A hmia nanona (Mk 9:2-13; Lk 9:28-36)
1 Noh charu khai tawhta Zisu ta Pity zy, Zami zy, a unawhpa Zawhana zy a hnohta a chhi ta, a nano ta tlâh sâh ngaitapa lâta khykhei ta,
2 ama hmiakô liana chata a hmia yzie cha a vaw nano ha ta, a hmia cha noh hawhta khaih ta, a chysiazy cha a khaihpa hawhta vaw ngyu ha ta.
3 Chatawhcha Mawsi nata Elaiza cha ama hnohta a vaw luah pâ ei ta, âmo nata bie a chho ei ta.
4 Pity ta Zisu hnohta, “Abeipa, eima châta he liata ypa he a pha na; na khoh khiahtala, he liana heta byureih miathôh ei tu aw, na châta miakha, Mawsi châta miakha, Elaiza châta miakha,” tah ta.
5 A rei hai nona chata; ameih râhpa chata âmo vaw khu ta, amei tawhna chata ao ta, “He he ei Sawchapawpa kho ngaitapa ano liata ei ly ngaitapa cha a châ, ano bie nahthlie teh u,” tahpa ta.
6 A pachupazy chata cha cha ama thei nahta, a khu lâta pao ei ta, chi ngâsâ ei ta.
7 Zisu a vy ta âmo cha hria ta, “Thyu ula, chi khah u,” tah ta.
8 Chatawhcha kaw moh ei ta, Zisu dei leipa cha ahy hmah ta hmô veih ei.
9 Tlâh tawhtapa cha ama za chô hai no ta, Zisu ta ama hnohta, “Chyhsa Sawchapawpa he athihpa hry tawhta a thyu heih hlâ lei tala, nama hmo hmôpa kha ahy hmahta chho kha u,” tahpa ta biepie ta.
10 Chatawhcha a pachupazy ta a hnohta, “Khazia e, Ryhpa pachutuhpazy ta Elaiza cha a vy tua awpa a châ ama tah tly?” tahpa ta hiahria ei ta.
11 Ano chata, “Elaiza cha a vy tlai aw, ato zydua a taopathi aw.
12 Châhrasala ei cha chho ei chuh, Elaiza cha a vy ha ta, ano cha pahno leipa ei ta, a chô liata ama kho zie ta hawhta tao ei ta. Cha hawhna hra chata Chyhsa Sawchapawpa chhao he âmo ku liata pasa a tao hra aw,” tah ta.
13 Chatanachata a pachupazy ta Bâtituhpa Zawhana thâtih ama hnohta a reih tahpa pahno ha ei ta.
Hawtipa thlahpa chhiepa ta a patupa a patlâh(Mk 9:14-29; Lk 9:37-43)
14 Zawpizy hnohta ama vaw tlô nahta, chyhsa pakha a hnohta a vy ta, a hmiakô liata pakhu paneihpa ta,
15 “Pâpuh, ei sawchapawpa ngiachhie mah y, a riapamiepa châ ta, thata pasa taopa ta, ei hluhpi mei liata pao tyh ta, ei hluhpi ti liata a pao tyh hra.
16 Na pachupazy hnohta a vaw chhi na ta, âmo ta patlâsa thei veih ei,” tah ta.
17 Zisu ta, “Hy ngiapâna a hnei leipa nata chhorupa chhâ saih u, nama hnohta khachâ e y aw na ta? Khachâ e ei cha pachâ thai aw ei? Ano cha ei hnohta a vaw chhi teh u,” tah ta.
18 Zisu ta ahripa cha ra ta, a chhôh tawhtapa pua ha ta, cha khai tawhna chata hawtipa cha vaw tlâ ha ta.
19 A pachupazy cha Zisu hnohta âmo deita ta a vy ei ta, “Khazia e keimo ta eima papua thei vei?” tah ei ta.
20 Zisu chata ama hnohta, “Namâ ngiapâna chyhpa vâta a châ. Hmeihseihta ta, ei cha chho ei chuh, ahrâ chi hmô kha tluta ngiapâna nama hnei khiahta cha he tlâh hnohna heta, ‘He tawhna heta hao lâ va pasie teh,” tah ula, a pasie thlâh ha aw; nama châta tao thei leipa rai khâpahmah y aw vei,” tah ta.
21 Châhrasala he hawhpa he thlahchhâna nata nie leina dei leipa ta cha pua thei vei.
Zisu ta a thi nawpa kyh a reih chaneina
22 Kalili râh liata amâ vaw pahmaoh nota, Zisu ta ama hnohta, “Chyhsa Sawchapawpa he chyhsazy ku ta patusapa ta a y aw,
23 ano cha thi aw ei ta, noh thôh noh ta pathyupa ta a y aw,” tah ta. A pachupazy cha ama pachârôh ngaita ta.
Achhyna-o chhie cheina
24 Zisu nata a pachupazy Kapynia ama vaw tlô nahta, achhyna-o chhie kheituhpazy Pity hnohta a vy ei ta, “Nama pachutuhpa chata achhyna-o chhie pie tyh hra vei ma?” tah ei ta.
25 Ano chata, “A pie cha â,” tah ta. Pity cha o liata a ngia nahta, Zisu ta a hnohta, “Saimaw, kheihta e na pachâ? Alei beizy ta chhie tlyma sôh hneina ma tlyma ahy liata e ama la tyh? Ama sawzy liata ma, chyhsa hropa liatahpa ma?” tahpa ta vaw reih khâh ta.
26 Pity ta, “Chi hropa liatahpa,” tah ta. Zisu ta a hnohta, “Cha khiahta cha sawzy cha ama ei chuh.
27 Châhrasala, ama palôh pachhie kha, sie la tilaipi liata keipa ny la, nga na pa-ao tua chaipa la la, a pakah cha-ia la tâkâ tlaw no hmô aw chi ta, cha cha la la, keima nata nâmo châta ama hnohta pie teh,” tah ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |