah ei ta.
29 Ano chata, ‘Châ vei; sâhpakheipazy nama phia khiahtala sâhzy nama phiapa pathlei aw na.
30 Sâh hriana daihti taihta tlao y khoh thlâh ha ei se; chatanachata sâh hriana daihti chata sâh taituhpazy hnohta, sâhpakheipazy hria tua ula, rao awpa ta a piah ta chahry teh u, sâh deikua cha ei sawvâ liata pahmaoh teh u,’ ei tah aw,” tah ta.
Ahrâ chi pakhona(Mk 4:30-32; Lk 13:18-19)
31 Zisu ta pakhona bie hropa ama hnohta reih heih ta. “Vârâh Khihnarâh cha ahrâ chi chyhpa ta chyhsa ta la ta, a lyu liata a hiepa hawhta a châ;
32 chi zydua hryta chyh chai ta, a vaw laiseih nata deikua cha chicheipa zydua hlâta lai chai ta, tho kô a tloh tyh, chatanachata avâ liata pavaw a zawpazy a vy ei ta, a chiahzy liata bu ama tu tyh,” tah ta.
Thinô pakhona(Lk 13:20-21)
33 Pakhona bie hropa ama hnohta reih heih ta, “Vârâh Khihnarâh cha thinô chanô ta la ta, viahdie panuana miathôh hryta pabu ta a zydua ta a thyu khaina taihta a sopa hawhta a châ,” tah ta.
Pakhona biezy hmâpa ta a reih(Mk 4:33 34)
34 Cha hmo zydua cha Zisu ta zawpizy hnohta pakhona biezy ta reih ta; pakhona bie hmâ leipa ta khâpa hmahta ama hnohta reih vei.
35 He he hrohsopa ta:“Pakhona biezy ta ei pakah â aw na ta,khizaw tao pathao tua no tawhta hmo nyupazy cha ei reih aw,”a tahpa kha a vaw tlô theina awpa ta.
Zisu ta sâh nata sâhpakheipa a reipasiana
36 Cha nona chata zawpizy siesai ta, o liana chata a ngia ha ta, cha liana chata a hnohta a pachupazy a vy ei ta, “Ngiachhiepa ta, lyu liata sâhpakheipa pakhona kha maniah chhopasia teh,” tah ei ta.
37 Ano chata a chhy ta, “Chi phapa a hietuhpa cha Chyhsa Sawchapawpa a châ;
38 lyu cha khizaw he châ ta, chi phapazy cha Khihnarâh sawzy he châ ei ta; sâhpakheipazy deikua cha moleipa sawzy ama châ,
39 khakhaipa âmo a hietuhpa cha ahripa a châ; sâh hriana daihti cha khizaw chhâna a châ, sâh atupazy cha vâlyuhchâpazy ama châ.
40 Sâhpakheipazy pahmaohpa ta mei liata raopa hawhta, khizaw chhâna liata a y hra aw.
41 Chyhsa Sawchapawpa ta a vâlyuhchâpazy tuah aw ta, a râh tawhtapa moleina zydua a paysatuhpa nata moleina a taotuhpa zydua a pakhy khai aw,
42 patisana mei liata thy ei ta; cha liana chata chana nata hâriena a y aw.
43 Chatanachata chyhsa siapazy cha noh hawta ama paw Khihnarâh liata ama khai aw. Nahkhao a hneipa ta cha thei se.
Ryuby nyupa
44 “Vârâh Khihnarâh cha lyu liata ryubyh nyupa, chyhsa pakha ta hmô ta, nyu heih ta; a ly tupa vâta sie ta, a hneina zydua zuah ta, cha lyu cha a chaleipa hawhpa he a châ.
Taikulô sôhpa pakhona
45 “Vârâh Khihnarâh cha sôhdaopa taikulô sôhpa a tluapa hawhta cha heih ta,
46 taikulô sôh ngaitapa sâkha a hmô nah ta, sie ta a hneina zydua ta a chaleipa hawhta a châ.
Sao pakhona
47 “Vârâh Khihnarâh cha tilaipi liata sao vawpa, nga chi to a khu khaipa hawhta a châ;
48 cha cha a bie pata nahta ngapatutuhpazy ta ngiakâ lâ a daophi ei ta, atyuh ei ta, nga phapazy cha hrâbyh liata soh ei ta, a chhiepa deikua cha ama thy.
49 Cha hawhna hra chata khizaw chhâna liata a y hra aw. Vâlyuhchâpazy a zu aw ei ta, molei penawh cha a siapenawh tawhtapa ama pahrua aw,
50 patisana mei liata thy aw ei ta; cha liana cha chana nata hâriena a y aw.
Ryubyh thiehpa nata parohpa
51 “He hmo zydua he nama pahnopasia ma?” tah ta. Âmo chata a hnohta, “Eima pahno,” tah ei ta.
52 Ano chata ama hnohta, “Chavâta Ryhpa pachutuhpa vârâh Khihnarâh châta pachupa maih cha, o a hneituhpa a ryubyh tawhta hmo thiehpa nata parohpa a papua theipa hawhta a châ,” tah ta.
Nazari liata Zisu a pyh veih ei(Mk 6:1-6; Lk 4:16-30)
53 Zisu, cha pakhona biezy cha a reih khai pata nahta, cha tawhtapa cha sie ha ta,
54 a yna khih cha kei tlô ta, amâ pakhyna-o liata zawpizy cha pachu ta, ama noâh ngaita kaw ta, “He chyhsa he khataih tawhtapa he sona nata hmotaotheinazy ma a hnei?
55 He he thobyh taotuhpa sawchapawpa kha châ vei ma? A nô chhao cha Mari tlâ châ vei ma? A unawhpazy chhao Zami zy, Zawsi zy, Saimaw zy, Zuda zy châ veih ei ma?
56 A sietanôzy chhao ama zydua ta he liata eima hnohta y veih ei ma? Khataih tawhtapa he chyhsa heta he hmo zydua he a hmô?” tah ei ta.
57 A chôta ama palôh tlâh leipa ta Zisu ta ama hnohta, “Hrohsopa ahy hmahta a râh nata a o liata palyupalihpa ta y veih ei,” tah ta.
58 Cha liana chata amâ ngiapâ leina vâta hmonoâhpa a hluhpi tao vei.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |