Kô sâh kha
1 Chatawhcha vâlyuhchâpa aleichiepa khaotlô châhbi nata bâlia laipapi a ku ta chabapata avâ tawhta a za chôpa hmô na ta.
2 Drakao, parihpi hlôpa, cha cha Ahripa nata Sâtâ cha patu ta, kô sâh kha chata chahry ta,
3 aleichiepa khaotlô liana cha za thy ta, khawhlôh ta kô sâh kha a ki hlâ lei cha phopizy a dô khao lei nawpata a chô liata chahnao thlu ha ta; cha khai tawhna chata daihti bohpi leipa chhôhta pathlie chy awpa a châ.
4 Chatawhcha abeidyuchhaizy hmô na ta, a chô liata chyhsa a tyuh ei ta, ama hnohna chata ryureina piepa châ ta. Zisu pahnosana bie vâta nata Khazohpa bie vâta luh taipazy thlahpa nata sahrâhpa nata a nohthlahpa achhy leipa, ama khih liata tlyma, ama ku liata tlyma ngiana a hnei leipazy thlahpa cha hmô hra na ta. Cha sahlao cha vaw hroh ei ta, kô sâh kha chhôhta Krista ryureilâhpata y ei ta.
5 Athihpa a hropa deikua cha kô sâhkha a tlô hlâ lei cha hroh mâh leipa ei ta. Cha cha thyuheihna hmiatua chaipa cha a châ.
6 Thyuheihna hmiatua chaipa liata a hlaopa cha a nohhlao ta, a pathaih hra. Cha sahlao chô liana chata thina einona chata hmotaotheina rai hnei vei, Khazohpa nata Krista theihthaipazy cha aw ei ta, ano nata kô sâh kha chhôh ryureipata tlao ama y aw.
7 Kô sâh kha a tlô tawhta Sâtâ cha a tâhna tawhtapa cha pathliepata y aw ta,
8 alei ki palih liata phopizy, Kawka nata Makawka cha dôpata, adyuhna lâta chhihtha pakhy awpata a pua aw; cha sahlao hluhzie cha tilaipi liata leisadi hawhta ama châ.
9 Alei a hâ duata sie ei ta, mopathaihpazy riehmo nata khih kho ngaitapa cha chadô ei ta, châhrasala avâ tawhta mei za tla ta, âmo cha kâ khai haw ei ta,
10 âmo a dôtuhpa Ahripa cha sahrâhpa nata hrohso pakheipa yna mei nata kaih tipo liana chata thy hawpata y ei ta; chatanachata chhâzaw ta chhô nata zâ pasa pataosapata ama y aw.
Abei dyuchhai diehpa rônahpa liata pachâna
11 Chatawhcha abeidyuchhai diehpa rônahpa nata a chô liata a tyuhpa cha hmô na ta; a hmiakô tawhtapa cha alei nata avâ a râ ei ta, âmo chata su rai y khao leipata.
12 Chatawhcha athipazy alaipa nata a nawhpa chhao, abeidyuchhai hmiakô liata a duahpa hmô na ta, châbuzy cha pahypa châ ta. Châbu hropa hrona châbu cha pahypa châ hra ta. Athipazy cha châbuzy liata ropa hawhta ama hmotaozie lymâ hawhta pachiapata ama y haw.
13 Chatawhcha tilaipi chata a chhôh liata athipa a ypazy cha papuasa ta, Thina nata Athihpakhih chata ama chhôh liata athihpa a ypazy cha papuasa hra ei ta; chyhsa to ama hmotaopa chyu lymâ hawhta pachiapata ama y haw.
14 Chatawhcha Thina nata Athihpakhihzy cha meitipo liata thypata y ta. He he thina einona cha a châ, meitipo tlai cha;
15 ahy moh rai hrona châbu liata ropa hmôpa a châ vei khiahtala, meitipo liata thypata y hra ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||