Chanô thokhazy ta Zisu ama zi
1 Cha khai tawhna chata Zisu ta biechhopa ta nahta Khazohpa Khihnarâh Thâtihpha pahnosapa ta, khih laipazy nata khih chyhpazy chahry lymâ ta. A hnohta pahrawhleinopazy cha y ei ta,
2 chanô ahyzy tlyma thlahpa moleipazy nata chieh-leipa a patlâhpazy nata: Mari, Madali ama bipa, a chhôh tawhta ahripa pasari a papuapa zy,
3 Herawda sôh a mokhâhtuhpa Kuza lahpinô, Zôana zy, Susana zy nata a hropa hluhpizy chhaota ama châ, chazy chata ama hneina tawhta âmo ama deichhy tyh.
Chi hietuhpa pakhona(Mt 13:1-9; Mk 4:1-9)
4 Zawpi thata a vy pakhy ei ta, âmozy cha khi to tawhta a hnohta a vypa ama châ, pakhona bie ta reih ta:
5 “Chi hietuhpa cha chi hie awpa ta pua ta, a hie nata; thokha lâthlôh kiah liata tla ta, chyhsa tlypa ta y ta, avâ pavawzy ta dyh khai haw ei ta.
6 Thokha cha alôphiariapa chô liata tla ta; a kaw pyu nahta, a pazua leipa vâta uah ha ta.
7 A hropa cha ahloh hryta tla ta; ahloh nata kaw pyu khoh ta, disao ha ta.
8 A hropa cha alei phapa liata tla ta, pyuh ta, a lie za kha ta pathei ta,” tah ta. Cha bie cha a rei hai nota, awh ta, “Ahyrai thei nawpa ta nahkhao a hneipa ta cha thei se,” tah ta.
Chi hietuhpa chhopasiana(Mt 13:10-23; Mk 4:10-20)
9 A pachupazy chata a hnohta he pakhona bie he kheihta tahna ma a châ tahpa ta hiahri ei ta,
10 ano chata ama hnohta, “Khazohpa Khihnarâh bienyupazy cha nâmo pahno awpa ta pasaipa châ ta; chyhsa hropa hnohta deikua cha pakhona bie deita ta reipa a châ, hmô hra ei sala hmô leipa ama châ theina awpa ta, nahkhao ta thei hra ei sala a pachâna ama pahno thei leina awpa ta.
11 Pakhona bie kha he he a châ: Chi cha Khazohpa bie a châ.
12 Lâ kiah liata a tlapazy cha bie a pahno hapazy he châ ei ta; ahripa cha a vy ta, angiapâ leipa ta pachha ama châ thei lei nawpa ta ama pathipalôh liata bie cha lapa ta.
13 alôphiariapa liata a tlapazy cha hezy he ama châ, bie cha ama thei nahta, aly ngaitapa ta a pyh ei ta; châhrasala thari ama hnei leipa vâta, buakhata zyh ei ta, reipasaona a vaw y nahta ama paosai heih tyh.
14 Ahloh hry liata a tlapazy cha hezy he ama châ, ama thei tawhta sie ei ta, he hrochhôh khihsanazy, hneinazy, phasanazy chata disao ha ta, a thei rai pathei vei.
15 Alei phapa liata a tlapazy cha hezy he ama châ, palôhrupa siapa nata phapa ta bie thei ei ta, a vao thlâh ha ei ta, tiamana chôta theizy ama pathei tyh.
Meiôh sona dopa(Mk 4:21-25)
16 “Ahyhmah ta meiôh rao ei sala beih ta khu beih veih ei, rakhô ry liata chhao soh veih ei, a ngiapa maihta a khaihna ama hmô theina awpa ta a sona liata tlao ama soh tyh.
17 Phuah lei awpa ta phihpa khâpahmah y tlôh leipa ta, pahno leipa nata a lâ lei awpa ta nyupa khâpahmah y hra vei.
18 Chatanachata kheihta e nama pahno, a chado teh u; ahyrai a hneipa maih pie baichha aw ei ta, ahyrai a hnei leipa maih, hneipa ta a rao tlakaihpa chhao ama lapa aw,” tah ta.
Zisu nô nata unawhpa(Mt 12:46-50; Mk 3:31-35)
19 A nô nata a unawhpazy chata Zisu vaw pangai ei ta, châhrasala zawpi vâna chata a hnohta tlô thei veih ei.
20 A hnohta, “Na nô nata na unawhpazy ta nâma hmô a chhuahpa ta khôtho lâ amâ duah thlâh haw,” tahpa ta chho ei ta.
21 Ano chata ama hnohta, “He Khazohpa bie thei ta, a taopazy he, ei nô nata ei unawhpazy ama châ,” tahpa ta a chhy ta.
Thlihpipa a chalihsa(Mk 4:35-41)
22 Noh kha cha balyh liata kiah ta, a pachupazy hnohta, “Tipo haosâ lâ chakâ ei suh vy,” tah ta. Chatanachata balyh cha pathlâ ei ta, sie haw ei ta,
23 ama sie hai nona cha Zisu cha a mô ha ta. Tipo liana chata thlihpi vaw pathli ta, ama balyh cha ti ta bie daihmâ ta, chichhih ngaitapa ta y ei ta.
24 A vy ei ta, ano cha pathyu ei ta, “Pachutuhpa, Pachutuhpa, eima leidia hih!” tah ei ta. Ano cha a vaw hra ta, thlih nata chalâhparâpa cha ra ta; bâh ta, sidia ha ta.
25 Ano chata ama hnohta, “Khataih liata e namâ ngiapâna a y?” tah ta. Chatawhcha chipa ta, ama noâh kaw ta, “He he ahyma a châ tly, thlih nata ti chhaota bie pie ta amâ ngiahpa he?” a tah ei ta.
Kerasi liata ahripa patupa a patlâh(Mt 8:28-34; Mk 5:1-20)
26 Kalili râh dady ta, Kerasi* râh tlô haw ei ta.
27 Alei liata a chô nata, khih liata chyhsa ahripa ta patupa ahy tlyma ta a vaw tyh ta; cha chyhsa cha bohpi poh rai a bu leipa ta y ta, o liata chhao y leipa ta thlâ liatazy tlao y tyh ta.
28 Zisu a hmôpa ta nahta aw ta, a hmiakô liata pao ta, ao paro ngaitapa ta, “Zisu, Khazohpa Chônôchaipa Sawchapawpa, keima liata khâpa tao awpa e na hnei? Eina taola leina awpa chi ta, ei cha hiah na,” tah ta.
29 Zisu ta thlahpa puapa cha cha chyhsa chhôh tawhta pua awpa ta bie pie ha tlôh ta. Cha chyhsa cha ahripa ta a patu tyhpa a châ; chyhsazy ta bâlia nata keihrai daipa ta, vaih tyh ei ta, châhrasala ama chahrynazy chhie ta, ahripa ta râhpathohpa lâzy ta to tyh ta.
30 Zisu ta, “Na moh ahy maw?” tahpa ta hiahri ta. Ano cha, “Zahlupi,” tah ta; a chhôh liata ahripa hluhpi ama ngiapa vâta.
31 Âmo chata khaohtlôpa lâ siepa ta bie pie lei awpa ta Zisu hnohta a haw ei ta.
32 Tlâh liana chata vao zaw hluhpi ama lao chuah ei ta; a hnohta vao chhôh liata zy a ngia thei nawpa a hiah ei ta. Ano chata bie pie ta.
33 Ahripazy cha chyhsa chhôh tawhtapa cha pua ei ta, vao chhôh liatazy a ngia ei ta, vao zaw cha padawpa lâta a râ ei ta, tipo liata a ngia ei ta, tlasao haw ei ta.
34 A pasatuhpazy chata cha hmo yzie cha hmô ei ta, a râ ei ta, khih liata nata lyu lianazy chata kei reih ei ta.
35 Hmo a vaw ypa cha khâpama a châ tly tahpa ta mo awpa ta pua chyu ei ta, Zisu hnohta ama tlô nahta ahripa ta a puasai hapa kha, poh a bupa ta palôhrupa a dopa phaohpa ta, Zisu phei thaby liata atyupa ta vaw hmô ei ta, chatanachata chi haw ei ta.
