Nôhmei nata ryureituhpa pakhona bie
1 Hnabeidy leipa ta thlahchhâ tyh awpa a châ tahpa pahnosa nawpa ta ama hnohta pakhona bie reih ta.
2 “Khih kheihawhpa liata tlyma ryureituhpa pakha y ta, cha chyhsa chata Khazohpa chi leipa ta, chyhsa a papeisa hra vei;
3 cha khih liana chata nôhmei pakha y ta, ano chata, ‘Phuh na lapa teh,’ tahpa ta ano lâ vawh tyh ta.
4 Ano chata bohpi khoh leipa ta y ta; châhrasala a noh hropa ta cha a palôhrupa ta, ‘Khazohpa chi leipa ta, chyhsapa papeisa vei hra aw sala,
5 he chanô heta eina patypamâpa vâta a phuh ei lapa aw, chata leipa ta la khâ a vy tyhpa heta ei rie eina pathei pathlei aw na,’ tahpa ta,” tah ta.
6 Abeipa ta, “Ryureituhpa sia leipa bie reipa cha thei teh u.
7 Ama chô liata a nô pha chy hrasala a tlypa, a chhô a zâ ta ano a padotuhpazy phuh cha Khazohpa ta lapa aw vei ma?
8 Ei cha chho ei chuh, ama phuh thlai a lapa aw. Châhrasala Chyhsa Sawchapawpa he a vy tita cha khizaw liana heta ngiapâna a vaw hmô aw ma?” tah ta.
Pharisai nata chhiekheituhpa pakhona bie
9 Chyhsa sia ngaitapa a châpa ta a pangiasapa ta chyhsa hropa zydua a mohnao tyhpa ahyzy tlyma hnohna chata, he pakhona bie chhao he reih ta:
10 “Chyhsa pano Khazohpa achhyna-o liata thlahchhâ awpa ta khy ei ta, pakha cha Pharisai châ ta, pakha cha chhiekheituhpa a châ.
11 Pharisai cha a duah ta, anosasyh liata he tana heta thlahchhâ ta, ‘Khazohpa y, mo hropa hawhta a vyuhpazy, sia leipazy, ei châ leipa vâta nata, he chhiekheituhpa hawhna chhao he ei châ leipa vâta na chô liata ei châ ly na.
12 Hâta maihta ei no nie leipa ta y tyh na ta, ei hmôpa maih su hrawh su kha ei pie tyh,’ tah ta.
13 Chhiekheituhpa deikua cha lâhlapi ta a duah ta, avâ lâ chhao ua ngâh leipa ta, ‘Khazohpa y, kei moleipa na he, na ngiachhie teh,’ tahpa ta a chachôhna tlao a chô ta.
14 Ei cha chho ei chuh, a hmiatuapa hlâta cha chyhsa cha thai châpa ta a o lâ zu ha ta; apasâhsapa maih nawh aw ei ta, a reisipa maih palyupalipa ta ama y aw,” tah ta.
Hawtizy Zisu ta byhnâ awpa(Mt 19:13-15; Mk 10:13-16)
15 A hria awpa ta a hnohta ama hawsaihzy a vaw chhi ei ta; pachupazy deikua chata, cha cha ama hmôpa ta nahta ra ei ta.
16 Châhrasala Zisu ta âmo cha aw ta, “Hawtizy ei hnohta pavysa ula, dytha khah u; Khazohpa Khihnarâh cha he hawhpazy eih châ tlôh ta.
17 Hmeiseihta ta, ei cha chho ei chuh, ahyrai Khazohpa Khihnarâh cha hawtita ta alypa hawhta aly leipa maih a chhôh liata a ngia chacheita aw veih ei,” tah ta.
Ryureituhpa thyutlia hneirôhpa(Mt 19:16-30; Mk 10:17-31)
18 Hyutuhpa ahy tlyma ta a hnohta, “Pachutuhpa Phapa, chhâzaw hrona to nawpa ta kheihta e ei tao aw?” tahpa ta hiahri ta.
19 Zisu ta a hnohta, “Khazia phapa eina tah chi? Chyhsa pakha dei leipa ta cha ahyhmah phapa y veih ei, cha cha cha Khazohpa a châ.
20 Biepiepazy cha na pahno mâ tâh: ‘A phei khâ; Liany cheih khâ; Paru khâ; Leih khâ; Na nô nata na paw palyupalih teh,’ tahpazy hih,” tah ta.
21 Chatawhcha ano chata, “Cha bie zydua cha ei hawtita tawhta ei ngiah lymâ tyh,” tah ta.
22 Zisu ta cha cha a thei nahta a hnohta, “Atahmâ chhao kyh kha nâ bâh na. Na hneipa zydua zuah la, dyhchhiepazy liata rai teh, chatanachata avâ liata ryu na hnei aw; chatanacha a vy la, na zi mah y,” tah ta.
23 Ano deikua chata cha biezy cha a thei nahta a pachâ rôh ngaita ta, a hneirôh ngaitapa a châpa vâta.
24 Chatanachata Zisu ta ano cha moh ta, “Hneirôhpazy cha Khazohpa Khihnarâh liata a ngia awpa a ru kaw dia!
25 Chyhsa hneirôhpa Khazohpa Khihnarâh liata a ngiapa hlâta cha râraoseihpa chiepho khaoh liata a ngiapa a nao via,” tah ta.
26 Cha bie a theipa zawpizy chata, “Cha khiahtala ahy e pachhapa a châ thei aw tly?” tah ei ta.
27 Zisu deikua chata, “Chyhsapa tao thei leipa he Khazohpa tao theipa a châ,” tah ta.
28 Pity ta, “Moh teh, keimo ta eima o nata lyu siesaipa ta cha zi pi ta,” tah ta.
29 Ano chata ama hnohta, “Hmeiseihta ta, ei cha chho ei chuh, ahyrai Khazohpa Khihnarâh vâta o tlyma, lahpinô tlyma, unawhzy tlyma, nô nata paw tlyma, sawzy tlyma a siesaipa maih cha,
30 atahmâ hro chhôh liana tlai heta a hluh via a hmô lei awpa ahyhmah y veih ei, daihti a vaw tlô awpa liata chhâzaw hrona chhao,” tah ta.
Zisu ta a thina ei thôh a chho chhieliena(Mt 20:17-19; Mk 10:32-34)
31 Chatawhcha pahrawhleinozy cha a nano ta a chhi ta, ama hnohta, “Nahthlie teh u, Zerusale khih lâ eima khy aw, hrohsopa bie ropa zydua kha Chyhsa Sawchapawpa chô liana heta a tlô aw;
32 Zenitaizy hnohta pie aw ei ta, pahneisaisona châta hmâh aw ei ta, nozachhih ngaitapa ta tao aw ei ta, ama pachih ta ama pachhao aw;
33 chhei aw ei ta, ama thi aw, noh thôh noh ta a thyu heih aw,” tah ta.
34 Cha biezy cha a pachâna pahno leipa ei ta; bie reipa cha âmo tawhta nyupa ta y ta, khâpa a reihpa ma a châ tahpa chhao pahno leipa ei ta.
Zerikô kiapâh liata mochaopa mo pavâhna(Mt 20:29-34; Mk 10:46-52)
35 Zerikô khih a tlô chyta, mochaopa ahy tlyma lâpi kiah liata kudaopa ta a tyuh ta;
36 cha chyhsa chata zawpi siepa pyu thei ta, khâpama a châ tahpa hiahri ta.
37 Âmo chata, “Nazari Zisu a sie,” tahpa chho ei ta.
38 Chatanachata ano chata, “Zisu, Davi Sawchapawpa y, na ngiachhie teh!” tahpa ta awh ta.
39 Chatawhcha hmia a sahpazy chata a chalih awpa ta ra ei ta; châhrasala ano chata, “Davi Sawchapawpa y, na ngiachhie teh!” tahpa ta tha via ta awh ta.
40 Chatanachata Zisu a duah ta, ano lâta amâ vaw chhi awpa ta bie pie ta; a kiapâh a vaw tlô nahta,
41 “Na chô liata kheihta ei tao awpa na khoh?” tah ta, hiahri ta. Ano chata, “Abeipa y, mo pavâhna ei khoh,” tah ta.
42 Zisu ta a hnohta, “Mo pavâhpa ta y teh; nâ ngiapâna na tlâhkheipa a châ,” tah ta.
43 Chatawhcha sôkhata a mo pavâhpâ ha ta, Khazohpa reithaina chôta ano cha zi ha ta; chyhsa zydua chata cha cha ama hmô nahta Khazohpa reithai ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||