Zisu leih-na (Mt 26:1-5,14-16; Mk 14:1-2. 10-11; Zh 11:45-53)
1 Viahchhâ Thinô pahlao leipa kyhchhi, Zawpakhô ama tahpa cha a hnia ha ta.
2 Theihthaipa abei nata Ryhpa pachutuhpazy chata ano ama thie thei nawpazie tlua ei ta; vâtlâh chi tlôh ei ta.
Zuda ta Zisu patusa awpa ta a paryhsa(Mt 26:14-16; Mk 14:10-11)
3 Chatawhcha pahrawhleinozy hry liata a hlaopa Zuda, lskari ama tahpa chhôh liana chata Sâtâ a ngia ta.
4 Chatanachata ano cha vawh ta, ama hnohta a patusa theina awpazie theihthaipa beizy nata hyutuhpazy cha a kei chhohia ta.
5 Âmo cha aly ngâsâ ei ta, a hnohta tâkâ pie awpa bie taih haw ei ta.
6 Ano chata a ryh tah ta, zawpi y lei nota patusana ryhpaona tlua ha ta.
Zisu nata a pachupazy Zawpakhô pati dôna(Mt 26:17-25; Mk 14:12-21; Zh 13:21-30)
7 Viahchhâ Thinô pahlao leipa kyhchhi noh, zawpakhô pati mietahkupa taw thina noh cha vaw tlô ha ta.
8 Chatanachata Zisu ta Pity nata Zawhana cha, “Zawpakhô pati ei nie awpa ta na kei chhuadyhpa teh u,” tahpa ta tuah ta.
9 Âmo chata a hnohta, “Khataih liata a chhuadyh ei sihla na khoh?” tah ei ta.
10 Ano chata ama hnohta, “Nahthlie teh u, khihpi liata namâ ngia nahta chapaw beih ta ti a pupa ta cha tyh aw ei ta; a ngiana o liana chata zi ula.
11 O hneituhpa hnohna chata, ‘Pachutuhpa ta ei pachupazy chhaota zawpakhô pati eima nie nawpa ta khichhai chhôhpadâhpa cha khataih liata e?’ a cha tah na, tah muh vy.
12 Chatanachata ano chata chhôhpadâhpa chô lâ tahpa a kawh ngaitapa ta chhuahdy chiehpa cha a cha pamosa aw ei; cha liana chata a chhuahdy muh vy,” tah ta.
13 Chatawhcha vawh ei ta, ama hnohta a reipa hawhna chata hmô ei ta; zawpakhô pati cha a chhuahdy haw ei ta.
Abeipa tlâhkhai paysana(Mt 26:26-30; Mk 14:22-26; 1 Kaw 11:23-26)
14 Chatawhcha nie a daih nata Zisu chata pati dôh ta, apôstôlzy chata dôhkhei hra ei ta.
15 Ama hnohta, “Hmo ei tao hlâta he zawpakhô pati he cha niekhei awpa ei ta ei kho ngâsâ;
16 ei cha chho ei chuh, he he Khazohpa Khihnarâh liata a hmeiseihpa a châ hlâ lei la nie heih khao aw va na,” tah ta.
17 Chatawhcha nyu la ta, alyna bie a rei khai nahta, “He he la ula, a rai teh u;
18 ei cha chho ei chuh, atahmâ rakha tawhta Khazohpa Khihnarâh a vaw tlô hlâ lei cha krezô patheipa ti he doh khao aw va na,” tah ta.
19 Viahchhâ la ta, alyna bie a rei khai nahta, ei chheih ta, ama hnohta pie ta, “He he ei pôhpa nama vyuhpa ta pie awpa cha a châ, eina pahno thlâh ha nawpa eichi ta, he he tao tyh teh u,” tah ta.
20 Chatawhcha zâ pati nie khai nahta cha hawhna hra chata nyu cha la ta, “He nyu he ei thisaih liata biehrai thiehpa cha a châ, nama vyuhpa ta a loh awpa chuh.
21 Châhrasala moh teh u, na patusatuh awpa ku cha ei hnohta tlâhkhai chô liata y tlôh ta.
22 Chyhsa Sawchapawpa he ama raopa hawhta a sie aw; châhrasala a patusatuh awpa chyhsa chô liana chata a hu a po na!” tah ta.
23 Âmo chata, “Eima hry liata cha hawhta hmo a tao awpa cha ahyma a châ tly?” tahpa ta âmosasyh ta a hiahri ei ta.