36 A pahnotuhpazy chata ahripa patupa a patlâhsanazie cha sahlao cha chho ei ta.
37 Chatawhcha a chheipâh ta Kerasi râh liata chyhsa zydua chata ama chi ngaitapa vâta; ano cha âmo tawhta siesai awpa ta a haw ei ta; chatawhcha balyh liata kiah ta kua ha heih ta.
38 Cha chyhsa cha ahripa ta a puasai tawhna chata Zisu hnohta y thla ha awpa ta a haw chaimâh ta, châhrasala Zisu ta,
39 “Na o lâ a di heih la, Khazohpa ta na châta hmo a cha taopa he a rôhnahzie va chho teh,” tahpa ta pasiesa ha ta. Sie ta, khihpi chhôh zydua liana chata Zisu ta a châta hmo a taopa a rôhnahzie cha tlâh awhkhei ta.
Zairu sawchanônô a patlâhpa nata chanô thi lohpa(Mt 9:18-26; Mk 5:21-43)
40 Zisu a vaw kua heih nah chata, chyhsa zawpi ta ano aly ei ta, ano vaw hâ thlâh ha tlôh ei ta.
41 Chyhsa pakha a moh Zairu, a pakhyna-o hyutuhpa cha a vy ta; Zisu phei thaby liata pao ta, a o lâ sie awpa ta a haw ta.
42 ano cha sawchanô matlupa hnei ta, kô hrawhleinopa châ ta, cha chyhsa cha thi daihmâpa ta a zia thlâh ha ta.Zisu a sie hai nota zawpi sahlao ta thata by ei ta.
43 Chanô pakha kô hrawhleino chhôhta thi lohpa ta a tla leipa, a sôh hneipa zydua cha dawhty zy liata patlâhsa nawpa ta hmâh khai ha ta; châhrasala ahyhmah ta patlâhsa thei tlôh lei khâh ei ta.
44 Cha chyhsa cha a hnôh lâta a vy ta, a poh pai hria ta. Sôkhata ta a thi lohpa cha a vaw hâh ha ta.
45 Zisu ta, “Na hriapa kha ahyma a châ?” tah ta. “Keima châ va na,” tah chyu ei ta. Pity ta, “Pachutuhpa, zawpi sahlaozy ta thata ama cha bypa he!” tah ta.
46 Châhrasala Zisu ta, “Ahy tlyma ta eina hria; hmotaotheina ei chhôh tawhta a pua tahpa pahno tlôh na ta,” tah ta.
47 Chanô cha a nyu thei leipa ta a pahno ta, chalyuna chôta a vy ta, a hmiakô liata pao ta, a hria chhânapa nata sôkhata ta a tlâh hanazie cha chyhsa zydua hmiakô liana chata reih ha ta.
48 Ano chata a hnohta, “Ei sawchanô, nâ ngiapâna ta na tlâhkhei na; thlahlôh ngaitapa ta sie teh,” tah ta.
49 A rei hai nona chata, apakhyna-o hyutuhpa o tawhna cha chyhsa pakha a vy ta, “Na sawchanônô a thi haw, Pachutuhpa he patypamâ khao khah y,” tah ta.
50 Zisu deikua chata cha bie cha a pahno nahta, “Chi khâ, angiapâ thlâh ha teh, chatanachata a tlâh heih aw,” tahpa ta a chhy ta.
51 Chatawhcha o cha a kei tlô nata Pity zy, Zawhana zy, Zami zy hawtipa nô zy nata paw zy dei leipa cha, ahyhmah ta angiapah pasai leipa ta.
52 Chatawhcha ama zydua ta cha hôlô ei ta, chakhei ei ta, châhrasala ano chata, “Cha khah u; thi vei, a môpa tlao a châ,” tah ta.
53 A thi hapa ta pahno tlôh ei ta, thata pahneisao ei ta.
54 Zisu deikua chata a ku patu ta, “Hawti, thyu teh,” tahpa ta aw ta.
55 A thlahpa cha vaw kua heih ta, thlai thyu ha ta; niepa pie awpa bie pie ta.
56 A nô nata a paw chata ama noâh kaw ta; châhrasala ano chata a hmotaopa cha ahyhmah ta chho lei awpa ta bie pie ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||