Arawna chôchahrei
1 ABEIPA ta Mawsi chho ta,
2 “Izarel pathlazy chho la, ama chhôhkha to châta chôchahrei miakha chyu, ama chhôhkha yzie lymâ ta, ama pawhrâhpa zydua hluhna zie chôchahrei miahrawhleino la la. Ama chôchahrei liana chata ama moh chyu roh teh,
3 chatawhcha Livai chôchahrei liana chata Arawna moh roh mah y. Ama chhôhkha to châta chôchahrei miakha lymâ a châ awpa a châ.
4 Bie eimâ chhona ahmaohpakhyna poh-o bie pahnosana hmiakô liata na soh awpa a châ.
5 Ei tlyh awpa chyhsa chôchahrei cha a chhyh thao aw ta; chatanachata Izarel pathlazy paphôhna, na chô liata ama paphôhna he, ei papai aw,” tahpa ta.
6 Mawsi chata Izarel pathlazy cha chho ta; ama pawhrâhpa zydua chata ama chhôhkha to châta, pawhrâhpa tota chôchahrei miakha lymâ, chôchahrei miahrawhleino pie ei ta; Arawna chôchahrei chhao cha ama chôchahreizy hry liana chata a hlao hra ta.
7 Mawsi ta bie pahnosana poh-o liata ABEIPA hmiakô liata chôchahreizy cha soh ta.
8 A mylâ chata Mawsi cha bie pahnosana poh-o lâna chata vawh ta; Livai chhôkha chata Arawna chôchahrei cha a chhyh thao ta, a pawpa chhaota pawh ta, almond hmohpa pathei ta.
9 Mawsi chata ABEIPA hmiakô tawhtapa chôchahrei zydua cha Izarel sahlaozy hnohta pua khei ta; vaw moh ei ta, âmo chôchahrei chyu cha la ei ta.
10 ABEIPA ta Mawsi hnohta, “Tyhmâhpa sawzy ama châ tahpa, pahnosa tyh nawpa ta Arawna chôchahrei cha bie pahnosana kiapâh liata soh heih teh, chatanachata ei chô liata amâ tyna he na papai thei aw, ama thi lei nawpa ta,” tah ta.
11 Cha hawhna chata Mawsi ta tao ta; ABEIPA ta bie a piepa hawhna chata tao ta.
12 Izarel pathlazy chata Mawsi hnohta, “He he eima leidia mâh tâh, eima rao khai haw, eima rao khai haw mâh tâh.
13 A vaw hniapa maih ABEIPA achhyna byureih a vaw hniapa maih cha thi lymâ ei ta. Eima thi khai aw mâ?” tah ei ta.