Pahrawhleino penawh a tly ei (Mk 3:13-19; Lk 6:12-16)
1 Zisu ta a pachupa pahrawhleinozy aw ta, thlahpa puapa papua awpa ta nata pasana to nata chiehleina to patlâhsa thei nawpa ta biehneina pie ta.
2 Apostol pahrawhleino moh cha hezy he ama cha: Hmiatua ta, Saimaw Pity ama bipa nata a unawhpa Adru; Zebadi sawchapawpa Zami nata Zawhana;
3 Phili nata Bathawlawmu; Thawma nata chhiekheituhpa Mathai; Zami Alphu sawchapawpa nata Thadia* zy;
4 Kana chyhsa Saimaw nata a patutuhpa Zuda Iskari zy cha.
Pahrawhleino penawh a tuah(Mk 6:7-18; Lk 9:1-6)
5 He pahrawhleino penawh he Zisu ta tuah ta, ama hnohta he hawhna heta biepie ta, “Zenitaizy yna maihta a ngia leipa ula, Samari khihpi liata chhao a ngia hra khah u;
6 anodeikuacha Izarel mietahkupa a leipazy lâna chata tlao sie teh u.
7 Nama siena liata, ‘Vârâh Khihnarâh cha a vaw hnia haw,’ tahpa ta chho lymâ teh u.
8 Atlâh leipazy patlâh ula, a thihpazy pathyu ula, aphawhpazy pathaisa ula, ahripazy papua teh u. A saipa ta hmô eichi ta, a saipa ta pie teh u.
9 Nama sahria liata ngôh ma, dawh ma a phao leipa ula,
10 khi tlyna châta sahria ma, viahpakao zo no ma, pheiky zy ma, chôhchahrei ma hnei khah u; raihriatuhpa cha niepa hmô tlâh châ tlôh ta.
11 Khihpi liata tlyma khih chyhpa liata tlyma namâ ngiana maih ta, cha patlôsa tlâh châpa tlua ula, nama sie hlâ lei cha ano hnohta y teh u.
12 O namâ ngia tita anaoh teh u.
13 Cha o liatahpazy cha anaoh tlâh ama châ khiahtala nama thlahpalôhna bie cha ama chô liata vaw tlô mawh sy; anaoh tlâh ama châ vei khiahta deikua cha nama thlahpalôhna bie cha nama chôta vaw kua heih mawh sy.
14 Ahyrai châ ly leipa tlyma, nama biezy a nahthlie leipa tlyma ei cha, cha o tawhtapa tlyma, cha khih tawhta tlyma nama pua tita, nama phei liatahpa buhchadoh chatho teh u.
15 Hmeihseihta ta, ei cha chho ei chuh, ryurei noh liana cha cha khihzy hlâna chata Sawdawma nata Kawmawra pasa taopa a zie a y via aw.
Taolana a tlô haipa
16 “Pachâ teh u, changie hry liata mietahkupa hawhta ei cha tuah ei hih, parihzy hawhta soh ula, vachhuhzy hawhta nonaipa ta y teh u.
17 Chyhsa liatahpa a chado teh u; ryureituhpazy cha patusa aw ei ta, amâ pakhyna-ozy liata ama cha tu aw,
18 keima moh vâta biehneituhpazy nata abeizy hmiakô liata ama châ chhi aw, âmo nata Zenitaizy pahnosa awpa ta.
19 Ama cha patu tina chata, kheihta e, khâpa bie e ei reih aw tahpa ta pachâ chhie kha u; nama bie rei awpa cha a daihti liata piepa nama châ aw;
20 a reihtuh awpa cha nâmo châ leipa eichi ta, nama Paw Thlahpa ta nâmo hmpa ta tlao a reih aw.
21 Thie awpa ta unawhpazy ta unawhpazy patusa aw ei ta, pawzy ta sawzy patusa aw ei ta, sawzy ta nôpawzy adyuh aw ei ta ama pathiesa hra aw;
22 ei moh vâta chyhsa to a haopa ta y aw eichi ta. Achhâna taih a taopa maih deikua cha pachhapa ta ama y aw.
23 Cha khihpi liana chata a cha taola ti ei ta, a hro lâta a râ teh u; hmeihseihta ta, ei cha tah ei chuh, Chyhsa Sawchapawpa a vy hlâ ta. Izarel khihpizy chahryh khai aw veih eichi.
24 “Pachupa cha a hyutuhpa chô lâta y vei, sei chhao a zibeipa chôta y hra vei;
25 pachupa cha a hyutuhpa hawhta ypa nata sei chhao a zibeipa hawhta ypa cha a daih na. O hneituhpa hmahta Belzebul ama tah khiahta cha, a chhôhkha chhochhi kheihta ma ama tah aw tly!
Hmo chi awpa(Lk 12:2-9)
26 Chatanachata âmo chi kha u; a lâ leipa ta khupa khâpa hmah y vei, pahno lei awpa ta khâpa hmah phihpa y hra vei.
27 A zohna liata ei cha chhopa ei cha, khaihna liata reih teh u; bieparu ta nama theipa cha, vâphuh chôta tlâh awhkhei teh u.
28 Pôhpa thi thei ta, thlahpa a thi thei leipazy chi khah u; Kehena liata pôhpa nata thlahpa a pahleipadia theipa cha tlao chi teh u.
29 Boby sâno phusâ sâkha ta zuapa châ vei ma? Ama hryta sakha chhao nama Paw paryhsana leipa ta alei liata tla aw vei.
30 Nama luh liata sâ zydua chhao a reih khaipa a châ mâ tâh.
31 Chavâta chi khah u, boby hluhpi hlâta nama sôh via.
Chyhsa hmiakô ta Krista a châkheina(Lk 2:8-9)
32 Ahyrai chyhsa hmiakô ta na châkheipa maih cha, ei paw avâ liatahpa hmiakô ta ei châkhei hra aw;
33 ahyrai chyhsa hmiakô ta nâ paphapa maih, ei Paw avâ liatahpa hmiakô ta ei papha hra aw.
Adyhna châ leipa ta zaozi tlao a châ(Lk 12:51-53; 14:26-27)
34 “Alei liata adyhna a patlôsa awpa ta a vypa ei châ tahpa na pangiasa khah u; adyhna a patlôsa awpa châ leipa na ta, zaozi chareisa awpa ta a vypa tlao ei châ.
35 Chapaw ta a paw adyuhpa ta, sawchanô ta a nô adyuhpa ta, myunô ta a nohnô adyuhpa ta a vypa tlao ei châ.
36 Chyhsa khakhaipazy cha ano chhôhkhapa liatahpa cheingei ama châ aw.
37 Keima hlâta a paw ma, a nô ma kyh a pachâ viapa cha ei chyhsa tlâh châ vei; keima hlâta a sawchapawpa ma a sawchanônô ma kyh a pachâ viapa chhao cha ei chyhsa tlâh châ hra vei.
38 Ahyrai a kraws pu ta na zi leipa cha ei chyhsa tlâh châ vei.
39 Hrona a hmôpa cha pahlei aw ta; keima vâta a hrona a pahleipa deikua cha a hmô heih aw.
Lymâ(Mk 9:41)
40 “Ahyrai châ lypa ei cha nâ lypa ama châ, ahyrai nâ lypa cha nâ tuahtuhpa a lypa ama châ hra.
41 Ahyrai hrohsopa cha hrohsopa a châpa vâta alypa cha hrohsopa lymâ a hmô aw, ahyrai chyhsa siapa cha chyhsa siapa a châpa vâta alypa cha chyhsa siapa lymâ a hmô aw.
42 Ahyrai he hawtipa chyhpatazy hryta pakha he, pachupa a châpa vâta ti chakuapa nyu kha chhao a piepa cha, hmeihseihta ta, ei cha chho ei chuh, ama lymâ cha lei chacheita aw vei,” tah ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |