Haiphiana kyh liata zikyurâna (Mt 10:26-27)
1 Cha chhôh liata zawpi sâh hluhpi a charichamy ngâna taihta ama vaw pahmaohpakhy nona chata, Zisu ta a hmiatua ta a pachupazy hnohta, “Pharisaizy thinô, piepiena liana chata a chado teh u.
2 A lâ lei awpa ta nyupa khâpa hmah y tlôh lei khâh ta, pahno lei awpa ta phihpa khâpahmah y hra vei.
3 Chavâta zohna liata nama reipa maih kha a khaihpa liata thei aw ei ta, chhôhpadâhpa chhôh chaipa liata bieparu ta nama reipa kha o chô kiapâh ta tlâh awhkheipa ta a y aw.
Ahy chi awpa(Mt 10:28-37)
4 “Ei viasa saih u, ei cha chho ei chuh, pôhpa thi ta, cha hnôh lâta khâpahmah a tao thei khao leipazy cha chi khah u.
5 Anodeikuacha ahy nama chi awpa ei cha chho chhielie aw ei: a thi tawh chhaota hriena su liata thy theina bie a hneipa cha chi teh u; ei cha chho ei chu, ano tlai cha chi teh u!
6 Rieta pô pangawh tâkâ tlaw no ta zuah tyh veih ei ma? Châhrasala ama hryta pô kha hmah Khazohpa ta my beih tlôh leipa ta.
7 Nama sâbuzy taih chhao he rei khaipa a châ mâ tâh. Chi khah u; rieta hluhpi hlâta nama sôh via.
Chyhsa hmiakô liata Krista palâhâhna(Mt 10:32-33; 12:32; 10:19-20)
8 “Ei cha chho ei chuh, chyhsazy hmiakô ta na châkheipa maih, Khazohpa vâlyuhchâpazy hmiakô liata Chyhsa Sawchapawpa ta a châkhei hra aw;
9 châhrasala chyhsazy hmiakô ta nâ paphapa cha Khazohpa vâlyuhchâpa hmiakô liata apaphapa a châ hra aw.
10 Chyhsa Sawchapawpa reipachhiepa maih cha, ama reipachhiena cha a ngiahthaipa a châ aw; Thlahpa Pathaihpa a reipachhiepa deikua cha a reipachhiena cha a ngiahthaipa châ aw vei.
11 Apakhyna-o liata chyhsazy, abeizy, hyutuhpazy hmiakô liata ama châ chhi tita, kheihta e, khâpa bie e ei chhy aw, khâpa bie e ei reih aw tahpa ta pachâ chhie khah u;
12 cha daihti liana chata khâpa nama reih awpa a rypa Thlahpa Pathaihpa ta a cha chho aw ei,” tah ta.
A hneirôhpa hrupa pakhona bie
13 Zawpi hryta ahy tlyma Zisu hnohta, “Pachutuhpa y, ei uhta hnohta ryu eina pachhaih hra awpa ta chho teh,” tah ta.
14 Châhrasala ano chata a hnohta, “Chyhsa, nâmo chô liata ahy e ryureituhpa ta nata sôh pachhaihtuhpa ta na tao?” tah ta.
15 Ama hnohta, “A chado ula, uavana kheihawhpa rai liana chata a vaih teh u; sôh hluhpi hneipa he chyhsa hro chhâna châ vei,” tah ta.
16 Ama hnohta pakhona bie reih ta, “Chyhsa hneirôhpa ahy tlyma kô thata pavei ta;
17 chatanachata “Kheihtama ei tao aw tly, ‘Ei sâh nata ei bia sona hnei tlôh lei khâh na ta?’ tah ta.
18 ‘He tana heta ei tao aw: ei sawvâzy phie aw na ta, a lai viapa ta sa aw na ta; cha liana chata ei sâh nata ei hneipa zydua ei soh aw.
19 Chatawhcha ei thlahpa hnohta, ‘Thlahpa y, kô hluhpi chhôh châta hneipa hluhpi na pachôpa he; a pahâ la, nie la, thapha ngaitapa ta y teh, ei tah aw,’ tah ta.
20 Châhrasala Khazohpa ta a hnohta, ‘Ahrupa Atazâ he na thlahpa lapa a châ aw; na hmo hneipazy kha ahy châta ma a châ aw tly?’ tah ta.
21 Ano chata sôh pachô ta, Khazohpa lâta a hnei tlôh leipa cha, cha hawhna cha a châ tyh,” tah ta.
Phahlana nata mohôhna(Mt 6:25-34)
22 Pachupazy hnohta, “Chavâta ei cha chho ei chuh, khâpa ei nie aw, tahpa ta nama hrona kyh nata, khâpama ei bu ei sai aw, tahpa ta nama pôhpa kyh pachâ chhie khah u.
23 Niepa hlâta hrona a sôh via, chysia hlâta pôhpa a sôh via.
24 Ra-awhzy moh teh u: sâh tu hra veih ei, hria hra veih ei, apâh zy, sawvâzy chhao hnei veih ei, châhrasala Khazohpa ta pasa tlôh ta. Nâmo cha pavawzy hlâta nama sôh via syulyu mâ tâh.
25 Nâmo hry liata pachâ chhiepa vâta ahy e ama doh lâ dy kha ta a pasâh thei hlei?
26 He a naopa ta hmahta a tao thei leipa eichi he, khazia hmo hropa liata nama pachâ chhie tyh?
27 Tlôma-u laiseih zy he pachâ teh u; raihria leipa ta, pala chhao hria hra vei; châhrasala ei cha chho ei chuh, Sawlawmaw tlai chhao a rôhnahna zydua a tobi nona khata he tlôma-u paw miakha tlu chhao heta tobipa ta y vei.
28 Chatanachata lyurâhpa sipopa atanoh hroh ta, a mylâ ta lômathu liata ti thlâh ha awpa hmahta Khazohpa ta cha tlatluta a tobi khiahta cha, hy nâmo ngiapâ chyhpa saih u, cha hlâna chata chysia a cha pie kaw aw ei dia
29 Nama nie awpazy, nama do awpa zy tlua khah u, noraihpa ta y kha u.
30 Khizaw liata pho to ta cha hmo zydua cha ama tlua tyh; chazy cha namâ ngiahpa nama paw ta pahno thlâh ha tlôh ta.
31 Ano Khihnarâh tlao tlua teh u, chatanachata cha hmozy chhao cha a cha pie baichha aw ei.
Avâ liata ryubyh(Mt 6:19-21)
32 “Sahlao chypa saih u, chi khah u, Khihnarâh a cha piepa ei he, nama Paw aly ngaitana a châ.
33 Nama hneipa maih zuah ula, sipasapa hnohta pie teh u; avâ liata paru hmâhpa sie leina liata, chhôma-u parao leina liana chata, tâkâ sykhao paroh thei leipazy, sôh leidia thei leipazy, nama châta tao teh u.
34 Nama ryu yna maih liata, nama palôhrupa chhao y tlôh aw ta.
Sei hrohruapazy
35 “Chai a sai thlâh hapa ta, nama meiôh chhao ia thlâh hapa ta y ula,
36 chyhsa ta ama zibeipa kialao kyhchhi tawhta a vaw di tita ochhi a vaw chakhypa ta nahta thlai pahy thei awpa ta, ama hâ thlâh hapa hawhna heta y teh u.
37 Ama zibeipazy a vy tita sei a vaw hâ thlâh hapa a hmôpazy cha ama nohlao aw; hmeiseihta ta, ei cha chho ei chuh, ano chata a poh a sai aw ta, âmo cha pati dôhpa ta patyusa aw ta, a chakao aw ei.
38 Zâcho ta tlyma, thyu tita tlyma a vy ta, cha hawhta a vaw hmô khiahtala, cha seizy cha ama nohlao aw!
39 Anodeikuacha he he pahno teh u, parutuhpa a vyna daihti awpa o hneituhpa ta pahno sala, a hra aw ta, a o pahraosa aw vei.
