Mietahkupa a leipa pakhona (Mt 18:10-14)
1 Chhiekheituhpazy nata moleipa zydua ta a bie thei awpa ta a kiapâh lâ vaw pangai ei ta.
2 Pharisaizy nata Ryhpa pachutuhpazy ta, “He chyhsa heta moleipazy a pahlao ta, ama hnohta pati a nie tyh hra,” tahpa ta paphôh ei ta.
3 Chatanachata ano ta ama hnohta, he pakhona bie he reih ta: “Nâmo hry liata ahyrai ta mietahkupa za kha hnei ula, ama hryta pôkha a pahlei hapa châ ula, râhpathohpa liata sychaki nata pô chaki cha siesaipa ta, a leipa cha a hmô heih hlâ lei, ahy e a tlua leipa a y aw eichi?
5 Chatawhcha a hmô heih nahta, aly ngaitapa ta a ngiatlâh liata a khaih tyh.
6 Chatawhcha o a tlôpa ta nahta a viasazy nata a vaihzy awpakhy ta, ama hnohta, ‘Nâ lykhei teh u, ei mietahkupa pahleipa kha ei hmô haw heih,’ a tah tyh.
7 Ei cha chho ei chuh, cha hawhna hra chata chyhsa siapa sychaki nata pachaki moleinazy ro awpa a hnei hlei leipazy hlâta cha, moleipa pakha a ropa chôta avâ liata alyna a y via aw.
Phusâ a leipa pakhona bie
8 “Chanô pakha ta tâkâ tlawhrawh hneipa ta, tlawkha a pahlei hawpa châ sala, meiôh raopa ta o phipa ta a hmô heih hlâ lei, ahy e pakhâta ta tlua leipa ta a y aw?
9 Chatawhcha a hmô heih nahta, a viasazy nata a vaihzy awpakhy ta„ ‘Nâ lykhei teh u, ei tâkâ pahleipa kha ei hmô haw heih na,’ a tah tyh.
10 Ei cha chho ei chuh, cha hawhna hra chata Khazohpa vâlyuhchâpazy hmiakô liana chata moleipa pakha ropa chô liata amâ ly tyh?” tah ta.
Sawchapaw a leipa pakhona bie
11 Chatawhcha Zisu ta reih lymâ ta: “Chyhsa ahy tlyma sawchapaw pano hnei ta;
12 a seihnai viapa chata a paw hnohta, ‘Ei pâ, ryu ei tovyu na pie teh,’ tah ta. Chatanachata a sôh cha ama hnohta pachhaih ta.
13 Noh rei leipa ta a sawchapaw seihnaipa chata a tovyuh zydua cha pakhy khai ta, râh hlapi lâ sie ha ta, cha liana chata phasa ngaitapa ta y ta, a sôh cha pahryu thlâhthli ta.
14 Chatawhcha a pahlei khaipa ta nahta, cha râh liana chata chakâhna thata vaw tlô ta, niepa a phahla haw ta.
15 Chatanachata cha râh chyhsa pakha hlao ta, cha chyhsa chata vao lao pie awpa ta a lyu lâ tuah ta.
16 Chatawhcha khâpa leipa hykua vao ta a niepazy chata a py a pabie khoh ngaita ta; ahyhmah ta khâpahmah pie tlôh lei khâh ei ta.
17 Chatawhcha a pachâ pasia nahta, ‘Ei pâ liata a hlaopazy a hluhpi y ei ta, chazy niepa chhao a daihpa ta a hnei thlâh bao nah ta, kei deikua cha he liata nodipa ta thi tlôh aw na ta!
18 Thyu aw na ta, ei pâ lâ sie aw na ta, a hnohta, “Ei pâ y, avâ liatahpa chô liata nata nâma mohmô ta hmo ei parao na;
19 na sawchapawpa ta bi tlâh châ khao va na; na hnohta a hlaopa pakha hawhta na tao hra teh,” ei tah aw,’ tah ta.
20 Chatanachata thyu ta, a paw lâ sie ha ta. Chatanachata lâhlapi ta a y nota a paw ta vaw hmô ta, ngiachhie ngaita ta, a râ ta, a pyhpahly ta, thata sy ta.
21 Chatawhcha a sawchapawpa ta a hnohta, ‘Ei pâ y, avâ liatahpa chôta nata nâma mohmô liata hmo ei parao na; na sawchapawpa ta bi tlâh châ khao va na,’ tah ta.
22 Châhrasala a paw chata a seizy hnohta, ‘Poh pha chaipa kha vaw cheih parah ula, vaw bu teh u; a ku liata kusadi paky ula, a phei liata pheikyzy paky teh u;
23 viahchao taw thawh ngaitapa kha vaw la ula, thie teh u, thapha ngaitapa ta nie ei suh u;
24 he ei sawchapawpa he thi ta, a vaw hroh haw heih hih; lei ta eima hmô haw heih hih,’ tah ta. Chatanachata thapha ngaitapa ta y pathao haw ei ta.
25 “Chatawhcha a sawchapaw uhtheipa cha lyu liata y ta; o a vaw tlô chyta khâpa leipa topa pyu nata lapa pyu thei ta.
26 Chatanachata sei pakha aw ta, ‘Cha cha khâpa maw?’ tahpa ta hiahri ta.
27 Sei chata a hnohta, ‘Na nawhta a vaw di ta, a bohpa ta a hmô heihpa vâta, na paw ta viahchao taw thawhpa kha a thie,’ tah ta.
28 Chatawhcha a pathi-ia ta, a ngia khoh leipa ta. A paw vaw pua ta, reipasao ta,
29 châhrasala ano chata a paw hnohta, ‘Pachâ teh, chati-kôsy he cha pasa na ta, na rei a ngiah leipa ta y beih tlôh leipa na ta; ei viasazy chhaota alyna ei tao nawpa ta mie taw ta chhao na pie beih leipa chi ta.
30 Châhrasala he na sawchapawpa sihryhpazy liata na sôh a nie khaituhpa he a vaw dipa ta nahta, ano chata viahchao taw thawhpa kha zua thie chi ta!’ tah ta a chhy ta.
31 Chatawhcha ano chata a hnohta, ‘Ei sawchapawpa y, nâ cha ei hnohta a y kôzawpa châ chi ta, ei hneipa zydua he nâma eih a châ.
32 Thapha ngaitapa nata aly ngaitapa ta y awpa raina a châ, he na nawhta he thi ta, vaw hroh ha heih ta; lei ta, eima hmô ha heihpa châ tlôh ta,’ tahpa ta,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||