Kresadô liata a hriapazy
1 Vârâh Khihnarâh cha o hneituhpa ta a kresadô liata raihriatuhpazy hrua awpa ta mydi ta a puapa hawhta châ tlôh ta.
2 Ano chata raihriatuhpazy nah chata noh khata denarius* miakha hlao awpa ta a paryh ei ta, kresadô lâna cha pasiesa haw ta.
3 Dawh chakipa liata sie ta, chyhsa hropa daopi su liata aduah chakhypazy hmô ta;
4 ama hnohta, ‘Nâmo chhao kresadô liata sie hra teh u, a daihna rakhata ei cha pie aw ei,’ tah ta. Chatanachata sie haw ei ta.
5 Dawh hrawhleinopa nata dawh thôhpa liata sie heih ta, cha hawhna chata tah heih ta.
6 Zâlâ dawh pangawhpa liata sie heih ta, chyhsa hropa aduahpazy hmô ta; ama hnohta, ‘Khazia e noh y ta he liata namâ duah thlâh haw?’ tah ta.
7 Âmo chata a hnohta, ‘Ahy hmahta maniah ama hrua leipa vâta,’ tah ei ta. Ano chata ama hnohta, ‘Nâmo chhao kresadô liana cha sie hra teh u,’ tah ta.
8 A vaw zâlâ nah chata, kresadô a hneituhpa chata a sôh mokhâhtuhpa hnohta, ‘Raihriatuhpazy aw la, a hnôh chaipa tawhta a thaopa ta a hmia tuachaipa taihta ama hlao pie teh,’ tah ta.
9 Dawh pangawhpa liata a hruapazy cha amâ vy nahta, denarius miakha hmô chyu ei ta.
10 A hmiatua chai tahpazy cha amâ vy nahta, a hluh via hmô awpa ta a pangiasa ei ta; châhrasala âmo chhao denarius miakha chyu hmô sai hra ei ta.
11 Ama la nahta o hneituhpa chôta thlai rei pasipasua ei ta.
12 A hnôh chaita a hriapazy he dawh kha chhôh deita hriapa ta, keimo hriapasapa ta nata nohsa a daohpazy nata maniah a pakho,’ tah ei ta.
13 Châhrasala ama hryta pakha hnohta, “Ei viasa, na chôta khâpahmah tao chhei va na; denarius miakha hlao awpa ta a paryh ma pi mâ?
14 Na eih kha la la, sie thlâh ha teh; nâma ei cha piepa hawhta he a hnôh chai tahpa hnohna heta piepa ei khoh.
15 Kei eih cha ei kho ta tao thei va na ma? Cha leipa ta ei riaphana cha nâma ta na hiatlia ma?’ tahpa ta a chhy ta.
16 Cha hawhna hra chata a hnôh chai tahpazy cha a hmia chaita ama châ aw, a hmia chaipazy chhao cha a hnôh chaipa ama châ aw,” tah ta.
A thina kyh reih chhieliena ei thôhna(Mk 10:32-43; Lk 18:31-34)
17 Zisu Zerusale lâ a khy nahta, a pachupa pahrawhleinozy a nano ta a chhi ta, lâthlôh liana chata ama hnohta.
18 “Pachâ teh u. Zerusale lâ eima khy hih; chatawhcha Chyhsa Sawchapawpa he theihthaipa beizy nata Ryhpa pachutuhpazy patusapa ta a y aw, âmo chata thai lei pachâsapa ta ama thie aw,
19 pasipasawpa ta nata chheipa ta nata khaipâ awpa ta Zenitaizy hnohta ama pie aw, chatawhcha a noh thôhna noh liata pathyupa ta a y aw,” tah ta.
Zawhana nata Zami ahawna(Mk 10:35-43)
20 Cha nona chata Zebadi sawchapawpazy nô cha a sawchapawpazy chhaota a hnohta a vy ei ta, a naoh ta, hmo khâpa tlyma hiah ta.
21 Zisu chata a hnohta, “Khâpa e na khoh?” tah ta. Ano chata a hnohta, “He ei sawchapawpazy pano he, na Khihnarâh liata na chachâh lâ pakha, na chavei lâ pakha amâ tyuh thei nawpa ta bie pie mah y,” tah ta.
22 Zisu deikua chata, “Nama hiapa cha pahno veih eichi. Ei nyu do awpa cha nama doh thei ma?” tahpa ta a chhy ta. Âmo chata a hnohta, “Thei cha â,” tah ei ta.
23 Ano chata ama hnohta, “Ei nyu cha nama doh tlai aw, châhrasala ei chachâh lâ nata ei chavei lâta atyuh awpa cha, keima ta ei pie awpah châ vei, ei Paw ta a chhuahdypazy châta tlao a châ aw,” tah ta.
24 A pachupa pahrawhpazy ta cha cha ama vaw pahno nahta, unawhzy pano chô liana cha ama hie hâh ta.
25 Zisu deikua chata âmo cha aw ei ta, “Zenitaizy ryureituhpazy cha a bei ngâsâ ei ta, ama molaipazy chata ama chô liata bie ama hnei ngaita kaw tyh tahpa nama pahno.
26 Châhrasala nâmo hry liata la cha hawhta châ aw vei; ahyrai nama hryta a rôhnahpa ta y a khohpa ta cha nama chakaotuhpa ta a y awpa tlao a châ,
27 ahyrai nama hry liata a hmiatua chaita a y khohpa ta cha, nama sei ta a y awpa tlao a châ;
28 Chyhsa Sawchapawpa he chakaopa ta y awpa ta a zu leipa ta, chakaotuhpa ta nata chyhsa hluhpi chatlai nawpa ta a hrona a pie awpa ta tlao a zupa hawhna khata,” tah ta.
Mochaopa pano mopavâna(Mk 10:46-52; Lk 18: 35-43)
29 Zerikô tawhta ama pua nona chata, zawpi hluhpi ta ano cha zi ei ta.
30 Mochaopa pano lâthlôh kiah liata atyuhpazy chata Zisu a vy tahpa ama pahnopa ta nahta, “Pâpuh,*Davi Sawchapawpa, maniah ngiachhie teh!” tahpa ta thata awh ei ta.
31 Zawpi chata a chalih awpa ta âmo ra ei ta, châhrasala âmo chata, “Pâpuh, Davi Sawchapawpa, maniah ngiachhie teh!” tahpa ta thata awh via rili ei ta.
32 Zisu a duah ta, âmo aw ta, “Nama chôta khâpa ei tao awpa e nama khoh?” tah ta.
33 Âmo chata a hnohta, “Pâpuh, mo pavâpa eima khoh,” tah ei ta.
34 Zisu ta âmo ngiachhie ta ama mo hria ta, thlai vaw hmô thei haw ei ta, ano cha ama zi haw.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |