Maluh Reina Bo 36

Maluh Reina Bo 36

Ryutotuhpa chanô dyhchâna ryhpa bie

1 Zawsi chhôhkhapazy hry liatahpa Manase sawchapawpa, Makhia sawchapawpa Kilia pathlazy chhôhkha pawhrâhpazy hry liatahpazy chata a vaw hnia ei ta, Mawsi nata hyutuhpa Izarel pathla pawhrâhpazy hmiakô liana chata bie reih ei ta; 

2 ABEIPA chata eima mahpaw cha Izarel pathlazy cha pachaopa ta ama to awpa râh pie awpa ta bie pie ta; ABEIPA ta eima mahpaw cha eima unawhpa Zelôpheha to awpa cha a sawchanôzy pie awpa ta bie pie ta. 

3 Âmo chata Izarel pathlazy hry liatahpa pho hropa ahy sawzy rai hnei sala, eima mahpawzy râh ama topa cha la pâpa ta ama kei hlaonazy pho râh liata bai awpa châ aw ta; cha hawhna chata eima râh tovyuh tawhtapa cha papuapa vaw châ aw ta. 

4 Izarel pathlazy zubili a vaw tlô tita ama râh cha ama kei hlaona awpazy maih pho râh liata baipa châ aw ta; eima mahpawzy pho râh tawhtapa cha ama râh pahryupa vaw châ aw ta,” tah ei ta.

5 Mawsi chata ABEIPA bie hawhta Izarel pathlazy cha bie pie ta, “Zawsi sawchapawpazy pho heta ama reipa â do na. 

6 Zelôpheha sawchanôzy kyh liata ABEIPA ta bie a piepa cha he hawhna heta a châ, ‘A pha ama tahpa maih hnei ei sala; anodeikuacha ama pawzy phopi hry liatahpa tlai ama hnei awpa a châ,’ tahpa ta. 

7 Izarel pathlazy râh cha pho hropa tawhta pho hropa lâta pasie ngâpa châ aw vei; Izarel pathlazy chata ama mahpawzy pho râh cha ama to lymâ awpa a châ. 

8 Izarel pathlazy hry liata ryutotuh awpa sawchanô maih cha Izarel pathlazy ta ama mahpawzy râh ama to chyu lymâ thei nawpa ta a paw phopi hry liatahpa tlai lahpinô a châ awpa a châ. 

9 Chatanachata râh cha pho hropa pho hropa lâta pasie ngâpa châ aw vei; Izarel pathlazy chata âmo râh chyu cha ama to lymâ awpa châ tlôh ta,” tahpa ta 

10 ABEIPA ta Mawsi bie a piepa hawh tlaita, Zelôpheha sawchanôzy chata tao ei ta; 

11 Zelôpheha sawchanô Mahlah zy, Tirzah zy, Hôklah zy, Milka zy, Naw zy chata ama paw unawhpa sawchapawpazy ama hnei. 

12 Zawsi sawchapawpa Manase sawchapawpazy hnei ei ta, ama ryutona cha ama paw pho liana chata a y thlâh haw.

13 Hezy he ABEIPA ta Mawsi hmâpa ta Zerikô dady Zawdâh haosâ Môaba bypi liata Izarel pathlazy a piepa biepiepazy nata pachiana ryhpazy cha a châ. 

Maluh Reina (Numbers)

 

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36

Maluh Reina Bo 35

Maluh Reina Bo 35

Livai sahlao khihpizy

1 Zerikô dady Zawdâh kiapâh Môaba bypi liana chata ABEIPA ta Mawsi chho ta, 

2 Izarel pathlazy bie pie la, ama râhzy liana chata Livai sahlao pahrâna awpa khihzy taopa mawh sy; sahroh pabâsa nawpa ta khih opâhzy Livai sahlao na pie awpa a châ.

3 Khihzy cha ama pahrâna awpa châ aw ta, a opâhzy cha ama viahchao nata ama sahroh, ama pasapa zydua châta a châ aw. 

4 Opâh Livai mo pie awpa cha khihpi kuh tawhta dy sâh kha a kawhpa ta a châ awpa a châ.

5 Kuh khôtho lâ tawhta thlie aw chi ta, nochhi lâchhâh ta dy sâh no, chho lâchhâh ta dy sâh no, notla lâchhâh ta dy sâh no, maw lâchhâh ta dy sâh no, a liah liata khih a ypa ta; he he âmo opâh eihpa a châ aw.

6 Livai mo na pie awpa khihzy cha lianyh a cheihpazy râ nawpa ta a râna khih miacharu châ aw ta, chazy leipa cha khih sypalih nata khih no na pie hra awpa a châ. 

7 Livai mo na pie awpa khih zydua cha khih sypalih nata khih charie a châ aw, opâh chhaota na pie awpa a châ. 

8 Izarel pathlazy topa khih na pienazie awpa cha a hluh viapa tawhta a hluh via pie aw chi ta, a chyh viapa tawhta a chyh via pie aw chi ta, chyhsa tota ama topa râh hluhnazie ta a khih cha Livai mo a pie awpa a châ,” tahpa ta.

Abohna khihpizy

9 ABEIPA ta Mawsi chho ta,

10 Izarel pathlazy chho la, ama hnohta, Zawdâh chakapa ta Kana râh namâ ngia tita cha, 

11 abohna khih awpa khihzy nama châta nama rao awpa a châ, lianycheih pathleituhpa a râ nawpa ta. 

12 Cha khihzy cha phuh a latuhpa tawhtapa namâ bohna a châ aw, pôhpakhypa hmiakô liata ryureipa awpa ta â dua hlâta liany a cheihtuhpa cha a thi lei nawpa ta.

13 Nama châta abohna awpa khih nama raopazy cha khih miacharu a châ aw.

14 Zawdâh haosâ lâ khih thôh rao aw eichi ta, Kana râh lâta khih thôh rao aw eichi ta, abohna khihzy a châ aw. 

15 Izarel pathlazy nata pho hropa nata ama hnohta a pahrâpazy châta he khih charu he abohna a châ aw, cha liana chata ahyrai chyhsa a thie pathleipa maihta amâ râ aw.

16 Anodeikuacha thua hmâpa ta chyhsa a thie khiahtala lianycheihpa châ ta, lianyh a cheihpa cha thi thlyu awpa a châ. 

17 Thina taihta alô ta chyhsa a chôpa ta a thie khiahtala, lianycheihpa châ ta; liany a cheihpa cha thi thlyu awpa a châ. 

