Sahrâhpa pôno
1 Chatawhcha sahrâhpa ki hrawh nata luh sari a hneipa, tilaipi tawhta a kaw puapa hmô na ta, a kizy liana chata abeilakho sâhrawh y ta, a luhzy liata Khazohpa reipachhiena mohzy y hra ta.
2 Sahrâhpa ei hmôpa cha keichho hawhta châ ta, a pheizy cha chavyh phei hawhta a châ, a pakah cha chakeibarôhneipa pakah hawhta a châ. Drakao chata a hnohta a hmotaotheina nata a beidyuchhai nata biehneina thata pie ta.
3 A luh miakha cha thikheina taihta hmahphaohpa hawhta hmô na ta; châhrasala a thikheina awpata hmahphaopa cha tlâ ha ta, alei liata chyhsa zydua ta sahrâhpa cha ama noâh ngaita ta, zi ei ta.
4 Sahrâhpa hnohta a biehneina cha a piepa vâta drakao cha chyhsa zydua ta a chhy ei ta; Sahrâhpa hawhpa he ahy e y ta, ahy e adyuh thei aw?” tahpata sahrâhpa chhao cha a chhy hra ei ta.
5 Sahrâhpa cha a palaina nata Khazohpa reipachhiena bie reina pakah a hnohta piepa a châ, thla sypalih nata thla no chhôhta hria awpata biehneina piepa a châ hra;
6 Khazohpa reipachhiepata a pakah â ta, a mo nata a pahrâna, avâ liata a pahrâpa sahlaozy cha reipachhie awpata.
7 Mopathaihpazy adyuh awpa nata a pahnie awpata pasaipa châ ta, chi to zy, mo to zy, pho to zy chô liata biehneina a hnohta piepa a châ hra.
8 Alei liata a pahrâpa zydua, khizaw a thaotua no tawhta thie chiehpa Mietahkupa Taw hrona châbu liata moh ro leipa maih chata ano amâ chhy aw.
9 Ahyrai ta nahkhao ama hnei khiahtala thei ei se:
10 Ahyrai sei ta y awpa ama châkhiahtala seichâpata ama y tyh; ahyrai ta zaozi ta chyhsa a thie khiahtala zaozi ta thie awpa ama châ. He liana heta mopathaihpazy tao hualuana nata ngiapâna a lâ theina a y.
11 Chatawhcha sahrâhpa hropa alei tawhta a vaw puapa hmô na ta; Mietahkupa Taw ki hawhta ki no hnei ta, drakao reih pathliepa hawhta pathlie ta.
12 Sahrâhpa hmiatuapa biehneina zydua kha a mohmô ta hmâh ta, alei nata a chô liata a pahrâpa zyduazy cha sahrâhpa hmiatuapa, thikheina taihta hmahphaohpa a vaw tlâ heihpa cha pachhysa hra ta.
13 Chyhsa mohmô liata avâ tawhta alei lâta mei patlasa theina taihta hmonoâhpa rônah ngaitapa zy a tao tyh,
14 alei liata a pahrâpazy hnohta sahrâhpa, zaozi ta hmahphao chiehpa a hroh heihpa palyupalih nawpata, ano nohthlahpa ama taopa a châ tahpa reipata, sahrâhpa mohmô liata hmonoâhpa tao awpata bie a hmôpa, cha hmonoâhpa vâna chata alei liata a pahrâpazy cha dô hra ta.
15 Sahrâhpa nohthlahpa cha bie a rei thei nawpa nata sahrâhpa nohthlahpa a chhy leipa maih a pathiesa thei nawpata sahrâhpa mianona hnohna chata husona pie pasaipa a châ.
16 Chyhsa zydua, a lai a chyh ta, hneirôhpa nata dyhchhiepa, sei nata sei a châ leipazy chhao, ama ku chachâh lâ tlyma, ama khi liata tlyma pahnona hneipata paysa ta;
17 pahnona, sahrâhpa moh tlyma, a moh nuby tlyma a hneipa dei leipata cha ahyhma ta khâpahma ama chalei thei lei awpa nata ama zua thei lei nawpata.
18 He liana heta sona a lâ theina a y. Pahno theina a hneipa chata sahrâhpa nuby cha a laichadai se; chyhsapa nuby châ tlôh ta; a nuby cha za charu nata sycharu nata sâcharu a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||