Pahrawhleino a tuapazy (Mt 10:5-15; Mk 6:7-13)
1 Zisu ta pahrawhleinopazy cha awpakhy ta, ahripa zydua chô liata hmotaotheina nata biehneina nata pasanazy patlâhsa theina pie ta.
2 Khazohpa Khihnarâh bie chho awpa nata a tlâh leipazy patlâh awpa ta tuah ta.
3 Ama hnohta, “Khi tlyh nawpa ta chôhchahrei zy tlyma, sahria tlyma, viahchhâ tlyma, tâkâ tlyma khâpahmahta a chei khah u; viahpakao zono hnei hra khah u.
4 Nama tlôna o maihta tlô lymâ thlâh ha ula, cha o tawhna chata pua muh vy.
5 Châ ly leipa maih cha, cha khih tawhna chata nama pua tita âmo pahnosa nawpa ta nama pheipazah liata buhchanoh cha chatho teh u,” tah ta.
6 Chatanachata sie haw ei ta, khih cha chahryh lymâ ei ta, Thâtihpha chhopa ta chyhsa patlâh lymâ hra ei ta.
Bâtituhpa Zawhana thina(Mt 14:1-12; Mk 6:14-29)
7 Abei Herawda ta a hmotaopa zydua cha vaw thei ha ta, chyhsa thokha ta Zawhana kha a hroh ha heih, tah ei ta,
8 thokha ta Elaiza a vaw luah haw, tah ei ta, thokha ta hlâno ta hrohsopa ahy tlyma a thyu heipa a châ hih, ama tahpa vâta a nôpo ha ta.
9 Herawda ta, “Zawhana cha a luh ei tai haw, châhrasala he tlatluta a bie ei pahno tyhpa he, ahyma a châ?” tah ta. Chatawhcha ano cha hmô a chhuah ha ta.
Sâh pangawh rih pabiena(Mt 14:13-21; Mk 6:30-44; Zh 6:1-44)
10 Apôstôlzy cha ama vaw kua heih nahta a hnohta ama hmotaopazy chho ei ta, ano cha âmo a chhi ta, Besaida khih ama tahpa liana chata a nano ta sie ha ta.
11 Châhrasala zawpizy chata pahno ei ta, zi lymâ ei ta; ano chata âmo cha a vaw ly ta, Khazohpa Khihnarâh bie chho ta, patlâhsa a byuhpa maihta patlâhsa ta.
12 Zâlâ a vaw châ nahta pahrawhleinopazy cha a vy ei ta, a hnohta, “Eima kiapâh liata khihzy nata lyu liata zy siepa ta tlô o nata nie awpa ama hmô thei nawpa ta zawpi he pasiesa teh; râhpathohpa su liata a ypa châ tlôh pi ta,” tah ei ta.
13 Ano deikua chata ama hnohta, “Nâmo ta niepa pie teh u,” tah ta. Âmo chata, ‘He chyhsa zydua châna heta nie awpa eima chalei leipa ta cha viahchhâ tlâ pangawh nata ngasa miano dei leipa ta cha khâpahmah hnei ma pi,” tah ei ta.
14 Machâpa saita sâh pangawh rachhôh châ tlôh ei ta. A pachupazy hnohta, “A py py ta sypangawh hlao ta, patyusa teh u,” tah ta.
15 Cha hawhna chata tao ei ta, patyusa khai haw ei ta.
16 Viahchhâ tlâ pangawh nata ngasa miano cha la ta, avâ lâ uapa ta byhnâ aw ta, pachhaih ta, zawpi hmiakô liata pie awpa ta a pachupazy hnohna chata pie ta.
17 ‘Chatawhcha nie ei ta, ama rih bie khai ei ta. Ama nie bâhpa a laipa cha hrâbyh miahrawhleino a huah ei ta.
Pity ta Zisu a palâhâhna nata a thina chhochhieliena(Mt 16:13-28; Mk 8:27-9:1)
18 Zisu ta ano deita ta thlah a chhâ nota a pachupazy cha a hnohta y ei ta, ama hnohta, “Chyhsazy ta ahy e a châ eina tah ei?” tahpa ta âmo hiahri ta.
19 Âmo chata, “Bâtituhpa Zawhana a châ, cha tah ei ta; châhrasala thokha ta, Elaiza a châ, cha tah ei ta; thokha ta hrohsopa ahy tlyma a thyuheipa a châ, cha tah ei ta,” tahpa ta a chhy ei ta.
