Pahâna noh ta sâh su ama thlie (Mk 2:23-28; Lk 6:1-5)
1 Cha nona chata pahânoh ta Zisu sâh thihzy chapiapa ta sie ta; a pachupazy cha ama nodi ha ta, sâh suzy thliepa ta nie ha ei ta.
2 Pharisaizy ta ama hmô nahta a hnohta, “Moh teh, na pachupazy ta hmo ânapa ama tao,” tah ei ta.
3 Chatawhcha âmo a chhy ta, “Davi ta a nodi nota a viasazy nata ama hmotaopa kha reih veih chi ma:
4 Khazohpa o liata a ngia ta, ano nata a viasazy nie awpa ta anapa, theihthaipazy deita ta nie theipa viahchhâ Sopa a niepa kha?
5 Cha khiahtala theihthaipazy ta pahânoh ta achhyna-o liata pahânoh paraopa ta thai ama châ tahpa ryhpa bie liata ropa kha reih va eichi ma?
6 He achhyna-o hlâta hmo rôhnah viapa a y tahpa ei cha chho ei chuh.
7 ‘Atheihna khoh leipa na ta, zawngiahna tlao ei khoh,’ tahpa he a yzie a pahnopasiapa cha hâ ula, chyhsa phapazy cha thai lei nama pachâsa lei awpa tlai.
8 Chyhsa Sawchapawpa cha pahânoh beipa châ tlôh ta,” tah ta.
Chyhsa ku sypa(Mk 3:1-6; Lk 6:6-11)
9 Zisu cha tawhtapa cha sie ta, ama pakhyna-o liata a ngia ta.
10 Chyhsa pakha ku sypa y ta, Zisu ama leih thei nawpa ta a hnohta, “Pahânoh ta chyhsa patlâhsa hraopa a châ ma?” tahpa ta ano hiahri ei ta.
11 Ano chata ama hnohta, “Nâmo hryta ahy e mietahkupa pôkha pahânoh ta khaotlô liata tla ha sala, a thaoh leipa a y aw eichi?
12 Mietahkupa hlâta chyhsapa sôh via syulyu tlôh ta! Chatanachata pahânoh ta hmophapa tao cha a pathaih na,” tah ta.
13 Chatanachata chyhsa hnohna chata, “Na ku pazawh teh,” tah ta. A ku cha pazawh ta, a ku hiakha lâ hawhta tlâ haw ta.
14 Pharisaizy deikua cha pua ei ta, ano ama pahleipadia thei nawpa ta bie a pachia ei ta.
Sei atlypa cha
15 Zisu deikua chata a pahno nahta, cha su tawhtapa cha sie ha ta. Chyhsa hluhpi ta ano cha zi ei ta, âmo zydua cha patlâhsa khai haw ta,
16 a thâtih cha phuah lei awpa ta âmo hnohta biepie ha ta.
17 He he hrohsopa Isai reipa a vaw pakisana cha a châ:
18 “Moh teh, ei sei ei tlypa,ei kho ngaitapa, a chôta ei ly ngaitapa cha.A chôta ei Thlahpa cha soh aw na ta,Zenitaizy hnohta ryureina cha a phuah aw.
19 Ano cha ei leipa aw ta, awh hra aw vei,othliahzy liata ahy hmahta a ao thei hra aw veih ei;
20 lothi tlie paliepa thlie leipa aw ta,pala khu chhao pachhaih hra aw vei,pahniena ryureina a tuah papua hlâ lei cha;
21 ano moh liana cha Zenitaizy ama hnabei a seih aw,”tahpa kha.
Zisu nata Belzebul(Mk 3:19-30; Lk 11:14-23)
22 Chatawhcha mochaopa reih pathlie thei leipa ahripa ta a patupa pakha a hnohta a vaw chhi ei ta, Zisu ta ano cha patlâh ta, reih pathlie thei leipa cha reih pathlie theipa ta a mo pavâh ha ta.
23 Zawpi zydua cha ama noâh ngaita kaw ta, “He he Davi Sawchapawpa a châ thei ma?” tah ei ta.
24 Pharisaizy deikua chata ama pahno nahta, “Ahripazy beipa Belzebul vâ dei leipa ta he chyhsa heta ahripazy papua thei aw vei,” tah ei ta.
25 Ama pachâpazy a pahno nata ama hnohta, “Râh kheihawhpa rai âmosasy ta amâ dyuh khiahta cha a rao tyh. Khihpi tlyma, chhôhkha tlyma âmosasy ta adyuhpa maih cha a duah thei veih ei;
26 Sâtâ ta Sâtâ a papua khiahta cha, anosasyh ta adyuhpa a châ; kheihta e a râh cha a duah thei aw?
27 Keima ta Belzebul vâta ahripazy ei papua khiahta cha, ahy vâta e nama sawzy cha papuapa ama châ aw tly? Chavâta âmo cha cha pachiatuh awpazy ama châ aw.
28 Châhrasala Khazohpa Thlahpa vâta ahripazy a papuapa ei châ khiahtala, Khazohpa Khihnarâh cha nama hnohta a vaw tlô haw.
29 Chyhsa ta chyhsa thatlôpa cha a chahry tua vei khiahta cha, kheihta e chyhsa thatlôpa o liata a ngiapa ta a hmozy cha a lapa thei aw? Chata a tao khiahta cha a o cha a hrao thei aw.
30 Ei chhâh a châ leipa cha nâ dyuhpa a châ. Ahyrai na pahmaohkhei leipa cha a papai tyh.
31 Chavâta ei cha chho ei chuh, chyhsa ama moleina to nata Khazohpa ama reipachhiena cha a ngiahthaipa ta châ aw ta, Thlahpa a reipachhiepa deikua cha a ngiahthaipa châ aw vei.
32 Ahyrai Chyhsa Sawchapawpa a reipachhiepa cha a ngiahthaipa châ aw ta, châhrasala Thlahpa Pathaihpa a reipachhiepa deikua cha he chhâ nata chhâ a vaw y heihpa liata chhao a ngiahthaipa châ aw vei.
Tho nata a theilâpazy(Lk 6:43-45)
33 Tho cha a pha, a thei chhao a pha; nama tah vei khiahtala tho cha a chhie, a thei chhao a chhie tah lalao teh u; tho cha a thei ta pahnopa châ tlôh ta.
34 Vâzi pathla saih u! nama molei thlâh hana chôta, kheihta e hmophapa nama reih thei aw? Palôh ta a bie pakhôpa cha pakah ta a reih papua tyh.
35 Chyhsa phapa cha a ryubyh phapa liatahpa hmophapa a papua tyh, chyhsa chhiepa cha a ryubyh chhiepa liatahpa a hmo chhiepa a papua tyh.
36 Ei cha chho ei chuh, chyhsa ta bie pha leipa a reihpa maih cha, ryurei nota cha bie thâtih cha ama reih aw;
37 na biezy ta thai châ aw chi ta, na biezy lilaw ta thai leipa ta na y hra aw.
Chhâ moleipazy ta ngiana ama tlua(Mk 8:12; Lk 11:29-32)
38 Cha nona chata Ryhpa pachutuhpa thokhazy nata Pharisai thokhazy ta a hnohta, “Pachutuhpa, nâma tawhtapa ngiana hmô eima khoh,” tah ei ta.
39 Ano chata âmo a chhy ta, “Chhâ moleipa nata aphei hmâhpazy ta ngiana tlua ei ta; châhrasala hrohsopa Zawna ngiana dei leipa ta cha ngiana piepa châ aw vei.
40 Zawna cha nga laipa py chhôhta noh thôh nata zâ thôh a ypa hawhta, Chyhsa Sawchapawpa chhao alei chhôh liata noh thôh nata zâ thôh a y hra aw.
41 Ryureina liana chata Niniva chyhsazy thyu aw ei ta, he chhâ he thai lei pachâsapa ta ama pazei aw; Zawna bie chhopa ta ama ropa vâta, he liana heta Zawna hlâta rôhnah viapa a y.
42 Chho lâ beinô cha he chhâ ryureina liata vaw thyu awh ta,thai lei apachasa awh;Sawlawmaw sona thei awhpata hmata alei chychhana tawta avy khiata cha. Sawlawmaw hlata rona viapa he liana heta y tlota.
Thlapa chhiepa a vaw kua hei(Lk 11:24-26)
43 “Thlahpa chhiepa cha chyhsa tawhta a papua nata ti y leina su liata yna tluapa ta a khie ngâ ta, châhrasala yna su hmô leipa ta;
44 anosasy ta ‘Ei vaw puasaipa o lâna kha tlâ ei kua heih aw,’ tah ta. Chatawhcha a kua nata o cha a ruapa ta nata phie chiehpa, a pathaihpata ta hmô ta.
45 Cha khai pata nahta sie ta, a hnohta thlahpa hropa pasari ano hlâta moleipazy a vaw chhi ta, cha liana chata a ngia ei ta, ama pahrâ haw; a chhâna lâta cha, cha chyhsa yzie cha a hmia lâtahpa hlâta thata a vaw molei via haw. Cha hawhna hra chata he chhâ moleipa chhao he a vaw y hra aw,” tah ta.
A nô nata a unawhpazy(Mk 3:31-35; Lk 8:19-21)
46 Zawpizy hnohta bie a rei hai nota, a nô nata a unawhpazy ano bie ama chho khohpa vâta khôtho liata aduah ei ta.
47 Chyhsa pakha ta a hnohta, “Pachâ teh, na nô nata na unawhpazy ta bie cha chho khohpa ta khôtho liata amâ duah thlâh haw,” tah ta.
48 Ano chata a chhotuhpa hnohta, “Ei nô cha ahy e a châ, ei unawhpazy chhao ahy e ama châ?” tahpa ta a chhy ta.
49 Chatawhcha a pachupazy lâta a ku pazawh ta, “Hezy he ei nô nata ei unawhpazy ama châ.
50 Ahyrai ei Paw avâ liatahpa khopa a taopa maih cha ei unawhpa nata ei sietanô nata ei nô ama châ,” tah ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |