Luka 1

Luka 1

Theôphila hnohta châ paphaopa

1 Theôphila Phachaipa: Eima hryta hmo a vaw tlôpa thâtihzy kha chyhsa hluhpi ta ro a chhuah ei ta.

2 A thaona liata a hmôtuhpazy nata Thâtihpha chakaotuhpazy ta keimo maniah ama chho hawpa thâtih kha.

3 Chavâta a thaona tawhta ato a siapa ta a laichadaina chôta, a pazipata ta na châta roh aw sala a phapa ta ei pahno,

4 hmia lâta bie ama cha chhopa kha a dopa tlai a châ tahpa na pahno thei nawpa ta.

Bâtituhpa Zawhana pina chhochhieliena

5 Zudia râh beipa Herawda a hro nota Abiza py liatahpa a moh Zekaria, theihthaipa pakha y ta; cha chyhsa cha Arawna pathla hry liatahpa Elizabe lahpinô ta hnei ta.

6 Ama pano ta Khazohpa hmiakô liata a sia kawpa châ ei ta, seina hnei leipa ta Abeipa biepiepa nata a ryhpa zydua amâ pyh tyh.

7 Châhrasala saw hnei vei ei, Elizabe cha saw hnei leipa chanô a châpa vâta; ama pano ta machâ kaw ei ta.

8 Noh kha cha a pyzy taozie hawhta Zekaria cha Khazohpa hmiakô liata theihthaipa hawhta a hria hai nota,

9 theihthaipazy tao tyhpa hawhta Abeipa achhyna-o liata a ngia ta, maisâh liata rohpahâhpa rao awpa cha pachaopa ta a chôta tlu ta.

10 Rohpahâhpa raona daihti nota, zawpi zydua cha khôtho liata thlahchhâ ei ta.

11 Abeipa vâlyuhchâpa pakha rohpahâhpa raona maisâh chachâh lâta a duahpa ta a hnohta aluah ta.

12 Cha cha Zekaria chata a hmôpata nahta a nôpo ta, chi ngaita ta.

13 Châhrasala vâlyuhchâpa chata a hnohta, “Zekaria, chi khâ, na thlahchhâna kha theipa a châ mâ tâh, na lahpinô Elizabe chata sawchapawpa sa aw ta, a moh Zawhana na bi aw.

14 Nâma cha thaphapa ta aly aw chi ta, ano pina noh liana cha chyhsa hluhpi ta amâ ly hra aw;

15 Abeipa hmiakô liata chyhsa rôhnahpa châ aw ta, kresawti nata pari theipa doh aw vei, a nô chhi tawh chhao tlaita, Thlahpa Pathaihpa ta a bie.

16 Izarel pathlazy hluhpi Abeipa ama Khazohpa lâta a paheisa heih aw,

17 ano cha Khazohpa hmiakô liata Elaiza hmotaotheina nata thlahpa hneipa ta a sie aw, reingiah leipazy cha siana kyh sona lâta paheisa aw ta, zawpizy cha Abeipa châta a chhuahdy hra aw,”tah ta.

18 Zekaria chata vâlyuhchâpa hnohta, “Cha cha kheihta e ei pahno thai aw? Kei machâpa châ na ta, ei lahpinô chhao machâpa a châ hra,” tah ta.

19 ‘Vâlyuhchâpa chata a hnohta a chhy ta, “Kei Kabriel, Khazohpa hmiakô ta a duah tyhpa châ na ta; chho awpa ta nata cha thâtih ly-ypa cha pahnosa awpa ta tuapa ei châ.

20 Châhrasala ei bie reipazy a daihtita ta a vaw tlô awpa cha na zo leipa vâta, cha hmozy a vaw tlô hlâ lei cha bie rei thai leipa ta na thlie thlâ ha aw,” tah ta.

21 Zawpizy chata Zekaria cha hâ thlâh ha ei ta, Khazohpa achhyna-o liata a y parei kawpa vâna chata ama noâh kaw ta.

22 A vaw pua nah chata ama hnohta bie reih thai khao leipa ta, chatanachata achhyna-o liata aluahna a hmô tahpa pahno ei ta; ama hnohta ku thliethlâpa ta bie reih thei leipa ta y thlâh ha ta.

23 A chakaona daihti cha a chhâ nah chata Zekaria cha o lâ a di haw ta.

24 Cha hnôh lâna chata a lahpinô Elizabe cha saw phaoh ha ta, thla pangawh chhôh cha a nyupa ta,

25 “Chyhsa mohmô ta ei moh chhie chhiehruna awpa ta, Abeipa ta chyhsa hmôpa ta he hawhna heta eina taopa haw,” tahpa ta reih ta.

Zisu pina chhochhieliena

26 A thla charuna liana chata Khazohpa ta vâlyuhchâpa Kabriel cha Kalili râh liata khih miakha Nazari ama tahpa liana chata, laihsakôpa pakha hnohta tuah ta,

27 cha laihsa cha Davi pathla liatahpa Zawsi ta â pahawhpa a châ; laihsa moh cha Mari a châ.

28 Vâlyuhchapa cha a hnohta angia ta, “Ei châ naoh na, nohlaopa y, Abeipa na hnohta a y!” tah ta.

29 Chatawhcha cha bie reipa vâna chata a nôpo ngâsâ ta, kheihtazie ta anaohpa ma a châ tahpa pachâ ta.

30 Vâlyuhchâpa chata chanô hnohta, “Mari, chi khâ, Khazohpa ngiachhiena na to hih.

31 Saw phaoh aw chi ta, sawchapaw sa aw chi ta, a moh ta Zisu na bi aw.

32 Ano cha chyhsa laipa châ aw ta, Chônôchaipa Sawchapawpa ama tah aw; Abeipa Khazohpa ta a hnohta a pathlatuhpa Davi dyuchhai cha pie aw ta,

33 Zakaw pathlazy chô liata chhâzaw ta a bei aw ta, a khihnarâh chhao chhâna hnei aw vei,” tah ta.

34 Mari ta vâlyuhchâpa hnohna chata, “Cha cha kheihta a châ thai aw tly, vahpa hnei tlôh lei khâh na ta?” tah ta.

35 Vâlyuhchâpa chata a hnohta, “Thlahpa Pathaihpa cha na chôta vaw tlô aw ta, Chônôchaipa hmotaotheina cha na chôta a y aw; he vâna heta hawti pathaihpa a vaw pih awpa chhao cha, Khazohpa Sawchapawpa ama tah aw.

36 Pachâ teh, na chihei chanô Elizabe chhaota a sathei chhâ ha tawhta sawchapawpa phaoh ta; saw leipa ama tah tyhpa kha atahma he a thla charuna a châ haw.

37 Khazohpa chata hmo khâpa rai tao thei leipa y vei,” tah ta.

38 Mari ta, “Abeipa seichanô ei châ; na bie hawhta ei chô liata tlô se,” tah ta. Vâlyuhchâpa chata siesai ha ta.

Mari ta Elizabe a kei hmô

39 Cha nona chata Mari cha thyu ta, Zudia khihpi miakha tlâh râh liata a ypa lâta thlai sie ha ta,

40 Zekaria o liata a ngia ta, Elizabe cha a naoh ta.

41 Elizabe ta Mari a naohna cha a pahnopa ta nahta, a chhi liata hawsai cha a tlieh ta; Elizabe cha Thlahpa Pathaihpa ta vaw bie ha ta,

42 ao paro ngaitapa ta awh ta, “Nâ cha chanô zydua hry liata nohlaopa na châ na, na saw phaopa chhao a nohlao na!

43 Ei Beipa nô, ei hnohta nâ vypa he kheihta zie e a châ tly?

44 Einâ naohna chi ao ei nahkhao liata a ngiapa ta nahta, ei chhi liata hawsai ypa cha alypa ta â chotlai.

45 Na nohlao na, hmoto Abeipa bie reipa kha tlô tlôh aw ta,” tah ta.

Mari reithaina hla

46 Mari chata:“Ei thlahhmipa chata Abeipa a palyupalih,

47 ei thlahpa chhao Khazohpa na Pachhahtupa liata thapha ta,

48 a seichanô nawhna zie hmô ta ngiachhie ta. Nathlie teh, atahmâ tawhta chhâ zydua ta nohlao eina tah aw ei;

49 Atotaotheipa khata hmo rôhnahpa na taopa haw ta, a moh chhao pathaihpa a châ.

50 Chatawhcha ano chituhpazy cha chhâ zydua ta a ngiachhie lymâ tyh.

51 A bâh ta a thatlônazie pamosa ta,apalaipazy pachâna kyh cha a papai khai haw,

52 abeidyuchhai liata ryureituhpazy atyuhpa cha a daophi pathlah ta, a nawhpazy cha tlao pasâhsa haw ta;

53 nodipazy cha hmophapazy ta pabie ta, a hneipazy cha a ruapa ta a pasisa.

54 Maniah pathlatuhpazy hnohta a reipa hawhna khata,

55 Abaraha nata a pathlazy cha, chhâzaw ta a ngiachhie awpa pahno thlâh hana awpa ta, a sei Izarelzy cha a bao haw,” tah ta.

56 Mari cha thla thôh rachhôh a hnohta y ta, chatawhcha a o lâ kua haw ta.

Bâtituhpa Zawhana pina

57 Elizabe saw Sana daihti cha a vaw daih ha ta, sawchapawpa sa ta.

58 A vaihzy nata a sanawhzy chata Abeipa ta a ngiachhie ngâsâ tahpa vaw pahno ei ta, alykhei kaw ei ta.

59 Chatawhcha noh charie tawhna chata hawsai chopawtai awpa ta a vy ei ta; a moh châta, a paw moh hawhta Zekaria bi amâ chhuah,

60 châhrasala a no ta, “Châ vei; Zawhana tlao bi awpa a châ aw,” tah ta.

61 Âmo chata a hnohta, “Na chiheizy hry liata he mo a phaohpa he ahyhmah ta y veih ei,” tah ei ta.

62 Chatawcha a paw hnohta thliethlâpa ta a moh cha ahy bipa châ sala e na khoh tah ei ta.

63 Ano chata chârona awpa a phiapa hiah ta, “A moh Zawhana a châ,” tahpa ta roh ta. Ama zydua ta ama noâh kaw ta.

64 Sôkhata a pakah nata a paleih cha a vaw pathlâ ta, Khazohpa reithaipa ta, a reih a pathlie haw.

65 Ama kiapâh ta a ypa zydua chata chi ei ta, cha bie cha Zudia râh zydua liata vaw pathâh haw ta;

66 a pahnopa maihta ama palôhrupa liata pachô ei ta. “Cha hawsai cha kheihawhta ma a y aw tly?” tah ei ta. Abeipa ku cha a hnohta y tlôh ta.

Zekaria chhochhieliena

67 A paw Zekaria cha Thlahpa Pathaihpa bie ta, chhochhielie hra ta,

68 “Abeipa Izarel Khazohpa cha palyupalihpa ta y mawh sy, a chyhsazy cha za tly ta, khotalaina taopa ta,

69 a sei Davi chhôhkhazy hry liana chata, pachhatuhpa maniah paduapa ha tlôh ta,

70 aleilô pi tua no tawhta a hrohsopa pathaihpazy pakah liata a reipa hawhna khata,

71 eima chariapazy nata maniah a mohnaotuhpa zydua tawhta pachhana cha;

72 maniah pathlatuhpazy ngiachhiena pamosana awpa nata, a biehrai pathaihpa pahno thlâh hana awpa,

73 maniah pathlatuhpa Abaraha hnohta chhie a sapa kha,

74 eima chariahpazy liata a bôh pi ta,

75 eima hro chhôh zydua a mohmô ta pathaih nata siapa ta ypa ta, chi leipa ta ano eima chakaona awpa kyh cha.

76 Hawti nâ he Chônôchaipa hrohsopa ama cha tah aw; Abeipa lâthlôhzy a chhuahdy awpa ta, a hmiakô ta sie tlôh aw chi ta,

77 a chyhsazy ama moleina a ngiahthaina awpa nata, Pachha ta ama châ nawpa bie chho awpa ta,

78 eima Khazohpa ngiachhiena vâta, chôlâ tawhta nôchhiena chata maniah a vaw tlyh haw

79 zohna hry liata nata thina nohpahli liata atyuhpazy pakhaihsa awpa nata, thlahlôhna lâpi lia eima pheizy a chhi awpa ta,tah ta.

80 Chatawhcha hawsai cha vaw laiseih lymâ ta, a palôhrupa a vaw i ta, Izarel hnohta a vaw luah hlâ lei cha râhpathohpa liata y thlâh ha ta. 

Luke (Luke)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Luka 2

Luka 2

Zisu Pina (Mt 1:18-25)

1 Cha nohzy liana chata, Kaisaria Aukastu ta khizaw zydua maluh rei awpa ta bie pie ta.

2 He maluhreina he, Suria râh liata Kuirinia ryureituhpa a châ nota tao tuapa a châ.

3 Chatanachata chyhsa zydua cha ama moh ropa ta ama khih lâ chyu sie ei ta.

4 Zawsi chhao cha Davi chhôhkha nata a pathla a châpa vâta, Kalili râh liata Nazari khih tawhta,

5 Mari a lahpinô châta a pahawhpa, saw pih daihmâpa nah chata, moh ro awpa ta Zudia râh liata Davi khih, Bethlehe ama tahpa lâna cha sie ei ta.

6 Cha liata ama y nona chata a saw sana noh cha a vaw ki ha ta.

7 Chatawhcha a saw tuapa liata chapaw sa ta, poh pahlyna ta pahly ta, khichhai bu liata amâ tlôh leipa vâta, sachaki liata pazia ta.

Mietahkuvaihtuhpazy nata vâlyuhchâpazy

8 Cha râh liana chata mietahkuvaihtuhpazy y ei ta, zâ ta ama mietahkupazy vaipa ta lyu liata a riepâ ei ta.

9 Abeipa vâlyuhchâpa cha ama hnohta a vaw luah ta, Abeipa rôhnahna ta ama chheipâh cha za khai ta, chi ngâsâ ei ta.

10 Vâlyuhchâpa chata ama hnohta, “Chi kha ula; nahthlie teh u, mo to châta thâtihpha aly y ngaitapa ei cha vaw tlôkheipa ei hih;

11 atanoh he nama châta Davi khih liata Pachhatuhpa a pih haw, Beipa Krista khaw.

12 Nâmo châta he he ngiana awpah a châ: hawsaih pohpahlyna ta pahlypa, sachaki liata a ziapa nama hmô aw,” tah ta.

13 Sôkha ta vâlyuhchâpa hnohna chata vâmo hluhpi a vaw luah ei ta, Khazohpa reithai ei ta.

14 “Khazohpa Chônôchaipa hnohta rôhnahna y mawh sy,alei chô liata ano a palysatuhpa chyhsazy hnohta adyhna y mawh sy!” tah ei ta.

15 Chatawhcha vâlyuhchâpazy ta avâ lâ ama siesaipa ta nahta, mietahkuvaihtuhpazy chata, “Atahmâ he Bethlehe lâ thlai sie ei suh vy, Abeipa ta hmo a vaw ypa miah a chhopa cha moh ei suh vy,” a tah ei ta.

16 Thlai sie parah ei ta, Mari nata Zawsi nata sachaki liata hawsaih paziapa chhao cha hmô ei ta.

17 Chatawhcha ama kei hmô nah chata hawsaih thâtih ama pahno hapazy cha reih ei ta;

18 a theipazy chata mietahkuvaihtuhpazy bie reipa cha noâh tah kaw ei ta.

19 Châhrasala Mari chata he hmo zydua he a palôhrupa ta pachâ ta, a vao thlâh ha ta.

20 Chatawhcha mietahkuvaihtuhpazy chata ama hnohta chhopa hawh tlaita, hmôpa ta ama pahnopa vâta, Khazohpa reithaina chôta kua ha ei ta.

Zisu chopawtaina

21 Chatawhcha a chopawtaina awpa noh charie a vaw tlô nahta, chhi liata a y hlâta, vâlyuhchâpa ta moh a bi chiehpa, Zisu bi ei ta.

Zisu achhyna-o liata ama hlâ

22 Mawsi ryhpa hawhta a pathaisa noh a vaw tlô nahta,

23 Abeipa ryhpa bie ta, “Chapaw saw a pih tuapa maih cha Abeipa lâta hlâpa ta ama châ aw,” tahpa ropa hawhna khata

24 Abeipa lâta hlâ awpa nata Abeipa ryhpa bie liata ropa hawhta, “Vachhuh baokha tlyma; pivaw taw pô no tlyma,” hlâ awpa ta Zerusale khih lâta a vaw chhi ei ta.

25 Chatawhcha Zerusale khih liana chata chyhsa pakha a moh Simeôna a y, cha chyhsa cha sia ngâsâpa nata Khazohpa pachâ ngaitapa châ ta, Izarelzy thlahpalôhtuh awpa cha hâ thlâh ha ta, ano chôta Thlahpa Pathaihpa cha a y.

26 Abeipa Krista a hmô hlâ lei cha a thi lei awpa Thlahpa Pathaihpa ta vaw pahnosa ha tlôh ta.

27 Thlahpa pahnosapa ta Khazohpa achhyna-o liata a kei ngia ta; ryhpa bie hawhta, tao awpa ta a nôpaw chata hawsaih Zisu cha ama kei ngiakhei nona chata

28 ano chata a pyh ta, Khazohpa reithai ta.

29 “Abeipa, na bie lymâ hawhta na sei he thlahlôhpa ta pasiesa mah y.

30 na pachhana chyhsa to châta na taopa kha

31 ei mo ta hmô ha ta,

32 Zenitaizy hnohta khaihna aluahna awpa nata na chyhsa Izarelzy rôhnahna awpa cha,” tah ta.

33 Hawsaih thâtih a reipa cha, a nô nata a paw chata noâh tah kaw ei ta.

34 Simeôna chata byhnâ awpa ei ta, a nô Mari hnohta, “Pachâ teh, he hawsai he Izarel hryta chyhsa hluhpi papao awpa nata padua awpa châta raopa a châ, ano cha ngiana châ aw ta, chyhsa hluhpi ta khoh aw veih ei.

35 Nama pathipalôh chhao zaozi ta chhôpahlie aw ta, chyhsa hluhpi ama pathipalôh liata ama pachânazy a luahna awpa ta,” tah ta.

36 Chatawhcha hrohsonô pakha Ana, Phanuel sawchanônô, Asera pho liatahpa y ta, anô cha nôpi ngâsâpa châ ta, vahpa kô sari chhôh hnei ta,

37 nôhmei châpa ta kô sycharie nata kô palih chhôh y ta. Ano cha Khazohpa achhyna-o siesai leipa ta a chhô a zâ ta, pati nie leipazy ta thlah chhâpa ta Khazohpa achhy tyh ta.

38 Cha daihti tlai chata ano cha a vy ta Khazohpa hnohta alyna bie reih ta, Zerusale khih chatlaina hnabeiseipa zydua hnohta ano thâtih cha chho ta.

Nazari lâ a vaw kua heih

39 Abeipa ryhpa bie hawhta hmo to zydua ama tao khai nahta, Kalili râh liata, ama khih Nazari lâna cha kua ei ta.

40 Hawsaih cha laiseih ta, a tha vaw tlô ta, sona ta bie ha ta; Khazohpa ngiachhiena chhao cha ano liata y lymâ ta.

Zisu cha Khazohpa achhyna-o a ngai

41 Kô tato ta Zawpakhô kyhchhi daihti ta a nô nata paw cha Zerusale khih lâta khy tyh ei ta.

42 Ano cha kô hrawhleino a vaw châ nahta, ama tao tyhpa hawhta Zerusale lâ khy ei ta;

43 kyhchhi cha a pai nahta, ama kua hai nota, hawtipa Zisu cha Zerusale khih liata y patlua ha ta. A nôpaw deikua chata pahno leipa ei ta,

44 khitlypazy sahlao hry liata a y khiah ma tahpa ta pachâ ei ta, noh kha siena cha sie ha ei ta, ama heinawhzy nata ama hmia pahnopazy hry liata tlua ei ta;

45 ama hmô leipa vâta, tlua lymâna chôta Zerusale khih lâta kua heih ei ta.

46 Noh thôh tawhna chata Khazohpa achhyna-o liata pachutuhpazy hry liata a tyuhpa ta, ama bie nahthliena chôta, a vaw hiahri haipa hmô ei ta;

47 a theipa maih chata, a novâh zie nata a chhynazie cha ama noâh kaw ta.

48 A nôpawzy chata ano cha ama hmô nahta ama noâh kaw ta; a nô ta a hnohta, “Ei saw, khazia e he hawhna heta maniah na tao? Na paw nata kei chata thlahzo ngâsâpa ta eima cha tlua,” tah ta.

49 Ano chata ama hnohta, “Khazia e, eina tlua eichi? Ei Paw o liata ei y awpa a châ tahpa pahno vei eichi ma?” tah ta.

50 Châhrasala ama hnohta a biereipa cha a pachâna pahno leipa ei ta.

51 Ama hnohta zu ta Nazari khih cha za tlô ta, ama bie zyhpa ta y ta; a no chata cha hmo zydua cha a palôhrupa ta a vao thlâh ha ta.

52 Chatawhcha Zisu cha laiseih ta, so via rili ta, Khazohpa nata chyhsa khochhihna hnei via rili ta. 

Luke (Luke)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Luka 3

Luka 3

Bâtituhpa Zawhana pachuna (Mt 3:1-12; Mk 1:1-8; Zh 1:19-28)

1 Taibiria Kaisaria a beina kô hrawhleipangawhna liana cha ta, Pawtia Pila cha Zudia râh ryureituhpa châ ta, Herawda cha Kalili râh beipa a châ, a unawhpa Phili cha Ituria nata Trakôniti râh beipa châ ta, Lysania cha Abeilene râh liata abeipa châ ta,

2 Ana nata Kaiapha cha theihthai beichaipazy ama châ, râhpathohpa liata Zekaria sawchapawpa Zawhana hnohna chata, Khazohpa bie vaw tlô ta;

3 ano cha Zawdâh chheipâh zydua hryhpa ta, moleina a ngiahthaina awpa ta rona bâtina bie cha chho lymâ ta.

4 Hrohsopa Isai châbu liata: “Râhpathohpa liata awhtuhpa ao chata,Abeipa lâthlôh a chhuahdy ula, a lâtleizy cha pado muh vy.

5 Saikao to pabiepa châ aw ta,tlâh sâhpa nata tlâh byuhpa zydua cha pahnaisapa a châ aw,lâpi a kohpazy a vaw tlâh aw ta, lâthlôh a raih leipazy cha pamih aw ta;

6 chyhsa zydua ta Khazohpa pachhana cha ama hmô aw!” tahpa ta ropa hawhna khata.

7 Ano chata bâti châ awpa ta a hnohta zawpi a vypazy hnohna chata, “Vâzi pathlazy saih u! Hiehâhna a vaw tlô awpa cha a râsai awpa ta ahy e zikyu châ râ ei?

8 Nama yzie cha ro hmeiseih teh u, ‘Abaraha pathla eima châ mâ tâh,’ palôhrupa ta a tah kha u; Khazohpa ta alôzy he Abaraha pathla lâta a paduasa thei tahpa, ei cha chho ei hih.

9 Atahmâ bawlaw ta, ahrei tho thaby to liata sopa a châ haw; tho to thei phapa ta a pathei leipa maih cha thlupa ta mei liata ama thy tyh,” tah ta.

10 Chatawhcha zawpi chata a hnohta, “Cha khiahtala khâpa e eima tao aw tly?” tahpa ta hiahri ei ta.

11 Ano chata ama hnohta, “Ahyrai viahpakao sâno a hneipa ta cha a hnei leipa hnohta pie mawh sy; ahyrai niepa a hneipa ta cha cha hawhna hra chata tao hra mawh sy,” tahpa ta a chhy ta.

12 Chhiekheituhpazy chhaota bâti châ awpa ta a hnohta a vy ei ta, a hnohta, “Pachutuhpa, khâpa e eima tao aw?” tah ei ta.

13 Ano chata ama hnohta, “Chhie a hnawpa hlâta a hluh via khei kha u,” tah ta.

14 Pheisaihzy chhaota a hnohta; “Keimo chhao he khâpa e eima tao awpa a châ?” tahpa ta hiahri ei ta, Ano chata ama hnohta, “Ahy ei hmah nôchhiena kyh ta paru leipa ula, haih leipa ula, nama hlao chô liata palôhtlâhpa ta y teh u,” tah ta.

15 Zawpi ta ama hnabeiseih ta, chyhsa zydua ta Zawhana thâtih cha ama palôhrupa ta, Mesia châ thlâh ha ngyu aw vei tlyma tahpa ta ama pachâ nota,

16 Zawhana ta âmo cha a chhy ta, “Kei chata ti ta ei cha bâti tyh ei; châhrasala keima hlâta chyhsa rôhnah viapa a vy aw, a pheiky ri a pathlâ tlâh chhao châ va na; ano chata Thlahpa Pathaihpa nata mei ta a cha bâti aw ei.

17 A barah cha a ku liata y ta, a sawhri zie pasia aw ta, a sâh cha apâh liata khô aw ta, châhrasala a sihpa cha mei thi thei leipa liata a rao aw,” tah ta.

18 Chatawhcha pasyuna bie hropa hluhpi ta, zawpizy cha Thâtihpha a chho tyh.

19 Châhrasala Abei Herawda cha a unawhpa lahpinô Herawdi kyh liata nata a hmo taochhiena kyh zydua vâna chata Zawhana ta chhorei ta,

20 a hmo paraona zydua baipa ta Zawhana cha lô-o liata khô ha ta.

Zisu bâtina (Mt 3:13-17; Mk 1:9-11)

21 Chyhsa zydua ta bâti ama châ khai nahta, Zisu chhao cha bâti châ hra ta, chatawhcha thlah a chhâ hai nota, avâ a vaw pahy ta,

22 Thlahpa Pathaihpa cha pôhpa hneipa ta, vachhuh lyupa ta za chô ta, a chôta a choh ta, avâ tawhta ao vaw pua ta, “Nâ ei Sawchapaw kho ngaitapa na châ; na chôta ei ly ngaita na,” tah ta.

Zisu a vaw pathlana(Mt 1:1-17)

23 Zisu chakaona rai a thao nona cha, kô sythôh rachhôh a châ, chyhsa pachâ ta cha, Zawsi sawchapawpa a châ, cha cha Heli saw a châ,

24 cha cha Matha saw a châ, cha cha Livai saw a châ, cha cha Melki saw a châ, cha cha Zanai saw a châ, cha cha Zawsi saw a châ,

25 cha cha Matathia saw a châ, cha cha Amôsâ saw a châ, cha cha Nahu saw a châ, cha cha Esli saw a châ, cha cha Nakai saw a châ,

26 cha cha Maatha saw a châ, cha cha Matathia saw a châ, cha cha Semei saw a châ, cha cha Zôseka saw a châ, cha cha Zôda saw a châ,

27 cha cha Zôana saw a châ, cha cha Rhesa saw a châ, cha cha Zerubabel saw a châ, cha cha Shaltiel saw a châ, cha cha Neri saw a châ,

28 cha cha Melki saw a châ, cha cha Adi saw a châ, cha cha Kôsa saw a châ, cha cha Elmada saw a châ, cha cha Era saw a châ,

29 cha cha Zawsua saw a châ, cha cha Eliaza saw a châ, cha cha Zawsi saw a châ, cha cha Matha saw a châ, cha cha Livai saw a châ,

30 cha cha Simeôna saw a châ, cha cha Zudah saw a châ, cha cha Zawsi saw a châ, cha cha Zônama saw a châ, cha cha Eliakima saw a châ,

31 cha cha Melia saw a châ, cha cha Mena saw a châ, cha cha Matatha saw a châ, cha cha Natha saw a châ, cha cha Davi saw a châ.

32 cha cha Zese saw a châ, cha cha Ôbeda saw a châ, cha cha Bôaza saw a châ, cha cha Sala saw a châ, cha cha Nashôna saw a châ.

33 Cha cha Aminada saw a châ, cha cha Adami saw a châ, cha cha Arni saw a châ, cha cha Hezrôna saw a châ, cha cha Pereza saw a châ, cha cha Zudah saw a châ,

34 cha cha Zakaw saw a châ, cha cha Aisika saw a châ, cha cha Abaraha saw a châ, cha cha Tera saw a châ, cha cha Nahaw saw a châ,

35 cha cha Seruka saw a châ, cha cha Re-u saw a châ, cha cha Peleka saw a châ, cha cha Ebe saw a châ, cha cha Sheleh saw a châ,

36 cha cha Kainana saw a châ, cha cha Arphakhasa saw a châ, cha cha Shema saw a châ. Cha cha Naw saw a châ, cha cha Lameka saw a châ,

37 cha cha Methusela saw a châ, cha cha Enawka saw a châ, cha cha Zare saw a châ, cha cha Mahalalel saw a châ, cha cha Kainana saw a châ, cha cha Enawsa saw a châ. cha cha Setha saw a châ, cha cha Ada saw a châ, cha cha Khazohpa saw a châ. 

Luke (Luke)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Luka 4

Luka 4

Zisu reipasaona a tyhpazy (Mt 4:1-11; Mk 1:12-13)

1 Zisu cha Thlahpa Pathaihpa ta bie ta, Zawdâh chavah tawhta kua heih ta,

2 ahripa reipasaona chôta, râhpathohpa liata noh sypalih Thlahpa chhihthapa ta y ta. Cha noh chhô liana chata khâpahmah nie vei; a chhâna lâ cha a no vaw di ha ta.

3 Ahripa ta a hnohta, “Khazohpa Sawchapawpa na châ khiahtala, he alô he viahchhâ lâta a lie awpa ta bie pie teh,” tah ta.

4 Zisu ta a hnohta, ‘Chyhsapa he viahchhâ deita ta hroh aw veih ei,’ tahpa ropa a châ,” tah ta a chhy ta.

5 Ahripa chata ano cha a chhi ta, movi hlâta khizaw khihnarâh zydua pamosa ta,

6 a hnohta, “He zydua chô liata biehneina nata a rôhnahna he ei cha pie aw; ei hnohta piepa châ ha tlôh ta. Ei khopa maih hnohta ei pie tyh hra.

7 Einâ naoh khiah chi tala, a zydua ta na eih a châ khai aw,” tah ta.

8 Zisu ta a hnohta,“ ‘Abeipa na Khazohpa cha a naoh la, ano deita na chakao awpana a châ,’ tahpa ropa a châ,” tah ta a chhy ta.

9 Chatawhcha ahripa chata Zerusale khih lâta a chhi ta, Khazohpa achhyna-o laki pazaohpa liata soh ta, a hnohta, “Khazohpa Sawchapawpa na châ khiahtala he tawhna heta a pathla teh;

10 ‘Nâma cha vaih awpa ta nâ kyh liata la, a vâlyuhchâpazy bie a pie aw!’ tahpa nata

11 Ama ku ta cha chalo aw ei ta, chata leipa ta la na pheizy nâ chhuh pathlei aw na.’ tahpa ropa châ tlôh ta,” tah ta.

12 Zisu ta a hnohta, “Abeipa na Khazohpa pasia khâ,’ tahpa a châ,” tahpa ta a chhy ta.

13 Chatawhcha ahripa ta a reipasaona awpa zydua ta a reipasao khai nahta, a rypaona daihti châta siesai ha ta.

Kalili râh liata chakaona â thao(Mt 4:12-17; Mk 1:14-15)

14 Zisu cha Thlahpa hmotaotheina ta Kalili râh lâta kua ha ta, a thâtih cha cha râh chheipâh zydua liata pathâh ta.

15 Amâ pakhyna-o liata zy pachu lymâ ta, chyhsa zydua reithaipa ta y ta.

Nazari liata Zisu ama dytha(Mt 13:53-58; Mk 6:1-6)

16 A laiseihna khih, Nazari cha vaw tlô ta; pahânoh ta a tao tyhpa hawhta a pakhyna-o liata a ngia ta, reipa ta a duah ta;

17 hrohsopa lsai châbu cha a hnohta pie ei ta. Châbu cha pahy ta, he bie reina su he a tlyh ta:

18 “Abeipa Thlahpa cha ei chôta y ta, dyhchhiepazy hnohta Thâtihpha chho awpa ta sathaw eina thupa vâta.Ano chata sei atâhpazy hnohta puana biechhopa nata mochaopazy hnohta mo pavâ hnei heih nawpa kyh zy, taola a taopazy puana awpa ta nata

19 Abeipa palôhtlâhna kô tlâh awhkhei awpa ta eina tuah,” tahpa hih.

20 Chatawhcha châbu cha chaty ta, chakaotuhpa pie heih ta, a tyuh ha ta; apakhyna-o liata chyhsa zydua mo cha a chôta khaihnao thlâh ha ta.

21 Ama hnohta, “Khazohpa châ bie he atanoh liata nama theipa ta a vaw tlô haw,” tahpa ta reih pathao ta.

22 Ama zydua ta ano reithai ei ta, ngiachhiena bie a pakah tawhta a puapazy cha ama noâh kaw ta; “He chyhsa he Zawsi sawchapawpa châ vei ma?” tah ei ta.

23 Ano chata ama hnohta, “Nâmo ta he bieso, ‘Dawhty, nâmasasyh ta a patlâh teh; Kapynia khih liata na hmotaopa eima theipa maih kha he nama khih lia chhaota tao hra teh,’ tahpa eina chho thlyu aw eichi na.” tah ta.

24 Ano ta, “Hmeiseihta ta ei cha chho ei chuh, hrohsopa ahyhmah ta ano khih liata chyhsa ta aly beih veih ei.

25 Châhrasala a dopata ta, ei cha chho ei chuh, Elaiza hro noh liana khata kô thôh nata thla charu avâ a khaw ta, râh zydua liata chakâhna thata a tlô nona khata, Izarel râh liata nôhmei hluhpi y ei ta;

26 anodeikua ama hry liata ahy hnohta hmahta Elaiza tuapa châ leipa ta, Sidaw râh liata Sarepta khihpa nôhmei pakha lâta deita tuapa tlao a châ.

27 Chatawhcha hrohsopa Elaisa hro noh liana chhao khata Izarel râh liata aphawhpa hluhpi y ei ta; châhrasala ama hry liata ahyhmah ta pathaisapa ta y veih ei, Naama Suria chyhsa dei leipa ta cha,” tah ta.

28 Apakhyna-o liata chyhsa zydua ta, cha bie cha ama theipa ta nahta ama hiehâh ngâsâ ta.

29 Thyu ei ta, khih tawhna chata chatichahnao lymâ ei ta, ama khih yna lôkâhpa khua liana chata chati pathlah awpa ta a chhi ei ta.

30 Châhrasala ano cha ama hryhri ta siepa ta sie syulyu ha ta.

Chyhsa pakha thlahpa puapa a hneipa(Mk 1:21-28)

31 Kalili râh liata Kapynia khih lâta zu ha ta, pahânoh liata âmo pachu ta;

32 biehnei ngâsâpa ta a pachupa vâna chata, noâh tah kaw ei ta.

33 Chatawhcha apakhyna-o liana chata chyhsa pakha ahripa thlahpa puapa a hneipa y ta; cha chata ao paro ngaitapa ta,

34 “Nazari Zisu, kheihta tao awpa e maniah na khoh? Maniah pahleipadia awpa ta ma nâ vy? Nâ, ei cha pahno na, Khazohpa Mo Pathaihpa cha na châ,” tahpa ta aw ta.

35 Châhrasala Zisu chata ra ta, “A chalih la, a chhôh tawhtapa vaw pua teh!” tah ta. Chatawhcha ahripa chata ama hryta papao ta, pasasa leipa ta, a chhôh tawhtapa cha vaw pua ta.

36 Ama zydua ta noâh tah kaw ei ta, “He he khâpa bie e a châ? Biehnei ngaitapa nata hmotao thei ngaitapa ta ahripa a puapazy bie pie ta, ama pua thlâh hapa he,” tahpa ta reih ei ta.

37 Chatawhcha cha râh chheipâh khih to liata a thâtih pathâh ha ta.

Zisu ta Pity lahpinô nô a patlâh(Mt 8:14-15; Mk 1:29-30)

38 Chatawhcha apakhyna-o tawhtapa cha pua ta, Saimaw o liata a ngia ta. Saimaw lahpinô nô cha thata chasi ta, chatanachata ano châna chata a hawpa ei ta.

39 A kiapâh ta a duah ta, chasipa cha ra ta, pai ha ta; thlai thyu ta, âmo chakao ha ta.

Zâlâ ta chyhsa hluhpi a patlâh(Mt 8:16-17; Mk 1:32-34)

40 Noh a tla hai nota tlâh leipa a hluhpi pasa to a ohpazy a hnohta a vaw chhi ei ta; ama zydua chôta a ku pahnieh ta, patlâh lymâ ta.

41 Ahripazy cha chyhsa hluhpi chhôh tawhtapa vaw pua ei ta, “Khazohpa Sawchapawpa na châ!” tahpa ta aw ei ta. Chatawhcha ano chata âmo cha ra ta, bie ama reipa pasaih leipa ta, Mesia a châ tahpa ama pahno thlâh hapa vâta.

Biechhopa ta a pua(Mk 1:35-39)

42 Chatawhcha khih a deih nahta pua ta, râhpathohpa su lâ sie ta. Châhrasala zawpizy chata tlua ei ta, a hnohta a vy ei ta, âmo a siesai lei nawpa ei ta patu a chhuah ei ta;

43 ano chata ama hnohta, “Khih hrolâzy chhao Khazohpa Khihnarâh Thâtihpha chhopa na a châ; cha vâna chata tuapa châ tlôh na ta,” tah ta.

44 Chatawhcha Zudia râh liata apakhyna-o liatazy bie chho lymâ ta. 

Luke (Luke)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Luka 5

Luka 5

Nga hluhpi patuna (Mt 4:18-22; Mk 1:16-20)

1 Zawpi ta Khazohpa bie nahthlie ei ta, ano amâ byh hôlô nota, Zisu cha Kenesare tipo kiah liata a duah ta.

2 Tipo kiah liana chata balyh sâno hmô ta; châhrasala nga a patutuhpazy cha pua ei ta, ama saozy pasi ei ta.

3 Balyh sâkha, Saimaw eih liana chata kiah ta, a hnohta raphyu tawhta bâh a pasie awpa ta hiah ta. A tyuh ta, balyh tawhna chata zawpizy cha pachu ta.

4 Bie a reipa cha a bâh nahta, Saimaw hnohta, “Athupa lâ pangai la, nga patu awpa ta na saozy vawh teh,” tah ta.

5 Saimaw ta a hnohta, “Hyutuhpa y, hriapasa ngaitapa ta a zozâ khihdei ta hria pi ta, khâpahmah patu ma pi! Châhrasala na bie hawhta saozy cha ei vawh heih aw na,” tahpa ta a chhy ta.

6 Chatawhcha sao cha ama vawh nahta, nga hluhpi khu ei ta; ama saozy chhao cha a hrie pathao ta,

7 balyh hropa liata ama pyheih a ypazy cha âmo a bao awpa ta ku ta a kei ei ta. A vy ei ta, balyh sâno liata pabie rairieh ei ta, ama balyh chhao cha a pamôhkhei daihmâ ha ta.

8 Saimaw Pity chata cha cha a hmô nahta, Zisu phei liata kei paothlu ta, “Hy Abeipa, na siesai teh, moleipa ei cha hih,” tah ta.

9 Ama nga patupa cha ano nata a viasazy chata noâh tah kaw ei ta;

10 Saimaw pyheih, Zebadi sawchapawpa Zami nata Zawhana zy chhaota noâh tah kaw hra ei ta. Zisu ta Saimaw hnohta, “Chi khâ, atahmâ tawhta la chyhsa na patu aw na,” tah ta.

11 Ama balyhzy cha ngiakâ lâ puakhei ei ta, ato siesaipa ta ano cha zi ha ei ta.

Zisu ta aphawhpa a pathai(Mt 8:1-4; Mk 1:40-45)

12 Khih miakha liata a y nota, chyhsa pakha a pôhpa duata aphawhpa a vy ta; Zisu a hmô nata a hmiakô liata paopa ta, “Abeipa, na khoh khiahtala eina pathaisa thei chi na,” tahpa ta a haw chaimâh ta.

13 Ano chata a ku pazawh ta, kei hria ta, “Ei khoh na, vaw pathaih ha mah y,” tah ta. Sôkhata ta aphawhpa cha vaw lei ha ta.

14 A hnohta, “Ahyhmah ta chho khâ; anodeikuacha theihthaipa vâ pamosa la, na pathaina awpa ta Mawsi biepiepa hawhta hlâ teh, chyhsazy pahnosana awpa ta,” tahpa ta bie taih ha ta.

15 Châhrasala a thâtih cha pathâh via rili ta; zawpi hluhpi chata a bie thei khohpa vâta nata ama chieh-leinazy patlâh na khohpa ta a vaw hmaohpakhy ei ta.

16 Châhrasala ano cha râhpathohpa lâta sie nanopa ta thlahchhâ tyh ta.

Asypa a patlâh(Mt 9:1-8; Mk 2:1-12)

17 Noh kha cha a pachu hai no ta, a kiahpa ta Pharisaizy nata Ryhpa pachutuhpazy atyupa ta y ei ta, chazy cha Kalili nata Zudia râh khi to tawhta nata Zerusale khih tawhzy ta a vypa ama châ; chyhsa patlâh theina awpa ta Abeipa hmotaotheina cha a hnohta a y.

18 Chatawhcha chapaw asypa pakha rakhô duata a vaw sy ei ta, Zisu hmiakô ta sopa ta angiana tlua ei ta;

19 zawpi vâta angiakheina rai hmô veih ei, vâphuh kiah ei ta, cha tawhna chata rakhô duata a lialiah liata Zisu hmiakô ta za pathlia ei ta.

20 Amâ ngiapâna a hmô nahta, a hnohna chata, “Viasa, na moleinazy angiahthaipa a châ haw,” tah ta.

21 Ryhpa pachutuhpazy nata Pharisaizy chata, “Khazohpa a reipachhiepa he ahyma a châ tly? Khazohpa dei leipa ta ahyma moleinazy a ngiahthai thei?” tahpa ta pachâ ei ta.

22 Zisu ta ama pachâna cha pahno ta, “Nama pathipalôh liata khâpa e nama pachâ?

23 ‘Na moleinazy angiahthaipa a châ haw,’ tahpa nata Thyu la, phei ta sie teh,’ tahpa he a kheihawhpa e a rei nao via?

24 Khâparai châ sala, khizaw liata Chyhsa Sawchapawpa heta molei a ngiahthai theina a hnei tahpa nama pahnona awpa ta,” tah ta, asypa hnohna chata, “Thyu la, na hmophawh la la, na o lâ a di teh, ei cha tah na,” tah ta.

25 Chatanachata ama mohmô liata thlai thyu ta, a ziana cha la ta, Khazohpa reithaina chôta a olâ a di ha ta.

26 Ama zydua ta ama noâh kaw ta, Khazohpa reithai ei ta, “Atanoh he hmonoâhpa eima hmô hih,” tah ei ta, china ta bie ha ei ta.

Livai awna(Mt 9:9-13; Mk 2:13-17)

27 Cha khai nah chata pua ta, chhiekheina su liata atyuhpa, chhiekheituhpa a moh Livai, hmô ta; a hnohta, “Na zi teh,” tah ta.

28 Ato siesaipa ta, thyu ta, zi ha ta.

29 Livai chata a o liata Zisu chata kyhchhi rôhnahpa tao ta; chhiekheituhpa hluhpi nata chyhsa hropazy chhaota âmo cha dôhkhei ei ta.

30 Pharisaizy nata ama Ryhpa pachutuhpazy chata a pachupazy hnohta paphôh ei ta, “Kheihtazie ta e chhiekheituhpazy nata moleipazy hnohta nie ta, a doh tly?” tah ei ta.

31 Zisu ta ama hnohta, “Chyhsa hri-ia pathaihpazy ta dawhty a ngiah leipa ei ta, chyhsa chiehleipazy ta tlao amâ ngiah tyh,

32 chyhsa siapazy tlua awpa ta a zupa châ leipa na ta, moleipazy tlua ta, parosa awpa ta a zupa tlao ei châ,” tah ta.

Pati nie leipa kyh hiahrina(Mt 9:14-17; Mk 2:18-22)

33 Âmo ta a hnohta, “Zawhana pachupazy ta pati nie leipa ta y tyh ei ta, thlah ama chhâ tyh, Pharisai pachupazy chhaota cha hawhna chata ama tao tyh, châhrasala na pachupazy heta niepa ta ama doh tyh,” tah ei ta.

34 Zisu ta ama hnohta, “Myuh alykheituhpazy hnohta myuhneituhpa cha a y chhôhta pati nie leipa ta nama paysa thei rai ma?

35 Châhrasala myuhneituhpa cha ama hry tawhta lana noh a vaw y aw, cha nohzy liana deikua chata nie leipa ta ama y aw,” tah ta.

36 Ama hnohta pakhona bie reih ta, “Ahyhmah ta poh thiehpa hriepa ta, poh parohpa liata baithla beih vei ei; baithlapa châ ha sala, a thiehpa chata hrie aw ta; a thiehpa liata a parohpa baipa cha a lyu thai vei.

37 Chatawhcha ahyhmah ta kresawti thiehpa savo tithei parohpa liata ryh beih veih ei, rypa châ ha sala, kresawti thiehpa châta savo tithei cha tochheih aw ta, a lei aw ta, savo tithei chhao cha a rao hra aw.

38 Kresawti thiehpa cha savo tithei thiehpa liata tlao ama rypa a châ.

39 Ahyhmah ta kresawti hlôpa a do khai nahta a thiehpa khô aw vei; ‘Ahlôpa a pha via,’ tah tlôh ei ta,” tah ta. 

Luke (Luke)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Luka 6

Luka 6

Pahânoh ta sâh su ama thlie (Mt 12:1-8; Mk 2:23-28)

1 Pahânoh ta Zisu cha sâh thih liazy ta sie ta, a pachupazy chata sâh suzy cha thlie ei ta, ama ku pazah ta chanaopa ta nie ei ta.

2 Pharisai thokhazy ta, “Khazia e pahânoh ta hmo tao hrao leipa nama tao tly?” tah ei ta.

3 Zisu ta a chhy ta, “Davi a nodi nota a viasazy chhaota ama hmotaopa kha, khazy kha reih beih veih eichi ma,

4 kha hawhta Khazohpa o liata a ngia ta, theihthaipazy deita nie pasaipa viahchhâ Sopa cha la ta, nie ta, a viasazy hnohta a pie hrapa kyh kha?” tah ta.

5 Chatawhcha ano chata ama hnohta, “Chyhsa Sawchapawpa he pahânoh Beipa a châ,” tah ta.

Chyhsa ku sypa(Mt 12:9-14; Mk 3:1-6)

6 Pahânoh noh hropa liana chata, apakhyna-o liata a ngia ta, pachu ta, cha liana chata chyhsa pakha a ku chachâh lâ asypa y ta.

7 Ryhpa pachutuhpazy nata Pharisaizy chata ano ama leih theina awpa ta, pahânoh ta a patlâh nata patlâh lei mopathli ei ta.

8 Châhrasala ano chata ama palôhrupa cha pahno ta, ku sypa hnohna chata. “A vy la, he liana heta a duah teh,” tah ta. Thyu ta a duah ha ta.

9 Chatawhcha Zisu chata ama hnohta, “Pahânoh liana heta hmopha tao ma ânapa châ ma, hmo chhie tao, pachhapa he ma ânapa a châ ma, thiepa maw? ei cha hiahri ei na.” tah ta.

10 Ama zydua cha moh ta, a hnohta, “Na ku pazawh teh,” tah ta. Chatawhcha pazawh ta, a ku cha vaw tlâ ha ta.

11 Chatanachata ama pathi-ia ngâsâ ta, Zisu chôta ama taona awpazie a chhohia ei ta.

Pahrawhleinopazy a tly(Mt 10:1-4; Mk: 3:13-19)

12 Cha noh daihtizy liana chata thlahchhâ awpa ta tlâh lâ khy ta; Khazohpa lâta a zozâ khihdei ta thlahchhâ ta.

13 Khih a pavâ nahta, a pachupazy cha aw ta, ama hry tawhta pahrawhleino a tlyh ta, ama moh ta apôstôlzy bi ta.

14 Chazy cha Saimaw, Pity ama bipa nata a unawhpa Adru zy, Zami nata Zawhana zy, Phili nata Bathawlawmu zy,

15 Mathai nata Thawma zy, Alphu sawchapawpa Zami zy, Saimaw, Zelôte ama bipa zy,

16 Zami sawchapawpa Zuda zy, nata Zuda Iskari a patusatuhpa zy ama châ.

Zawpi a chakao(Mt 4:23-25)

17 Ama hnohta zu ta, a bypa liata a duah ta, a pachupa zawpi hluhpi chhaota, Zudia râh zydua tawhta nata Zerusale khih tawhtapa zy, Tyre nata Sidaw khih lâta tilaipi kiah tawhtapa chyhsa hluhpi chhaota a vy ei ta, chazy cha a bie nahthlie khohpa nata ama pasana patlâhsa khohpa sai ama châ;

18 ahripa puapa ta a patupazy chhao vaw tlâh ha ei ta.

19 Ano tawhta hmotaotheina pua ta chyhsa zydua a patlâhsa lymâpa vâta zawpi chata ano hria a chhuah ei ta.

Nohlaona nata huponazy(Mt 5:1-12)

20 Chatawhcha avâ uapa ta a pachupazy cha moh ta:“Nâmo sipasapazy nama nohlao na,Khazohpa Khihnarâh nâmo eih châ tlôh ta.

21 “Nâmo atahmâ ta nodipazy nama nohlao na,nama rih bie tlôh aw ta. “Nâmo atahmâ ta a chapazy nama nohlao na,nama pahneih awpa vâta.

22 “Chyhsa Sawchapawpa vâta, chyhsazy ta châhaopa ta cha pathlua aw ei ta, reipachhiepa ta nama moleina ama cha tah tita nama nohlao na!

23 Cha noh liana chata aly ula, thaphapa ta a zawzâ teh u, avâ liata nama lymâ a hluhpi y tlôh ta; cha hawhna chata ama pathlatuhpazy ta hrohsopazy chôta tao haw hra ei ta.

24 “Anodeikuacha nâmo hneirôhpazy nama hu a po na, thlahlôhna hmô ha tlôh eichi ta.

25 “Nâmo atahmâ ta rihbiepazy nama hu a po na, nama nodi tlôh aw ta. “Nâmo atahmâ ta a pahneihpazy nama hu a po na, mâchhiesapa ta cha tlôh aw eichi ta.

26 “Chyhsa zydua ta ama cha reithai tita nama hu a po aw, cha hawhna chata ama pathlatuhpazy ta hrohso pakheipazy chôta ama taopa kha.

Khakhaipazy chôta kyhpachâna(Mt 5:38-48, 7:12)

27 “Ei bie a theituhpa saih u, ei cha chho ei chuh, nama khakhaipazy cha kyhpachâ ula, châ haopazy cha a phana awpa tao teh u,

28 chhie châ sapazy cha byhnâ aw pa ula, cha pasipasawhpazy cha thlahchhâ pa teh u.

29 Na baih hiakha lâ cha chabaituhpa hnohta, hiakha lâ chhao dao hra teh; na poh cha chhupa hnohna chata, na viahpakao lapa chhao thlyu khâ.

30 Cha hiatuhpa maih hnohta pie teh; na hmo cha lapatuhpa hnohta chhao hiah khao khâ.

31 Chyhsa ta nama chôta ama taopa nama khopa hawhta, chyhsa chôta chhao tao hra teh u.

32 “Kyh cha pachâtuhpa deita kyh nama pachâpa heta, khâpa alyna e nama hnei aw? Chyhsa moleipa chhaota kyh a pachâtuhpa cha kyh ama pachâ thei mâ tâh.

33 Chatawhcha nama chôta a phapazy chô lia deita ta nama phana heta, khâpa alyna e nama hmô aw? Chyhsa moleipa chhaota cha hawhpa ama tao thei mâ tâh.

34 Chatawhcha hmô heih awpa hnabeiseipa hmo deita ta hmo nama pacheisapa he khâpa alyna e nama hmô aw? Chyhsa moleipazy chhaota, a ualua ta hmô heih awpa ta, moleipazy hnohta ama pacheisa tyh

35 Anodeikuacha nama khakhaipazy kyh pachâ ula, ama phana awpa tao ula, pacheisa teh u, a vaw kua heih awpa khâpahmah hnabeisei kha u; chatanachata nama lymâ hluh aw ta. Chônôchaipa sawzy nama châ hra aw; ano chata chyhsa alyna cha pahno leipazy nata karâhneipazy a ngiachhie tyh.

36 Nama Paw ta chyhsa a ngiachhiepa hawhta ngiachhie hra teh u.

Seina kyh(Mt 7:1-5)

37 “Sei khah u, chatanachata seipa ta y aw veih eichi; ahyhmah thai lei pachâsa khah u, chatanachata thai leipa ta y aw veih eichi; angiahthai teh u. chatanachata angiahthaipa ta nama y aw;

38 pie teh u, chatanachata piepa ta nama y aw; hnaopa ta nata chalyupa ta nata a khô ngâpa ta panuana phapa cha, nama hnohta ama cha pie aw. Nama panuana hawhta ama cha panuapa hra aw mâ tâh,” tah ta.

39 Ama hnohta pakhona bie reih ta, “Mochaopa nata mochaopa amâ chhihtha thei ma? Ama pano ta khaotlô liata tla khoh aw veih ei ma?

40 Achupa cha a pachutuhpa chô liata y beih vei; châhrasala chyhsa to ama chu khai nahta, ama pachutuhpa hawhta ama y aw.

41 Khazia e na mo liata pâkô a ypa cha pachâ leipa ta, na unawhpa mo liata masô chyhpa ta a ypa cha na hmô tly?

42 Nâma mo liata pâkô a ypa cha hmô leipa ta, na unawhpa hnohta, ‘Unawh na mo liata masô a chyhpa ta kha na palasa teh,’ kheihtazie e na tah thei tly? Nâ haiphiahpa, na mo liata pâkô cha la tua teh, chatanachata na unawhpa mo liatahpa masô chyhpa ta lapa awpa ta a siapata ta na hmô aw.

Tho to ama thei ta pahnopa a châ(Mt 7:17-20; 12:34-35)

43 “Tho phapa cha thei chhiepa ta pathei beih vei, tho chhiepa chhao chata thei phapa ta pathei beih hra vei;

44 tho to ama theilâpa chyu pahnopa a châ. Ahloh liata theiku lyu beih veih ei, diasai liata kre thei lyu beih veih ei.

45 Chyhsa phapa ta a pathipalôh ryubyh phapa tawhta hmophapa zy a papua tyh, chyhsa chhiepa chata a pathipalôh ryubyh chhiepa tawhta hmo chhiepa a papua tyh; a pathipalôh bie pakhôpa cha a pakah ta a papua tyh.

Abôna mianopazy(Mt 7:24-27)

46 “Nâmo ta ei bie zyh tlôh leipa ta, khazia e, ‘Abeipa, Abeipa,’ eina tah eichi?

47 Chyhsa to ei hnohta a vy ta, ei bie thei ta a taopa maih cha, ahy a lyu tahpa ei cha pamosa aw ei:

48 chyhsa o satuhpa a thuhpi chao ta, lôpanô chôta a bôna a paryhpa hawhpa cha a châ; ti a vaw lai nahta, tily chahra ngaitapa ta chhao chata su ta, a chalyu thei vei, a phapa ta a sapa vâta.

49 Châhrasala thei tlôh ta a tao leipa cha, abôna leipa ta alei chô liata o a satuhpa chyhsa hawhpa cha a cha; tily chahrapa chata cha o cha su ta, thlai cho ta, cha o a raopa cha a rarôh a y ngâsâ kaw,” tah ta. 

Luke (Luke)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

Luka 7

Luka 7

Pheisaih zakha hyutuhpa sei a patlâh (Mt 8:5-13)

1 Zawpizy theipa ta bie zydua a rei khai nahta Kapynia khih liata a ngia ta.

2 Pheisaih zakha hyutuhpa sei kho ngaitapa ahy tlyma tlâh leipa ta, thi daihmâ ta.

3 Zisu thâtih a thei nahta, a hnohta a vypa ta nahta a sei patlâhpa ta hia awpa ta, Zu machâzy tuah ta.

4 Âmo cha Zisu lâ va tlô ei ta, phahnai khoh ngaitapa ta hiapa ta, “Ano chata he he na tao pa awpa tlai a châ,

5 eima phozy kyhpachâ ta, eima apakhyna o chhao ano ta maniah a sapa,” tah ei ta.

6 Zisu cha ama hnohta a vy ta. O a tlô chy ta, pheisaih zakha hyutuhpa chata a viasazy tuah ta, “Abeipa, a vy khoh khâ, o chhôh nâ ngiana tlâh chhao châ vei. Bie deita reih la, ei hawti cha a tlâh thlâh ha aw.

8 Kei chhao chyhsa ry ta a ypa châ na ta, ei ry ta pheisaihzy ama y hra: chyhsa pakha hnohta, ‘Sie la,’ tah na ta a sie tyh; a hropa hnohta, ‘A vy teh,’ tah na ta a vy tyh; ei sei hnohta chhao ‘He he tao teh’, tah na ta a tao ty,” tah ta.

9 Zisu ta cha cha a thei nahta a chôta a noâh ngâsâ ta, a heih ta, zawpi a zituhpazy hnohna chata, “Ei cha chho ei chuh, Izarelzy hry liata chhao he tlupo ta ngiapâna he hmô va na,” tah ta.

