Zelôpheha sawchanônôzy hiana
1 Zawsi sawchapawpa Manase pathla, Manase sawchapawpa Makhi cha sawchapawpa Kilia, cha sawchapawpa Hepha sawchapawpa Zelôpheha sawchanônôzy cha a vy ei ta. A sawchanônôzy moh cha Mahla zy, Naw zy, Hôklah zy, Tirzah zy ama châ.
2 Ahmaohpakhyna poh-o chhikao liata Mawsi nata theihthaipa Eliaza nata molaipa sahlao nata pôhpakhypa sahlao zydua hmiakô liana chata a kei duah ei ta,
3 “Râhpathohpa liana khata eima paw thi ta; ABEIPA a dyuh awpa ta pôhpakhypa sahlao Kôra py liana khata a hlao hra leipa ta, châhrasala âmo moleipa vâta thi ta; sawchapawpa hnei leipa ta.
4 Sawchapawpa a hnei leipa vâ deita khazia e eima paw moh cha a pathlazy hry tawhtapa a lei aw? Eima paw unawhpazy hry liata tovyuh maniah pie hra teh u,” tah ei ta.
5 Mawsi ta ama bie cha ABEIPA hmiakô liata tlôkhei ta.
6 ABEIPA chata Mawsi chho ta, “Zelôpheha sawchanônôzy chata ama tahnazie a dona; ama paw unawhpazy hry liata tovyuh na tao tlai awpa châ ta, ama paw tovyuh cha na pie awpa a châ.
8 Izarel pathlazy hnohta, ‘Chyhsa ta sawchapaw hnei leipa ta a thi khiahtala, a ryu cha a sawchanôzy nama pie awpa a châ.
9 Sawchanô a hnei vei khiahtala, a ryu cha a unawhpazy nama pie awpa a châ.
10 Unawhpazy a hnei vei khiahtala, a ryu cha paw unawhpazy nama pie awpa a châ.
11 A paw ta unawhpazy a hnei vei khiahtala, a ryu cha a heinawh pie aw eichi ta, ano ta pakhy aw ta, ABEIPA ta Mawsi bie a piepa hawhta Izarel pathlazy châta ryhpa biepiepa â ipa a châ aw,’ tahpa ta reih teh,” tah ta.
Mawsi ta ano a pazipa ta Zawsua a rao(Re 31: 1-8)
12 ABEIPA ta Mawsi hnohta, “Abari tlâh lâna khi ta khy la, Izarel pathlazy ei pie awpa râh sai teh.
13 Na hmô khai tita na unawhpa Arawna cha a chyhsazy hnohta pahlyhpa a châpa hawhta nâ chhao pahlyhpa na châ ha aw,
14 Zin râhpathohpa liata pôhpakhypa sahlao ama paphôh nota ama mohmô liata ti liana khata eina palyupalih awpa chi ta, bie ei cha piepa eipa ta nâ typa vâna khata,” tah ta. (Chazy cha Zin râhpathohpa liata Kadesa liata Meribah tizy cha a châ.)
15 Mawsi ta ABEIPA chho ta,
16 “ABEIPA y, sapa zydua thlahpazy Khazohpa châta,
17 ABEIPA chyhsa a pôhpakhypazy cha vaihtuhpa a hnei leipa mietahkupa hawhta ama y lei nawpa ta, pôhpakhypa chô liata hyutuhpa âmo chhihthapa ta, âmo pua kheipa ta, a ngia kheituh awpa tao mawh sy,” tahpa ta.
18 ABEIPA ta Mawsi hnohta, “Nuna sawchapawpa, palôhrupa hnei ngaitapa Zawsua cha a chhi la, a chô liata na ku pahnieh la;
19 theihthaipa Eliaza nata pôhpakhypa sahlao zydua hmiakô liata paluahsa la, ama mohmô liata biehneina pie teh.
20 Izarel pathla pôhpakhypa sahlao zydua ta a rei amâ ngiah thei nawpa ta a chô liata na biehneina pahnieh teh.
21 Ano cha theihthaipa Eliaza hmiakô liata a duah aw ta, ano ta ABEIPA hmiakô liata Urim ta bie lapa aw ta; ano reisai ta pua aw ei ta, ano reisai ta amâ ngiah aw, ano nata Izarel pathla zydua, pôhpakhypa sahlao zydua chhaota,” tah ta.
22 Mawsi chata ABEIPA biepiepa hawhta tao ta; Zawsua cha a chhi ta, Eliaza nata pôhpakhypa sahlao zydua hmiakô liana chata paduasa ta,
23 a chô liata a ku pahnieh ta, Mawsi hmâpa ta ABEIPA ta a reipa hawhna khata biehneina pie haw ta.