Molei reipasaona (Mt 18:6-7. 21-22; Mk 9:42)
1 Zisu ta a pachupazy hnohta, “Moleina reipasaona he y lei thei awpa châ vei; châhrasala a paysatuhpa hu a po na!
2 He chyhsa chyhpata hryta pakha rai pamoleisapa hlâta cha, a pamoleisatuhpa rao liana chata charona lô pa-aosapa ta, tilaipi liata thy sala ano châta a pha via awpa a châ.
3 A chado teh u; na unawhpa ta hmo a parao khiahtala chhorei teh, a ro khiahtala, a ngiahthai teh;
4 noh kha ta na chô liata ei sari hmoparaopa ta, ei sari, ‘Ei rona,’ tahpa ta, nâ lâta a vaw heih khiahtala, nâ ngiahthai awpa a châ,” tah ta.
Eima ngiapâna papôhsana
5 Apôstôlzy chata Abeipa hnohta, “Eimâ ngiapâna papôhsa via mah y,” tah ei ta.
6 Abeipa chata, “Ahrâ chi hmô kha tlu angiapâna nama hnei khiahtala, he mulbari kô hnohna heta, ‘A phia la, tilaipi liata a loh teh,’ tah aw eichi ta, nama rei amâ ngiah thlâh ha aw.
Sei tao awpa
7 “Châhrasala nâmo hry liata ahyrai ta alei paliepa ta tlyma, mietahkupa vaipa ta tlyma sei hnei ula, a vaw tlôpa ta nahta, ‘Pati vaw dôh teh,’ ahy e a tah aw ei chi?
8 ‘Ei nie awpa na taopa la, poh a sai la, ei niebaw khai hlâ lei cha na chakao teh, cha khai tawhna chata, nama niebaw lavâh chi,’ a tah leipa ahyma a y aw?
9 Nama bie hawhta a taopa vâta nama sei lâta alyna bie nama rei beih ma?
10 Cha hawhna hra chata nâmo chhaota nama hnohta biepiepa zydua nama tao khai tita, ‘Sei phahnai leipa ei châ, ei tao awpa rai na ei tao,’ tah teh u,” tah ta.
Phawhpa pahrawh Zisu ta a pathai
11 Zerusale lâ a sie hai nota Samari nata Kalili râh cha sie pakhô ta.
12 Chatawhcha khih kheihawhpa tlyma a ngia chy ta, chyhsa aphawhpa pahrawh ta a tyh ei ta, cha chyhsazy cha lâhlapi ta aduah ei ta,
13 ao paro ngaitapa ta “Zisu, Pachutuhpa y, maniah ngiachhie teh,” tah ei ta.
14 Ano chata âmo a hmô nahta ama hnohta, “Theihthaipazy lâta a kei pamosa teh u,” tah ta. Ama sie hai nona chata vaw pathaih haw ei ta.
15 Ama hryta pakha ta a tlâ hawpa a pahnopa ta nahta, ao paro ngaitapa ta Khazohpa reithaina chôta kua ha ta.
16 A phei thaby liata pao ta, alyna bie reih ta. Cha chyhsa cha Samari chyhsa a châ.
17 Chatanachata Zisu ta a chhy ta, “Chyhsa pahrawh pathaisapa châ veih eichi ma? Pachaki kha khataih liata ama y?
18 Khazohpa reithai awpa ta a vaw kuapa, he chi hropa chyhsa dei leipa he, chyhsa ahyhmah hmôpa y veih ei ma?” tah ta.
19 A hnohta, “Thyu la, sie teh; nâ ngiapâna he na tlâhkhei hih,” tah ta.
Khihnarâh tlôna(Mt 24:23-28, 36-41)
20 Pharisaizy ta Khazohpa Khihnarâh a vaw tlôna daihti awpa ama hiahripa vâta ama hnohta, “Khazohpa Khihnarâh cha ngianazy hmô theipa ta vaw tlô vei;
21 ‘Moh teh, he liana hih!’ tlyma, ‘Hao liana hu!’ tlyma tah hra aw veih ei. Pachâ teh u, Khazohpa Khihnarâh cha nama hry liata a y,” tahpa ta a chhy ta.
22 Pachupazy hnohna chata, “Chyhsa Sawchapawpa hro noh he, noh kha chhâ nama hmô khona nohzy a y aw, châhrasala hmô khao tlôh aw veih eichi.
23 Nama hnohta, Moh teh u, hao lâ hu!’ ‘Moh teh u, he lâ hih!’ ama cha tah aw. Pua leipa ula, âmo zi hra khah u.
24 Avâ hiakha lâta dôhla pathlie ta, avâ hiakha lâ taihta a khaih tyhpa hawhna heta, Chyhsa Sawchapawpa he ano noh liata cha a châ aw.
25 Châhrasala cha hlâna chata hmo hluhpi pasa a tao awpa châ ta, atahmâhlâ thyutliazy khoh leipa ta a y hra aw.
26 Naw hro nota yzi hawhna khata, Chyhsa Sawchapawpa a vy heihna nohzy liana chata a y hra aw.
27 Naw balyh liata a ngia ta, tipa-ua vaw tlô ta, ama zydua ta a pahleipadia khaipa hawhpa noh kha a tlô hlâ lei cha nie nata dopa ta y ei ta, lahpinô vahpa a pakia tyh ei ta.
28 Cha hawhna hra chata Lawta hro nota a vaw y, niepa ta doh ei ta, chalei ei ta; zuah ei ta, chi cheih ei ta, o sa tyh ei ta,
29 châhrasala Sawdawma khih tawhta Lawta a pua tawhna chata avâ tawhta mei nata kaih suah ta, ama zydua ta thi khai haw ei ta,
30 cha hawhna hra chata Chyhsa Sawchapawpa he a vaw luahna noh liana chata a y aw.
31 Cha noh liana chata ahyrai a o vâphuh liata a ypa chata a o chhôh liata a sôh a ypa cha la awpa ta chô khah se; lyu liata a ypa cha o lâ sie hra khah se.
32 Lawta lahpinô a thei thlâh ha teh u.
33 Ahyrai a hro pabohna a tluapa maihta pahlei aw ta, ahyrai a hro a pahleipa maihta a paboh aw.
34 Ei cha chho ei chuh, cha zâ liana chata rakhô miakha liata chyhsa pano y aw ei ta; pakha cha lapa ta y aw ta, pakha cha siesaipa ta a y aw.
35 Chanô pano sâh charopa ta y aw ei ta, pakha cha lapa ta y aw ta, pakha cha siesaipa ta a y aw.
36 Chyhsa pano lyu liata y aw ei ta, pakha cha lapa châ aw ta, pakha cha a râsaipa a châ aw.]” tah ta.
37 Chatawhcha âmo chata a hnohta, “Abeipa, khataih liata maw?” tahpa ta hiahri ei ta. Ano chata ama hnohta, “Thi-ruapa yna maih liata vâkhiezy chhao ama y pakhy aw,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||