Zisu Pila hnohta ama chhihtha (Mk 15:1; Lk 23:1-2; Zh 18:28-32)
1 My a vaw châ nahta, theihthaipa beizy nata vâtlâh machâ zydua cha Zisu ama thie theina awpa ta pachia ei ta;
2 ano cha chahry ei ta, a chhi ei ta, ryureituhpa Pila hnohta pie ei ta.
Zuda thina
3 Zuda, a patusatuhpa khata Zisu thai lei pachâsapa ta a y tahpa a pahno pata nahta a ngiapachhi ta, tâkâ tlaw sythôh kha theihthaipa abeizy nata machâzy hnohna chata va pakua ta,
4 “Chyhsa siapa thie awpa ta ei patusapa vâta ei vaw molei ha na,” tah ta. Âmo deikua chata, “Cha cha keimo châta khâpa a pei aw? Nâma ta na taota tao teh,” tah ei ta.
5 Ano chata tâkâ cha achhyna-o liata thy ta, siesai ta; a kei pa-aosao ha ta.
6 Theihthaipa abeizy chata tâkâzy cha la ei ta, “He he ‘thisaih ty a châpa vâta achhyna-o tâkâ byh liata soh awpa ta a ryh vei,” tah ei ta.
7 Ama pachia khai nahta, khichhaizy pabuna awpa ta beihvituhpa su cha chalei ei ta.
8 Cha vâna chata cha su cha atahmâ taihta Thisaih Su ama bi.
9 Hrohsopa Zeremiah ta, “Chatawhcha tâkâ sythôh ta a mâ ama reipa, Izarel sawzy ta a mâ ama rei chiehpa cha ama la,
10 Abeipa ta einâ taihpa hawhta beihvituhpa su châta ama pie haw,” tahpa ta a reipa kha a vaw tlô haw.
Pila ta Zisu a hiahrinazy(Mk 15:2-5; Lk 23:3-5; Zh 18:33-38)
11 Zisu cha ryureituhpa hmiakô liata a duah ta; ryureituhpa chata, “Zuzy Beipa na châ ma?” tahpa ta hiahri ta. Zisu ta a hnohta, “Ei châ na,” tah ta.
12 Theihthaipa abeizy nata machâzy ta ama leih nota, khâpa hmahta a chhy vei.
13 Pila ta a hnohta, “Ama cha leih-na zydua he thei va chi ma?” tah ta.
14 Châhrasala kawh khata hmahta a chhy vei; cha vâna chata ryureituhpa cha a noâh ngâsâ ta.
Zisu cha thie awpa ta ama pathlu(Mk 15:6-15; Lk: 23:13-25; Zh 18:39-19:16)
15 Kyhchhi daihti liana chata ryureituhpa ta atâhpa hry liatahpa zawpizy ta ama khôpa pakha a papua tyh.
16 Cha nona chata chyhsa atâhpa mohpathâh ngaitapa. Baraba ama bipa cha hnei ei ta.
17 Chatanachata a vaw pôhpakhy ei ta, Pila ta ama hnohta, “Ahyma châ papuapa aw ei sala nama khoh, Baraba* ma Zisu Krista ama tahpa ma?” tah ta.
18 Amâ haona vâta ano cha ama patu tahpa pahno tlôh ta.
19 Pila cha ryureina dyuchhai liata a tyu thlâh ha nona chata. a lahpinô ta, “Kha chyhsa sia ngaitapa chô liana khata kheihta hmah tah khâ, atanoh he ano vâta ei mâ liata hmo hluhpi pasa ei tao,” tahpa ta bie tah ta.
20 Theihthaipa beizy nata machâzy chata Baraba hiapa ta, Zisu pahleipadia awpa ta zawpizy cha pasyu ei ta.
21 Ryureituhpa chata ama hnohta, “He panopa hry liana heta ahy e cha papua pa aw ei sala nama khoh?” tah ta. Âmo chata, “Baraba” tah ei ta.
22 Pila ta ama hnohta, “Chata châ sala Zisu Krista ama bipa hnohna chata kheihta ma ei tah aw tly?” tah ta. Ama zydua ta, “Ano cha khaipâpa ta châ se,” tah ei ta.
23 A no chata, “Khazia, khâpa moleina ei a tao haw?” tah ta. Châhrasala, “Khaipâ ei se,” tahpa ta thata awh chaimâh ei ta.
24 Pila ta khâpa hmah tao thei leipa ta tlao atymâ via rili tahpa a pahno nahta, ti la ta zawpi hmiakô liana chata a ku a si ta, “He chyhsa siapa thisaih liana heta ei pathaih na; nâmo taota tao teh u,” tah ta.
25 Vâtlâh zydua ta, “Eima chôta nata eima sawzy chôta ano thisaih y se!” tahpa ta a chhy ei ta.
26 Cha khainah chata Baraba cha papua ta, Zisu deikua cha chhei ta, khaipâ awpa ta pie ha ta.
Pheihsaizy ta Zisu ama taola(Mk 15:16-20; Zh 19:2-3)
27 Ryureituhpa pheisaihzy chata Zisu cha abei o liata a chhi ei ta, a pheisaih zydua a hnohta pakhy ta.
28 A chysia pahluhpa ei ta, poh sailawpa pabu ei ta.
29 hloh lakho phieh ei ta, a luh liata pakho ei ta, a ku chachâh lâta lothi chabasa ei ta. A hmiakô liata pakhu paneihpa ta, “Zuzy beipa hroh pareih mah y,” tahpa ta taola ei ta.
30 Ano cha ama pachih ta pachhao ei ta, lothi cha la ei ta, a luh liata tu ei ta.
31 Ama pasipasaw khai nahta, a poh cha lapa ei ta, ano chysia cha pakysa ei ta, khaipâ awpa ta amâ chhi haw.
Zisu ama khaipâna(Mk 15:21-32; Lk 23:26-43; Zh 19:17-27)
32 Ama pua nahta, Kurini chyhsa, a moh Saimaw hmô ei ta; cha chyhsa cha Kraws papusa raruah ei ta.
33 Chatawhcha Kôlkôtha ama tahpa su ama tlô nahta (cha yzie cha luhru su tahna a châ),
34 kresawti, hmo khapa nata pahlaopa a do awpa ta pie ei ta; châhrasala a pachâ pata nahta doh khoh leipa ta.
35 Kraws liata ama khaipâ khai nahta pachao ei ta, a chysiazy a rai ei ta;
36 cha liana chata atyuh ei ta, vaih ei ta.
37 A luh chô liata ano leih-na, “He he Zisu Zuzy Beipa a châ,” tahpa ta ropa bai ei ta.
38 Cha nona chata phihmâhpa pano ano hnohta khaipâpa ta ama y, a chachâh lâ pakha, a chavei lâ pakha.
39 Zawpi a siepakhôpa maihta ama luh chahuahpa ta,
40 “Na Khazohpa achhyna-o parao ta, noh thôh ta a sa heihtuhpa chi cha, nâmasasyh ta a pachha teh! Khazohpa Sawchapawpa na châ khiahta cha, kraws tawhta za chô teh,” tahpa ta ano taola ei ta.
41 Cha hawhna hra chata theihthaipa abeizy chata Ryhpa pachutuhpazy nata machâzy chhaota taolapa ta,
42 “Chyhsa hropa pachha ta; anosasyh ta a pachha thei vei. Ano cha Izarel Beipa a châ; atahmâ kraws tawhta za chô se, ano eimâ ngiapâ aw.
43 Khazohpa a ngiapâ mâ tâh; Khazohpa Sawchapawpa ei châ,’ a tah tlôh ta, a khoh khiahtala atahmâ he Khazopa chata pachha se,” tah ei ta.
44 Chatawhcha phihmâhpa a hnohta ama khaipâpa chhao chata cha hawhna hra chata rei pachhie ta.
Zisu thina(Mk 15:33-41; Lk 23:44-49; Zh 19:28-30)
45 Nohchhô dawh hrawhleinopa tawhta zâlâ dawh thôhpa taihta alei chô zydua vaw zoh ha ta.
46 Dawh thôhpa rachhôhta ao paro ngaitapa ta Zisu awh ta, “Eli, Eli, lama sabach-thani?” cha cha. “Ei Khazohpa, Ei Khazohpa, khazia eina pathlua chi?” tahna a châ.