Rônahna thâtih a eichhiana
24 Chatawhcha ama hry liata ahyma rônah chaipa ta a rao tahna kyh liata a eina vaw pua ta.
25 Ano chata ama hnohta, “Zenitai sahlao abeizy cha ama chô liata a bei tyh ei ta; ama chô liata bie a hneituhpazy cha nô nata paw ama tah tyh.
26 Châhrasala nâmo la cha hawhta châ aw veih eichi; nama hry liata a rônah chaipa cha seihnai viapa hawhta tlao y sala, abei chaipa cha chakaotuhpa hawhta tlao y se.
27 Ahy e a rônah via, pati a dôhtuhpa ma chakaotuhpa? Pati a dôhtuhpa châ vei ma? Châhrasala kei la nama hry liata chakaotuhpa hawhta ei y hih.
28 Rietheina ei tyh chhôhta la nâmo na ypâtuhpa châ eichi ta;
29 chatanachata ei Khihnarâh liata ei tlâhkhai liata niepa ta nama bawh thei nawpa ta,
30 ei paw ta Khihnarâh eina raopa hawhta khihnarâh ei cha raopa ei, chatanachata Izarel pho hrawhleino ryureipa awpa ta abeidyuchhai liata namâ tyuh aw.
Pity a paphasai awpa chhochhieliena(Mt 26:31-35; Mk 14:27-31; Zh 13:36-38)
31 “Saimaw, Saimaw, Sâtâ ta sâh chaneipa hawhta a cha chanei thei nawpa ei ta, nâmo sahlao he a hiah mâ tâh,
32 châhrasala nâ ngiapâna a lei lei nawpa ta thlah ei cha chhâpa; na vaw heih heih tita nâma ta na unawhpazy pa-isa mah y,” tah ta.
33 Ano chata a hnohta, “Abeipa, na hnohta atâhna o liata nata thina liata chhao sie hrawpa ta ei mâ thlâh haw,” tah ta.
34 Chatawhcha ano chata, “Pity, ei cha chho chuh, eina pahnona liana chi ei thôh nâ papha hlâ lei la, atanoh he awh khoh aw vei,” tah ta.
Tâkâ byh, sahria nata zaozi
35 Ama hnohta, “Tâkâ byh leipa ta, sahria leipa ta, pheiky leipa ta ei cha tuah nona ei khata hmo rai namâ phahla ma?” tah ta. Âmo chata, “A phahla ma pi?” tah ei ta.
36 Ano chata ama hnohta, “Atahmâ deikua cha ahyrai tâkâ byh a hneipa ta cha phaoh se, sahria chhao. Ahyrai zaozi a hnei leipa ta cha poh zuah sala, chalei se.
37 Ei cha chho ei chuh, ‘Ano cha moleipa hry liata ama reipâ haw,’ tahpa ropa hawhna kha, ei chô liata a vaw tlô awpa a châ; ei chô kyh biezy kha paki khaipa ta y tlôh aw ta,” tah ta.
38 Âmo chata, “Abeipa, moh teh, zaozi miano a y,” tah ei ta. Ano chata ama hnohta, “Â daih na, “tah ta.
Sadô liata Zisu thlahchhâna(Mt 26:36-46; Mk 14:32-42)
39 Ano cha pua ta, a yzie tyhpa hawhta Ôli Tlâh lâna chata sie ha ta; pachupazy chhaota zi ei ta.
40 Chatawhcha a su cha a tlô nahta ama hnohta, “Reipasaona liata namâ ngia lei nawpa ta thlahchhâ teh u,’ tah ta.
41 Alô vaw phana rakha ta tlyma sie nano ta, a pakhu paneih ta, thlahchhâ ta,
42 “Ei Pâ, â ryh na tah khiahtala he nyu he ei tawhta pasie teh; châhrasala keima rei châ leipa ta, nâma reisai tlao châ se,” tah ta.
43 Chatawhcha avâ tawhta vâlyuhchâpa pakha tha patlô awpa ta a hnohta a vaw luah ta.
44 A pachârôh ngaita ta, phahnai khoh ngaitapa ta thlahchhâ ta; a mathlai di cha thisaih hawhta alei liata tla ta.
45 Chatawhcha thlah a chhâ khai nahta thyu ta, pachupazy lâna chata a vy ta, ama pachârôhpa vâta a môpa ta hmô ta.
46 Ama hnohta, “Khazia e namâ mô? Reipasaona liata namâ ngia lei nawpa ta thyu ula, thlahchhâ teh u,” tah ta.
Zisu patusana nata patuna(Mt 26:47-56; Mk 14:43-50; Zh 18:2-11)
47 Chatawhcha a rei hai nota, zawpi a vy ei ta, pahrawhleinopazy hry liata a hlaopa Zuda ama tahpa chata ama hmia a sahpa ta. Chatawhcha sy a chhuahpa ta Zisu vaw pangai ta;
48 châhrasala Zisu chata a hnohta, “Zuda, Chyhsa Sawchapawpa he sypa ta na patusa aw ma?” tah ta.
