Livai sahlao hluhna lâ nata raihriana
1 Sinai Tlâh liata ABEIPA ta Mawsi bie â chho nota, Arawna nata Mawsi pathlapa chyhsazy, he sahlaozy he ama châ.
2 Hezy he Arawna sawchapawpazy moh cha ama châ: A pih tua chaipa Nada, Abihu zy, Eliaza zy, Ithama zy ama châ;
3 hezy he theihthaipa châta sathaw thupa theihthaipa rai hria awpa ta ama pananopa, Arawna sawchapawpazy moh cha a châ.
4 Nada nata Abihu cha Sinai râhpathohpa liata, mei hmâ lei awpa chi ABEIPA hmiakô liata ama hlâ nona khata, ABEIPA hmiakô liata thi ei ta; saw hnei leipa ei ta. Eliaza nata Ithama chata ama paw Arawna hro nota theihthaipa rai he hria ei ta.
5 ABEIPA ta Mawsi chho ta,
6 Livai chizy cha theihthaipa Arawna lâta chhihtha la ama chakao thei nawpa ta, a hnohta paysa teh.
7 Âmo châta achhyna byureih kiapâh liata ahmaohpakhyna poh-o liata chakaona rai hriapa ta ano nata a pôhpapakhypa zydua vyuhpa ta ama chakao aw.
8 Ahmaohpakhyna poh-o hmobao zydua a vao aw ei ta, Izarel pathlazy vyuhpa ta achhyna byureih chakaona rai ama hria aw.
9 Livai sahlaozy cha Arawna nata a sawchapawpazy hnohta pie aw eichi ta; Izarel pathlazy vyuhpa ta a hnohta pihpa ama châ.
10 Arawna nata a sawchapawpazy cha rao aw chi ta, ama theihthai châna cha, ama châ ngâthlâh ha aw; chi hropa a vaw châ hrapazy cha thiepa ama châ aw,” tahpa ta.
11 ABEIPA ta Mawsi chho ta,
12 Livai sahlaozy he, Izarel pathlazy hry tawhtapa, Izarel pathlazy saw tuapa chhi pahy tua chaipa vyuhpa ta, keima tlaita ei lapa châ ei ta. Livai sahlao cha kei eih ama châ aw,
13 saw tuapa zydua cha, kei eih châ tloh ei ta; Izi râh liata saw tuapa zydua ei thie sao nona khata Izarelzy hry liata saw tuapa zydua, a chyhsa a sahroh ta, kei eih châta ei pahawhpa a châ; kei eih ama châ aw: Kei he ABEIPA cha ei châ,” tahpa ta.
14 ABEIPA ta Sinai râhpathohpa liata Mawsi chho ta,
15 Livai pathlazy cha a chhôhkha nata a pathla pathla ta reih la; chapaw maih cha thla kha tawhta a chôlâ cha na reih awpa a châ,” tahpa ta.
16 Mawsi chata a tao awpa liata bie a piepa hawhta ABEIPA bie hawhna chata reih chyu ei ta.
17 Livai sawchapawpazy moh cha hezy he ama châ: Kasao zy, Koha nata. Merari ama châ.
18 Ama pathlatuhpa Kasao sawchapawpazy moh cha: Libni nata Shimei ama châ.
19 Ama pathlatuhpa Koha sawchapawpazy cha: Amira zy, Izha zy, Hebraw nata Uziel.
20 Ama pathlatuhpa Merari sawchapawpazy cha: Mahli nata Musi ama châ. He he ama chhôhkhazy lymâ hawhta Livai sahlao pathlazy cha ama châ.
21 Kasao cha Libni mozy, Shimei mozy pathlatuhpa a châ; he he Kasao mo pathlazy ama châ.
22 Chapaw zydua thla kha tawhta a chôlâ ama reipazy cha, sâh sari nata za pangawh tlai tloh ei ta.
23 Kasao mo pathlazy chata ama poh-o cha achhyna byureih notla lâchhâh ama parai awpa a châ.
24 Kasao mo chhôhkha pawhrâhpa cha Lael sawchapawpa Eliasa a châ aw.
25 Kasao sawchapawpazy ta ahmaohpakhyna poh-o liata ama mohôh awpa cha achhyna byureih poh-o nata a chôzy, ahmaohpakhyna poh-o chhikao pohraipazy a châ aw,
26 a dôhpachhôh tlyhmia raipazy, achhyna byureih kiapâh liata a dôhpachhôh tlyhmia chhikao poh-o pohparaipazy, maisâh kiapâh liatahpa zy; cha liata hmâ awpa khawhri zydua chhao.
