Zisu thlahchhâna pachuna (Mt 6:9-15; 7:7-11)
1 Zisu ta kheihtapa su liata tlyma thlahchhâ ta, a chhâ khai nahta a pachupa chyhsa pakha ta a hnohta, “Abeipa, thlachhânazie Zawhana ta a pachupazy a pachupa hawhna khata maniah pachu hra teh,” tah ta.
2 Ano chata ama hnohta, “Thlah nama chhâ khiahtala he hawhna heta tah muh vy: “Eima Paw, na moh zachhih mawh sy. Na khihnarâh za tlô mawh sy.
3 Nohchareih eima niepa maniah pie mah y;
4 eima moleinazy maniah ngiahthai mah y, keimo chhaota maniah a bâhpazy eima ngiahthai tyh; reipasaona liata maniah a chhi khah y,” tahpa ta.
5 Ano lilaw ta ama hnohta, “Nama hryta ahy tlyma viasa hnei sala, zâcho ta ano lâ vawpa ta, ‘Ei viasa y, viahchhâ tlâ thôh na patha teh;
6 ei viasa khitlyhpa ta na vaw chapia ta, a hmiakô ta to awpa khâpahmah hnei lei khâh na ta,’ tah sala;
7 ochhôh liatahpa ta, ‘Na patypamâ khâ; atahmâ la ochhi khawpa châ ta, ei sawzy chhao ei hnohta rakhô liata amâ zia haw; thyupa ta cha pie thei va na,’ tahpa ta a chhy aw ma?
8 Ei cha tah ei chuh, a viasa a châpa vâta thyupa ta a pie lei tarawpa ta, a hiah ngâpa vâta thyupa ta a khonazie a pie aw.
9 Chatanachata ei cha tah ei chuh, Hiah teh u, chatanachata piepa nama châ aw; tlua teh u, chatanachata nama hmô aw; chakhyh teh u, chatanachata ochhi pahypa ta nama y aw.
10 Ahyrai a hiahpa maihta hmô tyh ei ta, ahyrai a tluapa chata ama hmô tyh, ahyrai a chakhypa cha pahypa a châ aw.
11 Nâmo hryta paw cha a sawchapawpa ta viahchhâ hiah sala, ahy e alô a pie aw, cha khiahla ngasa hiah sala ngasa vyuhpa ta parih a pie aw;
12 cha khiahla awhti hiah sala râhcha-ia a pie aw ma?
13 Chatanachata nâmo, moleipa hmahta, nama sawzy hmophapa piena châh nama pahno khiahta cha, nama Paw avâ liatahpa chata a hiahtuhpazy cha Thlahpa Pathaihpa a pie kaw aw dia!” tah ta.
Zisu nata Belzebul(Mt 12:22-30; Mk 3:19-27)
14 Zisu ta ahripa reih pathlie thei leipa pakha papua ta; ahripa cha a puapa ta nahta reih pathlie thei leipa cha reih pathlie ha ta, chatanachata zawpi ta ama noâh kaw ta.
15 Châhrasala thokha chata, “Ahripa beipa Belzebul vâta ahripazy a papua,” tah ei ta;
16 thokha ta ano pasia nawpa ta, avâ lâtahpa pahnona hiah ei ta.
17 Ano deikua chata ama pachâpazy pahno ta, ama hnohta, “Kheihawhpa khihnarâh rai âmosasy ta adyuhpa mai ama leidia tyh, chhôhkha chhao âmosasy ta adyuhpa cha ama lei tyh.
18 Sâtâ chhao anosasy ta adyuh khiahtala a khihnarâh kheihta e a duah thei aw? Belzebul cha ahripazy a papuasa, na tah tlôh eichi ta.
19 Chatawhcha kei he Belzebul, ahripazy a papuasa tyhpa ei châ khiahtala, nama sawzy ta ahy, vâta e ama vaw papua tyh tly? Chavâta âmo cha nâmo pachiatuh awpazy ama châ.
20 Anodeikuacha kei heta Khazohpa kudy hmâpa ta ahripazy a papua tyhpa ei châ khiahtala, Khazohpa Khihnarâh nama hnohta a vaw tlô hawpa a châ aw.
21 Chyhsa thatlôpa chata chaihrai a kipa ta chabapa ta, a o a vaih chhôhta cha a bohpa ta a y tyh;
22 châhrasala ano hlâta thatlô viapa ta vaw siehnaopa ta a pahnie tita cha a pachyna chaihrai a kipa cha chhu ta, a sôh a lapa cha a rai tyh.
23 Ahyrai ei chhâh a châ leipa cha nâ dyuhtuhpa a châ, ahyrai na pakhykhei leipa cha a papai.
Thlahpa pathaih leipa vaw kua heina(Mt 12:43-45)
24 “Thlahpa pathaih leipa cha chyhsa chhôh tawhta a pua nahta, pahâna tluapa ta ti y leina suzy lâta a khie ta; chatawhcha pahâna rai hmô leipa ta, ‘Ei puana o lâna khata ei kua aw,’ tah ta.
25 A kei tlô nahta phi chipa ta tobipa ta hmô ta.
26 Chapa ta nahta vawh ta, ano hlâta molei viapa ahripa hropa pasari a vaw chhi ta, cha liana chata a ngia ei ta, pahrâ ei ta; cha chyhsa yzie hnôh lâtahpa cha a hmia lâtahpa hlâta a pha lei via syulyu,” tah ta.
Nohlaona dopa
27 Cha biezy cha a rei nota zawpi hryta chanô ahy tlyma aw ta, a hnohta, “Chhi cha phaohpa cha a nohlao na, na sâhpi pazypa chhao,” tah ta.
28 Châhrasala Zisu chata, “Khazohpa bie thei ta a zyhpazy he chysa nohlaopa tlao ama châ,” tah ta.
Chhâ moleipa ta ngiana a tlua(Mt 12:38-42; Mk 8:12)
29 Zawpizy cha ano lâta ama vaw pakhy nota, Zisu ta, “Atahmâhlâ thyutliapazy he moleipa ama châ; ngiana tlua ei ta, châhrasala Zawna ngiana dei leipa cha ama hnohta ngiana rai piepa châ aw vei.
30 Zawna cha Niniva khih liata chyhsazy chata ngiana a châpa hawhna khata, Chyhsa Sawchapawpa chhao atahmâhlâ thyutliazy châta ngiana a vaw châ aw.
31 Chho lâ beinô kha pachia noh liata cha atahmâhlâ thyutliazy hnohta thyu hra aw ta, thai lei a pachâsa aw ei; Sawlawmaw sona nahthlie awpa ta hmahta kaoki tawhta a vy tlôh ta, Sawlawmaw hlâta rôhnah viapa he liana heta a y mâ ta.
32 Niniva khih liata chyhsazy cha pachia noh liata cha atahmâhlâ thyutliazy hnohta a duah hra aw ei ta, thai lei ama pachâsa hra aw; Zawna bie chhopa vâta ro tlôh ei ta, moh teh u, Zawna hlâta rôhnah viapa he liana heta a y mâ tâh.
Pôhpa khaihna(Mt 5:15; 6:22-23)
33 “Ahyhmah ta meiôh rao sala nyupa ta beih ta khu beih veih ei, chyhsa a ngiapazy chata a khaihpa ama hmô thei nawpa ta a sona liata tlao ama soh tyh.
34 Na pôhpa meiôh cha na mo a châ; na mo a sia khiahtala, na pôhpa a ualua ta khaihna ta a bie tyh; a rao khiahta deikua cha na pôhpa chhao a zoh khai tyh.
35 Chatanachata na chhôh liata khaihna a ypa cha zohna a cha lei nawpa ta a chado teh.
36 Chatanachata pôhpa a kheihawhpa liata hmahta zoh leipa ta, tlokhuh a khaih thei nawpa ta meiôh khaih ngaitapa ta a cha khaipa hawhta a khaihna ta a bie aw,” tah ta.
