1 Balama chata Balaka hnohta, “He liana heta maisâh miasari na taopa la, viahchao tôhpa pô sari nata mietahkupa tôhpa pô sari na chhuahdypa teh,” tah ta.
2 Balaka chata Balama a reipa hawhna chata tao ta; chatawhcha Balaka nata Balama chata maisâh tôh liata viahchao tôhpa pô kha nata mietahkupa tôhpa pô kha hlâ ei ta.
3 Balama chata Balaka hnohta, “Na raopa hlâna kiapâh liana heta a vaw duah thlâh ha la, kei cha ânano ta vawh aw na ta, ABEIPA cha bie eina chho awpa ta a vy ngyu aw ta; eina chhopa maih cha ei cha chho aw,” tah ta. Chatanachata su a pavâpa a sâhpa lâta khy ta.
Balama ta Izarel byhnâ aw ta
4 Khazohpa ta Balama cha a vaw tyh ta; ano chata a hnohta, “Maisâh miasari tao ha na ta, maisâh to liana chata viahchao tôhpa pô kha nata mietahkupa pô kha hlâ chyu na ta,” vaw tah ta.
5 ABEIPA ta Balama pakah liana chata bie soh ta, “Balaka hnohna chata kua heih la, kei reih pachhuah teh,” tah ta.
6 Chatanachata a hnohna chata kua heih ta, a raopa hlâna kiapâh liana chata a vaw duah thlâh ha ta, ano nata Môaba molaipa zydua chhao.
7 Ano chata bie cha reih ha ta.“Arama tawhta Balaka ta nâ chhi ta, nochhi lâ tlâh liata Môaba beipa chata,‘A vy la, Zakaw sahlao chhie maniah sapa teh, a vy la Izarel sahlao maniah pahaopa teh!
8 Kheihta e, Khazohpa a chhie sa leipa ta chhie ei sa awh? Kheihta e, Khazohpa a pahno leipa ei pahao aw?
9 “Lôpanô chô tawhta ano cha hmô tlôhna ta, tlâh tawhta âmo cha hmô na ta; pachâ teh, pho hropa ama châ, pho chyhpazy hry liata pahlao lei awpa ama châ!
10 “Zakaw sahlao buhchadoh cha ahy e ei thei aw ta, Izarel sahlao su palih ta pachhaih ta, su kha cha ahy e a reih thei aw, chyhsa siapa thipa hawhta thi hrapa ta, ei chhâna cha a chhâna hawhta châ se! tah ta.
11 Balaka chata Balama hnohta, “Eina tahzie chi he, kheihtazie ta e a châ? Ei khakhaipazy a chhiesapa awpa ta châ chhi na ta, byhnâ tlao aw chi ta,” tah ta.
12 Ano chata a chhy ta, “ABEIPA ta ei pakah liata a sopa cha ei reih thlyu awpa tlai, châ vei mâ?” tah ta.
13 Balaka chata a hnohta, “Su hro lâta sie heih tua ei si, cha tawhna chata na hmô thei aw ei; ama yna rakha zydua hmô aw chi ta, ama zydua deikua cha hmô khai cheingei aw va chi; cha tawhna chata a chhie maniah sapa mah y,” tah ta.
14 Zôphi lyu liata Piska laki lâta a chhi ta, maisâh miasari tao ta, maisâh to liana chata viahchao tôhpa pô kha nata mietahkupa tôhpa pô kha hlâ ta.
15 Balaka hnohna chata, “Hao liata ABEIPA bie ei kei chho chhôhta, na raopa hlâna kiapâh liana heta a vaw duah thlâh ha teh,” tah ta.
16 ABEIPA ta Balama cha a vaw tyh ta, a pakah liana chata bie soh ta, “Balaka hnohta kua heih la, a hnohta vaw reih pachhuah teh,” tah ta.
17 A hnohna chata vawh ta, araopa hlâna kiapâh liana chata vaw duah thlâh ha ta, Môaba molaipazy chhao a hnohna chata y hra ei ta. Balaka chata a hnohta, “ABEIPA ta khâpa e a vaw reih? tah ta.
18 Balama chata bie cha reih ha ta: “Thyu la, Balaka, nahthlie teh,Zipô sawchapawpa ei bi nahthlie teh,
19 Khazohpa cha hai a hmâhpa chyhsa hawhta châ vei, a palie a hmâhpa chyhsa sawchapawpa châ hra vei. A rei hawpa cha tao aw vei mâ? A vaw rei hawpa cha a pi patlohsa aw vei mâ?
20 Byhnâ aw awpa ta bie hmô na ta, byhnâ aw na ta, panano thei va na,
21 Zakaw sahlao paraona rai hmô leipa ta; Izarel sahlao liana chata tah raruahna hmô hra vei.ABEIPA ama Khazohpa cha ama hnohta y ta,ama hry liata ABEIPA palyupalihpa pyu a y.
22 Izi tawhta Khazohpa ta chhihtha ei ta, chaoliah tha hawhta ama hnei.
23 Zakaw sahlao lâta dyuthaina y vei, Izarel sahlao lâta mothaina y hra vei; Zakaw sahlao nata Izarel sahlao hnohta,’ Khazohpa hmo taopa cha! Palâsa lymâpa a châ.
24 Pachâ teh, zawpizy cha! Chakeibarôhneipa pano hawhta thyu ei ta, chakeibarôhneipa hawhta amâ zaw; ama sa taipa ama nie hlâta cha a byu veih ei, ama taipa thisaih ama dôh hlâ leita cha, tah ta.
25 Balaka chata Balama hnohta, “A chhiesa hra kha la, byhnâ aw hra khâ,” tah ta.
26 Châhrasala Balama chata a chhy ta, ‘ABEIPA ta a reipa zydua cha ei tao tlai awpa a châ,’ tahpa ta cha chho va na mâ?” tah ta.
27 Balaka chata Balama hnohta, “A vy teh, su hro lâta ei châ chhi aw; cha tawhna chata a chhie maniah sa pawpa ta Khazohpa ta â ryh a tah ngyu aw,” tah ta.
28 Chatanachata Balaka cha râhpathohpa heih lâ laki lâta a chhi ta.
29 Balama ta Balaka hnohna chata, “He liana heta maisâh miasari na taopa la, viahchao tôhpa pô sari nata mietahkupa tôhpa pô sari nâ chhuahdy pa teh,” tah ta.
30 Balaka chata Balama reipa hawhta tao ta, maisâh to liana chata viahchao tôhpa pô kha nata mietakupa tôhpa pô kha hlâ ta.