Livai sahlao rai ama hria awpa
1 ABEIPA ta Mawsi nata Arawna bie chho ta,
2 Livai sawchapawpazy hry liata Koha pathlazy a pathla pathla ta, chhôhkha ta
3 kô sythôh tawhta a chôlâ kô sypangawh taihta chakaona rai ahmaohpakhyna poh-o liata hria awpa zydua zie cha reih khai teh u.
4 Ahmaohpakhyna poh-o su pathaih chaipa liata Koha sawchapawpazy raihria awpa cha he he a châ.
5 Ariena su amâ pasiena maihta Arawna cha, a sawchapawpazy chhaota a ngia aw ei ta, su pathaihpa pohraipa la aw ei ta, cha chata Biehraina Byh khu aw ei ta;
6 cha cha pihvao vo ta khu aw ei ta. Cha cha poh nohpa ta khu aw ei ta, a lâzy ama chahraoh awpa a châ.
7 Chatawhcha viahchhâ sopa tlâhkhai chô liata poh nohpa phaw aw ei ta, cha liana chata beihkoh zy, phiahthla zy, biebuh zy nata nyu zy a patlai na awpa ama soh awpa a châ; cha chô liata chi leipa ta viahchhâ sopa cha, cha liana chata a y awpa a châ;
8 cha cha poh nohsaihpâpa ta khu aw ei ta, ama khuna pihvao vo ta khu aw ei ta, a lâzy ama chahraoh awpa a châ.
9 A pakhaihtuhpa meiôh sona nata cha châta ama hmâ awpa a meiôh zy, a chhaichhi zy, meipaoh sona zy, sathaw ôh zydua poh nohpa ta ama khu awpa a châ:
10 cha châ nata a chhaichhi zydua cha, a khuna pihvao vo ta khupa ta, â syna liata ama soh awpa a châ.
11 Chatawhcha ngôh maisâh cha poh nohpa ta khu aw ei ta, a khuna pihvao vo ta khu heih aw ei ta, a lâ ama chahraoh awpa a châ;
12 su pathaihpa liata ama chakaona hmobaoh zydua cha la khai aw ei ta, poh nohpa ta chaty aw ei ta, a khuna pihvao vo ta khu aw ei ta, a syna liata ama soh awpa a châ.
13 Chatawhcha maisâh liata meipaoh cha hru khai aw ei ta, a chô liata poh nohpa phaw aw ei ta;
14 a chô liana chata ama chakaona hmobaoh zydua, mei lana zy, sa thaona thua kohpa zy, buhchâh lina zy, rahô zy, maisâh hmobaoh zydua soh aw ei ta; a khuna pihvao vo ta khu aw ei ta, a lâ ama chahraoh awpa a châ.
15 Arawna nata a sawchapawpazy ta su pathaihpa nata su pathaihpa hmobaoh zydua ama khu khai nahta, amâ riena su amâ pasiena maihta Koha sawchapawpazy cha a sy awpa ta ama hria awpa châ ta, châhrasala hmo pathaihpazy cha ama hria awpa châ vei, ama hria khiahtala ama thi aw. Cha cha ahmaohpakhyna poh-o liata Koha sawchapawpazy tovyuh awpa a châ.
16 Theihthaipa Arawna sawchapawpa Eliaza hria awpa cha, pakhaih awpa sathaw zy, rohpahâhpa zy, chi leipa ta viahchhâ niepa hlâna zy, sathaw thupa zy, achhyna byureih zy, cha liata hmo a ypa zydua, su pathaihpa nata hmobaohzy pachâ awpa a châ,” tahpa ta.
17 ABEIPA ta Mawsi nata Arawna chho ta, 18 “Koha pathla chhôhkha cha Livai mozy hry tawhta lei thlâh ha leipa ta;
19 hmo pathaih chaipazy ama hnia nota, thi leipa ta ama y thei nawpa ta, he hawhna heta tao teh u; Arawna nata a sawchapawpazy cha a ngia sala ama hria awpa nata ama tovyuh chyu rao pâ mawh sy,
20 anodeikuacha hmo pathaihpa mo awpa ta buakha chhao a ngia kha ei se, amâ ngia khiahtala ama thi aw,” tahpa ta.
21 ABEIPA ta Mawsi chho ta,
22 Kasao sawchapawpazy chhao ama chhôhkha ta a pathla pathla ta reih khai teh;
23 kô sythôh tawhta a chôlâ kô sypangawh taihta, chakaona rai ahmaohpakhyna poh-o liata hria awpa zydua zie cha reih khai teh.