20 Ano chata ama hnohta, “Cha khiahtala, nâmo ta ahy e a châ eina tah eichi?” tah ta. Pity ta, “Khazohpa Mesia na châ,” tahpa ta a chhy ta.
21 Cha bie cha ahyhmah ta chho lei awpa ta bie pie ta.
22 Chyhsa Sawchapawpa he hmo hluhpi pasa a tao awpa a byuh, machâzy, theihthaipa abeizy, Ryhpa pachutuhpazy khoh leipa ta a y awpa châ ta, thiepa ta y awpa châ ta, noh thôh noh ta pathyupa ta a y hra awpa a châ,” tah ta.
23 Ano chata chyhsa zydua hnohta, “Ahyrai ei na zi khoh khiahtala ano a pachâ leipa ta, noh tato a kraws pupa ta na zi se.
24 Ahyrai a hro a pabohsa khohpa maihta pahlei aw ta; ahyrai keima vâta a hro a pahleipa maih ano tlai cha a pabohsa aw.
25 Chyhsa ta khizaw he a pôhpa ta hnei sala pahleipahlôpa ta tlyma a parao tlôh sala a châta khâpa e a phahnai aw.
26 Ahyrai keima nata bie a zakheipa maih, Chyhsa Sawchapawpa ta ano rôhnahna chhaota a Paw rôhnahna nata a vâlyuhchâpa pathaihpazy chhaota a zu tina chata ano cha a zakhei aw.
27 Hmeiseihta ta, ei cha chho ei chuh, he liata a duahpa sahlao thokhazy he Khazohpa Khihnarâh ama hmô hlâ lei cha thina pachâ chachei lei awpa ama y,” tah ta.
A hmia nanona(Mt 17:1-8; Mk 9:2-8)
28 Cha bie a rei tawhta noh charie tlyma ta, Zisu ta Pity zy, Zawhana zy, Zami zy cha a chhi ta, thlahchhâ awpa ta tlâh lâta kiah ta.
29 Thlah a chha hai nota a hmia yzie cha a vaw nano ta, a chysiazy cha a ngyuhpa ta thlahrawsiepa ta vaw y haw ta.
30 Chyhsa pano ano nata bie a chho ei ta, cha chyhsazy cha Mawsi nata Elaiza châ ei ta,
31 rôhnahna a tobipa ta a luah ei ta, Zerusale khih liata a thina vaw pangoh awpa bie cha reih ei ta.
32 Pity nata a viasazy deikua cha ama mokupa ta tla-uah ei ta, châhrasala a vaw hra ei ta, a rôhnahzie nata a hnohta chyhsa pano aduahpa cha hmô ei ta.
33 Cha chyhsazy chata Zisu ama siesai chyta, Pity ta Zisu hnohta, “Pachutuhpa eima châta he liata ypa he a pha na; byurei miathôh tu aw pi ta, na châta miakha, Mawsi châta miakha, Elaiza châta miakha,” tah ta, a bie reipa chhao pahno leipa ta.
34 Cha bie cha a rei hai nota meihdo a vaw chhoh ta, âmo cha khu haw ta; meihdo liana chata amâ ngia nahta chi ei ta.
35 Chatawhcha meihdo tawhna chata ao vaw pua ta, “He he ei Sawchapawpa ei tlypa cha a châ, ano bie nahthlie teh u!” tah ta.
36 Chatawhcha ao cha a chalihpa ta nahta Zisu cha ano deita ta hmô ei ta. A thlih thlâh ha ei ta, ama hmo hmôpa cha cha nohzy liana chata ahyhmah ta khâpahmah ta chho leipa ei ta.
Chapaw hawti thlahpa puapa a hneipa a patlâh(Mt 17:14-21; Mk 9:14-29)
37 A mylâ ta, tlâh tawhta ama zu tawhna chata chyhsa zawpi ta ano cha vaw dy ei ta.
38 Zawpi hry liana chata chyhsa pakha ta aw ta, “Pachutuhpa, ei sawchapawpa mo awpa ta ei châ haw na, sawchapaw ei hnei chhôhpa châ tlôh ta;
39 ahripa ta patu tyh ta, sôkhata thlai pa awsa tyh ta; chatanachata padaosa ta, pachi buchaphypa papuapâna taihta riethei pataosapa ta siesai tyh ta,
40 na pachupazy hnohta papuasa awpa ta a haw na ta, tao thei leipa ei ta,” tah ta.