10 Chatawhcha a chyhsa tuapazy cha o lâ amâ di nahta, sei cha a tlâhpa ta hmô ha ei ta.

Nain khih liata nôhmei sawchapawpa a pathyu

11 Cha khai tawhna chata Nain khih liata a kei ngia ta, a pachupazy nata zawpi hluhpi chhao a hnohta sie hra ei ta.

12 Khih hawka cha a vaw hnia nahta, chyhsa athihpa a vaw sy ei ta, a no cha nôhmeipa châ ta, a sawchapaw matlupa a châ, ama khih mo hluhpi chhaota a hnohta y ei ta.

13 Abeipa chata nôhmei cha a hmô nahta, ngiachhie kaw ta, ano hnohta, “Cha khâ,” tah ta.

14 A kei hnia ta, a syna cha hria ta, a sytuhpazy cha a duah ei ta. “Satliapa, thyu teh, ei cha tah na,” tah ta.

15 Athihpa cha a vaw tyuh ta, bie vaw reih ha ta. Zisu chata a nô hnohta pie ha ta 

16 Ama zydua ta chi ei ta; Khazohpa reithai ei ta, “Eima hryta hrohsopa rôhnahpa a vaw y he!” tah ei ta, “Khazohpa ta a chyhsazy a vaw tly he!” tah hra ei ta.

17 Cha thâtih cha Zudia râh zydua liata nata râh zydua liata pathâh ha ta.

Zawhana ta a tuapazy(Mt 11:2-19)

18 Cha bie zydua cha Zawhana pachupazy chata Zawhana chho ei ta.

19 Zawhana chata a pachupa pano aw ta, Abeipa lâna chata tuah ta, “A vy awpa cha na châ ma, chyhsa hropa eima hâ aw ma?” tahpa ta.

20 Chyhsazy cha ano lâ ama kei tlô nahta, “Bâtituhpa Zawhana ta, ‘A vy awpa cha na châ ma, chyhsa hropa eima hâ aw ma?’ tahpa ta nâ lâta maniah a tuah,” tah ei ta.

21 Cha noh liana tlai chata Zisu ta hri-ohpa hluhpi nata chieh-leipazy nata ahripa patupazy a hluhpi patlâh ta, mochaopa hluhpi chhao mopavâna pie ta.

22 Ama hnohta, “Kua ula, hmo nama hmôpa nata nama theipazy he Zawhana va chho teh u: mochaopazy ama mo pavâ ta, pheisypazy phei ta sie ei ta, aphawhpazy pathaih ei ta, nahpâpazy nah pavâ ta, athihpazy pathyupa ta y ei ta, dyhchhiepazy hnohta Thâtihpha chhopa châ ta.

23 Chatawhcha ahyrai ei chôta palôhcha leina a hnei leipa cha a nohlao na,” tah ta.

24 Zawhana tuapazy cha ama kua nahta, Zisu ta zawpizy hnohta Zawhana thâtih reih pathao ta: “Khâpa mo awpa ta ma râhpathohpa lâ kha nama sie khaw? Lothi ziza ta a chalyupa ma?

25 Cha leipa ta khâpa mo awpa tlaita ma namâ zu khaw? Poh-naipa ta a tobipa ma? Pachâ teh u, poh rôhnahpa a bupazy nata chyhsa hneirôhpazy cha abei ozy liata tlao ama y tyh.

26 Cha leipa ta khâpa mo awpa ta ma nama zu khaw? Hrohsopa ma? A cha tlai kha, ei cha tah ei chu, hrohsopa hlâta a rôhnah viapa.

27 Moh teh, ei lyuhchâpa na hmiakô liata ei tuah,ano chata na hmia lâta na lâpi a chhuahdy aw,’tahpa a thâtih ama ropa kha he chyhsa he a châ.

28 Chanô sapa hry liata Zawhana hlâta a rôhnah viapa y veih ei; châhrasala Khazohpa Khihnarâh liata chyhsa chyh chaipa chhao, ano hlâta cha ama rôhnah via, ei cha tah ei chuh,” tah ta.

29 Chyhsa zydua nata chhiekheituhpazy chata a bie reipa ama thei nahta Khazohpa thai pachâ ei ta, âmozy cha Zawhana hnohta bâti a châ chiehpazy ama châ;

30 Pharisaizy nata Ryhpa pachutuhpazy chata âmo châta Khazohpa ryraona cha khoh veih ei, âmo cha a hnohta bâti a châ leipazy ama châ.

31 Zisu ta, “Atahmâ thyutliazy he khâpa nata e ei pakho aw tly, khâpa e ama lyu tly?

32 Hawti sôhdaona su liata a tyuh ta, âmo nata âmo a aw ngâpa he ama lyu,‘Ramo cha tôpa pi ta, la leipa eichi ta;cha chakhei pi ta, pachârôh tlôh eichi va,’tah ta.

33 Bâtituhpa Zawhana cha a vy ta, viahchhâ nie leipa ta kresawti chhao doh leipa ta; nâmo ta, ‘Ahripa a hnei he,’ tah eichi ta.

34 Chyhsa Sawchapawpa a vy ta, nie ta doh ta; nâmo ta, ‘Moh teh u, rihkawhpa nata kresawti parâpa, chhiekheituhpa nata moleipazy viasa huh!’ tah tlôh eichi ta.

35 Châhrasala Khazohpa sona cha a saw zydua ta a do tahpa ama pasia haw,” tah ta.

Pharisaipa Saimaw o liata a y

36 Pharisaizy hryta chyhsa pakha ta pati nie hrua ta, Pharisaipa o liana chata a ngia ta, pati doh ta.

37 Cha khih liata chanô moleipa pakha chata Pharisai o liata pati dopa ta a tyuh tahpa a pahnopa ta nahta, alabasta sathaw rohpahâhpa ôh a vaw chei ta,

38 a hnôh lâta a phei thaby liata chana chôta a duah ta, a mothlih ta a pheipazah padâ ta, a sâ ta hru ta, a pheipazah cha sy ta, sathaw rohpahâhpa hnia ta.

39 A hruatuhpa Pharisaipa chata cha cha a hmô nahta a palôhrupa ta, “He chyhsa he hrohsopa a châ tlôh khiahta cha, a hriatuhpa chanô he ahy e a châ tahpa nata kheihawhpa chyhsa a châ tahpa a pahno thlyu awpa châ ta, ano cha moleipa chanô châ tlôh ta,” tah ta.

40 Zisu ta a hnohta, “Saimaw, na hnohta bie kawh kha rei awpa ei hnei,” tah ta a chhy ta. Ano chata, “Khâpa maw, Pachutuhpa?” tah ta.

41 Zisu ta, “Tâkâ dyu a pacheisapa ahy tlyma chyhsa pano ta amâ bâhpa y ta; pakha ta tâkâ tlaw za pangawh a bâh ta, a hropa ta sypangawh.

42 Chatawhcha thôna ama hnei leipa vâta a ngiahthai rairieh ta. Chatanachata âmo hry liata ahyma ano kyh pachâ via aw?” tah ta.

43 Saimaw chata, “Angiahthai hluh viapa cha a châ aw tahpa ei pangiasa,” tah ta a chhy ta. Ano chata a hnohta, “Na pasu na,” tah ta.

44 Chanô lâ cha a heih ta, Saimaw hnohna chata, “He chanô he na hmô ma? Na hnohta a vaw ngia na ta, nâ ta ei pheipazah pasi nawpa ti na pie tlôh leipa chi ta, ano deikua chata a mothlih ta ei pheipazah padâ ta, a sâ ta hry haw ta.

45 Nâ ta a sy rai na sy va chi, ano deikua heta ei vaw ngiapa ta nahta ei pheipazah a sypa bâh leipa ta.

46 Nâ ta ei luh liata sathaw na thu leipa chi ta, ano deikua chata ei pheipazah liata sathaw rohpahâhpa a hnia.

47 Chavâta ei cha chho chuh, a moleina hluhpi kha a ngiahthaipa ta a y haw, a kyhpachâna thata a palâsa hih; anodeikuacha a ngiahthaina chyhpa chata, kyh a pachâ chyh via tyh,” tah ta.

48 Chatawhcha chanô hnohna chata, “Na moleinazy a ngiahthaipa a châ haw,” tah ta.

49 A dolâhpazy ta, “Moleinazy chhao a ngiahthaipa he ahyma a châ tly?” a tah ei ta.

50 Ano chata chanô hnohna chata, “Nâ ngiapâna ta a cha pachha hih; thlahlôhpa ta sie teh,” tah ta. 

Luke (Luke)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24