27 Koha cha Amira mozy, Izha mozy, Hebraw mozy, Uziel mozy pathlatuhpa a châ; he sahlao he Koha pathlazy ama châ.
28 Chapaw zydua thla kha tawhta a chôlâ ama reinazie hawhta sâh chari nata za charu ama châ, su pathaihpa a mohôhtuh awpa cha.
29 Koha sawchapawpazy pathlazy chata achhyna byureih chhôh lâchhâh ta ama poh-o ama parai awpa a châ,
30 Koha pathlazy chhôhkha sanawh pawhrâh awpa cha Uziel sawchapawpa Elizapha a châ aw.
31 Ama mohôh awpa cha Biehraina Byh zy, tlâhkhai zy, sathaw meiôh sona zy, maisâh zy, su pathaihpa liata chakaona chhaichhi zydua, pohparaipa zy, cha liata chakaona hmo zydua a châ aw.
32 Chatawhcha theihthaipa sawchapawpa Eliaza cha Livai sahlao chhihthatuhpazy chhihthatuhpa a châ aw, su pathaihpa mohôhtuhpazy cha a vaih aw.
33 Merari cha Mahli mo nata Musi mo pathlatuhpa a châ; he sahlao he Merari pathlatuhpazy ama châ.
34 Chapaw zydua thla kha tawhta a chôlâ ama reinazie hawhna chata sâh charu nata za no ama châ.
35 Merari pathla chhôhkha pawhrâhpa cha Abihai sawchapawpa Zuriel châ ta; achhyna byureih maw lâchhâh ta ama poh-o ama parai awpa a châ.
36 Merari sawchapawpazy mohôh awpa ta raopa cha, achhyna byureih thophia paryhpa zy, a tlâh zy, a tôh zy, a patyuna zy, a chhaichhi zydua; chakaona chhaichhi zydua zy a châ aw;
37 a dôhpachhôh tlyhmia padôna tôh zy, a patyuna zy, a khaipâna nata a khawhrizy chhao.
38 Achhyna byureih nochhi lâchhâh ahmaohpakhyna poh-o kiapâh nochhi na lâta poh-o parai awpa cha, Mawsi nata Arawna nata a sawchapawpazy châ aw ei ta, su pathaihpa liata Izarel pathlazy chata a byuhpa maihta ama hria aw; pho hropa a vaw chahraopa maih cha thiepa ama châ aw.
39 ABEIPA biepiepa ta Livai sahlao pathla chapaw zydua thla kha tawhta a chôlâ Mawsi nata Arawna ta ama reipa zydua cha thy no nata sâh no ama châ.
Livai sahlao nata pih tuapa chatlaina
40 ABEIPA ta Mawsi hnohta, Izarel pathlazy hry liata saw tuapa chapaw thla kha tawhta a chôlâ zydua reih la, ama moh hluhnazie pahno teh.
41 Livai mozy cha (ABEIPA cha châ na ta) Izarel pathlazy hry liata saw tuapa zydua vyuhpa ta eina la pawpa chi a châ, Livai sahlao sahrohzy cha Izarel pathlazy sahroh zydua a patawh tuapa vyuhpa ta,” tah ta.
42 Mawsi chata ABEIPA ta bie a piepa hawhta Izarel pathlazy hry liata saw tuapa zydua cha reih ta.
43 Ama moh a hluhnazie hawhta thla kha tawhta a chôlâ saw tuapa chapaw zydua ama reipa zydua cha, thy no nata sâh no nata za no nata sysari nata pathôh ama châ.
44 ABEIPA ta Mawsi chho ta,
45 Izarel pathlazy hry liata saw tuapa zydua vyuhpa ta Livai sahlao cha la la, ama sahroh vyuhpa ta Livai sahlao sahroh; Livai sahlao cha kei eih ama châ aw: Kei he ABEIPA cha ei châ.
46 Livai sahlaozy hlâta ama hluhna cha Izarel pathlazy saw tuapa za no nata sysari nata pathôh chatlai nawpa ta
47 ama maluh hawhta sekel miapangawh chyu na la awpa a châ; su pathaihpa sekel hawhta na la awpa a châ, sekel cha gerah syno a châ,
48 a laipa sahlao chatlaina sôh cha Arawna nata a sawchapawpazy na pie awpa a châ,” tahpa ta.
49 Chatawhcha Mawsi chata Livai sahlao ta ama chatlai bâhpa ama chatlaina sôh cha la ta;
50 Izarel pathlazy saw tuapa tawhtapa sôh cha la ta, su pathaihpa sekel hawhta sâh kha nata za thôh nata sycharu nata miapangawh la ta;
51 ABEIPA ta Mawsi bie a piepa, ABEIPA bie hawhta Mawsi chata chatlaina sôh cha Arawna nata a sawchapawpazy pie ta.