Biephuahpa 1

Biephuahpa 1

Zisu Krista biephuahpa

1 Zisu Krista biephuapa, Khazohpa ta a hnohta a piepa, hmo thlai a vaw y awpa cha a seizy ta ama pahnosa thei nawpata; cha cha Krista ta a vâlyuhchâpa hmâpata a sei Zawhana vaw pahnosa ta.

2 Zawhana chata Khazohpa bie nata Zisu Krista pahnosana bie, a hmo hmôpa zydua cha pahnosa ta.

3 He chhochhieliena bie a reituhpa nata nahthlie ta a chhôh liata bie ropa a pyhtuhpazy cha ama nohhlao na; a daihti cha a hnia ha tlôh ta.

Awnanopa hlao sarizy anaohna

4 Zawhana chata Asia râh liata awnanopa hlao sarizy hnohna chata: A y haipa nata a y hawpa nata a vaw y awpa tawhta zy, a beidyuchhai hmiakô liata thlahpa pasari a ypa sahlao tawhta zy,

5 Zisu Krista bie a pahnosatuhpa ngâchhihpa, athihpa hry liatahpa a pih tua chaipa nata alei liata abeizy ryureituhpa tawhna chata, ngiachhiena nata adyhna nama hnohta y mawh sy. Kyh maniah pachâ ta, a thisaih tlaita eima moleinazy tawhtapa maniah pasi ta.

6 Khihnarâh nata a Khazohpa nata a Paw lâta theihthaipata maniah a taotuhpa hnohta, ano hnoh tlaita rônahna nata ryureina cha chhâzaw chhâna taih y mawh sy! Amen.

7 Nahthlie teh u, ano cha meihdozy nah chata a zu aw ta, mokhaoh tota hmô aw ta, ano a chôtuhpazy chhao khata; khizaw liata pho zydua ta ano ama chakhei hra aw. Cha tlai se: Amen.

8 “Kei, Alpha nata Omeka ei châ,” Abeipa Khazohpa, a y haipa nata a y hawpa nata a vaw y awpa, Atotaotheipa chata a tah.

Chyhsa Sawchapawpa aluahna

9 Kei Zawhana, nama unawhpa nata Zisu liata rietheina zy, Khihnarâh zy, tao hualuana zy cha taokheipa ei he, Khazohpa bie vâta nata Zisu pahnosana bie vâta Patmô liahpahlô ama tahpa liata y na ta.

10 “Abeipa noh ta Thlahpa ta vaw y na ta, ei hnôh lâta chiahmie paropa hawhta ao paro ngaitapata,

11 “Na hmo hmôpa cha châbu liata roh la, awnanopa hlao sarizy lâta, Ephesi lâta zy, Smyna lâta zy, Pekamu lâta zy, Thyatira lâta zy, Sadisa lâta zy, Philadelphia lâta zy, Laodisi lâna zy chata paphao teh,” a tahpa thei na ta.

12 Chatawhcha einâ chhyna ao hmô a chhuahpata a kaw heih na ta, ei kaw heih nah chata, ngôh meiôh sona miasari hmô na ta,

13 meiôh sona hry liata ahy tlyma chyhsa sawchapawpa hawhta, a phei pawhmao taihta poh a bupa a chachôhna liata ngôh chaisaina ta a saipa hmô na ta.

14 A luh nata a sâ cha mietahkupa hmi ngyupa hawhta nata dâhaw hawhta a ngyuhpa; a mokhaoh cha mei paleih hawhta a châ,

15 a pheipazahzy cha dawh pathliepa hawhta châ ta, patisana mei liata pathaisa hawpa hawhta châ ta; a ao cha tisaozy paropa hawhta a châ.

16 A ku chachâh lâ chata awhsi sâsari chaba ta, a pakah tawhta zaozi a koh nata a hâh a tiah rairiepa pua ta, a hmia cha noh a sa locho no hawhta a châ.

17 Ano cha ei hmô patanahta athihpa hawhta a phei thaby liata pao haw na ta. Ano chata a ku chachâh lâ cha ei chô liata pahniehpata ei hnohta, "Chi khah y, kei hmia tua chaipa nata hnôh chaipa nata.

18 a hrohpa cha ei châ; thi haw na ta, châhrasala nahthlie teh. chhâzaw chhâna taihta ei vaw hroh haw hih; Thina nata Athihpakhih châhbizy cha ei hnei hra.

19 Chatanachata na hmo hmô chiehpa, hmo a y haipa zy nata atahmâ tawhta hmo a vaw y awpazy cha roh teh.

20 Ei ku chachâh lâ liata awhsi sâsari a ypa na hmôpazy nata ngôh meiôh sona sâsarizy bierupa cha, awhsi sâsari cha awnanopa hlao sari lyuhchâpazy châ ei ta; meiôh sâsari cha awnanopa hlao sarizy cha ama châ. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 2

Biephuahpa 2

Ephesi Awnanopa lâta bietapa

1 “Ephesi liata awnanopa hlao vâlyuhchâpa lâna chata he tana heta roh teh: A ku chachâh lâ liata awhsi sâsari chaba ta, ngôh meiôh sona sâsari hry liata a hlai ngâpa khata he bie zy he a reih:

2 “Na hmotaozie zy, na hriapasazie nata na tao hualuanazie zy, chyhsa moleipa na chhy thai leizie zy ei pahno, Apôstôl châ tlôh leipata apôstôl atâhpazy cha pasia hra chi ta, a haihpa ama châ tahpa vaw pahno haw chi ta;

3 tao hualua chi ta, ei moh vâta pasa tao haw chi ta, panao tlôh leipa chi ta.

4 Châhrasala pasina ei cha hnei, na kyhpachâna hmiatua chaipa kha na bâhsaipa vâta.

5 Na paosai hawpa kha pahno thlâh ha la, ropata, hmotao tua chaipazy kha tao heih teh. Chata leipata la na hnohta a vy aw na ta, na ro vei khiahtala, na meiôh sona kha a su tawhtapa ei pasie aw.

6 Châhrasala he he na phana cha a châ, Nikôla sahlao hmotaopazy nâ haopa he, cha cha kei chhaota ei hao hra.

7 Thlahpa ta awnanopa hlaozy hnohta bie a reipa he nahkhao a hneipata cha thei se. A pahnietuhpa maih Khazohpa paradi liata hrona tho liatahpa ei paniesa awh, a tah na,’ tahpata.

Smyna Awnanopa lâta bietapa

8 “Smyna liata awnanopa hlao vâlyuhchâpa lâna chata he tana heta roh teh: Hmiatuachaipa nata Hnôhchaipa, thi haw ta, a vaw hroh heihpa khata he biezy he a reih:

9 “‘Na rietheipasazie zy, na dyhchhiezie zy—châhrasala hneirôh tlôh chi ta, Zu hmeiseihpa châ leipata, Sâtâ pakhyna-o sahlao châ tlôh ei ta, Zu a tâhpazy reipachhienazie zy ei pahno.

10 Pasa na tao awpazy he chi khâ. Nahthlie teh, pasiapata nama y thei nawpata Ahripa ta nama hry liata chyhsa thokha lô-o liata a cha khô aw ei; chatawhcha noh hrawh rietheipasana nama tao aw. Thina taihta ngâchhihpata y teh, chatanachata hrona lakho ei cha pie aw.

11 Thlahpa ta awnanopa hlaozy hnohta bie a reipa he nahkhao a hneipata cha thei se. A pahnietuhpa maih cha thi nona chata kheihta hmah tah aw vei, a tah na,’ tahpata.

Pekamu Awnanopa lâta bietapa

12 “Pekamu liata awnanopa hlao vâlyuhchâpa lâna chata he tana heta roh teh: ‘Zaozi a koh nata a hâh a tiah rairiepa a hneipa khata he biezy he a reih.

13 “Na pahrâna, Sâtâ beidyuchhai yna kha ei pahno; ei moh khâchâ patu thlâh ha chi ta, ei bie a pahnotuhpa Antipa, Sâtâ pahrana liata nama hryta ama thie, ei chyhsa ngâpa y no chhao khata, einâ ngiapâna chi he a paphasai lei khâh chi ta.

14 Châhrasala a chyhta pasina ei cha hnei, kha liata Balama pachuna bie a pyhtuhpa ahyzy tlyma nama ylâhpa vâna khata; ano chata nohthlahpa achhyna sa ama nie nawpa nata ama sihryh nawpata Balaka cha Izarel pathlahpa sahlao hmiakô liata a chapiana sopata a pachupa kha.

15 Nâ chhaota Nikôla sahlao pachuna bie cha hawh tlaita a pyhtuhpa ahyzy tlyma na ylâh hra.

16 Chatanachata ro teh. Chata leipata la na hnohta a vy patoh aw na ta, ei pakah liata zaozi chata âmo ei vaw dyuh aw ei.

17 Thlahpa ta awnanopa hlaozy hnohta bie a reipa he nahkhao a hneipata cha thei se. A pahnietuhpa maih hnohta tlai mana nyupa pie bâ aw na ta, alô ngyuhpa chhao ei pie aw. Cha alô chô liata moh thiehpa ropa chhao; cha moh ropa cha a totuhpa dei leipata cha ahy ta hmahta pahno veih ei, a tahna,’ tahpata.

Thyatira Awnanopa lâta bietapa

18 “Thyatira liata awnanopa hlao vâlyuhchâpa lâna chata he tana heta roh teh: Khazohpa Sawchapawpa mokhaoh mei paleih hawhta a hneipa, a pheipazah dawh pathliepa a lyupa khata, he biezy he a reih.

19 “Na hmotaozie zy, na kyhpachânazie zy, nâ ngiapânazie zy, na chakaonazie zy, na tao hualuanazie zy ei pahno, na hmotaopa hnôh chaipazy cha na tao tua chaipa hlâta a pha via syulyu tahpa ei pahno hra.

20 Châhrasala pasina ei cha hnei, chanô Zezebel hrohsonô atâhpa kha na chhyh thaipa vâta; ano chata ei seizy cha sihryh awpata nata khazoh nohthlahpa achhyna hmo nie awpata pachu ta, a no leipa lâta a paviasa tyh ei.

21 A ro nawpata daihti pie na ta, châhrasala a sihryna cha ro khoh vei.

22 Chavâta ano cha rakhô liata ei thy aw, ano a pheikheituhpazy chhao cha, a hmotaopazy ama ro vei khiahtala, rietheipasa ngaitana liata ei thy hra aw;

23 a sawzy cha hri ta thie hra aw na ta, chatanachata kei cha palôhrupa nata pathipalôh mohtuhpa ei châ tahpa awnanopa hlao zydua chata eina pahno aw ei; nama hmotaopazy lymâ hawhta ei cha pie chyu aw ei.

24 Châhrasala nâmo Thyatira liata mo hropa a ypa, cha pachuna a pyh leipata, Sâtâ hmo athupa ama tahpazy a pahno leipa maih hnohna chata, phaohri hropa rai cha pahnie thlu aw veih ei na, ei tah;

25 nama hnei chiehpa deikua kha ei vy hlâ lei la khâchâ patu thlâh ha teh u.

26 A pahnietuhpa maih nata a chhâna taihta ei hmotaopazy a pyhtuhpa maih, keima ta ei Paw tawhtapa ei hmôpa hawhna heta, ano cha pho to chôta bie ei pahneisa aw;

27 ano chata beihvituhpa beizy pazao khaipata a ypa hawhta, thua chôhchahrei ta ama chôta ryu a reih aw;

28 awhkho awhsi cha ano ei pie aw.

29 Thlahpa ta awnanopa hlaozy hnohta bie a reipa he nahkhao a hneipata cha thei se, a tah,’ tahpata. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 3

Biephuahpa 3

Sadisa Awnanopa lâta bietapa

1 “Sadisa liata awnanopa hlao vâlyuhchâpa lâna chata he tana heta roh teh: ‘Khazohpa Thlahpa pasari nata awhsi sâsari a hneipa khata he biezy he a reih:” Na hmotaopazie zy ei pahno; thi thlâh ha tlôh ta, a hrohpa moh a phaohpa na châ he.

2 A vaihpata y la, hmo a y tlakaihpa a thi daihmâpazy kha pa-isa teh; na hmotaopazy rai ei Khazohpa hmiakô liata siapakipata hmô tlôh lei khâh na ta.

3 Chatanachata na topa nata na theipa kha pahno thlâh ha teh; cha cha a pyh la, ro teh. Na vaih vei khiahtala a parutuhpa hawhta a vy aw na ta, khati dawh ta e ei cha vaw pachhai aw tahpa pahno tlôh lei khâh chi ta.

4 Châhrasala Sadisa liana khata ama pohzy a papua leipa chyhsa chyhta na hnei; âmo cha poh ngyuhpa a bupata ei hnohta ama charei tyh hra aw; cha hawhpa tlâ châ tlôh ei ta.

5 A pahnietuhpa maih cha cha hawhta poh ngyuhpazy pabusapa ama châ aw. Hrona châbu tawhtapa ano moh cha phie chachei leipa aw na ta, ei Paw hmiakô liata nata a vâlyuhchâpazy hmiakô liata ano moh cha tlao ei chakhei aw.

