Lôpanô tawhta ti a puanazie (Pu 17: 11-17)
1 Izarel pathla pôhpakhypa sahlao zydua cha thla khana liana chata Zin râhpathohpa liata a ngia ei ta, zawpizy chata Kadesa liata y ei ta; cha liana chata Miria cha thi ta, cha liana chata pabu ei ta.
2 Chatawhcha pôhpakhypa sahlao châta ti y leipa ta; Mawsi nata Arawna kyh liata a ahmaohpakhy ei ta.
3 Zawpi chata, “ABEIPA hmiakô liata, eima unawhpazy ama thi nona khata, keimo chhaota eima thi awpa ta Khazohpa ta maniah a pasai ha awpa tlai!
4 Khazia ABEIPA zawpi sahlaozy he thi awpa ta râhpathohpa liana heta na chhihtha, keimo nata eima sahrohzy chhaota?
5 Khâpavâta ma he râh pha lei ngaitapa liata maniah a chhi awpa ta Izi râh tawhta maniah na papua tly? Sa zy, theiku zy, krezô zy, pawmikranat zy y leina su châ ta; ti do awpa rai y hra vei, tahpa ta Mawsi liata paphôh ei ta.
6 Mawsi nata Arawna cha zawpi hry tawhtapa cha ahmaohpakhyna poh-o chhikao lâta vawh ei ta; â khu lâta pao ei ta. ABEIPA rôhnahna cha ama hnohta a vaw luah ta,
7 ABEIPA ta Mawsi hnohta,
8 Chôchahrei la la, pôhpakhypa sahlaozy cha hmaohkhata paysa la, nâ nata na unawhpa Arawna chhaota, ama mohmô liata lôpanô cha ti papua awpa ta chho la; lôpanô tawhtapa cha ti lapa aw chi ta; chatanachata pôhpakhypa sahlao nata ama sahrohzy cha na padosa aw,” tahpa ta chho ta.
9 Mawsi chata ABEIPA hmiakô tawhtapa chôchahrei cha a biepiepa hawhta la ta.
10 Mawsi nata Arawna chata pôhpakhypa sahlao cha lôpanô kiapâh liana chata paysa ei ta, ama hnohta, “Atyhmâhpa saih u, pachâ teh u; he lôpanô tawhtapa he, ti eima cha lapa aw mâ?” tah ei ta.
11 Mawsi chata a bâh pazawh ta, lôpanô cha a chôchahrei ta ei no tu ta; ti thata vaw pua ta, pôhpakhypa sahlaozy nata ama sahrohzy chata doh haw ei ta.
12 ABEIPA ta Mawsi nata Arawna hnohta, “Na ngâ leipa eichi ta, Izarel pathlazy mohmô liata eina palyupalih leipa vâ eichi ta, he pôhpakhypa sahlao he ei piepa râh liana chata chhihtha aw veih ei chi,” tah ta.
13 He he Meriba tizy cha a châ, Izarel pathlazy chata ABEIPA cha a dyuh ei ta, cha liana chata palyupalihpa ta a y hawpa vâta.
Edôma mo ta Izarel siepakhô a pasaih leina
14 Mawsi ta Kadesa tawhta Edoma abeipa hnohta chyhsa tuah ta, “Na unawhpa Izarel chata hetana heta a tah: Eima chô liata pasa taona a vaw tlôpa zydua he pahno chi ta:
15 eima mahpawzy Izi râh lâta zu ei ta, bohpi Izi râh liata eima ypa zy; Izi mozy ta keimo nata eima mahpawzy a pha lei ngaitapa ta maniah ama taonaziezy kha;
16 ABEIPA pado pi ta, eima ao cha thei ta, vâlyuhchâpa vaw tuah ta. Izi râh tawhtapa maniah papua ta; na khihnarâh a hnia chaipa khih Kadesa liata y pi ta.
17 Ngiachhiepa ta na râh he eima sie pahlie awpa ta maniah pasai mah y. Lyu tlyma, kresadô liata tlyma, sie leipa aw pi ta. tikhaohrei tizy doh hra aw ma pi; abei lâlai liata sie lymâ aw pi ta, na râh eima khô hlâ lei cha, chachâh lâ tlyma, chavei lâ tlyma tlei aw ma pi,” tah ta.
18 Châhrasala Edôma chata a hnohta, “Eina sie pahlie awpa chi châ vei, eina chapia chi khiahtala châ dyuh awpa ta zaozi chhaota ei thyu aw,” tah ta.
19 Izarel pathlazy chata a hnohta, “Lâlai lâta khy aw pi ta; keimo nata eima sahroh ta ti eima doh khiahtala a mâ cha eima cha pie aw; hmo hropa khâpahmah tao leipa ta phei ta sie pahliepa ta maniah pasaih teh,” tah ei ta.
20 Ano chata, “Sie pahlie aw veih eichi,” tah ta. Edôma mo cha zawpi hluh ngaitapa nata chyhsa thatlô ngaitapazy chhaota âmo a dyuh awpa ta vaw pua haw ta.
21 Edôma chata Izarel chyhsazy cha a râh liata sie awpa pasaih khao leipa ta; chatanachata Izarel mozy chata kua sai haw heih ei ta.
Arawna Hawra Tlâh liata a thi
22 Kadesa tawhta pua ei ta, Izarel pathla zawpi zydua chata Hawra Tlâh kei tlô ei ta.
23 ABEIPA ta Mawsi nata Arawna cha Edôma râhri a daihpa Hawra Tlâh liata bie a chho ta.
24 “Arawna cha a chiheihzy hnohta pahlyhpa a châ aw; Meriba tizy liana khata, ei biezy a dyuhpa ta namâ typa vâna khata, Izarel pathlazy ei piepa râh liana chata a ngia aw vei.
25 Arawna nata a sawchapawpa Eliaza cha Hawra Tlâh liata a vaw chhi teh;
26 Arawna cha a chysiazy pahluh pa la, a sawchapawpa Eliaza paky teh; Arawna cha a chiheihzy hnohta pahlyhpa châ aw ta, cha liana chata a thi aw,” tahpa ta.
27 Mawsi chata ABEIPA biepiepa hawhta tao ta; zawpi zydua mohmô liata Hawra Tlâh liata khy ei ta.
28 Mawsi chata Arawna cha chysiazy pahluhpa ta, Eliaza paky ta; chatawhcha Arawna cha tlâh laki liana chata thi haw ta. Mawsi nata Eliaza cha tlâh tawhtapa cha chô ei ta.
29 Zawpi zydua chata Arawna a thi tahpa ama pahno nata, Izarel sahlao zydua chata noh sythôh mâchhie sa ei ta.