Zisu biehneina hiahrina(Mt 21:23-27; Mk 11:27-33)
1 Noh kha cha Zisu ta Khazohpa achhyna-o liata chyhsazy pachu ta, Thâtihpha a chho nota, theihthaipa abeizy nata Ryhpa pachutuhpazy cha machâzy chhaota ano lâ thlai a vy ei ta,
2 a hnohta, “Ahy bie ta ma he hmozy he na tao, ahyma bie cha pie? maniah chho teh,” tahpa ta hiahri ei ta.
3 Ano chata ama hnohta, “Kei chhaota bie kawh kha ei cha hiahri hra aw ei; na chho teh u. Zawhana bâtina kha avâ tawhtapa ma, chyhsapa tawhtapa maw?” tah ta a chhy ta.
5 Âmo chata pachâ ei ta, “Avâ tawhtapa tah mawh ei sihla, ‘Khazia namâ ngiapâ vei?’ maniah tah tlôh aw ta.
6 ‘Chyhsapa tawhtapa,’ tah mawh ei sihla chyhsa zydua ta alô ta maniah ama vawh aw; Zawhana cha hrohsopa a châpa pahno pasia tlôh ei ta,” tah ei ta.
7 Chatanachata a chhy ei ta, “Khataih tawhtapa ma pahno ma pi,” tah ei ta.
8 Zisu ta ama hnohta, “Kei chhaota ahy bie ta ma he hmozy he ei tao tahpa cha chho hlei hra aw veih ei na,” tah ta.
Kresadô nata lyu hneituhpa pakhona bie(Mt 21:33-46; Mk 12:1-12)
9 Chatawhcha vâtlâh hnohta he pakhona bie he reih ta: “Ahy tlyma kresadô tao ta, lyu mokhâhtuhpazy hnohta thlyu hlao awpa ta pie ta, bohpi hawh awpa ta râh hro lâ sie ha ta.
10 A thei lyu daihti ta sadô liata a patheipa cha a tovyuh la awpa ta lyu mokhâhtuhpazy lâna chata sei pakha tuah ta; châhrasala lyu mokhâhtuhpazy chata vaw tu ei ta, ku ruapa ta pasiesa ha ei ta.
11 Sei hropa tuah heih ta; cha chhao cha vaw tu heih hra ei ta, nozachhih ngaitapa ta tao ei ta, ku ruapa ta pasiesa heih ei ta.
12 A pathôhna tuah heih ta; cha chhao cha hmah paphao ei ta, thy pathlah haw ei ta.
13 Kresadô hneituhpa chata, ‘Kheihtama ei tao aw vâ i? Ei sawchapawpa kho ngaitapa ei tuah aw; ano he ama vaw za ngyu aw la,’ tah ta.
14 Châhrasala lyu mokhâhtuhpazy chata ano cha ama vaw hmôpa ta nahta, ‘He he ryu totuh awpa cha a châ, thie ei suh u, chatanachata a ryu eima châta a châ aw,’ tahpa ta reipahmaoh ei ta.
15 Chatanachata kresadô tawhtapa cha thy pathlah ei ta, thie haw ei ta. Chatanachata kresadô hneituhpa chata ama chô liata kheihta a vaw tah aw?
16 Lyu mokhâhtuhpazy cha vaw pahleipadia aw ta, sadô cha mohropazy a pie aw,” tah ta. Cha cha ama thei nahta, “Khazohpa ta pasaih kha se?” tah ei ta.
17 Châhrasala ano chata âmo sahlao cha moh ta, “He bie ropa he khâpama a châ tly?‘O satuhpazy alô kho leipa kha,cha tlai cha a ki liata phahnai chaipa a vaw châ haw,’tahpa hih.
18 Ahyrai cha alô chô liata a a paopa maih a zao khai aw; a vipa chhochhi cha a di sao aw,” tah ta.
Kaisara liata chhie cheina(Mt 22:15-22; Mk 12:13-17)
19 Cha nona tlai chata Ryhpa pachutuhpazy nata theihthaipa abeizy ta patu a chhuah ei ta, châhrasala zawpi chi ei ta; cha pakhona bie cha âmo pasiapa ta a rei tahpa pahno tlôh ei ta.
20 Chatawhcha ano cha râh vaotuhpa ryureina nata biehneina liata tlôkhei awpa ta a bie rei chheipa patu awpa ta a byh thlâh ha ei ta, mohparutuhpa chyhsa phapa hawhta a y pakheipazy cha tuah ei ta.
21 Âmo chata a hnohta, “Pachutuhpa y, a dopa ta bie reipa ta pachu chi ta, ahyhmah panano hlei leipa ta, hmeiseihpa ta Khazohpa kyh na pachu tyhpa eima pahno.
