Zisu ta chyhsa a thlohpa a patlâh
1 Pahânoh ta Pharisaizy ta hyutuhpa pakha o liata pati nie awpa ta a vaw pa cha, moh pathli thlâh ha ei ta.
2 A hmiakô liana chata tlâh leipa a thlohpa ahy tlyma a y.
3 Zisu ta Ryhpa pachutuhpa nata Pharisaizy cha chho ta, ama hnohta, ‘Pahânoh ta patlâh hraopa ma, patlâh hrao leipa maw?” tah ta.
4 Âmo deikua cha a thlih thlâh ha ei ta. Ano chata tlâh leipa cha patu ta, patlâh ta, pasiesa haw ta.
5 Ama hnohta, ‘Nâmo hryta chyhsa pakha ta sawchapawpa tlyma, viahchao tlyma hneisa la, tikhaorei liata tla sala, pahânoh chhao rai châ sala ahyma a thao leipa a y aw eichi?” tah ta.
6 Cha biezy cha a chhy thei heih hra leipa ei ta.
Ohneituhpa nata khichhaizy pakhona bie
7 Ama hnohta pakhona bie reih heih ta, hruapazy ta atyuna phapa amâ tlyhpa hmô tlôh ta.
8 “Kialao nie awpa ta ahy tlyma a cha hrua tita cha, dyuchhai pha chaipa liata atyuh khah u, chata leipa ta la nâ hlâta chyhsa pha viapa hrua pathlei aw ta;
9 chatanachata cha hruatuhpa chata, ‘He chyhsa atyu nawpa ta tlei teh,’ cha tah aw ta, nâma cha noza ngaitapa ta dyuchhai pha lei chaipa liata atyu tlôh aw chi ta.
10 Ama cha hrua tita cha dyuchhai pha lei chaipa liata tlao atyuh mah y, chatanachata cha hruatuhpa a vy tita na hnohta, ‘Ei viasa y, dyuchhai pha viapa liata atyuh teh,’ a cha tah’ thei aw; chatanachata pati na dôh-lâhpazy mohmô liana chata palyupalihpa ta na y aw.
11 apasâhsapa maih nawh aw ei ta, apanawhpa cha palyupalihpa ta ama y aw,” tah ta.
12 A hruatuhpa hnohna chhao chata, “Nohchhô ta tlyma, zâ ta tlyma kyh na chhi tita, na viasazy, na unawhpazy, na heinawhzy, na vaih hneirôhpazy cha hrua khâ, chata leipa ta la cha hrua heih hra aw ei ta, ama cha thô aw.
13 Kyh na chhi tita cha dyhchhiepazy, pihpasipazy, pheisypazy, mochaopazy tlao hrua mah y,
14 chazy hawhpa chata ama cha thô nawpa ama hnei leipa vâta byhnâ na hmô aw. Mo siapazy thyu heih tita thôpa châ tlôh aw chi ta,” tah ta.
Kyhchhi rôhnahpa pakhona bie(Mt 22:1-10)
15 Pati a dôh-lâhpa ahy tlyma cha biezy cha thei ta, a hnohta, “Khazohpa Khihnarâh liata pati a nie awpa cha a nohlao na!” tah ta.
16 Ano chata a hnohta, “Chyhsa ahy tlyma zâ ta kyhchhi rôhnah ngaitapa ta tao ta, chyhsa hluhpi hrua ta;
17 a nie daihti chata a chyhsa hruapazy hnohta, ‘A vy teh u, atahmâ a to amâpa a châ haw,’ tah awpa ta a sei tuah ta.
18 Chatawhcha ama zydua ta reih kha tlapa ta reina hnei khai ei ta. A hmiatua chaipata a hnohta, ‘Lyu chalei na ta, mo awpa ta ei sie awpa a byuh; na ngiahthai la ei châ haw na,’ tah ta.
19 Chatawhcha mo hropa ta, ‘Viahchao bao pangawh chalei na ta, a chhie a pha pasia awpa ta sie aw na ta; nâ ngiahthai la ei châ haw na,’ tah ta.
20 Chatawhcha mo hropa ta, ‘Lahpinô pakia na ta, chavâta a vy thei va na,’ tah ta.
21 Sei chata a zibeipa hnohta cha biezy chho ta. O hneituhpa cha a pathi-ia ta, a sei hnohta, ‘Pua la, opâh liata zy, lâthlôh liata zy, sie parah la, dyhchhiepazy, pihpasipazy, mochaopazy, pheisypazy he liata vaw chhihtha teh,’ tah ta.
22 Chatawhcha sei chata, ‘Abeipa y, na biepiepa hawhna khata tao ha na ta, châhrasala su a rua thlâh haw,’ tah ta.
23 Abeipa chata sei hnohna chata, ‘Pua la, lâlai lâ zy, opa lâzy vawh la, ei o bie nawpa ta chyhsa a ngia awpa ta reipasao teh.
24 Ei cha chho chuh, chyhsa ei hruapazy khata pakha hmahta ei kyhchhi nie aw veih ei,’ tahpa ta,” tah ta.
Pachupa cha theina zie(Mt 10:37-38)
25 Zawpi hluh ngaitapazy a hnohta sie hra ei ta; chatanachata ano cha a heih ta, ama hnohta,
26 “Ahyrai ei hnohta a vypa cha, a paw zy, a nôzy, a saw zy, a unawh zy, a sietanô zy, ano hrona chhao tlai a hao vei khiahtala, ei pachupa châ thei aw vei.
27 Ahyrai ano kraws apupa ta na zi leipa maih cha, ei pachupa châ thei aw vei.
28 Nâmo hryta ahyrai ta o sâhpa sa a chhuah ula, a hmiatuapa ta atyupa ta palona taih sôh nama hnei nata hnei leipa pahno awpa ta, a mâ zie awpa a laichadai leipa a y aw ei chi?
29 Chata leipa ta alô bô hawpa ta, a paloh thei leipa khiahta cha, a mohpa maihta,
30 ‘He chyhsa heta o parai tlôh ta, paloh thei tlôh va,’ tahpa ta ama pahneisao pathlei aw na.
31 Chatawhcha abei ahyma abei hropa adyuh awpa ta a sie chy ta, a hmiatua ta atyuhpa ta chyhsa thy no nata ano adyuh awpa ta a vypa cha chyhsa thy kha nata a ty ngâh awpa nata ngâh lei awpa a pachâ aw vei tly?
32 Cha hawhta a châ heih vei khiahta, abei hropa cha lâhlapi ta a y nota adyhna bietai hiah awpa ta lyuhchâpa a tuah aw.
33 Cha hawhna hra chata nâmo hry liata ahyrai a hneipa zydua a siesai leipa cha ei pachupa châ thei aw vei.
Alôh a padâhpa(Mt 5:13; Mk 9:50)
34 “Alôh he a pha na; châhrasala alôh chhao a padâh ha khiahtala kheihta a iah heih thei aw?
35 Alei châta pha aw vei, alei paphasana châta chhao pha hra aw vei; chyhsa ta ama thy tyh. Ahyrai thei nawpa ta nahkhao a hneipa ta cha, thei mawh sy,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||