1 Izarel sahlao byhnâ awpa cha ABEIPA khonazie a châ tahpa Balama ta a pahno nahta, a noh hro ta a taopa hawhna chata dyuthaina lâta tao awpa ta sie leipa ta, râhpathohpa lâta tlao pangai ta.
2 Balama cha sai ta, Izarel chyhsazy cha ama pho yzie lymâ ta ypa ta hmô ta. Chatawhcha Khazohpa Thlahpa a chô liata vaw tlô ta,
3 bie cha vaw reih ha ta, “Beôra sawchapawpa Balama mo pavâh ta,Khazohpa biezy pahno ta,
4 Atotaotheipa a luahna hmô ta, paopa ta,a mo a pavâh hawpa cha ta:
5 Hy Zakaw sahlao nama poh-ozy cha a pha kaw dia. Hy Izarel sahlao namâ chhyna byureihzy cha!
6 Saikao hawhta padia zualuah ta, chavah kiah liata sahdô hawhta, ABEIPA lopa a lao hawhta chavah liata, sidy thozy hawhta ama châ.
7 A ti byh tawhta ti loh aw ta, a chi cha ti hluhpizy liata y aw ta, a bei cha Akaka hlâta rôhnah aw ta,a khihnarâh cha parôhnahsapa ta a y aw.
8 Izi tawhtapa Khazohpa ta chhihtha ta; chaoliah tha hawhta ama phaoh, ama khakhaipa pho hropazy cha palâ khai aw ei ta. ama ruzy pakei aw ei ta, ama châtai ta ama ka aw.
9 A bôh ei ta, chakeibarôhneipa hawhta a byu ei ta,chakeibarôhneipa panô hawh tlaita ahy e a pa thyu aw? Byhnâ cha aw patuhpa maih cha, byhnâ awpa ta y sala, chhie cha sapatuhpa maih cha, chhie sapa ta y mawh sy,a tah, tah ta.
Balama chhochhieliepa
10 Balama chô liana chata Balaka pathi cha ia ta, a ku chabaih ta, Balaka chata Balama hnohta, “Ei khakhaipazy chhiesa awpa ta cha aw na ta, ei thôh dua byhnâ aw chi ta.
11 Chavâta na yna lâ sie syulyu teh; rôhnah ngaitapa ta pasasa awpa ta cha pachâ na ta, châhrasala ABEIPA ta ei cha pasasa awpa a cha pakhâ ha hi,” tah ta.
12 Balama chata Balaka hnohta,
13 “Balaka heta a o cha tâkâ nata ngôh ta biepa ta eina pie awpa châ hrasala, a phana lâ tlyma, a chhiena lâ tlyma, keimo palôhrupa a puapa chata, ABEIPA bie khô lâta cha khâpahmah tao va na; ABEIPA ta a reipa maih cha ei reih aw,’ tahpa ta na chyhsa tuapazy hnohta chhao reih haw rai va na mâ?
14 Ei chyhsazy hnohta sie ha aw na ta; a vy teh, he chyhsazy heta atahmâ tawhta na chyhsazy chô liata ama taonazie awpa ei cha chho tua aw,” tah ta.
15 Chatawhcha ano chata bie cha reih ta, Beôra sawchapawpa Balama bie cha,cha chyhsa bie cha mo pavâhpa,
16 Khazohpa biezy a theipa, chônô chaipa pahnona pahnopa, Atotaotheipa a luahna a hmôpa, paopata, a mo a pavâh hawpa cha ta:
17 Ano cha hmô na ta, atahmâ ta a ypa hawhta châ leipa ta; sai na ta, lâ hniapa ta hawhta châ leipa ta:Zakaw tawhta awhsi vaw pua aw ta, Izarel tawhta ryureina chôchahrei vaw pua aw ta; Môaba râh tlokhuh ta chhô pahlie aw ta, tyhreina saw zydua a panawhsa aw.
18 A khakhai tyhpa Edôma a hnei aw, Seira zy cha a hnei hra aw, Izarel topa a pha chhôhta cha,
19 Zakaw tawhta ahy tlyma a bei aw ta, khi a y tlakaihpazy cha a pahleipadia aw! a tah,tah ta.
20 Amale lâ a heih ta, bie cha reih ta, “Amale cha phopi thaby chaipa a châ tarawpa ta, a chhâna lâ cha leidiana a châ,” tah ta.
21 Keni mo lâ a heih ta, bie cha reih ta, “Na yna su cha â i ta, na bu cha lôpanô liata tupa a châ;
22 châhrasala Keni cha roryhrapa ta y aw ta, Asahu sahlao ta sei ta amâ châ chhina taihta,” tah ta.
23 Chatawhcha bie cha reih heih ta,“Khazohpa ta he hawhta a tao nota, ahy e a hroh thei aw tly?
24 Châhrasala Kiti râh tawhta balyhzy vaw tlô aw ta,Asahu riepathei aw ei ta, Ebe riepathei aw ei ta,ano chhao a leidia aw,” tah ta.
25 Chatanachata Balama cha thyu ta, a khih lâta sie haw ta, Balaka chhao a di haw hra ta.