18 Thina taihta chyhsa tho ta tupa ta a thi khiahtala, lianycheihpa châ ta; liany a cheihpa cha thi thlyu awpa a châ. 

19 Thisaih phuh a latuhpa chata liany a cheihtuhpa cha a thi pâ aw; â tyh thithaw ta a thi awpa a châ. 

20 Chyhsa a haopa vâta a chati tlyma, a byhkhâhpa ta a vawh tlyma, a thie tlyma, 

21 â haona vâta a chô sao tlyma, a châ khiahtala, a thietuhpa cha thi thlyu awpa a châ; lianycheihpa a châ; thisaih phuh a latuhpa chata a thietuhpa cha â tyh thithaw ta a thie awpa a châ.

22 Anodeikuacha a haona vâta châ hlei leipa ta sôkha ta a chati tlamawpa tlyma, chatawhcha a byh cheingei leipa ta chyhsa ama y tahpa chhao pahno leipa ta, 

23 a khakhaipa chhao châ leipa ta hmo peipa hriapa a chhuah hlei leipa ta alô tlyma ta vawhpa ta chyhsa a vaw thie haw khiahtala; 

24 pôhpakhypa sahlao ta, he pachiana yzie hawhna heta a thietuhpa nata thisaih phuh a latuhpa cha ama pachiapa awpa a châ; 25 pôhpakhypa sahlao chata liany a cheihtuhpa cha thisaih phuh a latuhpa tawhtapa cha paboh aw ei ta, pôhpakhypa sahlao chata a râna abohna khih liana chata paysa heih aw ei ta, sathaw pathaihpa ta thupa theihthaipa abei a thi hlâ lei cha cha liana chata a y awpa a châ.

26 Anodeikuacha khati no rai ta lianycheihtuhpa chata a râna abohna khih râhri khôtho lâta siepa ta, 

27 thisaih phuh a latuhpa ta abohna khih khôtho lâ hmôpa ta, thisaih phuh a latuhpa ta a thie khiahtala thisaih liana chata thai lei châ aw vei. 

28 Theihthaipa abei a thi hlô leita cha abohna khih liata a y thlâh ha awpa a châpa vâta; theihthaipa abei a thi tawhta deikua cha liany a cheihtuhpa cha a yna râh lâta a di heih awpa a châ.

Pahnotuhpazy nata chatlaina ryhpa bie

29 He hmozy he nama pathlazy taihta nama yna maih liata nama pachianazie awpa a châ aw. 

30 Ahyrai ta chyhsa a thie khiahtala, lianycheihtuhpa cha pahnotuhpazy pakah tawhta bie a puapa ta thie awpa a châ; anodeikuacha pahnotuhpa pakha cha chyhsa thina awpa ta a daih vei. 

31 Lianycheihtuhpa cha nama chatlai awpa châ vei, thina taihta thai lei a châpa châ ta; thi thlyu awpa tlao a châ. 

32 Theihthaipa thi hlâta cha abohna khih lâta a râpa, a râh liata a y heih awpa ta chatlaina cha nama la awpa châ vei. 

33 Nama yna râh cha papuapaleipa aw eichi ta; thisaih chata râh cha papuapaleipa ta, thisaih palona râh papuapaleipa pathai nawpa ta a palotuhpa thisaih dei leipa ta cha hmâh theipa châ tlôh lei khâh ta, 

34 nama yna râh ei yna he nama papuapalei awpa châ vei, kei ABEIPA cha Izarel pathlazy hry liata y tlôh na ta, tah teh,” tahpa ta. 

Maluh Reina (Numbers)

 

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36

Maluh Reina Bo 34

Maluh Reina Bo 34

1 ABEIPA ta Mawsi chho ta,

2 Izarel pathlazy cha bie pie la, ama hnohta, Kana râh nama tlô tita, (Kana râh a râhri yzie lymâ hawhta nama pahrâ awpa râh cha), 

3 chho lâta nama pahrâ awpa rakha cha Zin râhpathohpa tawhta Edôma râh a ri lymâpa châ aw ta, chho lâ râhri cha Tilaipi Iapa chhâna tawhta nochhi lâchhâh a châ aw;

4 nama râhri cha Akarabi kiana chho lâchhâh ta pakoh aw ta, Zin liata sie palâh aw ta, a vaw puana cha Kadesabania chho lâta a châ aw; Hazarady lâta sie aw ta, Azmaw lâta a sie lymâ aw; 

5 râhri cha Azmaw tawhta Izi vatie taihta pakoh aw ta, a puana cha tilaipi liata a châ aw.

6 Notla lâchhâh ta Tilaipi Kawhpa cha râhri châta to aw chi ta; he he notla lâta nama râhri a châ aw.

7 He he maw lâta nama râhri a châ aw, Tilaipi Kawhpa tawhta Hawra Tlâh pahlypa ta tao aw chi ta; 

8 Hawra Tlâh tawhta Hama a ngiana taihta tao aw chi ta, râhri puana cha Zeda liata châ aw ta; 

9 râhri cha Zipraw lâta sie lymâ aw ta, a puana cha Hazarena liata a châ aw; he he maw lâta nama râhri a châ aw.

10 Nochhi lâta nama râhri cha Hazarena tawhta Shepha taihta tao aw chi ta; 

11 râhri cha Shepha tawhta Riblah taihta Aina chho lâchhâh ta zu aw ta; chatanachata râhri cha zu lymâ aw ta, Chinanere tilaipi nochhi lâchhâh ta a dy aw; 

12 râhri cha Zawdâh liata zu aw ta, a puana cha Tilaipi Iapa liata a châ aw. He he a chheipâh liata râhri sienazie hawhta nama râh a châ aw, tah teh,” tahpa ta.

13 Mawsi ta Izarel pathlazy cha bie pie ta, “He he ABEIPA ta pho chaki nata a khophiezy pie awpa ta bie a piepa pachaopa ta nama to awpa râh a châ; 

14 Rubena pathlazy pho ta ama chhôhkha yzie lymâ nata Kada pathlazy pho ta ama chhôhkha yzie lymâ nata Manase pho khophie chhaota, ama râh to awpa cha to haw tlôh ei ta; 

15 pho no nata pho khophiezy chata ama râh to awpa cha nohchhina lâ Zerikô dady Zawdâh haosâ nochhi lâta to haw ei ta,” tahpa ta.

16 ABEIPA ta Mawsi chho ta, 

17 to awpa ta râh a pachhaih kheituhpazy moh cha hezy he a châ: theihthaipa Eliaza nata Nuna sawchapawpa Zawsua zy he. 

18 Râh to awpa a pachhaihtuhpa châta pho to hry liata pawhrâhpa pakha chyu nâ tlyh awpa a châ. 

19 Cha chyhsa moh cha hezy he a châ; Zudah pho liatahpa Zephune sawchapawpa Kaleba. 

20 Simeona pathlazy pho liatahpa Amihu sawchapawpa Shemuel. 

21 Benzami pho liatahpa Kislawna sawchapawpa Eliadah.

22 Dana pathlazy pho hry liata pawhrâhpa Zôkli sawchapawpa Buki. 

23 Zawsi pathlazy hry liatahpa: Manase pathlazy pho pawhrâhpa Ephoda sawchapawpa Hananiel. 24 Ephrai pathlazy pho hry liata pawhrâhpa Siphata sawchapawpa Kemuel. 

25 Zebulawna pathlazy pho hry liata pawhrâhpa Parana sawchapawpa Elisapha. 

26 Iskara pathlazy pho hry liata pawhrâhpa Azana sawchapawpa Paltiel. 

27 Asera pathlazy pho hry liata pawhrâhpa Shelomi sawchapawpa Ahihu. 

28 Nathalai pathlazy pho hry liata pawhrâhpa Amihu sawchapawpa Pedahel. 

29 He sahlao he Kana râh liata Izarel pathla râh to awpa pachhaih awpa ta ABEIPA ta bie a piepazy cha ama châ,” tahpa ta. 

Maluh Reina (Numbers)

 

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36

Maluh Reina Bo 33

Maluh Reina Bo 33

Izarel sahlao khi tlynazie

1 Mawsi nata Arawna chhihthapa ta, Izi râh tawhtapa, a hlao a hlao ta puapa ta, ama sie lymâna zie cha he hawhna heta a châ. 

2 ABEIPA biepiepa ta puapa ta, ama sie lymâna zie cha Mawsi ta roh ta; puapa ta ama sienazy cha hezy liana heta a châ. 

3 Thla khana noh hrawhleipangawh noh ta, Ramese tawhta pua ei ta; zawpakhô noh mylâ chata Izi mo zydua mohmô liata, 

4 Izi mozy ta ama saw tuapa zydua ABEIPA ta a thiepa ama pabu nota Izarel pathlazy cha rôhnahpa ta pua ei ta; ABEIPA ta ama khazohzy chhao hrie ta.

5 Izarel pathlazy cha Ramese tawhta pua ei ta, Sukô liata a rie ei ta. 

6 Sukô tawhta pua ei ta, râhpathohpa ty tuapa liata Ethama liata a rie ei ta. 

7 Ethama tawhna chata pua ei ta, Baalzephô kiapâh liata Pihahirô lâta kua heih ei ta, Mikadô kiapâh liata a rie ei ta. 

8 Hahirô kiapâh tawhtapa cha pua ei ta, tilaipi liahliata sie palâh ei ta, râhpathohpa liata a ngia ei ta, Ethama râhpathohpa liata noh thôh siena sie ei ta, Marah liata a rie ei ta. 

9 Marah tawhta pua ei ta, Elima tlô ei ta; Elima liana chata tihnawh miahrawhleino nata thiahra kô sysari y ta, cha liana chata a rie ei ta. 

10 Elima tawhna chata pua ei ta, Tilaipi Saihpa kiapâh liata a rie ei ta. 

11 Tilaipi Saihpa tawhna chata pua ei ta, Sin râhpathohpa liata a rie ei ta. 

12 Sin râhpathohpa tawhna chata pua ei ta, Dôpaka liata a rie ei ta. 

13 Dôpaka tawhna chata pua ei ta Alusa liata a rie ei ta. 

14 Alusa tawhna chata pua ei ta, Rephidi liata a rie ei ta, cha liana chata zawpizy do awpa ti y leipa ta.

15 Rephidi tawhna chata pua ei ta, Sinai râhpathohpa liata a rie ei ta. 

16 Sinai râhpathohpa tawhna chata pua ei ta, Kibrôhatavah liata a rie ei ta. 

17 Kibrôhatavah tawhna chata pua ei ta, Hazeraw liata a rie ei ta. 

18 Hezeraw tawhna chata pua ei ta, Rithama liata a rie ei ta. 

19 Rithama tawhna chata pua ei ta, Rimôpere liata a rie ei ta. 

20 Rimôpera tawhna chata pua ei ta Libnah liata a rie ei ta. 

21 Libnah tawhna chata pua ei ta, Risa liata a rie ei ta. 

22 Risa tawhna chata pua ei ta, Kehelathah liata a rie ei ta. 

23 Kehehathah tawhna chata pua ei ta, Shepha Tlâh liata a rie ei ta. 

24 Shepha Tlâh tawhna chata pua ei ta, Haradah liata a rie ei ta. 

25 Haradah tawhna chata pua ei ta, Makhelô liata a rie ei ta. Makhelô tawhna chata pua ei ta, Taha liata a rie ei ta. 

27 Taha tawhna chata pua ei ta, Terah liata a rie ei ta. 

28 Terah tawhna chata pua ei ta, Mithaka liata a rie ei ta. 

29 Mithaka tawhna chata pua ei ta, Hasmona liata; a rie ei ta. 

30 Hasmona tawhna chata pua ei ta, Môserô liata a rie ei ta. 

31 Môserô tawhna chata pua ei ta, Benezaka liata a rie ei ta, Benezaka tawhna chata pua ei ta, Hôhakika liata a rie ei ta. 

33 Hôhakika tawhna chata pua ei ta, Zôbathah liata a rie ei ta. 

34 Zôbathah tawhna chata pua ei ta, Abrônah liata a rie ei ta. 

35 Abrônah tawhna chata pua ei ta, Eziôkeba liata a rie ei ta. 

36 Eziôkeba tawhna chata pua ei ta, Zin râhpathohpa liata a rie ei ta, (cha cha Kadesa ama tah hra). 

37 Kadesa tawhna chata pua ei ta, Edôma râh a daih lâ, Hawra Tlâh liata a rie ei ta.

38 Theihthaipa Arawna cha ABEIPA biepiepa ta Hawra Tlâh liana chata kiah ta, Izarel pathlazy Izi râh tawhtapa ama vaw puana kô sypalih kô, thla pangawhna noh kha noh ta, cha liana chata a thi. 

39 Arawna cha Hawra Tlâh liata a thi nona chata kô za kha nata kô syno nata kô thôh a châ.

40 Kana chyhsa, Kana râh liata Neke lâta a ypa Arada abeipa chata Izarel pathlazy amâ vypa cha vaw thei ta.

41 Hawra Tlâh tawhna chata pua ei ta, Zalmonah liata a rie ei ta. 

42 Zalmonah tawhna chata pua ei ta, Punô liata a rie ei ta. 

43 Puno tawhna chata pua ei ta, Ôbo liata a ri ei ta. 

44 Obo tawna chata pua ei ta, Moabô râh daih lâ, Iziabari liata a rie ei ta. 

45 Ima tawhta pua ei ta, Dibônkada liata a rie ei ta. 

46 Dibônkada tawhta pua ei ta, Almawdiblaithai liata a rie ei ta. 

47 Nebô kiapâh liata Abari Tlâh liata a rie ei ta. 

48 Abari tlâh tawhna chata pua ei ta, Zawdâh kiah Zerikô dady, Môaba bypi liata a rie ei ta. 

49 Zawdâh kiah Bezeshimô tawhta Abelsiti taihta Môaba bypi liata yna su paryh ei ta.

Kana râh râhri nata pachhaihnazie

50 Zerikô dady Zawdâh kiapâh ta Môaba bypi liana chata ABEIPA ta Mawsi chho ta, 

51 “Izarel pathlazy cha chho la, ama hnohta, Zawda chakapa ta Kana râh namâ ngia tita, 

52 cha râh liata a ypa zydua cha papua khai aw eichi ta, ama alô nohthlapa zydua zy cha parao khai aw eichi ta, ama nohthlapa leihpazy cha parao khai aw eichi ta, ama su a sâhpa zy chhao nama parao khai awpa a châ;

53 a râh cha pahrâ aw eichi ta, cha liana chata nama y aw, nama pahrâ awpa ta râh cha ei cha pie haw ei.

54 A chi yzie lymâ hawhta pachaopa ta râh cha to aw eichi ta; a hluh viapazy cha râh kawh viapa pie aw eichi ta; a hluh a leipa zy cha râh buah viapa nama pie aw; pachaopa ta a tluna maihta, ama tovyuh châ aw ta, nama mahpawzy chi sienazie lymâ hawhta nama to awpa a châ. 

55 Anodeikuacha cha râh liata a ypazy cha nama papua leipa khiahtala, nama paysapazy cha nama mo châta a chhôtuhpa nata sapa châta zy a hloh hawhta châ aw ei ta, nama pahrâna râh liana chata nama nô a cha papo aw ei. 

56 Ama chô liata tao awpa ta ei pachâpa cha, nama chô liata ei tao aw, tah teh,” tahpa ta. 

Maluh Reina (Numbers)

 

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36

Maluh Reina Bo 32

Maluh Reina Bo 32

Rubena, Kada nata Manase pho khophie Zawdâh nochhi lâ ama pahrâ (Rc 3:12-22)

1 Rubena nata Kada pathlazy chata sahroh hnei ngaita ei ta; Zaza râh nata Kilia râh ama hmô nahta, a su cha sahroh châta su pha ngaitapa châpa ta pahno ei ta. 

2 Kada pathlazy nata Rubena pathlazy chata Mawsi nata theihthaipa Eliaza nata pôhpakhypa sahlao pawhrâhpazy cha bie chho ei ta, 

3 “Izarel pôhpakhypa sahlao hmiakô liata ABEIPA ta a panawhpa râh, Atarô zy, Dibô zy, Zaza zy, Nimrah zy, Hesbaw zy, Eliale zy, Seba zy, Nebô zy, Biôna zy cha 

4 sahroh châta a pha ngaitapa râh châ ta; na chakaotuhpazy heta sahroh hnei pi ta, 

5 â ryh na tah khiahtala he râh he eima pahrâ awpa ta maniah pie la, Zawdâh maniah chakâhsa leipa ta,” tah ei ta.

6 Mawsi chata Kada pathlazy nata Rubena pathlazy hnohta, “Nama unawhpazy cha adyuhna lâta sie aw ei ta. Nâmo cha he liana heta nama vaw y thlâh ha aw mâ? 

7 Khazia e ABEIPA ta a piepa râh liata a ngia lei awpa ta Izarel pathlazy palôhrupa riah nama pachhie aw?

8 Kadesabania tawhta râh a kei mohparu awpa ta ei tua nona khata he hawhna heta nama mahpawzy chata tao ei ta. 

9 Eskawl saikao ama kaw tlô nona khata râh cha hmô ei ta, ABEIPA ta râh a piepa liana chata amâ ngia lei nawpa ta Izarel pathlazy palôhrupa riah pachhie ei ta. 

10 Cha noh liana chata ABEIPA pathi-ia ta, 

11 Izi râh tawhta a vaw puapa, kô syno tawhta a chô lâta chyhsa rai chata Abaraha zy, Aisika zy, Zakaw zy hnohta chhiesakhâhpa ta ei piepa râh cha ahyhmah ta hmô aw veih ei, eina zi hmeihseih leipa vâta; 

12 Keni chyhsa Zephuna sawchapawpa Kaleba nata Nuna sawchapawpa Zawsua zy dei leipa ta cha, âmo chata ABEIPA cha ama zi hmeihseihpa vâta,’ tahpa ta chhie sakhâh ta. 

13 Izarel sahlaozy chô liata ABEIPA pathi cha ia ta, ABEIPA mohmô liata hmo pha leipa a taotuhpa chhâ zydua ama leidia khai hlâ lei cha râhpathohpa liata kô sypalih paviavisa ta.

14 Izarelzy chô liata ABEIPA pathi-iana chichhih ngaitapa baichhapa ta nâmo chhâ moleipa heta nama mahpawzy â thla haw eichi ta! 

15 ABEIPA zi leipa ta nama y khiahtala, âmo sahlao he râhpathohpa liata paysa heih aw ta, he chyhsa zydua he nama pahleipadia aw mâh tâh,” tah ta.

16 A kei hnia ei ta, a hnohta, “He liana heta eima sahroh châta mietahkupa sahdôzy nata eima sawnawhzy châta khihzy tao aw pi ta, 

17 keimo deikua cha eima su awpa eima tlô hlâ lei ta Izarel pathlazy hmiakô liata sie lymâ awpa ta chariah chhaichhi eimâ tobi aw na; he râh liata chyhsazy vâna heta eima sawnawhzy cha kuhdôhpa khihzy liata y aw ei ta. 

18 Izarel pathla chyhsa tota, ama to awpa ama to chyu hlâ lei cha eima o lâta a di aw ma pi. 

19 Eima to awpa cha heisâ lâ Zawdâh nochhi lâ a châpa vâta, Zawdâh haosâ khô lâ cha to aw ma pi,” tah ei ta.

20 Mawsi ta ama hnohta, “Cha hawhta tahpa ta adyuhna liata ABEIPA hmiakô liata sie awpa ta chariah chhaichhi a tobipa ta, 

21 a hmiakô tawhtapa a khakhaipazy topa ta, ABEIPA hmiakô liata râh cha pahniepa a châ hlâ lei ta, nama hry liata chariah chhaichhi atobipa zydua ta ABEIPA hmiakô liata Zawdâh nama chaka khai khiahtala; 

22 noh hro a di aw eichi ta; ABEIPA chô liata nata Izarelzy chô liata thai lei châ aw veih eichi; chatanachata he râh he ABEIPA hmiakô liata nama to awpa châ aw ta. 

