Rona ma leidiana ma
1 Cha nona tlai chata, ahyzy tlyma y ei ta, chazy chata Kalili râh mo Pila ta ama atheihna nohta a thiepazy thâtih cha chho ei ta.
2 Ano chata ama hnohta, “Cha Kalili râh mozy cha, cha hawhpa hmo pasa ama taopa vâta Kalili râh mo zydua hlâta molei pachaipa a châpa ta nama pangiasa ma?
3 Châ bao va, ei cha chho ei chuh; nâmo chhao nama ro vei khiahtala cha hawhna hra chata nama leidia khai aw.
4 Silôam o sâhpa ta pahrawhleicharie a visaopazy chhao kha, Zerusale khih liata a ypa zydua hlâta molei pachaipa ama châpa ta nama pangiasa ma?
5 Châ bao va, ei cha chho ei chuh; nâmo chhao nama ro vei khiahtala, cha hawhna hra chata nama leidia khai aw,” tah ta a chhy ta.
Theiku pathei leipa pakhona bie
6 He pakhona bie he reih ta, “Ahy tlyma a kresadô liata theiku kô lopa miakha hnei ta; a kô liata a theilâpa vaw tlua ta, hmô kha hmahta hmô leipa ta,
7 Chatanachata krezôh mokhâhtuhpa hnohta, ‘Kô thôh chhôh liana heta he theiku kô liana he a theipa tlua tyh na ta, hmô kha hmahta hmô tlôh lei khâh na ta. Thlu la; khazia ma alei a pahrâ pahraoh tly?’ tah ta.
8 Ano chata a hnohta, ‘Pâpuh y, atakô chhâ he y sala, a kiapâh ta chao aw na ta, ie ta ei vaohei chy aw na.
9 Cha tawhna chata a pathei khiahtala a pha aw; a pathei vei khiahta deikua cha thlu thlâh ha lavâ chi, tahpa ta,” tah ta.
Chanô chiehleipa pahânoh ta a patlâhpa
10 Pahânoh ta ano chata apakhyna-o miakha liata pachu ta.
11 Kô hrawhleicharie ahripa patupa chieh leina a hneipa chanô pakha a y, cha chanô cha a koh thlâh ha ta, a patlâhpa ta a duah thei chachei leipa ta.
12 Zisu ta a hmôpa ta nahta awh ta, a hnohta, “Chanô, na chieh leina chata a cha pathlie haw,” tah ta.
13 A chô liata a kuzy pahnie ta, chatanachata sôkhata a patlâh ha ta, Khazohpa reithai ha ta.
14 Zisu ta pahânoh ta chyhsa a patlâhpa vâta pakhyna-o hyutuhpa cha a pathi-ia ta, zawpi cha chho ta, ama hnohta, “Chyhsapa raihria nawpa ta noh charu a y mâ tâh; cha chhôh liata a vy ula, a patlâ teh u, pahânoh ta a vy leipa ta,” tah ta.
15 Abeipa deikua chata a hnohta, “Nâmo haiphiahpa saih u! Pahânoh ta nama viahchao tlyma, alâ tlyma a lao niena tawhta pathlapa ta ti doh awpa ta chhihtha chyu tyh veih eichi ma?
16 He chanô he, Abaraha sawchanônô châ tlôh ta, Sâtâ ta kô hrawhhleicharie a patu thlâh hapa he, pahânoh ta rai he chahrypa he pathlâpa lei awpa ma a châ?” tah ta a chhy ta.
17 Cha biezy cha a rei hai nota, a khakhaipa zydua cha nozapa ta y ei ta; zawpi deikua cha a hmo rôhnahpa taopa zydua vâta aly kaw sai ei ta.
Ahrâ chi pakhona(Mt 13:31-32; Mk 4:30-32)
18 Chatanachata ano chata, “Khazohpa Khihnarâh cha kheihawhpa a châ? Khâpa nata ei pakho aw?
19 Ahrâ chi hmô kha chysa ta la ta, a sadô liata a hiepa hawhna cha a châ; cha cha pyuh ta, tho vaw châ ta, pavawzy cha a chiahzy liana chata a rie ei ta,” tah ta.
Thinô pakhona bie(Mt 13:33)
20 “Khazohpa Khihnarâh cha khâpa nata ei pakho aw? tah heih ta.
21 Thinô chanô ta la ta, viahdie panuana miathôh liata a zydua ta a thyu khaina taihta a pabupa hawhna cha a châ,” tah ta.
Ochhi buahpa(Mt 7:13 15, 21-23)
22 Ano chata pachu lymâna chôta Zerusale khih lâ pangaipa ta, khihpi nata khitawzy chahryh lymâ ta.
23 Ahy tlyma ta a hnohta, “Pâpuh, pachhapazy cha ama chyhta ma?” tah ta. Ano chata ama hnohta,
24 “‘Chhikao buahpa liana chata a ngia a chhuah lylia teh u; ei cha chho ei chuh, chyhsa hluhpi ta a ngia a chhuah aw ei ta, a ngia thei tlôh aw veih ei.
25 O hneituhpa thyu ta ochhi a khaw tawhna chata, nâmo ta khôtho lâ aduahpa ta, ‘Abeipa, ochhi maniah pahypa teh,’ tahpa ta; ochhi nama vaw chakhy tita ano ta, ‘Khataih lâ chyhsa ma nama châ, cha pahno veih ei na,’ tahpa ta cha chhy aw ei ta.
26 Cha tina chata nâmo ta, ‘Na mohmô liata chhao niepa ta eima doh hawpa kha, eima othliahzy liata chhao na pachu tyhpa kha,’ tah aw eichi ta.
27 Ano ta, ‘Ei cha chho ei chuh, khataih lâ chyhsa ma nama châ, cha pahno veih ei na; nâmo hmo moleipa a taopa zydua saih u, ei tawhtapa sie khai teh u!’ a tah aw.
28 Abaraha zy, Aisika zy, Zakaw zy, hrohsopa zydua cha Khazohpa Khihnarâh chhôhta a ypa hmô eichi ta, nâmo khôtho lâ papuapa nama châpa nama pahno tita, cha liana chata chana nata hâriena cha a y aw.
29 Nochhi nata notla, maw nata chho lâ tawhta chyhsa a vy aw ei ta, Khazohpa Khihnarâh liata ama vaw tyu aw.
30 Hnôh chaipazy chhao hmia chaipa ta a y awpa y ei ta, hmia chaipazy chhao hnôh chaipa ta y awpa ama y,” tah ta.
Zisu Zerusale chôta a chakheina(Mt 23:37-39)
31 Cha nona tlai chata Pharisai ahyzy tlyma a vy ei ta, a hnohta, “Pua la, he tawhna he sie syulyu teh, Herawda ta thie awpa a cha khoh ngaita,” tah ei ta.
32 Ano chata ama hnohta, “Cha sihâ hnohna chata he bie he kei reih teh u, ‘Atanoh nata mylâ chhao ahripazy papua aw na ta, pasapazy patlâh aw na ta, a hânohpa ta ei patlô aw.
33 Khâparai châ sala, atanoh nata mylâ chhao, ei sie lymâ awpa a châ; Zerusale lia dei leipa cha hrohsopa thie theipa châ vei,’ tah ta.
34 Hy Zerusale, Zerusale, hrohsopa sahlao a thietuhpa y, na hnohta ama vaw tuapazy alô ta a vaw saotuhpa! Awhpanô ano tachhih a mathlaw ryta a khupa hawhta, na sawzy ei khazie ma khu ei châ chhuah ei kha, châhrasala khoh tlôh eichi va!
35 Moh teh u, nama o cha a ruapa ta siesaipa ta a y haw. Ei cha chho ei chuh, ‘Abeipa moh ta a vypa cha reithaipa ta y mawh se!’ nama tah hlâ lei cha na hmô khao aw veih eichi,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||