Machâzy biechhypa (Mk 7:1-13)
1 Chatawhcha Pharisaizy nata Ryhpa pachutuhpazy Zerusale tawhta Zisu lâ a vy ei ta, a hnohta,
2 “Na pachupazy ta hlâno machâ biechhypa khazia e ama parao? Pati ama nie nota ama kuzy pasi leipa ei ta,” tah ei ta.
3 Ano chata ama hnohta, “Khazia nâmo chhaota nama biechhypa zie awpa ta Khazohpa biepiepa nama parao?
4 Khazohpa ta, ‘Na nô nata paw palyupalih teh’, ‘A nô ma, a paw ma a reipachhietuhpa cha thi tlai se,’ tah tlôh ta.
5 Nâmo deikua chata, Ahyrai a nô ma, a paw ma hnohta, nâmo ei phahnaina maih cha Khazohpa hnohta piepa a châ haw, a tahpa maih cha, a nôpaw za leituhpa a châ,’ nama tah tyh.
6 Chatanachata nama biechhypa vâta Khazohpa biepiepa cha namâ zaw pakhô haw.
7 Nâmo haiphiahpa saih u, hrohsopa Isai ta a do ngâsâpa ta nama yzie a vaw reih chhielie haw:
8 ‘He chyhsa heta ama hmao ta na palyupalih ei ta, ama pathipalôh deikua cha nâ hla tlôh ei ta;
9 a chôphô ta nâ chhypa ta, ama pachuna cha chyhsazy biepiepa hawh deitata a châpa vâta,’” tah ta, a chhy ta.
Hmo pathaih leipazy(Mk 7:14-23)
10 Chatawhcha zawpi cha aw ta, ama hnohta, “Nahthlie ula, pahno teh u;
11 Pakah liata a ngiapa chata chyhsa papua leipa ta, pakah tawhta a puapa deikua chata chyhsa a papua tyh,” tah ta.
12 Cha khainah chata a pachupazy a vy ei ta, a hnoht, “Na biereipa vâta Pharisaizy ta ama palôhtlâh leipa kha na pahno ma?” tah ei ta.
13 Ano chata, “Tho to ei Paw avâ liatahpa ta a lo leipa maih cha phiapa ta a y aw.
14 Âmo a papeisa kha u; chhihthatuhpa mochaopazy ama châ. Mochaop ta mochopa a chhihtha khiahta cha khaotlôpa liata ama tla khoh aw,” tahpa ta a chhy ta.
15 Pity ta a hnohta, “Cha pakhona yzie cha maniah chhopasia teh,” tah ta.
16 Zisu chata, “Nâmo chhao a yzie pahno to veih eichi ma?
17 Pakah liata a ngiapa maih cha pavyh lâta palâ ta, lyupâh puana lâta apua tahpa pahno veih eichi ma?
18 Châhrasala pakah tawhta a puapa cha pathipalôh tawhta a kaw puapa vâta, cha tlai chata chyhsa a papua tyh.
19 Pathipalôh tawhna heta pachâna moleinazy, lianycheina zy, apheina zy, apatlana zy, paruna zy, leina zy, reipachhiena zy vaw pua tyh tlôh ta.
20 Chazy cha chyhsa a papua paleipa a châ; ku si leipa ta niepa deikua chata chyhsa papua vei,” tah ta.
Kana chanô angiapâna(Mk 7:24-30)
21 Zisu cha su cha siesai ta, Tyre nata Sidaw bia liata a ngia ta,
22 Cha râh liatahpa Kana chanô pakha vaw pua ta, “Hy pâpuh, Davi Sawchapawpa, na ngiachhie teh; ei sawchanônô cha ahripa patupata thata pasa ta,” tahpa ta awh ta.
23 Ano deikua chata kawh kha hmahta a chhy vei. A pachupazy chata, “Eima hnôh lâta maniah awsao ngâ tlôh ta, pasiesa châh chi,” tahpa ta ano ahaw ei ta.
24 Zisu chata, “Izarel pho mietahkupa aleipazy hnoh deita tuapa ei châ,” tahpa ta chhy ta.
25 Chanô cha a vy ta, “Pâpuh, na bao teh,’ tahpa ta a naoh ta.
26 Zisu chata, “Sawzy viahchhâ chhu ta, izy hnohta thypa cha yzie châ vei,” tahpa ta a chhy ta.
27 Ano chata, “Pâpuh, cha la a châ na, izy chhaota ama zibeipa tlâhkhai tawhta a zôpa a tlapazy cha ama nie tyh hra mâ tâh,” tah ta.
28 Chatanachata Zisu ta a hnohta “Hy chanô y, nâ ngiapâna cha a lai kaw na! Na khopa hawhta na chôta y se,” tah ta a chhy ta, cha rakha tawhna chata a sawchanônô cha tlâ ha ta.
Tlâh leipa hluhpi a patlâh
29 Zisu cha su tawhtapa cha sie ta, Kalili Tipo kiah vaw tlô ta; tlâh lâta kiah ta, cha liana chata a tyuh ta.
30 Zawpi a hluhpi a nohta a vy ei ta, pheisypa zy, mochaopa zy, reih pathlie theileipa zy, pihpasipa zy nata a pasapa a hrohpa hluhpi, a phei thaby ta vaw soh ei ta, âmo a patlâh ei.
31 Zawpizy cha reih pathlie theileipa zy reih pathliepa ta nata pihpasipazy cha tlâ hapa ta, a pheisypazy cha phei ta siepa ta, mochaopazy cha ama hmô thei hapa vâta ama noâh ngaita kaw ta; Izarel Khazohpa cha reithai haw ei ta.
Chyhsa sâh palih rih a pabie(Mk 8:1-10)
32 Zisu ta a pachupzy cha aw ta, ama hnohta, “Zawpizy he atahmâ noh thôh ei hnohta y haw ei ta, khâpahmah ta niepa ama hnei leipa vâta, ei ngia eina chhie kaw ei na; nodipa ta âmo pasiesa khoh va na, chata leipa ta la lâpi liata ama panao pathlei aw na,” tah ta.
33 A pachupazy ta a hnohta, “Zawpi he zydua rih pabie nawpa ta he râhpathohpa liana heta kheihta e viahchhâ cha zie zydua cha eima hmô thei aw?” tah ei ta.
34 Zisu ta ama hnohta, “Viahchhâ khazie e nama hnei?” tah ta. Âmo chata, “Tlâ sari nata nga a chyhta dei,” tah ei ta.
35 Chatawhcha alei liata atyuh awpa ta biepie ta,
36 viahchhâ tlâ sari nata nga cha la ta, alyna bie reih ta, eichheih ta, a pachupazy hnohta pie ta, a pachupazy ta zawpi hnohta pie ei ta.
37 Ama zydua ta nie ei ta, ama rihbie ha ta; ama nie laipa cha hrâbyh hmo sari a huah ei ta.
38 A niepazy cha chanô nata hawtipazy rei leipa ta, pitlopa saita sâh palih châ ei ta.
39 Chatawhcha zawpizy cha pasiesa ta, balyh liata kiah ta Makada râh vaw tlô ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |