Zisu nata Zakia
1 Zisu Zerikô khih liata a ngia ta, palâh lymâ ta.
2 Chyhsa pakha a moh Zakia y ta; cha chyhsa cha chhiekheipa hyutuhpa châ ta, ano chhao hneirôh kaw ta.
3 Zisu cha kheihawhpa chyhsa ma a châ hmô a chhuah ta, zawpi ama hluh kawpa vâta hmô thei vei, ano cha a doh chyu tlôh ta.
4 Chatanachata chhaokhâh ta, mo awpa ta theiku kô kiah ta, cha lâpi cha a vaw chhi awpa châ tlôh ta.
5 Zisu cha cha su a vaw tlô nahta, ua ta, a hnohta, “Zakia, za chô parah teh; atanoh na o liata ei tlô awpa a châ,” tah ta.
6 A parah ngaitapa ta chô ta, thapha ngaitapa ta ano cha patlôsa ta.
7 Cha cha ama hmôpa ta nahta ama zydua ta, “Chyhsa moleipa liata tlô awpa ta a ngia ha huh,” tah ei ta, paphôh ei ta,
8 Zakia cha a duah ta, Abeipa hnohna chata, “Abeipa y, ei sôh khophie dyhchhiepazy liata pie aw na ta; chatawhcha ahy liata rai hmo kheihawhpa ei vyuh hapa maih a lie palih ta ei thô aw,” tah ta.
9 Zisu ta Zakia kyh reih ta, “Atanoh he o liana heta pachhana a vaw tlô haw, ano chhao Abaraha sawchapawpa châ tlôh ta.
10 Leidiapazy tlua ta pachha awpa ta Chyhsa Sawchawpawpa he a vypana a châ,” tah ta.
Ngôh Tâkâ tlawhrawh pakhona bie
11 Cha biezy cha ama nahthlie nota, Zerusale khih a hnia hawpa vâta nata Khazohpa Khihnarâh thlai a vaw luah awpa ta ama pangiasapa vâta, pakhona bie reih ta.
12 He biezy he reih ta, “Chyhsa phapa ahy tlyma râh a vaona bie lapa ta vaw kua heih awpa ta khih lâhlapi lâta sie ta.
13 A sie chyta a seizy pahrawh aw ta ama hnohta, ngôh tâkâ tlawhrawh pie ta, ama hnohta, ‘Ei vaw tlô heih hlâ lei cha he heta sôh vaw palie teh u,’ tah ta.
14 Châhrasala a khih chyhsazy ta a hao ei ta, ‘He chyhsa he eima beipa châta khoh ma pi,’ tah awpa ta a hnôh lâta lyuhchâpa tuah hra ei ta.
15 Chatawhcha râh a vaona bie cha lapa ta a vaw kua heih nahta, a sei tâkâ a piepazy cha ama papôhnazie pahno nawpa ta pa-awsa ta.
16 A hmiatuapa cha a vy ta, ‘Pâpuh y, na ngôh tâkâ kha tlawhrawh ta a pôh,’ tah ta.
17 Ano chata a hnohta, ‘Sei phapa y, na taopa a pha na! A chyhta chô liata ngâ nâ chhihpa vâta, khih hrawh chô liata hyutuhpa ta y teh,’ tah ta.
18 A panonapa cha a vy ta, ‘Pâpuh y, na ngôh tâkâ kha tlawpangawh ta a pôh,’ tah ta.
19 Ano chata ano hnohna chhao chata, Nâ chhao khih pangawh chô liata hyutuhpa ta y teh,’ tah ta.
20 Mo hropa a vy ta, ‘Pâpuh y, moh teh, na ngôh tâkâ kha ahruna poh ta ei vao thlâh haw;
21 chyhsa a hrâhraoh ngaitapa na châpa vâta ei cha chi; na sôh leipa chhao la tyh chi ta, na hie leipa chhao a tyh tlôh chi ta,’ tah ta.
22 Ano chata a hnohta, ‘Sei moleipa, na reikah puapa tlaita cha pathaisa va na! Chyhsa hrâhraoh ngaitapa châ na ta, ei so leipa chhao la tyh na ta, ei hie leipa chhao ei a typa na pahno ma?
23 Cha thlaopa cha khazia ei tâkâ he sôh paliena o liata na soh vei, chatanachata ei vaw tlô nahta a pôhpa chhaota ei pado awpa a châ mâ tâh?’ tah ta.
24 Chatawhcha a kiapâh ta a duahpazy hnohta, ‘A ngôh tâkâ kha lapa ula, ngôh tâkâ tlawhrawh a hneituhpa pie teh u,’ tah ta.
25 Chatawhcha âmo chata a hnohta, ‘Pâpuh y, ano cha ngôh tâkâ tlawhrawh a hnei mâ tâh!’ tah ei ta.
26 ‘Ei cha tah ei chuh, a hneipa maih baichha aw ei ta; a hnei leipa cha a hnei chhôhpa chhao ama lapa aw.
27 Châhrasala he nâ dyuhtuhpazy ama abei châta na khoh leipazy he, a vaw chhi ula, ei hmiakô liata thie teh u,’ tahpa ta,” tah ta.
Zerusale liata a rôhnahpa ta â ngiana(Mt 21:1-11; Mk 11:1-11; Zh 12:12-19)
28 Cha hawhpa bie a rei khai nahta, Zerusale khih lâ pangaipa ta, hmia a sah ta.
29 Bethapha nata Bethani khih kiapâh, Ôli tlâh ama tahpa cha a tlô nahta, pachupazy hrytahpa pano tuah ta.
30 “Nâma dady khih liana haota vawh ula, cha liana chata namâ ngia tuana liata alâ taw bupa ahyhmah kia beih leina nama hmô aw; cha cha pathlâ ula, a vaw chhi teh u.
31 Chyhsa ahyrai ta, ‘Khazia nama pathlâ?’ tahpa ta ama cha hiahri khiahtala, he tana heta reih teh u, Abeipa ta a khoh,’ tahpa ta,” tah ta.
32 A tuapazy cha sie ei ta, a chhopa hawhna tlai chata kei hmô ei ta.
33 Alâ taw cha ama pathlâ hai nona chata, a hneituhpazy ta ama hnohta, “Alâ taw kha khazia nama pathlâ’.’” tah ei ta.
34 Âmo chata, “Abeipa ta a khoh,” tah ei ta.
35 Chatanachata Zisu lâta a vaw chhi ei ta, alâ taw chô liana chata ama pohzy phaw ei ta, a chô liata pakiasa ei ta.
37 Chatawhcha a tlô chyta Ôli Tlâh khô chy liana chata, pachupa zawpi zydua chata a hmo rôhnahpa a taopa zydua ama hmôpa vâta aly ei ta,
38 ao paro ngaitapa ta, “Abeipa moh ta, abei a vypa cha reithaipa ta y mawh sy! Avâ liata adyhna charei sala, chônôchaipa liana khita rôhnahna y mawh sy!” tahpa ta Khazohpa reithai ei ta.
39 Zawpi hryta Pharisaizy thokha ta a hnohta, “Pachutuhpa y, na pachupazy he ra teh,” tah ei ta.
40 Ano deikua chata, “Ei cha chho ei chuh, hezy he ama thlithlâh ha khiahtala alôzy chhâ heta ama awh awpa a châ,” tah ta a chhy ta.
Zisu ta Zerusale a chakheina
41 Chatawhcha a tlô chyta khih cha hmô ta, chakhei ta.
42 “Nâma tlaita atahmâ chhôh liana heta thlahlôh nawpa kyh he na pahno ta maw sala! Châhrasala atahmâ la na hmô lei nawpa ta a nyu ha tlôh ta.
43 Na chariahpazy ta cha padopa ta alei kuh tao aw ei ta, cha dô aw ei ta, a kâ lâ zydua cha dôkhâh aw ei ta,
44 na chô liata na sawnawhzy nâma chhaota alei liata cha taikhy aw ei ta, na chô liata alô pachopa rai pahlôh aw veih ei; ama cha chahryna nota na pahno leipa vâta cha hawhpa nohzy cha na chô liata a vaw tlô aw,” tahpa ta.
Achhyna-o pathaina(Mt 21:12-17; Mk 11:15-19; Zh 2:13-22)
45 Khazohpa achhyna-o liana chata a ngia ta, khâpaleipa a zuahtuhpazy cha papua ta,
46 ama hnohta, “‘Ei o cha thlahchhâna o a châ aw,’ tahpa ropa a châ, nâmo deikua chata phihmâhpazy lôpu ta tlao nama tao hih,” tah ta.
47 Nohchareih Khazohpa achhyna-o liana chata pachu tyh ta. Theihthaipa beizy nata vâtlâh hryta hyutuh viapazy ta ano pahleipadia a chhuah ei ta;
48 châhrasala chyhsazy ta phahnai khoh ngaitapa ta a bie ama nahthliepa vâta a taonazie awpa pahno thei tlôh veih ei.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||