Kôra, Datha nata Abira a typa
1 Livai sawchapawpa Kôha, cha sawchapawpa Izha, cha sawchapawpa Kôra cha, Eliaba sawchapawpazy, Datha nata Abira nata Pele sawchapawpa Ôna, Rubena pathlazy chhao chata,
2 chyhsazy chhihtha ei ta; Izarel pathlazy chyhsa rôhnah viapa, zawpi hry liata hyutuhpa, ryureituhpa châta a tlyhpazy hry liatahpa, za no nata sypangawhzy chhaota, Mawsi hmiakô liata vawh ei ta;
3 Mawsi nata Arawna teipa ta pôhpakhy ei ta, ama hnohta, “Namâ palai ngaitana! Zawpizy cha pathaih chyu tlôh ei ta, ABEIPA chhao ama hry liata y tlôh ei ta; khâpavâta e, ABEIPA zawpi pôhpakhypa sahlao chô liata namâ pachônôsa via?” tah ei ta.
4 Cha cha Mawsi ta a thei nahta â khu lâta pao ta,
5 Kôra nata a sahlao zydua hnohna chata, “Mylâ myta ABEIPA ta ano eih zy nata a pathaihpazy cha paluahsapa ta ano a pahniasa aw ta; a tlyhpazy tlai cha ano a pahniasa aw.
6 He tana heta tao teh u: Kôra nata a sahlao zydua saih u;
7 mylâ mei lanazy cheih ula, cha liana chata mei soh ula, ABEIPA hmiakô liata rohpahâhpa mia teh u, chatawhcha ABEIPA ta â tlyhpa maih cha a pathaih aw. Livai sawchapawpazy saih u, namâ palai kawna!” tahpa ta reih ta.
8 Mawsi ta Kôra hnohta, “Nâmo Livai sawchapawpazy saih u, nahthlie teh u:
9 ABEIPA achhyna byureih liata chakaopa ta, zawpi hmiakô liata chakaopa ta a duah awpa ta Izarelzy Khazohpa ta ano a hnia awpa ta Izarel zawpizy hry tawhtapa a cha pananopa ei nata Livai sawchapawpa nama unawhpa zydua chhaota ano hmô awpa ta a cha paysapa ei he, hmo chyhpata ta nama pachâ mâ? Theihthaipa châna kha nama tlua tly?
11 Chavâta nâma nata na sahlao zydua ABEIPA a dyuhpa ta namâ pôhpakhy; chatawhcha Arawna heta khâpama tao ta a chô liata nama paphôh tly?” tah ta.
12 Mawsi chata Eliaba sawchapawpa Datha nata Abira pa-awsa ta; amo chata, “A khy aw ma pi.
13 Râhpathohpa liata maniah pahleipadia awpa ta sâhpiti nata kheihti lona râh tawhtapa maniah a chhihthapa he hmo chyhpa ta ma a châ, eima chô liata na pabeisa bai lai?
14 Sâhpiti nata kheihti lona râh liata maniah chhihtha leipa ta, lyu nata kresadô ryu châta maniah pie hra vei. He sahlao mozy he na pachaosa aw mâ? A khy chachei ta aw ma pi,” tah ei ta.
15 Mawsi cha a pathi-ia ngaita ta, ABEIPA hnohta, “Ama hmohlâpa cha a pyh khâ, ama alâ cha pô kha hmah la leipa nata ahyhmah ta pasasa hra va na,” tah ta.
16 Mawsi ta Kôra hnohna chata, “Mylâ nâma nata na chyhsa pôhpakhypa sahlao, nâ chhao, âmo chhao, Arawna chhaota, ABEIPA hmiakô liata vaw y teh u;
17 ama mei lana chaba chyu ei sala, rohpahâhpa mia ei sala, ABEIPA hmiakô liata mei lana chyu, mei lana za no nata sypangawh cha vawh cheih ei se, nâma nata Arawna chhaota, nama mei lana chaba rairieh teh u,” tah ta.
18 Chatanachata chyhsa to ta, ama mei lana cha chaba ei ta, mei soh ei ta, rohpahâhpa mia ei ta, Mawsi nata Arawna zy chhaota, ahmaohpakhyna poh-o chhikao liana chata a kei duah ei ta.
19 Kôra chata zawpi zydua cha, âmo a dyupa ta ahmaohpakhyna poh-o chhikao liana chata paysa ta. Chatawhcha zawpi zydua lâna chata ABEIPA rôhnahna a vaw luah ta.
20 Chatanachata ABEIPA ta Mawsi nata Arawna chho ta,
21 “He zawpizy hry tawhtapa he a panano teh u, sôkha ta âmo ei pahleipadia thei nawpa ta,” tahpa ta.
22 Âmo chata â khu lâta pao ei ta, “Hy Khazohpa, sapa zydua thlahpa Khazohpa y, chyhsa pakha moleipa vâta zawpi zydua chô liata na pathi a ia aw mâ?”
23 ABEIPA ta Mawsi chho ta,
24 “Zawpizy hnohta, Kôra zy, Datha zy, Abira zy ariena su tawhtapa he a hnei sai khai teh u,” tahpa ta reih ta.
25 Mawsi cha thyu ta. Datha nata Abira zy hnohta vawh ta, Izarel sahlao machâzy cha zi ei ta.
26 Chatawhcha pôhpakhypa sahlao hnohna chata, “He chyhsa moleipa sahlaozy poh-ozy tawhna heta pua khai teh u, ama khâpahmah hria kha u, chata leipa ta la ama moleina zydua liana heta namâ hlao pathlei aw na,” tapa ta reih ta.
27 Chatanachata Kôra zy, Datha zy, Abira zy ariena su tawhtapa cha pua ei ta, Datha nata Abira cha ama poh-o tawhtapa pua ei ta, ama poh-o chhikao liana chata ama lahpinô zy, ama sawchapawpa zy, ama sawnawh chyhpa ta zy chhaota a duah ei ta.
28 Chatawhcha Mawsi ta, “Keima palôhrupa a puapa ta taopa châ leipa ta, he hmozy tao awpa heta ABEIPA ta eina tuah tahpa, he liana heta nama pahno aw.
29 He chyhsazy he, chyhsa zydua hriena haw hra ta, hriepa ama châ khiahtala, Khazohpa ta eina tuah leipa châ aw ta.
30 ABEIPA ta hmo thiehpa taopa ta, alei ta a pakah âpa ta, âmo nata ama eih zydua palâpa ta, Sheol liata a hrohpa ta amâ ngia khiahta deikua cha, he chyhsazy heta ABEIPA amâ nawhtaw tahpa nama pahno aw,” tah ta.
31 Cha bie zydua cha a rei khai nahta ama ry liata alei cha a vaw patlaw ta,
32 alei chata a pakah â ta, ama chhôhkha ta Kôra chyhsa zydua, ama hmodâh zydua chhaota palâ khai haw ta.
33 Âmo nata ama ei zydua cha Sheol liana chata a hrohpa ta a pamôh khai haw ei ta; alei chata a pabieh khâh ha ta, pôhpakhypa hry tawhtapa cha leidia haw ei ta.
34 Ama chheipâh liata Izarel chyhsa zydua cha ama awh pa pyu liana chata a râpai ei ta; “Alei ta maniah a palâ pathlei aw na!” tah ei ta.
35 Chatawhcha ABEIPA tawhta mei vaw pua ta, rohpahâhpa a hlâtuhpa chyhsa za no nata sypangawh cha vaw kâ sao haw ta.
36 ABEIPA ta Mawsi chho ta,
37 Nâma ta mei cha hie patla la, theihthaipa Arawna sawchapawpa Eliaza cha mei tawhtapa mei lanazy cha la awpa ta chho teh. Hmo pathaihpa châ tlôh ta,
38 amo hrona chô liata moleipa sahlao mei lanazy tlai chhao cha; chatawhcha maisâh khuna a phiapa ta daipa châ mawh sy; ABEIPA hmiakô liata hlâpa châ ta, chavâta a pathaih. Cha cha Izarel pathlazy châta pahnona a châ aw,” tahpa ta.
39 Theihthaipa Eliaza chata a kâpa sahlao dawh mei lanazy cha la ta;
40 Izarel pathlazy chata a thei thlâh hana zy, Arawna pathla a châ leipa, pho hropa rai, ABEIPA hmiakô liata rohpahâhpa rao awpa ta amâ hnia lei nawpa zy, Kôra nata a sahlaozy hawhta ama y lei nawpa zy, Mawsi hmâpa ta a hnohta ABEIPA ta a reipa hawhta maisâh khu nawpa ta daih haw ei ta.
41 Châhrasala a mylâ chata, “ABEIPA chyhsazy nama thie,” tahpa ta Izarel pathla zawpi zydua chata Mawsi nata Arawna chô liata paphôh ei ta.
42 Mawsi nata Arawna chô liata zawpi amâ pôhpakhy nona chata ahmaohpakhypa poh-o lâ cha a heih ei ta; ameih ta vaw khu ta, ABEIPA rôhnahna a vaw luah ta.
43 Mawsi nata Arawna cha ahmaohpakhyna poh-o tlyhmia lâna chata vawh ei ta,
44 ABEIPA ta Mawsi chho ta,
45 “He zawpi hry tawhtapa he a hnei sai teh u, sôkhata ei pahleipadia thei nawpa ta,” tahpa ta. Chatawhcha âmo cha â khu lâta pao ei ta.
46 Mawsi ta Arawna hnohta, “Na mei lana la la, maisâh tawhtapa mei soh la, rohpahâhpa mia la, zawpi lâta siekhei parah la, ama châta aryhna tao teh; ABEIPA tawhtapa hiehâhna a vaw pua, hri a charei pathao hai,” tah ta.
47 Arawna chata Mawsi a reipa hawhna chata la ta, pôhpakhypa sahlao hry liata a ngia ta; hri cha zawpi hry liana chata charei pathao ta, rohpahâhpa cha mia ta, zawpi châna chata aryhna tao ta.
48 A thihpa nata a hrohpa likawh liata a dua ta; hri cha a pai haw ta.
49 Chatawhcha Kôra kyh liata a thipa rei leipa ta, hri ta a thipa zydua cha thy kha nata sâh palih nata za sari ama châ.
50 Arawna cha ahmaohpakhyna poh-o chhikao liata Mawsi lâna chata kua heih ta, chatanachata hri cha a pai haw ta.