Pathaih leipa pathaisana
1 ABEIPA ta Mawsi nata Arawna chho ta,
2 “He he ABEIPA biepiepa ryhpa cha a châ: Izarel pathlazy cha viahchao zeinô saipa, dyutlapa seina a hnei leipa, rao paky beih leipa amâ vaw chhi awpa ta chho teh.
3 Chatawhcha theihthaipa Eliaza pie aw chi ta, ano ta ariena su khôtho lâ a chhi aw ta, a hmiakô liata ahy tlyma ta a thie awpa a châ.
4 Theihthaipa Eliaza chata a kudy ta a thisaih la aw ta, ahmaohpakhyna poh-o hmia lâta a thisaih cha ei sari hie aw ta.
5 Ahy tlyma ta viahchao zeinô cha a mohmô liata rao aw ta; a vo zy, a sapa zy, a thisaih zy, a ie zy chhaota rao aw ta;
6 theihthaipa ta sidy tho nata hisaw lapa ta, lari saihpa la aw ta, viahchao zeinô ama raopa liana chata a thy awpa a châ.
7 Theihthaipa chata a chysiazy pasu aw ta, ti liata a ngai a si aw ta; cha khai tawhna chata ariena su lâta vawh aw ta, zâlâ taihta theihthaipa cha pathaih aw vei.
8 A raotuhpa chata ti liata a chysiazy pasu aw ta, ti liata a ngai a si aw ta, zâlâ taihta pathaih leipa a châ aw.
9 Chatawhcha chyhsa pathaihpa ta viahchao zeinô paopa cha la aw ta, ariena su khôtho lâ su pathaihpa liata soh aw ta; Izarel pathla zawpizy chata a pathaina ti châta hmâh awpa a châ, cha cha molei atheihna a châ.
10 Viahchao zeinô paopa a pakhytuhpa chata a chysiazy pasu aw ta, zâlâ taihta pathaih leipa châ aw ta. He he Izarel pathlazy châta nata pho hropa ama hnohta a ypazy châta chhâzaw ryhpa awpa a châ.
11 “Ahy ri rai a hriatuhpa maih cha noh sari pathaih leipa ama châ aw;
12 cha chyhsa cha noh thôh noh nata noh sari noh ta a pathai aw ta, a pathaih aw; anodeikuacha noh thôh noh nata noh sari noh liata a pathaih vei khiahtala, pathaih aw vei.
13 Ahyrai ta ahy ri rai hriapa ta a pathai vei khiahtala, ABEIPA achhyna byureih a papuapaleipa a châ, cha chyhsa cha Izarel chyhsazy hry tawhtapa pathlua awpa a châ; a pathaina ti cha a chô liata hie leipa a châpa vâta, pathaih aw vei, a pathaih leina cha a chô liata a y.
14 “Chyhsa poh-o liata a thi khiahtala he he a ryhpa awpa a châ: poh-o liata a ngiapa maih nata poh-o chhôh liata a ypa maih cha noh sari pathaih leipa ama châ aw.
15 Chatawhcha hmobao a pahypa, a pahruna ta pahru leipa maih cha, pathaih leipa a châ.
16 Ahyrai ta lyurâhpa liata zaozi ta thiepa tlyma, a thihpa ri tlyma, chyhsa ripa tlyma, thlâ tlyma, a hria khiahtala, noh sari pathaih leipa a châ aw.
17 A pathaih leipa chata molei atheihna paohpa cha la aw ei ta, beih liata ti a loh haipa nata ama soh aw;
18 chatawhcha chyhsa pathaihpa ta hisaw la aw ta, ti liata ny aw ta, poh-o zy, hmobaoh zydua zy, cha liata chyhsa a ypa zydua zy, rupa tlyma, thiepa ri tlyma, a thihpa ri tlyma, thlâ tlyma, a hriatuhpazy cha hie aw ta,
19 chyhsa pathaihpa ta noh thôh noh nata noh; sari noh ta chyhsa pathaih leipa cha hie aw ta, noh sari noh ta pathaisa aw ta, a chysiazy pasu aw ta, ti liata a ngai a si aw ta, zâlâ ta a vaw pathaih ha aw.
20 “Chyhsa pathaih leipa a pathaih leipa deikua chata ABEIPA su pathaihpa a papuapa leipa vâta cha chyhsa cha pôhpakhypa sahlao hry tawhta pathlua awpa a châ; a pathaina ti chata hie leipa châ ta, pathaih leipa a châ.
21 He he ama châta chhâzaw ryhpa awpa a châ. A pathaina ti ta hiepa maih chata ama chysiazy pasu aw ei ta; a pathaina ti a hriapa maih cha zâlâ taihta pathaih leipa ama châ aw.
22 Chatawhcha chyhsa pathaih leipa ta a hriapa maih cha pathaih leipa châ lymâ aw ta; cha chyhsa a hriatuhpa maih cha zâlâ taihta pathaih leipa ama châ aw,” tahpa ta.