6 Thlahpa ta awnanopa hlaozy hnohta bie a reipa he nahkhao a hneipata cha cha thei se, a tah na,’ tahpata.

Philadelphia Awnanopa hnohta bietapa

7 “Philadelphia liata awnanopa hlao vâlyuhchâpa lâna chata he tana heta roh teh: ‘Mopathaihpa, a hmeiseihpa, Davi châbi a hneipa, ahyhma ta khaw lei awpata a pahytuhpa, ahyhmah ta pahy lei awpata a khawtuhpa chata he biezy he a reih;

8 “‘Na hmotaozie zy ei pahno, Nahthlie teh ahyhma ta khaw thei leipa ochhi pahy chiehpa na hmiakô liata ei paysa; hmotaotheina a chyhta na hneipa ei pahno, chata chôna chhao chata ei bie a pyh chi ta, ei moh chhao a paphasai va chi.

9 Nahthlie teh, Sâtâ apakhyna-o hry liatahpa, Zu chyhsa hmeiseihpa châ tlôh leipata, haih ta. Zu chyhsa atâhpazy hrytahpa cha ei tuah aw; na phei thaby liata cha vaw pachhysa aw ei na ta, na kyh ei cha pachâ tahpa ei pahnosa hra aw.

10 Ei tao hualuana bie nâ pyhpa vâna khata, alei liata a pahrâpazy pasiapata khizaw zydua chô liata pasiana daihti a vaw tlô awpa tawhtapa cha keima chhaota ei cha hrôbieh hra aw.

11 Ei vy patoh aw; ahy ta hmahta na lakho a cha lapa lei nawpa ei ta na hnei chiehpa kha khâchâ a vao teh.

12 A pahnietuhpa mai cha ei Khazohpa achhyna-o liana chata otôh ta tao aw na ta, cha tawhna chata pua khao aw veih ei; ano liana chata ei Khazohpa moh nata ei Khazohpa khihpi moh, Zerusale thiehpa, ei Khazohpa tawhtapa avâ tawhta a za chô awpa moh chhao, ei moh thiehpa chhaota ei roh aw.

13 ‘Thlahpa ta awnanopa hlaozy hnohta bie a reipa he nahkhao a hneipata cha thei se, a tah na,’ tahpata.

Laodisi Awnanopa lâta bietapa

14 “Laodisi liata awnanopa hlao vâlyuhchâpa lâna chata he tana heta roh teh: Amen, bie a pahnotuhpa, ngâpa nata hmeiseihpa, Khazohpa hmotaopa a thaona khata he biezy he a reih.

15 “‘Na hmotaozie zy ei pahno, chakua leipa chi ta, lalôh hra va chi, na chakua ma, na lalôh ma ei khoh!

16 Chatanachata lalôh leipata, chakua tlôh leipata, vivâh dei na lalôhpa vâta ei pakah tawhtapa ei cha pachhao aw.

17 Hneirôh na ta, sôh hnei thlu na ta, khâpahma a phahla va na, na tahpa vâta nahta, na sipasapa, ngiachhie a chhipa, dyhchhiepa, mochaopa, thluahruapa na châ tahpa na pahno leipa vâta.

18 Na vaw hneirôh thei nawpata ngôh mei liata pathaisapa zy; poh na bu thei nawpa nata na thluahrua maophyuh chhiepa cha a lâ lei nawpata poh ngyuhpa zy, na hmô thei nawpata na mokhaoh liata hnia awpata mo pasana thohna ei hnohtapa chalei awpata ei cha chhosie.

19 Kyh ei pachâpa maih cha pasipa-ao na ta, ei chhorei tyh. Chatanachata phahnaikhoh la, ro teh.

20 Nahthlie teh, ochhi thaby liata aduahpata ei chakhy hih; ahyrai ei ao thei ta, ochhi a pahy khiahta cha ano liata a ngia aw na ta, a hnohta zâpati nie aw na ta, ano chhaota ei hnohta a nie hra aw.

21 A pahnietuhpa maih ei beidyuchhai liata ei hnohta ei patyusa aw. Kei chhaota pahnie na ta, ei Paw hnohta a abeidyuchhai liata ei tyupa hawhna khata.

22 Thlahpa ta awnanopa hlaozy hnohta bie a reipa he nahkhao a hneipata cha thei se, a tah na,’ tahpata,’ tah ta. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 4

Biephuahpa 4

Vârâh liata achhyna

1 Cha hmo hnôh lâna chata kaw moh na ta, avâ liata ochhi a pahypa hmô na ta! Chatawhcha ao ei thei tuapa, chiahmie hawhta na chhopa khata, “He lâ a khy teh, atahmâ tawhta hmo a vaw y awpazy cha cha pamosa va na,” tah ta.

2 Sôkha ta Thlahpa ta thlai vaw y pâ ha na ta; avâ liata abeidyuchhai a vaw patyu ta, cha liana chata mo pakha a vaw tyuh hra ta!

3 A tyupa cha zaspy nata karnelia lô hawhta a châ; abeidyuchhai chheipâh liana chata meisakupa lyupata emyra lô hawhta a zaw ta.

4 Abeidyuchhai chheipâh liana chata abeidyuchhai hropa syno nata miapalih y ta; cha liana chata machâ paki nata papalih poh ngyuhpa a bupata atyupa hmô na ta; ama luh liata ngôh lakhozy a kho ei ta.

5 Abeidyuchhai tawhna chata dôhlazy, aozy, tôkalôhpa a thuapa pyuzy vaw pua hôlô ta, meirei miasari abeidyuchhai hmiakô liana chata ia ta, chazy cha Khazohpa Thlahpa pasari kha châ ei ta;

6 abeidyuchhai hmiakô liana chata thlalâ tilaipi hawhta krystal lô hawhpa y ta. Abeidyuchhai liah liata nata abeidyuchhai chheipâh liana chata hmohrohneipa miapalih, hmialâ nata a hnôh lâ mokhaoh ta a biepa y ei ta:

7 Hmohrohneipa miakhana cha chakeibarôhneipa hawhta châ ta; a mianona cha viahchao taw hawhta a châ, a miathôhna chata chyhsapa hmia hawhta phaoh ta, a miapalihna cha pahmôpi a zaw haipa hawhta a châ.

8 Hmohrohneipa miapalih cha, mathlaw sâcharu sai a hneipa, ama pôhpalôhpa nata ama chhôh liata mokhaoh ta a biepa ama châ. “Beipa Khazohpa, Atotaotheipa, a y hawpa nata a y haipa nata, a vaw y awpa cha, a pathaih na, a pathaih na, a pathaih na.” tahpata a chhô a zâ ta a pahâ beih leipata sa ei ta.

9 Hmohrohneipazy chata abeidyuchhai liata atyuhpa chhâzaw ta a hro thlâh hapa cha parônahsa ei ta, palyupalih ei ta, alynabie ama reina maihta,

10 machâ pakih nata papalihzy cha abeidyuchhai liata atyuhpa hmiakô liata a bôh ei ta, chhâzaw ta a hroh thlâh hapa cha achhy ei ta;

11 “Nâ, eima Beipa nata eima Khazohpa, rônahna zy, palyupalihna zy, hmotaotheinazy cha a to tlâh na châ na; nâma ta ato zydua tao chi ta, na khopa vâta a ypa nata taopa châ tlôh hra ei ta,” tahpata, sapata ama lakhozy cha abeidyuchhai hmiakô liana chata ama soh. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 5

Biephuahpa 5

Châ chatypa nata Mietahkupa Taw

1 Abeidyuchhai liata atyupa ku chachâh lâna chata châ chatypa, a chhôh lâ nata a ky lâta ropa chahnaona sâsari ta liahsa chahnaopa hmô na ta;

2 chatawhcha vâlyuhchâpa thatlô ngaitapa, ao paro ngaitapa ta, “‘Ahy e châ chatypa he pahy ta a chahnaonazy he a pathlâ tlâh a y?” tahpata tlâh-awpata hmô hra na ta.

3 Châhrasala avâ liata zy, alei liata zy, alei ry liata zy chhao châ chatypa cha ahyhma ta a pahy theipa y leipa ei ta, a chhôh liata a mo theipa y hra veih ei.

4 Châ chatypa a pahypa nata a chhôh lâ a moh tlâh ahyhma ta ama y leipa vâta thata cha na ta.

5 Chatawhcha machâ hryta pakha chata ei hnohta, “Cha khâ; nahthlie teh! Chakeibarôhneipa, Zudah pho liatahpa, Davi thabypa khata, châ chatypa cha pahypata nata a chahnaona sâsari pathlâ awpata a pahnie haw,” tah ta.

6 Chatawhcha abeidyuchhai nata hmohrohneipa miapalih lialiah liata machâzy lialiah liana hra chata Mietahkupa Taw thie chiehpa hawhta ki sari nata mokhaoh miasari a hneipa a duahpa hmô na ta, cha mokhaoh miasarizy cha Khazohpa thlahpa pasari, alei chô zydua liata tuapa cha ama châ.

7 Ano cha a vy ta, châ chatypa abeidyuchhai liata atyupa ku chachâh lâtahpa cha la haw ta.

8 Châ chatypa cha a la patanahta, hmohrohneipa miapalih nata machâ pakih nata papalihzy cha totâ nata ngôh biebu ropahâhpa ta a biepa chei chyupata, Mietahkupa Taw hmiakô liata a khu ei ta; cha rohpahâhpazy cha mopathaipazy thlahchhâna a châ.

9 Âmo ta hla thiehpa sa ei ta: “Nâ, châ chatypa cha lapata, a chahnaonazy a pathlâ tlâh na châ na; thiepata y haw chi ta, chi to liatahpa zy, reih to liatahpa zy, chyhsa to liatahpa zy, pho to liatahpa zy, Khazohpa chata na thisaih ta chalei chi ta,

10 eima Khazohpa chata khihnarâh ta nata theihthaipazy ta tao haw tlôh chi ta, chatawhcha alei liana chata ryu ama reih aw,” tahpata.

11 Chatawhcha kaw moh na ta; abeidyuchhai nata hmohrohneipazy nata machâzy chheipâh liana chata vâlyuhchâpa hluhpi ao thei na ta; ama hluhnazie cha a thy ta thy hluhpi nata a sâh ta, sâh hluhpi ama châ,

12 chazy chata ao paro ngaitapata: “Mietahkupa Taw thie chiehpa he hmotaotheina zy, hneina zy, sona zy, thatlôna zy, palyupalihna zy, rônahna zy, byhna a hmô tlâh a châ na!” tah ei ta.

13 Chatawhcha avâ nata alei chô nata alei ry nata tilaipi chô liata hmotaopa to a ypazy nata cha sahlao chhôh liata a ypa zydua chata: “Abeidyuchhai liata atyupa nata, Mietahkupa Taw hnohna chata, byhnâ zy, palyupalihna zy, rônahna zy, ryureina zy chhâzaw ta y mawh sy,” ama tahpa thei hra na ta.

14 Hmohrohneipa miapalihzy chata, “Amen!” tah ei ta. Machâzy chhao chata a khupata anaoh haw ei ta. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 6

Biephuahpa 6

Chahnaonazy

1 Chatawhcha Mietahkupa Taw chata chahnaona sâsari hryta sâkha cha a pathlâ nota hmô na ta, hmohrohneipa miapalihzy hryta miakha chata tôkalôhpa a thuapa hawhta, “A vy teh!” a tahpa, thei na ta.

2 Kaw moh na ta, arâ râhpa hmô na ta; a chô liata a kiahpa chata libaw a chaba ta a hnohna chata lakho piepata y ta; pahniena chô nata pahnie lymâ awpata pua ha ta.

3 Chatawhcha Mietahkupa Taw ta chahnaona sânona a vaw pathlâ patanahta hmohrohneipa mianona chata, ‘A vy teh!” a tahpa thei na ta.

4 Arâ hropa, a saihpa vaw pua heih ta; a chô liata a kiahpa hnohna chata alei liatahpa adyhna lapa theina nata, chyhsa a pathiesa theina piepata y ta; a hnohta zaozi laipapi piepata y hra ta.

5 Chatawhcha Mietahkupa Taw ta chahnaona sâthôhna cha a pathlâ patanahta, hmohrohneipa miathôhna chata, “A vy teh!” a tahpa thei na ta. Kaw moh na ta, arâ vyhpa hmô na ta; a chô liata a kiahpa chata khopathliana chaba ta;

6 hmohrohneipa miapalihzy lialiah tawhna chata ao hawhna heta, “Tâkâ tlaw khata uit sâh khua kha, tâkâ tlaw kha ta bâli sâh khua thôh; sathaw nata kresawti deikua cha parao khâ!” a tahpa ei thei.

7 Chatawhcha Mietahkupa Taw ta chahnaona sâpalihna cha a vaw pathlâ pata­nahta hmohrohneipa miapalihna ao chata, “A vy teh!” a tahpa ei thei.

8 Kaw moh na ta, arâ hropa hmô na ta; a chô liata a kiahpa moh cha Thina a châ; a hnôh lâta Athihpakhih ta vaw zi ta; zaozi zy, chakâhna zy, hri zy, alei liata sahrâhpa zy ta thie awpata cha chyhsazy hnohna chata alei su palih pachhaih ta su kha chô liata biehneina piepata y ta.

9 Chatawhcha Mietahkupa Taw ta chahnaona sâpangawhna a vaw pathlâ pata­nahta maisâh ry liana chata Khazohpa bie vâta nata ama pyhpa pahnosana bie vâta thihpazy thlahpa cha hmô na ta.

10 Âmo chata ao paro ngaitapata, “Hy Abeipa Chônôchaipa, pathaihpa nata hmeiseihpa, khachâ e pachia leipata alei liata a ypazy chô liata eima thisaih puana phuh cha la leipata na y aw tly?” tahpata awh ei ta.

11 Ama hnohna chata poh ngyuhpa pie chyupa châ ta; ama seiheizy nata ama unawhpazy âmo hawh hra ta thie awpazy chhao cha, amâ ki hlâ lei cha ama pahâ chy awpa a châ tahpa chhopa châ ta.

12 Mietahkupa Taw ta chahnaona sâcharuna a vaw pathlâ nota moh thlâh ha na ta, alo a thata a vaw sih haw ta; noh cha latho sykhao poh hawhta vaw vyh ta, thlâpâ chhao cha a pôhpa duata thisaih hawhta vaw y haw ta;

13 avâ liata awhsizy cha theiku kô thlihpi ta chanao ta, a thei heipazy a zôpa hawhta, alei lâ tla haw ta;

14 avâ cha châ chatypa chatypata a leipa hawhta lei ha ta; tlâh nata liahpahlô to cha ama yna tawhtapa a pasiepata y khai haw ei ta.

15 Chatawhcha alei liata abeizy, molaipazy, pheisaih hyutuhchaipazy, hneirôhpa nata thatlôpa zy, sei nata sei a châ leipa to zy cha lôpu liata nata tlâh liata lôpanô liana chata a nyu ei ta.

16 Tlâhzy nata lôpanôzy lâna chata, “Maniah vi ula, abeidyuchhai liata atyuhpa hmiakô tawhtapa nata Mietahkupa Taw hiehâhna tawhtapa maniah pakhâ teh u;

17 ama hiehâhna noh rarô-y ngaitapa cha a vaw tlô haw hih, chatanachata ahy e a duah thei aw tly?” tahpata. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 7

Biephuahpa 7

144,000 Izarelzy chahnaona

1 Cha hnôh lâna chata alei liata zy tilaipi liata zy tho kheihawhparai liana chata thlih a pathli lei nawpata, alei thlih miapalihpa cha patupata alei ki palih liata a duahpa vâlyuhchâpa papalih hmô na ta.

2 Chatawhcha vâlyuhchâpa hropa, Khazohpa a hropa chahnaona a chei ta, noh chhina lâta a kiahpa hmô hra na ta. Ano chata vâlyuhchâpa papalih, alei nata tilaipi parao theina piepazy hnohna chata ao paro ngaitapata,

3 “Eima Khazohpa seizy cha ama khi liata eima chahnao hlâ lei cha alei zy, tilaipi zy, thozy cha parao mâh khu u,” tahpata awh ta.

4 Chatawhcha ama chahnaopa zie cha vaw pahno na ta, Izarel pathlapazy pho to tawhtapa chyhsa thy sykha nata thy palih nata sâh palih chahnaopata y haw ta,

5 Zudah pho liatahpa thy kha nata sâh no, Rubena pho liatahpa thy kha nata sâh no, Kada pho liatahpa thy kha nata sâh no, Asera pho liatahpa thy kha nata sâh no, Nathalai pho liatahpa thy kha nata sâh no, Manase pho liatahpa thy kha nata sâh no, Simeôna pho liatahpa thy kha nata sâh no, Livai pho liatahpa thy kha nata sâh no, Iskara pho liatahpa thy kha nata sâh no, Zebulawna pho liatahpa thy kha nata sâh no, Zawsi pho liatahpa thy kha nata sâh no, Benzami pho liatahpa thy kha nata sâh no chahnaopa ama châ.

Pho to tawhtapa zawpizy

9 Cha hnôh lâna chata kaw moh na ta, zawpi hluh ngaitapa ahyhma ta reitiah leipa, pho to hry liatahpa zy, chi to hry liatahpa zy, mo to hry liatahpa zy, reih to hry liatahpa zy poh ngyuhpa a bupata, nôhmeinô kuah a cheipata, abeidyuchhai hmiakô liata nata Mietahkupa Taw hmiako liata aduahpa hmô na ta.

10 Chazy chata ao paro ngaitapata: “Eima Khazohpa abeidyuchhai liata atyuhpa hnohta nahta Mietahkupa Taw hnohta pachhana!” tahpata awh ei ta.

11 Vâlyuhchâpa zydua cha abeidyuchhai nata machâzy nata hmohrohneipa miapalihzy kiapâh liana chata a duahpata y ei ta; abeidyuchhai hmiakô liana chata a khupata,

12 “Amen! Byhnâ zy, rônahna zy, sona zy, alynabi reina zy, palyupalihna zy, hmotaotheina zy, thatlôna zy chhâzaw ta eima Khazohpa hnohta y se! Amen,” tahpata Khazohpa achhy ei ta.

13 Machâ hryta pakha chata ei hnohta, “He poh ngyuhpa a bupazy he ahyzy e châ ei ta, khataih lâ tawhta a vypa e ama châ?” tahpata reih ta.

14 Keima ta a hnohta, “Pâpuh, pahno va na, nâma ta na pahno mâ tâh,” tah na ta. Ano ta ei hnohta,’’ Hezy he rietheipasana ngaitapa tawhta a puapa sahlaozy kha ama châ; ama pohzy Mietahkupa Taw thisaih ta pasupata ama pangyusa haw.

15 Chavâta Khazohpa abeidyuchhai hmiakô liata ama y; a chhô a zâ ta ano achhyna-o liana chata ama chakao tyh; chatawhcha abeidyuchhai liata atyuhpa chata ama hnohta a pahrâ aw,

16 Ama nodi khao leipa aw ta, ama dâhphi khao hra aw vei; noh ta ama chôta vaw hra leipa aw ta, nohkâhna rai ta ama rie patheisa khao hra aw vei.

17 Mietahkupa Taw, abeidyuchhai lialih liata a ypa cha, âmo vaihtuhpa châ aw ta, hrona tihnawh lâta zy a chhi aw ta; chatawhcha Khazohpa ta ama mo liatahpa mothlih zydua a hru khai aw,” tah ta. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 8

Biephuahpa 8

Chahnaona sâsarina nata ngôh rohpahâhpa raona byh

1 Mietahkupa Taw ta chahnaona sâsarina cha a vaw pathlâ patanahta dawh khophie rachhôh avâ liata a chalihna y ta.

2 Chatawhcha Khazohpa hmiakô liata vâlyuhchâpa aduah tyhpazy cha hmô na ta; ama hnohta chiahmie sâsari piepa châ ta.

3 Vâlyuhchâpa hropa a vy ta, ngôh rohpahâhpa raona byh chhaota maisâh liata a duah thlâh ha ta; abeidyuchhai hmiakô ta ngôh maisâh chôta mopathaihpa zydua thlahchhânazy baichha nawpata rohpahâhpa a hluhpi a hnohta piepa châ ta.

4 Rohpahâhpa khuh cha mopathaihpa sahlao thlahchhânazy nah chata vâlyuhchâpa ku tawhtapa cha Khazohpa hmiakô lâta khy haw ta.

5 Chatawhcha vâlyuhchâpa chata rohpahâhpa raona byh cha la ta, maisâh liata mei ta pabie ta, alei liata thy ha ta; chatanachata tôkalôhpa a thuapazy, aozy, dôhlazy, alosihna zy thlai vaw y pâ ha ta.

Chiahmiezy

6 Chatawhcha vâlyuhchâpa pasari, chiahmie sâsari a hneipazy cha tô awpata a pachyh ei ta.

7 A hmiatua chaipa chata vaw tô ta; pareih nata mei, thisaih nata a pahlaopa, thlai vaw y pâ ha ta, chazy cha alei lâta tla haw ta; chatanachata alei su thôh ta pachhaih ta su kha cha kâ khai ha ta, thozy chhao su thôh ta pachhaih ta su kha cha kâ khai ha ta, sibiepa hropa zydua chhao a kâ khai ha hra.

8 Vâlyuhchâpa panona chata vaw tô ta; tlâh laipapi, mei ta a kâ haipa hawhta, tilaipi liata thypa châ ta;

9 chatanachata tilaipi su thôh ta pachhaih ta su kha cha thisaih lâta a vaw lie haw; tilaipi liata hmo hro hneipazy cha su thôh ta pachhaih ta su kha cha thi haw ei ta; balyhzy chhao su thôh ta pachhaih ta su kha cha paraopa a châ haw hra.

10 Vâlyuhchâpa pathôhna chata vaw tô ta; awhsi laipapi, meirei iapa hawhta, avâ tawhta za tla ta, chavah zy su thôh ta pachhaih ta su kha nata tihnawhzy vi ha ta.

11 “Cha awhsi moh cha Khahpa a châ. Tizy su thôh ta pachhaih ta su kha cha khahpa lâta a vaw lie ha ta, chyhsa hluhpi thi ei ta, ti a vaw khah hawpa vâta.

12 Vâlyuhchâpa papalihna chata vaw tô ta; noh su thôh ta pachhaih ta su kha, thlâpâ chhao su thôh ta pachhaih ta su kha, awhsizy chhao su thôh ta pachhaih ta su kha cha paraopa châ haw ta; cha sahlao su thôh ta pachhaih ta su kha cha a zohna awpa nata, chhô cha su thôh ta pachhaih ta su kha a khaih leina awpata; zâ chhao cha hawhna hra chata a châ.

13 Chatawhcha kaw moh na ta, pahmôpi avâ liata a zaw haipa ta ao paro ngaitapata, “Vâlyuhchâpa pathôh chiahmie a vaw tô awpa, cha paropa pyu a vaw y awpazy vâna chata alei liata a pahrâpa sahlaozy hu a po na, hu a po na, hu a po na!” a tahpa thei na ta. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 9

Biephuahpa 9

1 Chatawhcha vâlyuhchâpa papangawhna chata vaw tô ta, awhsi avâ tawhta alei liata a tla chiehpa hmô na ta, aleichiepa khaotlô pahyna cha a hnohta piepa châ ta.

2 Awhsi chata aleichiepa khaotlô cha pahy ta; cha tawhtapa cha meikhuh patisana mei a thata a khupa hawhta kaw pua ta; aleichiepa khaotlô meikhuh vâna chata noh nata aruapa cha vaw zô ha ta.

3 Meikhuh hry tawhna chata khawsuzy alei liata vaw pua ta, alei liata râhcha-iazy ta hmotaotheina ama hneipa hawhna heta hmotaotheina piepa ta ama y hra.

4 Ama khih liata Khazohpa chahnaona a hnei leipa chyhsazy dei leipata cha alei liata sibiepazy, hmo hropazy rai, tho kheihawhpa rai chhao parao leipa a châ tahpata chhopata y ei ta.

5 Ama hnohna chata cha chyhsazy cha thie leipata, thla pangawh chhôhta tlao pasasa awpata bie piepa châ ta, ama pasasanazie cha râhcha-ia ta chyhsa chakie ta a pasasapa hawhta a châ.

6 Cha nohzy liana chata chyhsazy ta thina tlua aw ei ta, hmô chacheita aw veih ei; thi khoh ngaita aw ei ta, châhrasala thina chata a râsai aw ei.

7 Khawsuzy alânazie cha arâ a dyuh nawpata amâchiehpa hawhta ama châ; ama luhzy liata ngôh lakho a lyupa y ta; ama hmia chhao chyhsapa hmiazy hawhta a châ,

8 chanô sâ hawhta sâ hnei ei ta, ama hâhzy chhao cha chakeibarôhneipa hâh hawhta a châ hra;

9 thua chachôhna vyphao hawhta chachôhna vyphaoh hnei ei ta; ama mathlaw chakhypa pyu cha adyuhna talaili pyu, arâ a hluhpi adyuhna lâta a râ hôlôpa pyu hawhta a châ.

10 Râhcha-iazy hawhta lahmei hnei ei ta, azâpa chhao, ama lahmei liata thla pangawh chhôhta chyhsazy pasasa theina cha a y.

11 Aleichiehpa khaotlô lyuhchâpa cha ama chôta abei chaipa ta hnei ei ta; Hebrai reih ta a moh cha Abadôn châ ta. Krika reih ta Apôliôn a châ, (cha cha “Paraotuhpa” tahna.)

12 Hupona hmiatua chaipa cha lei ha ta; atahma tawhna heta hupona sâno a vaw y heih hra aw.

13 Chatawhcha vâlyuhchapa pacharuna chata vaw tô ta, Khazohpa hmiakô liata ngôh maisâh ki palihzy tawhta ao thei na ta,

14 cha ao chata vâlyuhchâpa pacharuna, chiahmie a chabapa hnohna chata, “Euphrate chavah liata vâlyuhchâpa papalih chahrypazy kha pathlâ teh,” tah ta.

15 Cha dawh nata noh nata thla nata kô châna chata chyhsa su thôh ta pachhaih ta su kha thie awpata rao chiehpa vâlyuhchâpa papalihzy cha pathlâpata y haw ei ta.