23 Anodeikuacha cha hawhta nama tah leipa khiahtala, ABEIPA chô liata a moleipa châ aw eichi ta, nama molei khiahtala a cha hmô tlai aw ei, tahpa pahno teh u. 

24 Nama sawnawhzy châta khihzy tao ula, nama mietahkupazy châta chhao sahdôzy tao ula; nama reipa hawhna chata tao teh u,” tah ta. 

25 Chatawhcha Kada pathlazy nata Rubena pathlazy chata Mawsi hnohta, “Na chakaotuhpazy heta eima zibeipa biepiepa hawhna heta eima tao aw na. 

26 Eima lahpinô nata sawzy, eima mietahkupa zawzy, eima sahlao zydua zy cha Kilia râh khih liana zy heta vaw y aw ei ta; 

27 anodeikuacha na chakaotuhpa a dyuh awpa ta chariah chhaichhi a tobipa zydua zy chata eima zibeipa a reipa hawhna chata ABEIPA hmiakô liata eima chakah aw na,” tahpa ta reih ei ta.

28 Mawsi chata ama thâtih liana chata theihthaipa Eliaza zy, Nuna sawchapawpa Zawsua zy, Izarel pho chhôhkha pawhrâhpazy cha bie pie ta. 

29 Mawsi ta ama hnohta, “Kada pathlazy, Rubena pathlazy adyuh awpa ta chariah chhaichhi a tobipa zydua heta ABEIPA hmiakô liata Zawdâh cha chakah kheipa ta râh cha nama panawh khiahtala, Kilia râh cha ama ryutona châta nama pie awpa a châ; 

30 anodeikuacha chariah chhaichhi a tobipa ta ama cha chakah khei vei khiahtala, Kana râh liata nama hryta ama hlao aw,” tah ta. 

31 Chatawhcha Kada pathlazy nata Rubena pathlazy chata, “Na chakaotuhpazy hnohta ABEIPA ta a reipa hawhna chata eima tao aw na. 

32 Chariah chhaichhi a tobipa ta ABEIPA hmiakô liata chakapa ta Kana râh liata a ngia aw pi ta, chatanachata eima râh to awpa cha Zawdâh khô lâta a châ aw,” tahpa ta a chhy ei ta. 

33 Mawsi chata Kada pathlazy nata Rubena pathlazy nata Zawsi sawchapawpa Manase pathla pho khophie zy cha Amawri beipa Sihaw râh zy, Basana beipa Ôka râh, cha râhzy cha a khih a ypa zydua chhaota, a chheipâh râh khihzy chhaota pie ta. 

34 Kada pathlazy chata Dibô zy, Atarô zy, Arôera zy, 

35 Atarôsôpha zy, Zaza zy, Zôbeha zy, 

36 Benira zy, Behara zy tao ei ta, khihpi kuh a hneipa zy, mietahkupa sahdô zy chhaota. 

37 Rubena pathlazy chata Hesbaw zy, Eliale zy, Kiriathai zy, 

38 Nebô zy, Balama zy, (a mohzy he panano hawpa a châ), Sibmah zy tao ei ta; ama khih sapazy cha moh hropa bi ei ta. 

39 Manase sawchapawpa Makhi pathlazy cha Kilia râh lâta sie ei ta, la ei ta, Amawri mo, cha liata a ypazy cha papua ei ta. 

40 Mawsi ta Kilia râh cha Manase sawchapawpa Makhi pie ta, cha liana chata y ta, 

41 Manase sawchapawpa Zaira chata cha khihzy cha la ta, Havôzaira bi ta. 

42 Nôbah chata Kenatha la ta, a khih tawhzy chhaota, ano moh paphaopa ta Nôbah bi ta. 

Maluh Reina (Numbers)

 

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36

Maluh Reina Bo 31

Maluh Reina Bo 31

Midia sahlao chôta phuh lana nata hraona hmo pathaisana

1 ABEIPA ta Mawsi chho ta, 

2 “Midia sahlao chô liata Izarel pathlazy phuh la teh; cha khai tawhna chata na chiheihzy lâta pahlyhpa na châ ha aw,” tahpa ta. 

3 Mawsi chata zawpizy cha chho ta, “Midia sahlao chô liata ABEIPA phuh lana patlôo awpa ta Midia sahlao siehnaopa ta adyuh awpa ta nama hry liata chyhsa chariah chhaichhi ta a tobi ei se. 

4 Izarel pho zydua hry liata pho to liatahpa chyhsa sâh kha lymâ adyuhna lâta nama pasiesa awpa a châ,” tahpa ta. 

5 Chatanachata Izarel sahlao sâh hluhpi hry liatahpa pho to tawhta sâh kha sai, adyuhna lâta a sie awpa ta pheisaih thy kha nata sâh no papua ei ta. 

6 Mawsi ta chi to hry liatahpa sâh kha sai nata theihthaipa Eliaza sawchapawpa Phineha su pathaihpa liata hmobaohzy bie pie nawpa ta chiahmiezy chabapa ta adyuhna lâta pasiesa ta. 

7 ABEIPA ta Mawsi bie a piepa hawhta Midia sahlao a dyuh ei ta, chapaw zydua thie ei ta. 

8 Ama chyhsa thiepazy hry liata Midia sahlao abeizy chhao a hlao ei ta, Midia abei papangawh Ivi, Reke, Zua, Hura nata Reba zy cha; Beôra sawchapawpa Balama chhao zaozi ta thie ei ta. 

9 Izarel pathlazy chata Midia sahlao chanôzy ama sawzy chhao sei ta a chhi ei ta, chatawhcha ama sahroh zydua zy, ama mietahkupa zaw zydua zy, ama hmobaoh zydua zy cha hraona sôh châta la ei ta. 

10 Ama yna khih zydua zy, amâ riena su zydua zy, mei ta rao khai ei ta. 

11 Chyhsapa nata sahroh, sei nata hraona sôh zydua siekhei khai ei ta, 

12 sei zy, patupazy, hraona sôhzy cha Mawsi nata theihthaipa Eliaza nata Izarel pathla pôhpakhypa sahlao hnohta, Zerikô dady Zawdâh kiapâh ta Môaba bypi liata amâ riena su lâna chata vaw tlô khei ei ta.

13 Mawsi nata theihthaipa Eliaza nata pôhpakhypa zydua chata ariena su khôtho lâta kei dy ei ta. 

14 Mawsi cha pheisaih hyutuhpa, sâh kha chô liata hyutuhpazy nata za kha chô liata hyutuhpazy, adyuhna tawhta a vypazy chô liana cha a pathi-ia ta. 