40 Nâmo chhao a pachyh thlâhpa ta y teh u; nama pangiasa vei tita Chyhsa Sawchapawpa a vy tlôh aw ta,” tah ta.
Sei ngâchhihpa nata ngâchhih leipa(Mt 24:45-51)
41 Pity ta, “Abeipa, he pakhona bie he keimo deita ma maniah na chho, chyhsa zydua maw?” tah ta.
42 Abeipa ta, “Sôh mokhâhtuhpa ngâchhihpa so ngaitapa a zibeipa ta a daihti maihta ama niepa to awpa rai awpa ta a chhôhkhazy chô liata hyutuhpa ta a tao awpa cha, ahyma a châ aw?
43 A zibeipa a vy tita sei cha hawhta a taopa a vaw hmôpa cha a nohlao aw.
44 A dopa ta ei cha chho ei chuh, a hneipa zydua chô liata hyutuhpa ta a tao aw.
45 Anodeikuacha cha sei chata a palôhrupa ta, ‘Ei zibeipa a vy patoh aw vei,’ tahpa ta, seichapawzy, seichanôzy tu sala, niedohpa ta pari sala,
46 cha sei zibeipa cha a pangiasa leipa noh liata, a pangiasa leipa dawh ta, a pahno vei nota a vy aw ta, thata hrie aw ta, chyhsa ngâchhih leipazy topa hawhpa a patosa aw.
47 Sei, a zibeipa a khopa pahno thlâh hana chôta, a pachy tlôh leipa ta, a zibeipa khopa hawhta a tao leipa cha thata tupa a châ aw.
48 Anodeikuacha pahno leina chôta tuna taih hmo a taopa cha, a chyhta tupa a châ aw. Ahyrai a hluhpi piepa hnohna chata a hluhpi a hnawpa a châ aw; ahyrai a hluhpi pavaosapa hnohna chata a hluh viata a hnawpa a châ aw.
Zisu a chhaihna thabypa(Mt 10:34-36)
49 “Alei chô liata mei pathla awpa ta a vypa ei châ; atahmâ chhao kâ ha sala ei tah kaw dia!
50 Châhrasala bâti châ awpa ei hnei; cha pangoh hlâ lei cha ei hu a po kaw dia
51 Alei chô liata adyhna chareisa awpa ta a vypa a châ eina tah eichi ma? Châ bao va, ei cha chho ei chu, pachhaihna a chareisa awpa ta a vypa tlao ei châ.
52 Atahmâ tawhta cha chhôhkha liata chyhsa papangawh ama pachhaih aw, pathôh ta pano, pano ta pathôh.
53 A chhaih aw ei ta, paw ta a sawchapawpa, a sawchapawpa ta a paw, a nô ta a sawchanônô, a sawchanônô ta a nô, a nohnô ta a myunô, a myunô ta a nohnô,” tah ta.
Daihtizy pahnona(Mt 16:1-4 Mk 8:11-13)
54 Zawpi hnona chhao chata, “Notla lâta meihdo a puapa nama hmô khiahtala, Avâ a suah aw,’ tah tyh eichi ta; cha hawhna chata a vaw châ tlai tyh.
55 Chho thlih pathlipa nama hmô nahta, ‘Noh a kâh aw,’ tah tyh eichi ta; cha hawhna chata a vaw châ tlai tyh.
56 Nâmo haiphiahpa saih u, Alei nata avâ yzie chhao pahno pasia thai tlôh eichi ta; khazia atahmâhlâ hmo he nama pahno pasia thei vei?
Adyuhtuhpa nata adyryhna(Mt 5:25-26)
57 “Khazia ma nâmo ta a siapa cha nama pachia vei?
58 Ryureituhpa hmiakô liata nâ kholâhpa nata nama vaw tita na sie nota lâpi liata adyhna tlua lyhlia teh, chata leipa ta la ryureituhpa hmiakô liata châ chhi aw ta, ryureituhpa chata chyhsa a patupa hyutuhpa cha patusa aw ta, chyhsa a patupa hyutuhpa chata atâhna o liata a cha khô pathlei aw na.
59 Ei cha chho chuh, phusâ tlaw khata chhao na pie paki hlâ lei cha, cha tawhtapa cha pua chachei ta aw va chi,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||