16 Pheisaih arâ a kiahpa sahlao cha ama hluhna zie thy thy no ama châ; ama hluhna zie reipa cha ei thei.

17 Chatawhcha aluahna liata arâ nata a kiahtuhpa sahlaozy cha he hawhna heta ei hmô: mei nata saphai lô nata kaih hawhpa chachôhna vyphaohzy hnei ei ta; arâ luhzy cha chakeibarôhneipa luhzy hawhta a châ. ama pakah tawhta mei nata meikhuh nata kaihzy a vaw pua.

18 He hriena miathôh heta chyhsa su thôh ta pachhaih ta su kha cha thi haw ei ta, mei nata meikhuh nata kaih ama pakah tawhta a puapa khata.

19 Arâzy hmotaotheina cha ama pakah liata nata ama lahmei liata a y; ama lahmeizy cha parihzy hawhta a châ, luhzy hnei hra ei ta; cha chata chyhsa ama pasasa tyh.

20 Chyhsa hropa zydua he hrina liata thi laibâhpazy chata ahripazy nata ngôh khazoh nohthlahpazy, tâkâ khazoh nohthlahpazy, dawh khazoh nohthlahpazy, alô khazoh nohthlapazy khâpahma a hmô thei leipa, a thei thei leipa, a sie thei leipa zy cha ama chhy khao lei nawpata ama ku ta hmotaopazy cha ro hlei veih ei;

21 ama lianycheipazy chhao, ama dyuhmâpazy chhao, amâ pheipazy chhao ama parupazy chhao ro hlei veih ei. 

<

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 10

Biephuahpa 10

Vâlyuhchâpa nata châ chatypa chyhpa

1 Chatawhcha vâlyuhchâpa thatlô ngaitapa hropa pakha, meihdo ta a tobipa avâ tawhta a za chôpa hmô na ta; a luh chô liata meisakupa a zawh ta, a hmia cha noh hawhta châ ta; a pheizy cha meitôh hawhta a châ.

2 A ku liata châ chatypa chyhpata pahy chiehpa chaba ta. A phei chachâh lâta tilaipi chô liata tly ta, a chavei lâta tlâh liata tly ta,

3 chakeibarôhneipa a hupa hawhta ao paro ngaitapata awh ta; a awh khai nahta tôkalôhpa miasarizy chata ao papua haw ei ta.

4 tôkalôhpa miasaripazy chata ao ama papua patanahta ro va na tahna ta. “Tôkalôhpa miasaripazy bie reipa cha phih ha la, roh khâ,” tahpata avâ tawhta ao thei na ta.

5 Chatawhcha vâlyuhchâpa tilaipi nata tlâh chô liata a duahpa ei hmôpa chata a ku chachâh lâ cha avâ lâ pazawh ta,

6 chhâzaw ta a hroh thlâh hapa, avâ nata a chhôh liata hmo a ypazy alei nata a chhôh liata hmo a ypazy, tilaipi nata a chhôh liata hmo a ypazy chhaota a taotuhpa cha reipata chhiesapata, “Daihti y khao aw vei;

7 châhrasala vâlyuhchâpa pasarina ta chiahmie tôpata, pyu a y tita. Khazohpa bieparu cha a ki ha aw, a sei hrohsopazy lâta a chhopa hawhna khata,” tah ta.

8 Chatawhcha avâ tawhta ao ei theipa khata bie na chho heih ta, “Tilaipi nata tlâh chô liata aduahpa vâlyuhchâpa ku liata châ chatypa pahy chiehpa hao kei la teh,” a tahpa thei na ta.

9 ‘Vâlyuhchâpa lâna chata vawh na ta, a hnohta, “Châ chatypa chyhpata kha na pie teh,” tah na ta; ano ta ei hnohta, “La la, nie khai ha teh; na chhôh cha pakhasa aw ta, na pakah liata deikua kheihti hawhta a thlôh aw,” na tah ta.

10 Vâlyuhchâpa ku tawhta châ chatypa chyhpata cha la na ta, nie khai haw na ta; ei pakah liana chata kheihti hawhta thlôh ta, châhrasala ei nie khai patanahta ei chhôh cha vaw pakhasa haw ta.

11 Chatawhcha ei hnohta, “Chyhsa hluhpizy, pho hluhpizy, reih hluhpizy, abei hluhpizy thâtih na chho heih aw,” tah ta.

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 11

Biephuahpa 11

Pahno pakheituhpa pano

1 Chatawhcha lothi chôchahrei hawhpa na pie ta, ahy tlyma ta, “Thyu la, Khazohpa achhyna-o nata maisâh nata a chhôh liata achhytuhpazy chhao thlie teh,

2 achhyna-o khôtho lâ dôhpachhôh ohmia deikua cha thlie pa khâ; cha cha pathlua teh. Zenitaizy hnohta piepa châ ha tlôh ta; âmo chata khihpi pathaihpa cha thla sypalih nata thla no ama tlypâ aw.

3 Chatawhcha ei bie pahnotuhpa pano hnohna chata bie pie aw na ta, latho poh a bupata noh sâh kha nata noh za no nata noh sycharu chhôhta bie ama chho chhielie aw,” tah ta.

4 Hezy he ôli tho sâno nata meiôh sona khizaw Beipa hmiakô liata aduahpazy cha ama châ.

5 Âmo cha ahyrai ta pasasa amâ chhuah khiahtala, ama pakah tawhta mei vaw pua ta, ama khakhaipazy cha a kâ khai; ahyrai ta âmo cha pasasa a chhuah ei sala, cha hawhna hra chata thihpata ama y awpa a châ.

6 Ama bie chho chhôh noh zydua cha avâ sua lei awpata avâ khaw theina ama hnei, ama khona daihti maihta thisaih lâta pachâsa awpata tizy chô liata bie hnei ei ta, khizaw he hriena to raita hrie awpata bie ama hnei hra.

7 Ama pahnosana bie cha ama chho khai tita aleichiepa khaotlô tawhta sahrâhpa a vaw pua awpa chata âmo cha a dyuh aw ta, pahnie aw ta, a thie aw ei,

8 ama ri cha khihpi rônahpa othliah liata a zaw thlâh ha aw ta, cha khihpi rônahpa cha thlahpa kyh lâta cha Sawdawma nata Izi ama bi. Cha liana hra chata ama Beipa cha khaipâpata a y hawpa kha.

9 Chyhsa chi to hry tawhta zy, mo to hry tawhtapa zy, reih to hry tawhta zy, pho to hry tawhta zy ta noh thôh nata khophie ama rizy cha mô aw ei ta, ama rizy cha thlâ liata pabu pasai aw veih ei.