22 Kaisara liata chhie cheih awpa âna ma, ana vei ma?” tahpa ta hiahri ei ta.
23 Châhrasala ano chata ama sydiepa pahno ta, ama hnohta,
24 “Tâkâ na pamosa teh u, ahy nohthlahpa nata ahy moh ma a choh?” tah ta. Chatawhcha âmo chata, “Kaisara” tah ei ta.
25 Ano chata ama hnohta, “Cha thlaopa cha Kaisara hmozy cha Kaisara hnohta pie ula, Khazohpa hmozy cha Khazohpa hnohta pie teh u,” tah ta.
26 Chatanachata zawpi hmiakô liata a bie rei chheipa patu awpa hmô leipa ei ta; a chhyna cha ama noâh kaw ta, a thlih thlâh ha ei ta.
Thyuheihna kyh hiahriana(Mt 22:23-33; Mk 12:18-27)
27 Saduasizy thyuheina y vei a tahpazy hry liatahpa, ahyzy tlyma ano lâ a vy ei ta,
28 a hnohta, “Pachutuhpa y, Mawsi ta ahyrai a unawhpa ta lahpinô hnei sala, saw hnei leipa ta thi sala, a unawhpa ta a lahpinô topa ta a unawhpa chata chi a pathlapa awpa a châ tahpa, maniah a ropa.
29 Chatatlyh, unawh pasari y ei ta; a hmiatua chaipa ta lahpinô hnei ta, saw hnei leipa ta thi ta;
30 a panona chata to ta.
31 a pathôhnapa chata to heih ta, cha hawhna chata pasari cha saw hnei leipa ta thi lymâ ei ta.
32 Cha hnôh lâna chata chanô chhao cha thi ha ta.
33 Chatanachata thyuheih tina chata ahy lahpinô ma a châ aw? Ama pasari chata lahpinô ta hnei chyu tlôh ei ta,” tahpa ta hiahri ei ta.
34 Zisu ta ama hnohta, “Atahmâhlâ chyhsazy he lahpinô vahpa ama hnei tyh;
35 châhrasala cha daihti liata athihpa hry tawhta thyuheihna liata a hlao tlâhpa ta raopa maih cha, lahpinô vahpa a hnei khao aw veih ei,
36 thi khao aw veih ei, vâlyuhchâpazy tluta y tlôh aw ei ta, thyuheina sawzy ama châpa vâta Khazohpa sawzy ama châ aw.
37 Athihpa pathyupa ta ama y awpa, Mawsi chhaota chhobuh liata, Abeipa cha Abaraha Khazohpa, Aisika Khazohpa, Zakaw Khazohpa a tah nona khata, a pahnosapa kha.
38 Ano cha athihpa Khazohpa châ leipa ta, ahrohpa Khazohpa tlao a châ; ano pachâna liata cha chyhsa zydua hroh khai tlôh ei ta,” tah ta.
39 Ryhpa pachutuhpa ahyzy tlyma ta, “Pachutuhpa y, na reipa â do kaw na,” tahpa ta a chhy ei ta.
40 Bie hrohpa hiahri ngâh khao tlôh leipa ei ta.
Davi Sawchapawpa thâtih hiahrina(Mt 22:41-46; Mk 12:35-37)
41 Ano chata ama hnohta, “Mesiah cha Davi Sawchapawpa a châ tahpa kheihtazie ta a reih tyhpa ma ama châ?
42 Hlazy châbu liata “Davi tlai ta,‘Abeipa chata ei Beipa hnohta, na khakhaipazy
43 na phei tlyna ta ei tao hlâ lei la, ei chachâh lâ a tyuh teh,’a tah.
44 Chatanachata Davi ta ano cha Abeipa tah tlôh ta; kheihta ma a sawchapawpa a châ thei tly?” tah ta.
Ryhpa pachutuhpazy Zisu ta a reipachhiena(Mt 23:1-36; Mk 12:38-40; Lk: 11:37-54)
45 Chyhsa zydua theipa ta a pachupazy hnohta,
46 “Ryhpa pachutuhpazy liata a chado teh u, âmo chata viahpakao pasihpa a kypa ta charei khoh tyh ei ta, sôhdaona su liata a naohnazy, pakhyna-o liata dyuchhai pha chaipazy, kyhchhina liata su pha chaipazy pasô tyh ei ta,
47 nôhmei sôh nie ei ta, chyhsa dô nawpa ta a pasihpi ta thlah ama chhâ tyh, cha sahlao chata thai lei ama châ pachai aw,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||