41 Zisu ta, “Hy thyutlia ngiapâna a hnei leipa nata chhorupa saih u, khachâ e nâma hnohta y aw na ta, ei cha tao thei aw tly? Na sawchapawpa cha he liana heta vaw chhi teh,” tah ta a chhy ta.
42 A vy hai nota ahripa chata sôkhata papaosa ta, thata padaosa ta. Zisu ta thlahpa pathaih leipa cha ra ta, hawti cha patlâsa ta, a paw hnohna chata pie haw ta.
43 Chyhsa zydua ta Khazohpa rôhnahnazie cha noâh tah ngâsâ ei ta.
A thi nawpa a rei chhielie heih(Mt 17:22-23; Mk 9:30-32)
Chyhsa zydua chata a hmotaopa zydua cha noâh ama tah nona chata, Zisu ta a pachupazy hnohna chata,
44 “Cha bie cha nama nahkhao liata pangiasapa ta y se; Chyhsa Sawchapawpa he chyhsazy ku ta patusapa ta y tlôh aw ta,” tah ta.
45 Châhrasala a bie reipa cha pahno veih ei, ama pahno thei lei nawpa ta a nyupa a châ; cha bie reipa thâtih cha ano hiahri ngâ tlôh leipa ei ta.
Ahyma a rôhnah chai aw(Mt 18:1-5; Mk 9:33-37)
46 Ama hry liata ahy e a rôhnah chai aw tahpa ta a ei ei ta.
47 Zisu ta ama palôhrupa pachâna cha pahno ta, hawti pakha a chhi ta, a kiapâh ta paduasa ta,
48 ama hnohta, “Ahyrai ei moh vâta he hawti chyhpa alypa maih cha keima nâ lypa a châ aw, ahyrai kei nâ lypa maih cha nâ tuahtuhpa alypa ama châ aw; nama hry liata a chyh chaipa he na a rôhnah chaipa a châ,” tah ta.
Cha dyuh leipa ei cha nama chhâ ama châ(Mk 9:38-40)
49 Zawhana chata, “Pachutuhpa ahy tlyma na moh ta ahripazy papuapa hmô pi ta, cha zipazy liana chata a hlao leipa vâta eima pakhâ ha na,” tahpa ta a chhy ta.
50 Zisu deikua chata a hnohta, “Pakhâ khao khah u, ahyrai nâmo châ dyuh leituhpa cha nâmo lâta a châpa châ tlôh ta,” tah ta.
Samari chyhsazy ta Zisu khoh veih ei
51 Ano cha chô lâta chhihthana daihti a hnia nah chata, Zerusale khih lâta sie awpa ta a chhuah ha ta.
52 A hmia lâta zikyu a râpazy pasiesa ta, sie ei ta, ano a vaw chhuahdy awpa ta Samari chyhsazy khih miakha liata a ngia ei ta.
53 A mo padeinazie cha, Zerusale khih lâta pangai awpa ta a lâpa vâta ano aly veih ei.
54 A pachupa Zami nata Zawhana chata cha cha ama pahnopa ta nahta, “Abeipa, he sahlao kâ khai nawpa heta avâ tawhta mei pathla awpa ta aw ei sihla a ryh na tah ma?” tah ei ta.
55 Anodeikua chata a vaw heih ta, ra ei ta.
56 Chatawhcha khi hropa lâta sie haw ei ta.
Zisu a zituh awpazy(Mt 8:19-22)
57 Lâthlôh liata ama sie laih nota, ahy tlyma a hnohta, “Na siena maihta ei cha zi aw,” tah ta.
58 Zisu ta a hnohta, “Sihâzy khaoh hnei ei ta, avâ liata pavawzy chhaota bu hnei ei ta; Chyhsa Sawchapawpa deikua chata a luh nyuna hnei vei,” tah ta.
59 Chyhsa hropa hnohta, “Na zi teh,” tah ta. Châhrasala ano chata, “Abeipa, ei paw pabu tua awpa ta na pasai teh,” tah ta.
60 Zisu deikua chata a hnohta, “Athihpa ta âmo athihpa cha pabu ei se; nâ deikua chata Khazohpa Khihnarâh bie cha tlao pathâhsa teh,” tah ta.
61 Chyhsa hropa chhaota, “Abeipa, ei cha zi aw; anodeikuacha ei o liata a ypazy a tlâhpa bie reih tua awpa ta na pasai mah y,” tah ta.
62 Zisu ta a hnohta, “Ahyrai leipaliena liata a ku soh ta hnôh lâ a heihpa cha Khazohpa Khihnarâh chyhsa tlâh châ vei,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||