Mohôhtuhpa ngâchhih leipa pakhona bie
1 Zisu ta a pachupazy hnohta he bie chhao he reih ta, “Chyhsa hneirôhpa ahy tlyma sôh mokhâhtuhpa hnei ta, cha chyhsa chata a sôh a pahryuh thlâhthlipa kyh liata a hnohta vaw leih ei ta.
2 Chatanachata ano chata ano cha aw ta, a hnohta, ‘Na chô liata bie ei theipa he kheihtazie ta a châ? Sôh na mokhâhpa thâtih na ropa khai teh, atahmâ tawhta sôh mokhâhtuhpa ta châ thei khao aw va chi,’ tah ta.
3 Chatawhcha sôh mokhâhtuhpa chata a palôhrupa ta, “Ei zibeipa ta sôh ei mokhâhpa eina pabâ awpa he, kheihta ei tao aw? Alei palie thei tlôh lei khâh na ta, kudaopa hra cha ei no za tlôh ta.
4 Sôh mokhâhtuhpa eina pabâ tita ama o liata eina paysa nawpa ta a taonazie awpa ei pahno haw,’ tah ta.
5 Chatanachata a zibeipa sôh a bâhtuhpazy cha aw chyu ta, a hmiatuapa hnohna chata, ‘Ei zibeipa liata khazie nâ bâh?’ tah ta.
6 Ano chata, ‘Sathaw panuana za kha,’ tah ta. Chatawhcha ano chata a hnohta, ‘Nâ cha la la, atyu parah la, sypangawh roh teh,’ tah ta.
7 Chatawhcha mo hropa hnohta, ‘Nâma khazie e nâ bâh?’ tah ta. Ano chata, ‘Sâh panuana za kha,’ tah ta. Ano chata a hnohta, ‘Nâ cha la la, sycharu roh teh,’ tah ta.
8 Chatawhcha a zibeipa chata sôh mokhâhtuhpa sia leipa cha a ryhna a pahnopa vâta reithai haw ta; khaihpa sawzy hlâta he khizaw sawzy he atahmâhlâ kyh liana heta tlao ama so via.
9 Ei cha chho ei chuh, khizaw sôh ta nama châta viasazy tao teh u, sôh a leidia tita chhâzaw yna liana chata a cha paysa thei nawpa ei ta.
10 “Ahyrai a chyhta chôta ngâchhihpa cha a hluhpi chôta chhao ngâ â chhih tyh; ahyrai a chyhta chôta ngâchhih leipa cha a hluhpi chôta chhao ngâchhih leipa a châ tyh.
11 Khizaw sôh chôta hmahta ngâ namâ chhih vei khiahta cha, ahyma sôh hmeiseihpa cha cha pavaisa aw ei?
12 Chyhsa hropa ei chôta hmahta ngâ namâ chhih vei khiahta cha, nâmo ei cha ahy e cha pie aw ei?
13 Chakaotuhpa ahyhmah ta hyutuhpa pano chakao pabaoh thei vei; pakha a haopa ta, pakha a khoh aw, cha vei khiahta pakha a châkheipa ta, pakha a mohnao aw, Khazohpa nata hneirôna chakao pabaoh thei veih eichi,” tah ta.
Ryhpa nata Khazohpa Khihnarâh(Mt 11:12-13; 5:31-32; Mk 10:11-12)
14 Pharisaizy tâkâ tlaichhaipa chata cha biezy cha ama thei nahta pahneisao ei ta.
15 Chatanachata ano chata ama hnohta, “Chyhsa mohmô ta a pasiapa dei châ eichi ta, châhrasala Khazohpa ta nama palôhrupa pahno tlôh ta, chyhsa hryta ama palyupalihpa cha Khazohpa mohmô ta pasichhih ngaitapa châ tlôh ta.
16 “Ryhpa nata hrohsopazy bie cha Zawhana vaw yna taih khata y ta; cha rakha tawhna chata Khazohpa Khihnarâh Thâtihpha he chho ei ta, chyhsa to thachahra ta a ngiah chyu ei ta.
17 Châhrasala ryhpa bie dikarita a lei awpa hlâta, avâ nata alei leidiapa a nao via na.
Nôvah a chhaihna kyh liata Zisu pachuna bie(Mt 19:1-12; Mk 10:1-12)
18 “Ahyrai lahpinô ma ta, lahpinô hropa a hneipa maih a pheipa a châ, ahyrai chyhsa lahpinô mapa a hneipa maih a pheipa a châ.
Hneirôhpa nata Lazara
19 Chyhsa hneirôhpa ahy tlyma a y, poh saih-lawpa nata poh rih di ngaitapa a bu ta, nohcharei phasa ngaitapa ta a y tyh.
20 Chyhsa pakha a moh Lazara kudaopa hmah ta a biepa, hneirôhpa ochhi kiapâh liata pazia tyh ei ta,
21 chyhsa hneirôhpa tlâhkhai a tlaopa cha nie khoh ta; izy ta a hmahzy palie pa tyh ei ta.
22 Chatawhcha kudaopa cha thi ta, vâlyuhchâpazy ta siekhei ei ta, Abaraha chachâh lâta soh ei ta. Chyhsa hneirôhpa chhao cha thi ta, pabupa ta y ta;
23 athihpa khih liana chata, pasa ngaitapa taopa ta y ta, mohmia kaw pasaih ta, lâhlapi ta Abaraha chachâh lâta Lazara a ypa cha hmô ta.
24 Chatawhcha aw ta, ‘Ei paw Abaraha y, na ngiachhie la, Lazara kha vaw tuah teh, a kudy pawhmao ti liata ny sala ei palei chakuasa nawpa ta; he mei paleih liana heta ei pasa ngaita,’ tah ta.
25 Châhrasala Abaraha ta, ‘Ei sawchapawpa y, nâma cha na hro chhôhna khata hmophapa to chi ta, cha hawhna hra chata Lazara ta hmopha leipa a topa kha pahno châh chi; châhrasala atahmâ ano cha he liata thlahlôh ngaitapa ta y ta, nâ cha pasa na tao khâ.
26 He leipa chhao he, he tawhta nâmo lâta sie a chhuahpazy cha ama sie thei lei nawpa nata ahyhmah kha tawhta keimo lâta amâ vy thei lei nawpa ta, keimo nata nâmo likawh liana heta leichiepa kawh ngaitapa taopa a châ,’ tah ta.
27 Ano chata, ‘Cha khiahtala, ei paw y, ano cha ei pâ o lâ pasiesa awpa chhâ ta ei châ haw,
28 pilâhpa chapaw papangawh hnei tlôh na ta, he pasapa yna liana heta amâ vy pathlei hra aw na, phahnai khoh ngaitapa ta chho tua se,’ tah ta.
29 Abaraha deikua chata, ‘Mawsi nata hrohsopazy ama hnei mâ tâh; chazy bie cha nahthlie ei se,’ tah ta.
30 Ano chata, ‘Ei paw Abaraha y, cha cha a daih vei, athihpa hrytahpa tlai ama hnohta tlao vawh sala ama ro aw,’ tah ta.
31 Abaraha chata ama hnohta, Mawsi nata hrohsopazy bie ama nahthlie vei khiahtala, athihpa hry tahpa thyu hra sala zo hlei aw veih ei,’ tahpa ta,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | ||||