47 Cha liata aduahpazy chata ama thei nahta, “He chyhsa heta Elaiza a aw,” tah ei ta.
48 Ama hryta chyhsa pakha thlai a râ ta, sponge la ta, kresawti thaopa ta pabie ta, lothi pawhmao liata patao ta, a do awpa ta pie ta.
49 Châhrasala thokhazy ta, “Y thlâh sa, ano pachha awpa ta Elaiza a zu ma, moh sah u,” tah ei ta.
50 Chatawhcha Zisu ao paro ngaitapa ta awh heih ta, a thlahpa pathlie ha ta.
51 Chatawhcha Khazohpa achhyna-o pohraipa cha a chôlâ tawhta a ry lâ taih a hri ha ta; alo a sih ta, lôpanôzy a patlaw ta;
52 thlâzy a pahy ta, mopathaihpa pôhpazy hluhpi a mô chiehpazy cha pathyupa ta y haw ei ta,
53 Zisu a thyuheih tawhta thlâ liatahpa vaw puapa ta khih pathaihpa liana chata a ngia ei ta, chyhsa hluhpi hnohta a luah ei ta.
54 Cha nona chata pheisaih zakha hyutuhpa nata a hnohta Zisu a vaihtuhpenawh ta, alo a sihpa nata hmo a ypazy cha ama hmô nahta chi ngaita kaw ei ta, “He he Khazohpa Sawchapawpa a châ tlai na!” tah ei ta.
55 Cha liana chata chanô a hluhpi ano deichhy lymâna chôta Kalili tawhta Zisu a vaw zipazy cha y ei ta, lâhlapi tawhta sai ei ta;
56 ama hry liana cha Mari Madali zy, Mari Zami nata Zawsi nô zy, Zebadi sawchapawpazy nô zy ama y.
Zisu pabuna(Mk 15:42-57; Lk 23:50-56; Zh 19:38-42)
57 Zâlâ a vaw châ nahta, chyhsa a hneirôhpa Zawsi, Arimathai khih tawhta a vy ta, ano cha Zisu pachupazy hry liatahpa a châ hra.
58 Pila hnohta vawh ta, Zisu ri hiah ta, Pila ta pie awpa ta bie pie ta.
59 Chatawhcha Zawsi ta a ri cha la ta, poh-naipa pathaihpa ta pahly ta,
60 ano thlâ thiehpa, alô khiepa liana chata pazia ta; thlâ chhikao liana cha alô lai ngaitapa ta pamai ta, siesai ha ta.
61 Cha liana chata Mari Madali nata Mari hropazy cha a thlâ dady ta atyuh ei ta.
Thlâ vaihtuhpa
62 A mylâ chata, cha cha pachynoh mylâpa a châ, theihthaipa abeizy nata Pharisaizy cha Pila hnohta a pahmaoh ei ta,
63 “Pâpuh y, cha dôtuhpa ta a hro nota, ‘Noh thôh noh ta ei thyu heih aw,’ a tahpa pahno thlâ ha pi ta.
64 Cha vâna chata thlâ cha noh thôh noh taihta a phapa ta vaih awpa ta bie pie teh, chata leipa tala a pachupazy chata ano cha ama paru pathlei aw na, vâtlâhzy hnohta, ‘Athihpa hry tawhta a thyu haw heih, ama tah pathlei aw na, dôhna a hnôh lâ chai tahpa cha a hmialâ tahpa hlâna khata a pha lei via aw na,” tah ei ta.
65 Pila ta ama hnohta, “A vaihtuhpa pheisaihzy nama hnei mâ tâh; vawh ula, a phapa ta vaih teh u” tah ta.
66 Chatanachata vawh ei ta, thlâ cha a phapa ta tao ei ta, alô cha pa-i ei ta, a vaihtuhpa soh ei ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |