Ariena su tawhta pathaih leipazy topa ta ama y
1 ABEIPA ta Mawsi chho ta,
2 Izarel pathlazy cha amâ riena su liata aphawhpa zydua nata a lôpa a hneipa zydua nata thina vâta a pualeipa maihzy cha papua khai awpa ta bie pie teh;
3 a chapaw, a chanô ta, papuapa ta ariena su khôtho lâ na soh awpa a châ; a liahliata ei pahrâ tyhpa amâ riena su cha ama papua pathlei aw na,” tahpa ta.
4 Izarel pathlazy cha cha hawhna chata tao ei ta, ariena su khôtho lâta soh ei ta; ABEIPA ta Mawsi hnohta a reipa hawhta, Izarel pathlazy chata tao ei ta.
Thôna kyh ryhpa bie
5 ABEIPA ta Mawsi chho ta,
6 Izarel pathlazy hnohta reih la, chapaw tlyma, chanô tlyma ta, ABEIPA chô liata hmo khâpa rai vaw paraopa ta, thailei châ sala,
7 a paraona liana chata ama phuah awpa a châ, paraona mâ cha â ki ngaitapa ta thô awpa châ ta, a su pangawh ta pachhaih ta su kha a paraona pa paw cha a pie baichha awpa a châ.
8 Anodeikuacha moleina mâ a totuhpa chata sanawh a hnei leipa khiahtala moleina ty ABEIPA liata a hlâpa cha theihthaipa tovyuh awpa châ aw ta, aryhna mietahkupa tôhpa chhaota aryhna a tao awpa a châ aw.
9 Chatawhcha Izarel pathlazy hmo pathaihpa hiepa hlâna zydua theihthaipa hnohta a hlâpa maih cha, theihthaipa tovyuh châ aw ta; chyhsa ta theihthaipa a piepa maih cha a tovyuh a châ aw, tahpa ta,” tah ta.
Hiatliana kyh ryhpa bie
11 ABEIPA ta Mawsi chho ta,
12 Izarel pathlazy hnohta reih la, ama hnohta, chyhsa, a lahpinô ta tao pathleipa ta molei sai sala,
13 chyhsa ta a ziakhei ha sala a vahpa ta pahno tlôh leipa sala, cha hawhta a y thlâhpa ta a papuapalei thlâh ha tlôhpa ta, phuah tlôh leipa ta, a pahnotuhpa y leipa ta, pahnopa vaw châ sala;
14 hiatliana palôhrupa phaohpa ta, a lahpinô a papuapalei vâna chata ngâh leipa sala tlyma; cha leipa ta apapuapalei leipa chhaota a lahpinô cha hiatliapa ta ngâ leipa sala;
15 cha hawhta a châ khiahtala, cha chata a châta hmohlâpa bâli sâh viahdie ephah su hrawh pachhaihpa ta su kha cheihpa awpa a châ; sathaw hry awpa châ leipa ta, deiryh sopa awpa châ hra vei, hiatliana niepa hlâna, pahno thlâh hana hlâna paraona pahnona châ tlôh ta.
16 Chatawhcha theihthaipa ta a vaw chhi aw ta, ABEIPA hmiakô liata paduasa aw ta;
17 theihthaipa chata alei beih ta ti pathaihpa la aw ta, achhyna byureih siphiah liata buhchadoh la aw ta, ti liana chata mia aw ta.
18 Theihthaipa chata chanô cha ABEIPA hmiakô liata paduasa aw ta, a sâ pathliahsa aw ta, pahno thlâh hana niepa hlâna hiatliana atheihna hlâna cha a ku liata chabasa aw ta. Theihthaipa chata a chhiesana patlôsatuhpa ti khapa cha chaba aw ta.
19 Chatawhcha theihthaipa chata chanô cha chhie pasasa aw ta, chanô hnohna chata, ‘Na vahpa bie ry liata na y chhôhta chyhsa hropa ahyhmah ta ama châ ziakhei leipa, puana lâta na sie leipa khiahtala a chhie cha patlôsatuhpa, he ti khapa tawhna heta na pathaih aw.
20 Anodeikuacha na vahpa bie ry liata na y chhôhta parao pathleipa ta papuapa ta, na vahpa leipa, chyhsa ahy tlyma a châ ziakhei khiahtala pathaih aw va chi, a tah awpa a châ,
21 (theihthaipa chata chanô cha a chhie pasasa aw ta, chanô liata theihthaipa chata), ‘ABEIPA ta na byhpi pazaohsa ta, na py a pathlohsa khiahtala ABEIPA ta na chiheihzy a chhie a totuh awpa ta cha tao mawh sy;
22 a chhie patlôsatuhpa, he ti he na ri liata a ngia aw ta, na py pathlohsa aw ta, na byhpi pazaohsa aw ta,’ tah aw ta. Chatawhcha chanô chata, ‘Amen, Amen,’ tah aw ta.
23 Chatawhcha theihthaipa chata cha a chhiesana biezy cha, châbu liata roh aw ta, ti khapa liana chata a pachie awpa a châ,
24 chanô cha a chhie a patlôsatuhpa ti khapa cha a padosa awpa a châ, a chhie a patlôsatuhpa ti cha a py chhôh lâta a ngia aw ta, a vaw kha aw.
25 Chatawhcha theihthaipa chata hiatliana niepa hlâna, chanô ku liatahpa cha la aw ta, ABEIPA hmiakô liata niepa hlâna cha hie aw ta, maisâh lâta a vaw khei aw;
26 theihthaipa chata niepa hlâna pahno thlâhna cha pazah kha la aw ta, maisâh liana chata rao aw ta, cha khai tawhna chata ti cha chanô a padosa awpa a châ.
27 Ti a padosa na chata papualeipa ta a vahpa chô liata hmo paraopa a châ khiahtala, a chhie a patlôsatuhpa ti cha a py chhôh lâta a ngia aw ta, vaw kha aw ta, a py vaw thlo aw ta, a byhpi vaw zaoh aw ta, chatanachata chanô cha a chiheihzy a chhie a patosatuhpa a vaw châ aw.
28 Anodeikuacha chanô cha a papuapalei leipa ta a pathaih khiahtala, pathliepa ta y aw ta, saw a phaoh thei lymâpa a châ aw.
29 He he lahpinô parao pathleipa a vahpa bie ry liata chyhsa hropa nata a papuapalei tlyma,
30 chapaw ta hiatliana palôhrupa phaohpa ta lahpinô a hiatlia tlyma liata pachianazie châ ta; chatanachata ABEIPA hmiakô liata a chhie sa aw ta, theihthaipa chata he ryhpa zydua hawhna heta a chô liata a tao awpa a châ.
31 Chapaw cha paraona liana chata pathaih aw ta, chanô cha a moleina maoh a phaoh aw, tah teh,” tah ta.