ABEIPA ta sa piepa bie taih ta
1 Zawpizy chata ABEIPA nakhaoh theina liata paphôh thaipazy hawhta hmo pha lei ngaitapa reih tyh ei ta; cha cha ABEIPA ta a thei nah ta, a pathi-ia haw ta, chatanachata ABEIPA mei cha ama hry liana chata vaw pua ta, amâ riena su pai lâchhâ cha kâ ta.
2 Zawpizy chata Mawsi aw ei ta; chatawhcha Mawsi ta ABEIPA lâta thlahchhâ ta, mei cha dia ha ta.
3 Cha su moh cha Taberah bi ei ta, ABEIPA mei cha ama hry liata a vaw puapa vâna chata.
4 Ama hry liata pho hropa nata a hnei pahlaopazy chata sa ni khona vaw hnei haw ei ta; Izarel mo chhao cha heih ei ta, “Ahy e sa niepa maniah a pie aw?
5 Khodâh hawhta Izi râh liata nga eima nie tyhpazy cha a thei thlâh ha pi ta, athei zy, bokaizy, khâchhao heipa niepazy, khâchhao biapazy, khâchhao râhpazy chhao;
6 châhrasala atahmâ cha eima lathli a chawh khai haw, khâpahmah hnabeisei awpa y vei, mâna dei leipa heta cha,” tah ei ta.
7 Mâna cha kaoriady chi hawhta â lânazie ta cha bedelium hawhta a châ.
8 Chyhsazy chata a huah ei ta, charohna liata charoh ei ta, sôkhaoh liata zy daih ei ta, beih liata chhoh ei ta, viahchhâ lâta zy tao ei ta; niepa ta, cha sathaw ta chateipa viahchhâ hawhta châ ta.
9 Ariena su liata diati a tla nota mâna cha tla hra ta.
10 Zawpizy cha ama chhôhkha chyuta ama poh-o chhikao liata ama cha tahpa, Mawsi ta a pahno nah ta; ABEIPA pathi cha thata ia haw ta, Mawsi cha a palôh châ leipa ta.
11 Mawsi ta ABEIPA lâta, “‘Khâpavâta e, cha chakaotuhpa he rietheipa ta eina paysa chi? Kheihtazie ta e, na mo a dy leipa ta he zawpi zydua phaohripa he ei chô liata na pahnieh?
12 He zawpi zydua he ei sapa ma ama châ? ‘Ama mahpawzy chhiesapa ta pie awpa nâ taihpa râh lâta chhihtha awpa ta hawsaih a pyhtuhpa ta, sâhpi a pazy haipa â pyhpa hawhta na kalachhôh liata a py teh,’ eina tah awpa chi châta ma ei chhihtha ei?
13 He zawpi zydua pie awpa heta khataih tawhtapa e, sa ei hnei aw? ‘Eima nie awpa ta sa maniah pie teh,’ tahpa ta chapa ta nâ heihnao tlôh ei ta.
14 He zawpi zydua he keima deita ta cha phaoh thei va na, kei châta â hri tu haw.
15 He hawhta eina tao awpa chi khiahtala na ngiachhie la, na thie lâlao thlâh ha la, ei rie na pathei khao khâ,” tah ta.
16 ABEIPA ta Mawsi hnohta, ‘Izarelzy machâ, zawpizy machâ nata ama hyutuhpa a chapa ta na pahnopa, chyhsa sysari kha, ei hnohta a vaw chhi la, ahmaohpakhyna poh-o liata nâma nata hmaohkhata a duah awpata a vaw chhi teh.
17 Chatanachata za chô aw na ta, cha liana chata bie ei châ vaw chho aw; nâma liata thlahpa cha ama chô liata soh aw na ta; nâma deita ta phaoh leipa ta, zawpizy phaohripa cha ama cha phaokhei aw.
18 Nâma ta zawpizy hnohta, “Mylâ châta a pathai khai ula, chatanachata sa cha nama nie aw; ‘Sa ni awpa ahy e maniah a pie aw, Izi râh liata kha eima pha thlâh bao na ta,’ tahpa ta ABEIPA nakhaoh theina liata cha eichi ta. Chavâta ABEIPA ta sa cha pie aw ei ta, nama nie aw.