Zisu ta Pharisaizy nata Ryhpa pachutuhpazy a reipachhiena(Mt 23:1-36; Mk 12:38-40; Lk 20:45-47)
37 A rei ngâ nota Pharisai pakha ta ano cha a hnohta pati nie awpa ta hrua ta; a ngia ta, pati dôh ta.
38 Pharisai chata pati a dôhpa cha a hmô nahta pati nie hlâta ku a si leipa cha a noâh kaw ta.
39 Abeipa chata a hnohta, “Nâmo Pharisaizy ta nyu nata beikoh chôlâ cha pasi tyh eichi ta, nama chhôh lâ deikua cha a vyuhna nata moleina ta bie tlôh ta.
40 Ahrupa saih u! A chôlâ a taotuhpa ta chhôh lâ chhao tao vei ma?
41 Châhrasala a chhôh liata hmo a ypa cha sipasapa hnohta pie awpa ta hmâh teh u; chatanachata nama châta a to a pathaih haw.
42 “Nâmo Pharisaizy saih u, nama hu a po na! chatani zy, chicheipa to zy, su hrawh liata su kha pie tyh eichi ta, siana nata Khazohpa kyhpachâna cha uasa leipa ta nama y tyh; châhrasala chazy cha nama tao awpa a châ mâ tâh, a hropazy chhao cha tao leipa ta y hlei leipa ta.
43 Nâmo Pharisaizy saih u, nama hu a po na! Pakhyna-o liata dyuchhai pha chaipazy nata sôhdao su liata anaohnazy tlaichhai tyh tlôh eichi ta.
44 Nama hu a po na! Thlâ a châpa â hno leipa a chôta pahno leipa ta, chyhsa ama sie tyhna hawhpa cha nama châ,” tahta.
45 Ryhpa pachutuhpa pakha ta a hnohta, Pachutuhpa, he biezy na reipa he keimo chhao maniah a rapa na châ he,” tah ta achhy ta.
46 Anochata, “Ryhpa pachutuhpa saih u, nâmo chhao nama hu a po na hmo phao riethei chhih ngaitapazy chyhsazy paphaosa tyh eichi ta, nâmo ta phaozy cha nama ku paroh miakha chhaota hria beih tlôh leipa eichi ta.
47 Nama hu a po na! hrohsopazy thlâ ozy sa tyh eichi ta, nama pathlatuhpazy thiepa châ tlôh ei ta.
48 Chatanachata nama pathlatuhpazy hmotaopazy cha pahnokheipa ta a ryh nama tahkheipa a châ; âmo ta thie ei ta, nâmo ta ama thlâ ozy sa tlôh eichi ta.
49 Chavâta Khazohpa sona chhaota, Ama hnohta hrohsopazy nata lyuhchâpazy tuah aw na ta, thokha thie aw ei ta. thokha ama taola aw,’ a tahpa kha.
50 Chatanachata Abela thisaih loh rakha tawhta Zekaria maisâh nata achhyna-o likawhta a thipa thisaih lona taih khata.
51 hrohsopa zydua thisaih aleilô y tuano tawhta a lohpa cha atahmâhlâ thyutliazy chô liana heta phuh ama la thei aw, Chatatlyh, ei cha chho ei chuh, atahmâhlâ thyutliazy chô liana heta phuh ama la aw.
52 Nâmo Ryhpa pachutuhpa saih u, nama hu a po na! sona châhbi cha siekhei haw eichi ta; nâmo a ngiah tlôh leipa eichi ta, a ngia awpa chhao pakhâ tlôh eichi ta,” tah ta.
53 Cha tawhtapa cha a pua nahta, Ryhpa pachutuhpazy nata Pharisaizy chata ano cha a hao ngaita ei ta, bie to pareisa raruah ei ta,
54 a rei chhei pathleina patu a chhuahpa ta a byh thlâh ha ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||