24 Kasao pathla sahlao tovyuh cha chakaona lâ nata phaona lâ he a châ:
25 achhyna byureih pohraipazy ahmaohpakhyna poh-o chhikao pohraipa zy,
26 tlyhmia dôhpa pohraipa zy, tlyhmia dôhpa chhikao pohparaipa zy, achhyna byureih nata maisâh kiapâh liata a khawhri zy, a chhaichhi zydua zy, phaoh aw ei ta; tao byuhpa maihta ama tao awpa a châ.
27 Kasao sawchapawpazy raihria phaona lâ nata chakaona lâta ama tovyuh zydua cha Arawna nata a sawchapawpazy reisai châ aw ta; ama phaoh awpazy taihta rao pa awpa ta bie na pahneisa aw.
28 Cha cha ahmaohpakhyna poh-o liata Kasao pathla sawchapawpazy chakaona cha a châ, tao awpa cha theihthaipa Arawna sawchapawpa Ithama raopa a châ.
29 Merari sawchapawpazy cha, a pathla pathla ta chhôhkha ta na reih awpa a châ;
30 kô sythôh tawhta a chôlâ kô sypangawhpa taihta ahmaohpakhyna poh-o liata a hria awpa zie na reih khai awpa a châ.
31 Ahmaohpakhyna poh-o liata ama chakaona ama tovyuh awpa cha he he a châ: achhyna byureih thophia paryhpa zy, a tlâh zy, a tôh zy, a patyuna zy,
32 a tlyhmia dôhpa tôh zy, a patyuna zy, a khaipâna zy, a khawhri zy, a chhaichhi zydua nata a hmobaoh hropa zydua; a phaohpa zy ama moh aw lymâ chyupa ta ama tovyuh awpa na rao awpa a châ.
33 Cha cha theihthaipa Arawna sawchapawpa Ithama sahlao ta a ahmaohpakhyna poh-o liata Merari sawchapawpazy pathlazy sahlao ta ama chakao awpa taihta, ama chakao nawpa zie awpa a châ,” tahpa ta.
34 Mawsi nata Arawna nata pôhpakhypa sahlao hry liata pawhrâhpazy chata Koha sahlao sawchapawpazy cha a pathla pathla ta chhôhkha ta,
35 ahmaohpakhyna poh-o liata a hria awpa zie cha kô sythôh tawhta a chôlâ kô sypangawhpa taihta reih ei ta;
36 cha sahlao a pathla ta ama reipa cha sâh no nata za sari nata sypangawh ama châ.
37 Chazy cha ahmaohpakhyna poh-o liata chakao tyhpa Koha sahlao pathla ama reipa Mawsi hmâpa ta ABEIPA biepiepa hawhta, Mawsi nata Arawna ta ama reipazy a châ.
38 Kasao sawchapawpazy a pathla pathla ta chhôhkha ta.
39 ahmaohpakhyna poh-o liata hria awpa ta a chakaopa zie cha kô sythôh chôlâ, kô sypangawhpa taihta reipa châ ei ta,
40 cha a pathla pathla ta chhôhkha ta ama reipazy cha sâh no nata za charu nata sythôh ama châ.
41 Chazy cha Kasao sawchapawpazy pathla sahlao ahmaohpakhyna poh-o liata a chakaopa sahlao zydua ABEIPA biepiepa hawhta Mawsi nata Arawna ta ama reipazy a châ.
42 Merari sawchapawpazy ahmaohpakhyna poh-o liata hria awpa ta a chakao awpazy cha,
43 a pathla pathla ta chhôhkha ta, kô sythôh tawhta a chôlâ kô sypangawh taihta reipa châ ei ta,
44 a pathla pathla liata chhôhkha ta ama reipazy cha, sâh thôh nata za no ama châ.
45 Cha cha Merari sawchapawpazy pathla sahlao ama reipa Mawsi hmâpa ta ABEIPA biepiepa hawhta, Mawsi nata Arawna ta ama reipazy cha a châ.
46 Livai sahlao chakao awpa nata ahmaohpakhyna poh-o liata phaohpa phao awpazie,
47 a pathla pathla ta chhôhkha ta kô sythôh tawhta a chôlâ kô sypangawh taihta Mawsi nata Arawna nata Izarel sahlao pawhrâhpazy chata reih ei ta,
48 cha ama reipazy cha sâh charie nata za pangawh nata sycharie ama châ.
49 Mawsi hmâpa ta ABEIPA biepiepa hawhta chyhsa to ama hria awpa nata ama chakaonazie lymâ hawhta reipa châ ei ta; cha hawhna chata ABEIPA ta Mawsi bie a piepa hawhta reipa ama châ.