Theihthaipazy nata Livai mozy châta ama pasanazie
1 ABEIPA ta Arawna hnohta, “Nâma nata na sawchapawpazy nata nama chhôhkha heta su pathaihpa paraona maoh cha phaoh aw eichi ta; nâma nata na sawchapawpazy heta nama theihthaina raihria paraona maoh cha nama phaoh aw.
2 Livai chi, na paw chi, na unawhpazy ta cha pazao hrapa ta, a cha chakao thei nawpa ta na kiapâh a hniapa liata paysa la, anodeikuacha nâ nata na sawchapawpazy cha bie pahnosana poh-o kiapâh liata nama y awpa a châ.
3 Na raihria cha baokhâ aw ei ta, poh-o lâ raihria zydua to aw ei ta: anodeikuacha su pathaihpa hmobaoh nata maisâh cha a vaw hnia kha se, ama thi lei nawpa ta âmo tlyma, nâma tlyma rai.
4 Âmo chata châ pazao aw ei ta, poh-o chakaona raihria zydua liata ahmaohpakhyna poh-o raihria cha to aw ei ta; pho hropa chata a châ vaw hnia awpa ei châ vei.
5 Nâma ta su pathaihpa raihria nata maisâh raihria cha na to aw, Izarel pathlazy chô liata hiehâhna a y khao lei nawpa ta.
6 Kei heta na unawhpa Livai sahlaozy cha Izarel pathlazy hry tawhtapa a tlyh na ta; ahmaohpakhyna poh-o chakao awpa ta ABEIPA hnohta piepa na châta hmo piepa ama châ aw.
7 Nâma nata na sawchapawpazy heta maisâh nata pohraipa chhôh lâ kyh liata nama theihthaipa raihria cha nama hria aw; chatawhcha nâma ta na chakao aw, theihthaipa raihria he nama chakaona raihria châta ei cha pie ei, pho hropa a vaw hria hrapa maih cha thiepa ama châ aw,” tah ta.
8 ABEIPA ta Arawna chho ta, “Kei heta ei châta chaluahna hlâna Izarel sawzy hmohlâpa zydua taihta; nâma nata na sawchapawpazy ta chhâzaw ta nama tovyuh châta cha pie ei na ta.
9 Mei ta rao bâhpa hmo pathaihpazy cha na ei châ aw ta; ama hmohlâpa to, ama niepa hlâna zy, ama molei atheihna hlâna zy, ama thailei atheihna hmohlâpa ei hnohta ama hlâ awpa zy taihta, pathaih ngaitapa nâma nata na sawchapawpazy tovyuh a châ aw.
10 Hmo pathaih ngaitapa niepa hawhta cha nie aw eichi ta; chapaw zydua ta nie aw ei ta; na châta pathaihpa a châ aw.
11 Hezy he na tovyuh a châ aw, niepa hlâna ama hmo piepa, Izarel pathlazy chaluahna hlâna zydua taihta; nâma nata na sawchapawpazy nata na sawchanôzy chhaota, nama chhâzaw tovyuh ta cha pie ei na ta; na o liata chyhsa pathaihpa zydua ta ama nie thei aw.
12 Sathaw pha chaipa zy, kre pha chaipa zy, sâh pha chaipa zy, thei hmiatua chaipa ABEIPA châta ama piepa cha ei cha pie.
13 Ama lyu liata a patheipa a hmoh tua chaipa, ABEIPA châta ama vaw cheipa cha na eih châ aw ta; na o liata chyhsa pathaihpa zydua ta nie thei aw ei ta.
14 Izarel sahlao hmohlâpa zydua cha na eih a châ aw.
15 ABEIPA châta ama piepa, chhi a pahy tua chaipa maih cha chyhsa rai, sahroh rai nâ eih châ aw ta; anodeikuacha saw tuapa cha na chatlai thlyu awpa châ aw ta, sahroh pathaih leipa taw, a patawh tua chaipa chhao cha na chatlai awpa a châ.
16 Thla kha a châ nahta chatlai awpazy cha chatlaina ty na raopa yzie hawhta su pathaihpa liata sekel hawhta sekel miapangawh ta na chatlai awpa a châ, (sekel cha gerah syno a châ).
17 Anodeikuacha viahchao a pih tua chaipa zy, mietahkupa a pih tua chaipa zy, mie a pih tua chaipa zy cha na chatlai awpa châ leipa ta; pathaihpa ama châ. Ama thisaih cha maisâh liata hie aw chi ta, ABEIPA châta rohpahâhpa ta, ama thawzy cha mei ta hmohlâpa ta na rao awpa a châ.
18 Ama sapa cha nâma eih a châ aw, hiepa hlâna palôh nata a phei chachâh lâ nâ eih a châpa hawhna heta.
19 Hmo pathaihpa ta hiepa hlâna, Izarel pathlazy ta ABEIPA châta ama hlâpazy cha nama chhâzaw tovyuh châta ei cha pie ei; ABEIPA hmiakô liata nâma nata na sawchapawpazy nata na sawchanôzy chhaota, chhâzaw biehrai a châ aw,” tah ta.
20 Chatawhcha ABEIPA ta Arawna hnohta, “Ama râh liana chata ryuto hnei leipa aw eichi ta, ama hry liata tovyuh hnei hra aw veih ei chi; Izarel pathlazy hry liata na tovyuh nata na ryuto cha keima he ei châ.
21 “Livai pathlazy cha, chakaona raihria ahmaohpakhyna poh-o chakaona raihria liata ama chakaona ty ta, Izarel râh liata su hrawh liata su kha zydua he ei pie.
22 Atahmâ tawhta cha Izarel pathlazy châta ahmaohpakhyna poh-o cha amâ vaw hnia awpa châ vei, moleina phaoh tlamawpa ta ama thi aw na.
23 Livai sahlao deikua chata ahmaohpakhyna poh-o chakaona raihria hria aw ei ta, âmo hmoparaona maoh cha ama phaoh aw; he he na pathlazy taih châta ryhpa châ aw ta; Izarel pathlazy hry liata ryuto hnei aw veih ei.
24 Izarel pathlazy ta su hrawh liata su kha ABEIPA châta chaluahpa hlâna ta ama hlâpa cha Livai sahlao ryuto châta ei pie; chavâta ama hnohta Izarel pathlazy hry liata ryuto hnei aw veih ei, ei vaw tah haw,” tah ta.
25 ABEIPA ta Mawsi chho ta,
26 “Chazy bie dei leipa chhaota Livai sahlao cha chho la, ama hnohta, ‘Nama ryuto châta Izarel pathlazy su hrawh liata su kha ei cha piepa ei, âmo tawhta nama to tina chata, cha su hrawh liata su kha tawhtapa su hrawh liata su kha cha ABEIPA lâta chaluahna hlâna ta nama hlâ awpa a châ.
27 Nama chaluahna hlâna cha sawhri liata sâh nata kresawti a veih tua chaipa ta pachâpa a châ aw.
28 Cha hawhna chata Izarel pathlazy tawhtapa su hrawh liata su kha nama topa zydua liatahpa cha ABEIPA châta chaluahna hlâna ta nama hlâ lymâ hra awpa a châ; cha tawhna chata ABEIPA chaluahna hlâna cha theihthaipa Arawna nama pie awpa a châ.
29 Nama hmo topa zydua liatahpa cha a pha chaipa a pathaihpa liatahpa lymâ ABEIPA chaluahna hlâna ta nama hlâ awpa a châ.
30 Chavâta ama hnohta,’ Cha liatahpa a pha chaipa nama chaluah tita Livai sahlao sawhri liata a dipa nata kresawti a veihpa hawhta pachâpa a châ aw;
31 khataih liata rai nama nie thei aw, nâmo nata nama chhôhkhazy chhaota; ahmaohpakhyna poh-o liata nama chakaona ty châ tlôh ta.
32 A pha chaipa nama chaluah khiahtala a moleina maoh phaoh leipa aw eichi ta. Izarel pathlazy hmo pathaihpa cha papua palei leipa aw eichi ta, thi aw veih eichi,’ tah teh,” tahpa ta.