19 Noh kha tlyma, noh no tlyma, noh pangawh tlyma, noh hraw tlyma, noh syno tlyma dei chhao châ leipa ta,
20 thla kha bohlo tlai, aina taih nata pali chhina taihta nama nie aw, nama hry liata ABEIPA cha khoh leipa ta, “Khazia e, Izi râh tawhtapa eima pua tly?” tahpa ta a hmiaôko liata nama tahpa vâta,’ tah mah y,’” tah ta.
21 Mawsi ta, “Ei ylâhpa zawpi sahlao phei ta a sie theipa thy charu châ ei ta, ‘Thla kha bohlo nie awpa sa ei pie aw!’ tah chi ta.
22 Mietakupa zaw nata sahroh zaw chhao thie pâ ei sihla, .amâ daih aw ma? Tilaipi nga zydua chhao patu pâ khai ei sihla, amâ daih aw ma?” tah ta.
23 ABEIPA ta Mawsi hnohta, ABEIPA ku cha a chyu ma? Na chô liata ei bie hawhta a tlô nahta tlô lei na pahno aw,” tah ta.
Machâzy chhochhieliepa
24 Mawsi cha pua ta. ABEIPA bie cha zawpizy chho ta; zawpi sahlaozy machâpa sysarizy cha aw ta, poh-o chheipâh liana chata paduasa ta.
25 Chatanachata ABEIPA cha ameih liana chata vaw chô ta, bie a vaw chho ta, ano liata thlahpa cha machâ sysarizy chô liana chata soh ta; thlahpa cha ama chô liata a y pata nahta chhochhielie ei ta. Châhrasala cha hawhna chata tao khao veih ei.
26 Ariena su liana chata chyhsa pano y ei ta, pakhapa moh cha Elda cha ta, pakhapa moh cha Meda a châ, thlahpa cha ama chô liata y ta; ropazy hry liata a hlaopa châ ei ta, ahmaohpakhyna poh-o lâna deikua chata vawh veih ei, ariena su liana chata chhochhielie ei ta.
27 Chatananachata satlia pakha a kei râ ta, Mawsi kei chho ta, “Elda nata Meda ta ariena su liata ama chhochhielie,” tah ta.
28 Nuna sawchapawpa Zawsua satlia dyu tawhta Mawsi a chakaotuhpa chata a chhy ta, “Ei beipa Mawsi y, pakhâ mah y,” tah ta.
29 Châhrasala Mawsi ta a hnohta, “Keima vâta a pachâ peimawhsapa ma na châ? ABEIPA chyhsa zydua cha hrohsopa châ khai ei sala, ABEIPA ta ama chô liata a thlahpa cha soh chyu sala! tah na châpa ta,” tah ta.
30 Chatanachata Mawsi cha ariena su liana chata a ngia heih ta.
ABEIPA ta mamozy pie ta
31 ABEIPA tawhna chata thlih vaw pathli ta, tilaipi tawhtapa mamo vaw phaoh ta, ariena su hiakha lâchhâh noh kha sie, a hiakha lâchhâh noh kha sie rairieh ta ariena su chheipâh liana chata alei tawhta dy no a sâhpa ta pathlasa ta.
32 Zawpizy chata cha noh, noh y nata zâkhidei nata a mylâ noh y ta mamo cha a huah ei ta; a huah chyh chaipa chhaota homer miahrawh a huah ta; ariena su chheipâh liana chata âmo châ chyu ta zawh ei ta.
33 Cha sa ama nie nota, ama nie khai hlâta, zawpizy chô liata ABEIPA pathi cha ia haw ta, zawpizy cha pasana hri ru ngaitapa ta ABEIPA ta hrie ta.
34 Cha su moh châta Kibrohatavah bi ta, cha liana chata sapa khona a hneituhpazy cha ama pabupa vâta.
35 Kibrohatavah tawhna cha zawpizy cha Hazro lâta sie ei ta; Hazero liana chata y haw ei ta.