15 Mawsi ta ama hnohta, “Chanô cha a hrohpa ta nama pahlôh khai ma? 

16 Pachâ teh u, Balama ryhraohpa chata Peôr kyh liata Izarel pathlazy cha ABEIPA chô liata paraona a patlôsatuhpazy cha hezy he ama châ, ABEIPA chyhsa pôhpakhypa sahlao chô liana chata hri a vaw charei hawpa kha. 

17 Chavâta sawnawhpa hry liata chapaw zydua thie ula, chanô chyhsa a pahno pathei hawpa zydua cha thie hra teh u. 

18 Chanô hawti chyhsa a pahno pathei leipa zydua deikua cha nama châta pahlôh teh u. 

19 Ariena su khôtho lâ noh sari a rie ula; ahyrai chyhsa a thiepa nata thihpa a hriapa maih cha noh thôh noh nata noh sari noh ta a pathai teh u, nâmo nata nama seizy chhao. 

20 Chysia to nata savo ta hmo taopa zydua zy, mie hmi ta hmo taopa zydua zy, tho ta hmo taopa zydua kyh liata nama pathaih awpa a châ,” tah ta.

21 Theihthaipa Eliaza chata adyuhna lâ a siepa adyuhpa chyhsazy hnohna chata, “He he ABEIPA ta Mawsi bie a pienazie bie raopa cha a châ: 

22 khâpa rai châ sala, ngôh zy, tâkâri zy, dawh zy, thua zy, râhvâ zy, ky zy, 

23 khâpa rai mei ta raopa ta a rao thei leipa maih cha mei liata pasisa aw eichi ta, chatanachata a vaw pathaih aw. Khâparai châ sala pathaina ti ta pathai awpa a châ; mei liata pasia thei leipa maih cha ti liata nama pasisa awpa a châ. 

24 A noh sari nohta nama poh pasu aw eichi ta, pathai aw eichi ta; cha khai tawhna chata ariena su liata namâ ngia aw,” tah ta.

Hraona hmo pachhaihna kyh

25 ABEIPA ta Mawsi chho ta, 

26 “Nâma chhao, theihthaipa Eliaza chhao, pôhpakhypa sahlao pawhrâhpazy chhao ta, hraona sôh ta ama lapa, chyhsapa nata sahrohzy cha reih khai ula; 

27 hraona sôh cha su no ta pachhaih ula, a dyuhna lâta a siepa a dyuhpa chyhsazy châta nata pôhpakhypa sahlao zydua châta. 

28 Chatawhcha adyuhna lâta a siepa a dyuhpa chyhsa tawhna chata ABEIPA châta chhie pie awpa khei lymâ ula, za pangawh lymâ liata pakha, chyhsapa tawhta zy, viahchao tawhta zy, alâ tawhta zy, mietahkupa zaw tawhta zy ta; 

29 chazy cha ama topa khophie tawhta la ula, ABEIPA châta chaluahna hlâna ta theihthaipa Eliaza pie teh u.

30 Chatawhcha a khophie Izarel pathlazy tovyuh cha sypangawh tawhtapa pakha la lymâ la, chyhsa tawhta zy, viahchao tawhta zy, alâ tawhta zy, mietahkupa zaw tawhta zy, sahroh tawhta zy ta, chazy cha ABEIPA achhyna byureih a mohôhtuhpa Livai sahlaozy pie teh,” tah ta. 

31 ABEIPA ta Mawsi bie a piepa hawhna chata Mawsi nata theihthaipa Eliaza ta tao ei ta.

32 Pheisaihzy ta ama patupa hraona sôh rei leipa ta, ama lapa cha: mietahkupa thy sycharu nata thy sari nata sâh pangawh, 

33 viahchao thy sari nata sâh no, 

34 alâ thy charu nata sâh kha, 

35 chyhsa cha chanô, chapaw a pahno pathei beih leipa thy thôh nata sâh no châ ei ta. 

36 A khophie adyuhna lâta a siepazy tovyuh cha mietahkupa thy sythôh nata thy thôh nata sâh sari nata za pangawh châ ta, 

37 ABEIPA chhie mietahkupa cha za charu nata sysari nata pô pangawh. 

38 Viahchao cha thy thôh nata sâh charu châ ta, cha liata ABEIPA chhie cha sysari nata pô no châ ta. 

39 Alâ cha thy thôh nata za pangawh châ ta, cha liata ABEIPA chhie cha sycharu nata pô kha a châ. 

40 Chyhsa cha thy kha nata sâh charu châ ei ta, cha liata ABEIPA chhie cha chyhsa sythôh nata pano ama châ.

41 ABEIPA ta Mawsi bie a piepa hawhta chhie ABEIPA chaluahna hlâna cha Mawsi ta theihthaipa Eliaza pie ta.

42 Mawsi ta adyuhpa chyhsazy tawhta a raipa Izarel chyhsazy tovyuh khophie cha, 

43 (zawpi tovyuh khophie cha mietahkupa thy sythôh nata thy thôh nata sâh sari nata za pangawh, 

44 viahchao thy thôh nata sâh charu, 

45 alâ thy thôh nata za pangawh, 

46 chyhsa thy kha nata sâh charu châ ei ta;) 

47 Izarelzy tovyuh khophie tawhtapa cha Mawsi chata chyhsa nata sahroh, sypangawh lymâ liata pô kha la ta, ABEIPA biepiepa hawhta ABEIPA achhyna byureih mohôhtuhpa Livai sahlao pie ta.

48 Chatawhcha pheisaihzy chô liata hyutuhpa, a sâh chô liata hyutuhpazy, a za chô liata hyutuhpazy chata, Mawsi a hnia ei ta, 

49 Mawsi hnohta, “Na chakaotuhpazy heta, eima ku liata a ypa adyuhpa chyhsazy cha reih pi ta, ahyhmah ta a ki leipa y leipa pi ta. 

50 Chatawhcha eima hrona chata ABEIPA hmiakô liata aryhna taona awpa ta ABEIPA châta hmohlâpa, chyhsa ta ama hneipa, ngôh ta pangiapa a tobina phei pakypa zy, lâkyu zy, moh chahnaona kusadi zy, rahy zy, pachhih zy. eima vaw cheih,” tah ei ta. 

51 Mawsi nata theihthaipa Eliaza chata ngôh ta taopa amâ tobina zydua cha la ei ta. 

52 A sâh chô liata hyutuhpazy nata a za chô liata hyutuhpazy ngôh ABEIPA lâta chaluahna hlâna ta ama hlâpa zydua cha sekel thy kha nata sâh charu nata za sari nata sypangawh a châ. 

53 (A dyuhpa chyhsazy cha ama hraona sôh cha âmo châ chyu ta a lapa châ ei ta.) 

54 Chatawhcha Mawsi nata theihthaipa Eliaza chata a sâh chô liata hyutuhpazy nata a za chô liata hyu tuhpazy ngôh cha la ei ta, Izarel pathlazy a thei thlâh ha nawpa ta ahmaohpakhyna poh-o ABEIPA hmiakô liata vaw cheih ei ta. 

Maluh Reina (Numbers)

 

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36

Maluh Reina Bo 30

Maluh Reina Bo 30

1 Mawsi ta Izarel pathlazy chi sahlao pawhrâhpazy cha chho ta, “He he ABEIPA ta bie a piepa cha a châ. 

2 Chyhsa ta ABEIPA lâta bie â taih tlyma, a palôhrupa bietaihpa ta a chahry awpa ta chhie â sana tlyma, a châ khiahtala, a bie cha parao awpa châ vei, a pakah ta a puapa zydua hawhna chata a tao awpa a châ. 

3 Chanô chhaota a laihsa nota a paw o liata a y nota, ABEIPA lâta bie a taihpa ta, bietai liata a chahrypa ta a bietaipa nata bietai liata a palôhrupa a chahrypa cha, 

4 a paw ta pahnopa ta, a paw ta a chalih sai thlâh ha khiahtala; a bietai zydua cha patlô aw ta, chatawhcha bietaipa to liata a palôhrupa ta a chahrynazy cha a y thlâh ha aw. 

5 Anodeikuacha a paw ta a pahno nata a pasaih vei khiahtala a bietaizy, a chahryna bietaizy, a kheihawhpa liata hmahta patlô aw vei; a paw ta a pasaih leipa a châpa vâta, ABEIPA ta ano cha a ngiahthai aw. 

6 Bietaipa ta tlyma, bie pachâ leipa ta a palôhrupa chahryna ta tlyma a vi nota vahpa hneipa ta, 

7 a vahpa ta pahnopa ta, a pahno nota a chalih thlâh ha khiahtala; a bietai cha y thlâh ha aw ta, a palôhrupa chahryna bie pachâ leipa ta, a bietaipa chhao cha a y thlâh ha aw. 

8 Anodeikuacha a vahpa ta a pahno nota a pasaih vei khiahtala, a chô liata bietai a ypa nata a palôhrupa chahryna pachâ leipa ta bie a taipa cha a pahlei aw; chatawhcha ABEIPA ta a ngiahthai aw. 

9 Anodeikuacha nôhmei tlyma, mapa tlyma bie taipa cha, a palôhrupa a chahryna zydua chata a vi thlâh ha aw.

10 Chatawhcha a vahpa ta bietaipa ta chhiesakhâhpa ta a palôhrupa chahry awpa ta biehraihpa ta, 

11 a vahpa ta pahnopa chhaota, a chalih thlâh hapa ta, a pasaih leipa a châ vei khiahtala; a bietai zydua y thlâh ha aw ta, a palôhrupa chahry awpa ta a bietaipa to chhao a y thlâh ha aw. 

12 Anodeikuacha a vahpa ta a pahno nota, khâpa hmah châ leipa hawhta tao ta, a pahlei khiahtala, a bietaipa tlyma, a palôhrupa chahryna tlyma, bie ta a pakah ta bie a puapa maih cha y khao aw vei; a vahpa ta a pahlei haw, ABEIPA ta ano a ngiahthai aw. 

13 Bietai zydua nata hrona riepathei awpa ta chahryna chhiesakhâhpa zydua cha a vahpa ta pa-i thei ta, a vahpa ta a pahlei thei. 

14 Anodeikuacha a vahpa ta noh tato ta a chalih sai palâh khiahtala, a bietai zydua nata a chô liata chahryna zydua cha a pa-ipa châ ta; a pahno noh tawhta a chalih saipa vâta a pa-ipa a châ. 

15 Anodeikuacha a pahno ha tawhta khâpahmah châ leipa ta taopa ta a pahlei khiahtala, a hmo paraona maoh cha a phaoh awpa a châ,” tahpa ta.

16 Hezy he chapaw nata a lahpinô likawh nata, paw nata a sawchanônô laihsa nota, a paw o liata a y thlâh hapa, ama likawh liata ryhpa, ABEIPA ta Mawsi bie a piepazy cha a châ. 

Maluh Reina (Numbers)

 

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36

Maluh Reina Bo 29

Maluh Reina Bo 29

1 “Thla sarina noh kha noh liana chata pakhypi pathaihpa hnei aw eichi ta; khâpa rai rupa hmahta nama hria awpa châ vei. Nama châta chiahmie tôna noh a châ aw, 

2 ABEIPA châta rohpahâhpa raopa hlâna hlâ aw eichi ta: viahchao tôh dawpa pô kha, mietahkupa tôhpa pô kha, mietahkupa taw a chapawpa kô khapa seina a hnei leipa pô sari; 

3 nama niepa hlâna viahdie dipa sathaw pahlaopa, viahchao tôhpa pô kha liata ephah su hrawh ta pachhaih ta su thôh, mietahku tôhpa pô kha liata su hrawh ta pachhaih ta su no, 

4 mietahkupa taw pô sari, pô kha chyu liata su hrawh ta pachhaih ta su kha; 

5 nama châta aryhna tao nawpa ta molei atheihna mie tôhpa pô kha chhaota; 

6 thla thiehpa raopa hlâna nata cha liata niepa hlânazy, raopa hlâna hlâ tyhpa nata cha liata niepa hlânazy, dopa hlânazy, ama tao tyhpa ABEIPA châta rohpahâhpa mei ta hlâpazy rei leipa ta.

7 “He thla sarina noh hrawh noh liata pakhypi pathaihpa hnei aw eichi ta, nama hrona rie pathei aw eichi ta; khâpa raihria hmahta nama hria awpa châ vei, 

8 ABEIPA châta rohpahâhpa ta raopa hlâna deikua cha nama hlâ awpa a châ: viahchao tôhpa pô kha, mietahkupa tôhpa pô kha, mietahkupa taw a chapawpa kô khapa pô sari; nama pachâpa ta seina a hnei leipa a châ awpa a châ; 

9 ama niepa hlâna viahdie dipa sathaw pahlaopa viahchao tôhpa pô kha liata ephah su hrawh ta pachhaih ta su thôh, mietahkupa tôhpa pô kha liata su hrawh ta pachhaih ta su no, 

10 mietahkupa taw pô sari, mietahkupa taw pô kha chyu liata su hrawh ta pachhaih ta su kha: 

11 molei atheih nawpa ta mie tôhpa pô kha chhaota, aryhna awpa ta molei atheihna zy, raopa hlâna hlâ tyhpa zy, cha liata niepa hlâna nata dopa hlâna zy rei leipa ta.

12 “Thla sarina noh hrawhleipangawh noh liata pakhypi pathaihpa nama hnei awpa châ ta; khâpa rai rupa hmahta nama hria awpa châ leipa ta, ABEIPA châta noh sari kyhchhi namâ ô awpa a châ; 

13 ABEIPA châta rohpahâhpa ta mei ta hmohlâpa raopa hlâna nama hlâ awpa a châ, viahchao tôh dawpa pô hrawhleithôh, mietahkupa tôhpa pô no, mietahkupa taw a chapawpa kô khapa pô hrawhleipalih; seina a hnei leipa sai ama châ awpa a châ; 

14 ama niepa hlâna sathaw pahlaopa viahchao tôhpa pô hrawhleithôh, viahchao tôhpa pô kha chyu liata ephah su hrawh ta pachhaih ta su thôh mietahkupa tôhpa pô no, mietahkupa tôhpa pô kha chyu liata su hrawh ta pachhaih ta su no, 

15 mietahkupa taw pô hrawhleipalih, mietahkupa taw pô kha chyu liata su hrawh pachhaih ta su kha; 

16 molei atheihna châta mie tôhpa pô kha chhaota, raopa hlâna hlâ tyhpa cha liata niepa hlânazy, dopa hlânazy rei leipa ta.

17 “A noh nona liata viahchao tôh dawpa pô hrawhleino, mietahkupa tôhpa pô no, mietahkupa taw a chapawpa kô khapa seina a hneileipa pô hrawhleipalih nama hlâ awpa a châ, 

18 ama niepa hlâna nata ama dopa hlâna a yzie ta hawhta, ama hlânazie lymâ hawhta, viahchao tôhpa châta zy, mietahku tôhpa châta zy, mietahkupa taw châta zy; 

19 molei atheih nawpa ta mie tôhpa pô kha chhaota; raopa hlâna hlâ tyhpa zy, cha liata niepa hlânazy, dopa hlânazy rei leipa ta.

20 “A noh thôh noh liana chata viahchao tôhpa pô hrawhleikha, mietahkupa tôhpa pô no, mietahkupa taw a chapawpa kô khapa seina a hnei leipa pô hrawhleipalih, 

21 ama niepa hlâna nata dopa hlâna a yzie ta hawhta ama hluhnazie lymâ hawhta, viahchao tôhpa châta zy, mietahkupa châta zy, mietahkupa taw châta zy, 

22 molei atheih nawpa ta mie tôhpa pô kha chhaota, raopa hlâna hlâ tyhpa nata cha liata niepa hlâna nata cha liata dopa hlâna rei leipa ta.

23 “A noh palih noh liana chata viahchao tôhpa pô hrawh, mietahkupa tôhpa pô no, mietahkupa taw a chapawpa kô khapa seina a hnei leipa pô hrawhleipalih, 

24 ama niepa hlâna nata dopa hlâna, a yzie ta hawhta ama hluhnazie lymâ hawhta, viahchao tôhpa châta zy, mietahkupa châta zy, mietahkupa taw châta zy; 

25 molei atheih nawpa ta mie tôhpa pô kha chhaota raopa hlâna hlâ tyhpa zy, cha liata niepa hlâna nata dopa hlânazy rei leipa ta.

26 “A noh pangawh noh liana chata viahchao tôhpa pô chaki, mietahkupa tôhpa pô no, mietahkupa taw a chapawpa kô khapa seina a hnei leipa pô hrawhleipalih, 

27 ama niepa hlâna nata dopa hlâna a yzie ta hawhta, ama hluhnazie lymâ hawhta, viahchao tôhpa châta zy, mietahkupa tôhpa châta zy, mietahkupa taw châta zy; 

28 molei atheih nawpa ta mie tôhpa pô kha chhaota; raopa hlâna hlâ tyhpa zy, cha liata niepa hlâna nata cha liata dopa hlâna zy rei leipa ta.

29 “A noh charu noh liana chata viahchao tôhpa pô charie, mietahkupa tôhpa pô no, mietahkupa taw a chapawpa kô khapa seina a hnei leipa pô hrawhleipalih, 

30 ama niepa hlâna nata dopa hlâna a yzie ta hawhta ama hluhnazie lymâ hawhta, viahchao tôhpa châta zy, mietahkupa tôhpa châta zy, mietakupa taw châta zy; molei atheih nawpa ta mie tôhpa pô kha chhaota; raopa hlâna hlâ tyhpa zy, cha liata niepa hlâna nata cha liata dopa hlâna zy rei leipa ta.

32 “A noh sari noh liana chata viahchao tôhpa pô sari, mietahkupa tôhpa pô no, mietahkupa taw a chapawpa kô khapa seina a hnei leipa pô hrawhleipalih, 

33 ama niepa hlâna nata dopa hlâna a yzie ta hawhta, ama hluhnazie lymâ hawhta, viahchao tôhpa châta zy, mietahkupa tôhpa châta zy, mietahkupa taw châta zy; 

34 molei atheih nawpa ta mie tôhpa pô kha chhaota; raopa hlâna hlâ tyhpa zy, cha liata niepa hlâna nata cha liata dopa hlâna zy rei leipa ta.

35 “A noh charie noh liana chata pakhypi rôhnah ngaitapa hnei aw eichi ta: khâpa rai rupa hmahta nama hria awpa châ vei, 

36 ABEIPA châta rohpahâhpa ta mei ta hmohlâpa raopa hlâna deikua cha nama hlâ awpa a châ: viahchao tôhpa pô kha, mietahkupa tôhpa pô kha, mietahkupa taw a chapawpa kô khapa seina a hnei leipa pô sari, 

37 ama niepa hlâna nata ama dopa hlâna, viahchao tôhpa châta zy, mietahkupa tôhpa châta zy, mietahkupa taw châta zy, a yzie ta hawhta, ama hluhnazie lymâ hawhta; 

38 molei atheih nawpa ta mie tôhpa pô kha chhaota; raopa hlâna hlâ tyhpa nata cha liata niepa hlâna nata cha liata dopa hlâna rei leipa ta.

39 “Nama bietai zy, lôhthai ta hlâpa zy, nama raopa hlâna zy, nama niepa hlâna zy, nama dopa hlâna zy, nama aryhna hlâna zy rei leipa ta, hezy he nama daihti raopa kyhchhi noh liata ABEIPA lâta nama hlâ awpa a châ, tah teh,” tahpa ta.

40 ABEIPA ta Mawsi bie piepa zydua cha Izarel pathlazy cha Mawsi chata chho ta. 

Maluh Reina (Numbers)

 

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36