10 Ama thipa vâta alei liata a pahrâpazy cha aly aw ei ta, thaphana tao aw ei ta, hmosaipa ama paphao rairieh aw; hrohsopa pano chata alei liata a pahrâpazy cha rie ama patheisa tyhpa vâta.

11 Noh thôh nata a khophie tawhna chata Khazohpa tawhtapa hrona hu cha ama chhôh liata a vaw ngia ta, ama phei ta aduah haw ei ta, a hmôtuhpazy chata chi ngaita kaw ei ta.

12 Chatawhcha ama hnohta, “He lâ a khy teh u,” tahpata avâ tawhta ao paro ngaitapa thei ei ta. Chatanachata ama khakhaipazy mohmô ta meihdo hry liata avâ lâ kiah haw ei ta.

13 Cha nona tlai chata alo thata a sih ta, khihpi cha su hrawh ta pachhaih ta su kha cha cho ha ta; alo sihpa liana chata chyhsa sâh sari thi haw ei ta; a laibâhpazy chata chi ei ta, avâ Khazohpa cha palyupalih haw ei ta.

14 Hupona sânona cha lei haw ta; châhrasala hupona sâthôhna cha thlai a vaw y aw.

Chiahmie sâsarina

15 Chatawhcha vâlyuhchâpa pasarina chata chiahmie vaw tô ta, “Khizaw khihnarâh cha eima Beipa nata a Krista Khihnarâh a vaw châ haw, ano chata chhâzaw ta ryu a reih aw,” tahpata avâ liata ao paro ngaitapa zy thlai vaw pua ta.

16 Chatanachata Khazohpa hmiakô liata ama beidyuchhai liata machâ pakih nata papalih atyuhpazy cha a khu ei ta. Khazohpa a naoh ei ta,

17 reih ei ta: “Hy Abeipa Khazohpa, Atotaotheipa, a y haipa nata a y hawpa, na hmotaotheina rônah ngaitapa cha lapata ryu na reipa vâta alynabie eima cha hlâ.

18 Phopizy cha ama pathi-ia ta, na hiehâhna cha vaw tlô ta, athihpazy pachia ti nahta na seizy hrohsopazy, mopathaihpazy hnohta na moh a zapa molaipa nata mochyhpazy hnohta, ama lymâ piena daihti nata. aleilô a paraotuhpazy parao hriena daihti cha vaw tlô ha hra ta,” tahpata.

19 Chatawhcha avâ liata Khazohpa achhyna-o cha pahypata y ta, achhyna-o liana chata a biehraina byh cha a vaw lâ ha ta; chatawhcha dôhlazy, aozy, tôkalôhpa a thuapa pyuzy, alosihpa zy, pareih zy a thata thlai vaw y pâ ha ta. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

Biephuahpa 12

Biephuahpa 12

Chanô nata Drakao

1 Chatawhcha ngiana rônah ngaitapa avâ liata a vaw lâ haw ta, chanô no ta a tobipa, a phei ry liata thlâpâ a ypa, awhsi sâhrawhleino ta taopa lakho a khopa vaw y ta;

2 ano chata saw phaoh ta; saw a zeih pasapata sa ta, saw pihpata a zeihpa vâta.

3 Ngiana hropa avâ liata a vaw lâ heih ta; drakao saipa laipapi luh sari nata ki hrawh a hneipa, a luhzy liata lakho sâsari a khopa vaw y ta.

4 A lahmei chata avâ liata awhsi su thôh ta pachhaih ta su kha cha a daophi pathlah ta, alei liata za thy ha ta. Chatawhcha a vaw pi patanahta a palâ thei nawpata drakao cha chanô saw a sa awpa hmiakô liata a duah thlâh ha ta.

5 Chatawhcha sawchapawpa, phopi zydua chô liata thua chôchahrei ta ryu a reih awpa sa ta; a saw cha Khazohpa lâta nata abeidyuchhai lâna chata lapata y haw ta.

6 Chanô cha râhpathohpa liata Khazohpa ta a chhuahdypa su a hneipa liana chata a râ syulyu ha ta, cha liana chata noh sâh kha nata noh za no nata noh sycharu pasapata a y thei nawpata.

7 Chatawhcha avâ liana thata adyuhna vaw y ta; Mikhael nata a vâlyuhchâpazy chata drakao cha adyuh ei ta; drakao nata a lyuhchâpazy chhao chata adyuh hra ei ta,

8 châhrasala pahniepata y ei ta, avâ liata ama su chhao y khao hra vei.

9 Chatawhcha drakao laipapi, parihpi hlôpa. Ahripa nata Sâtâ ama bipa, khizaw zydua a dôtuhpa cha za thy pathlah haw ei ta, alei liata za thy ei ta, a lyuhchâpazy chhao ama za thy pâ hra.

10 Chatawhcha avâ liata ao paro ngaitapata, “Atahmâ he eima Khazohpa pachhana nata hmotaotheina nata Khihnarâh cha a vaw tlô haw. Krista biehneina chhao; eima unawhpazy a leituhpa, eima Khazohpa hmiakô liata a chhô a zâ ta a lei tyhtuhpa cha za thy pathla ha tlôh ei ta.

11 Châhrasala Mietahkupa Taw thisaih vâta nata ama pahnosana bie vâta ano cha ama pahniepa a châ. Thina taih chhaota ama hrona cha khâpata reih hra leipa ei ta.

12 Chavâta hy avâ nata a chhôh liata a pahrâpazy thapha teh u! Alei nata tilaipi hu a po na! Ahripa chata daihti a chyhta deita a hnei tahpa a pahnopa vâta hiehâh ngaitapata nâmo lâ a za chô hawpa vâta,” a tahpa ei thei.

13 Drakao chata alei liata za thy pathlahpa a châ tahpa apahno patanahta sawchapawpa a satuhpa chanô cha siehnao ha ta.

14 Râhpathohpa liata a su lâta a zaw thei nawpata chanô cha pahmôpi lai ngaitapa mathlaw sâno piepata y ta, cha liana chata parihpi hmô thei khao leina liata kô thôh nata khophie chhôh ta pasapata a y aw.

15 Parihpi chata ti ta a paphaosa thei nawpata chanô hnôh lâna chata chavah hawhta a pakah tawhta ti pachhao ta.

16 Châhrasala alei ta chanô cha bao ta, alei chata a pakah â ta, drakao ta a pakah tawhta a pachhaopa chavah cha palâ khai ha ta.

17 Chatanachata drakao cha chanô chô liata a hie hâh ta, a pathla laibâhpazy, Khazohpa biepiepazy zyhpata Zisu pahnosana bie a pyhpazy cha adyuh awpata sie ha ta.

18 Chatanachata tilaipi raphyu liata a duah ha ta. 

Biephuahpa (Revelation)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22