49 A kiapâh liata chyhsazy chata hmo a vaw tlô awpa cha ama pahno nata, “Abeipa, zaozi ta eima chhawh aw ma?” tah ei ta.
50 Ama hry liata ahy tlyma Theihthai Beichaipa sei cha chhawh ta, a nahkao chachâh lâ pathai ha ta.
51 Zisu ta, “He he a daih haw,” tah ta. A nahkao cha hria ta, patlâ haw ta.
52 Zisu ta a hnohta a vypa theihthaipa abeizy, Khazohpa achhyna-o hyutuhpazy nata machâzy hnohta chata, “Zaozizy, byuthôhzy chabahpa ta phihmâhpa patu awpa hawhta nama vaw pua ma?
53 Khazohpa achhyna-o liata nama hnohta nohchareih ei y nonazy khata, patu a chhuahpa ta na paza tlôh eichiva.Châhrasala atahmâ he nama hria theina daihti a châ na, zohna bie hneina chhao,” tah ta.
Pity ta Zisu a paphasaina(Mt 26:57-58, 69-75; Mk 14:53-54, 66-72; Zh 18:12-18, 25-27)
54 Chatawhcha patu ei ta, a chhi ei ta, Theihthai Beichaipa o liana chata a ngia haw ei ta. Pity ta lâ hla pi ta zi ta;
55 a dôhpachhôh tlyhmia liata mei patih ei ta, atyuh ei ta. Pity cha ama hry liata a tyuh hra ta.
56 Mei khaihpa liata â tyu nota laihsa ahy tlyma ta hmô ta, moh ta. “He chyhsa chhao he a hnohta a ypa kha a châ he,” tah ta.
57 Ano deikua chata, “Chanô, ano cha pahno va na,” tahpa ta a papha ta.
58 Ataviapa ta mo hropa ta vaw hmô heih ta, “Nâ chhao, ama hry-tahpa na châ he,” tah ta. Pity deikua chata, “Chyhsa, châ va na,” tah ta.
59 Chatawhcha dawh kha tawhna chata mo hropa ta, “He chyhsa chhao he a hnohta a ypa kha a châ tlai na; Kalili râh mo a châ mâ tâh,” khâchâ tah ta.
60 Pity ta, “Chyhsa, na bie reipa cha pahno va na,” tah ta. Chatawhcha sôkhata a rei hai nona tlai chata awh khoh pâ ha ta.
61 Abeipa cha a vaw heih ta, Pity cha moh ta, Pity chata Abeipa ta, “Atanoh he awh a khoh hlâta ei thôh einâ papha aw chi,” a hnohta a tahpa bie kha a thei ha ta,
62 Pity cha pua ta, thata cha ta.
Zisu taolapa ta ama tuna(Mt 26:67-68; Mk 14:66)
63 Zisu a patutuhpazy ta taola ei ta, tu ei ta;
64 a mo chahry ei ta, “Reih teh! Ahy châ tu?” tahpa ta hiahri tyh ei ta.
65 Chatawhcha bie hropa hluhpi ta reipachhiepa ta ra ei ta.
Zisu, ryureina hmiakô liata(Mt 26:59-66; Mk 14:55-64; Zh 18:19-24)
66 Chatawhcha khih pavâpa ta nahta vâtlâh machâ sahlao theihthaipa abeizy nata Ryhpa pachutuhpazy cha a pakhy ei ta; ama ryureina lâna cha a chhi ei ta,
67 “Mesia na châ tlai khiahtala maniah chho teh,” tah ei ta. Ano chata ama hnohta, “Cha chho hra aw ei sala, zo aw veih eichi;
68 cha hiahri hra aw ei sala a chhy aw veih eichi.
69 Châhrasala atahmâ tawhta la Chyhsa Sawchapawpa he Khazohpa hmotaotheina chachâh lâta a tyuh ha aw,” tah ta.
70 Ama zydua ta, “Nâ he, Khazohpa Sawchapawpa cha na châ ma?” tah ei ta. Ano chata ama hnohta, “Nâmo ta a châ, eina tah eichi,” tah ta.
71 Âmo chata, “Khâpa pahnona hropa ma eimâ ngiah khao aw? Keimo tlaita ano pakah ta eima thei ha mâ tâh,” tah ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||