Sihrypa rônah ngaitapa pachiana
1 Chatawhcha vâlyuhchâpa pasari, biebu sâsari a hneipazy hryta pakha chata a vy ta, “He lâ a khy teh, ti hluhpi chô liata a tyuhpa sihrypa rônah ngaitapa hriena cha ei cha pamosa aw;
2 alei liata abeizy chata ano cha apheikhei tyh ei ta, alei liata a pahrâpazy chhao cha a chyhsa apheikhei a hmaâa kresawti chata parisapata ama y tyh,” tahpata na chho ta.
3 Ano chata Thlahpa ta râhpathohpa lâta na siekhei ta; Khazohpa reipachhiena moh ta a bipa, luh sari nata ki hrawh a hneipa sahrâhpa a sailawpa chô liata a kiahpa chanô hmô na ta.
4 Cha chanô chata poh nohsaihpa nata a saih-lawpa a bu ta, ngôh nata alôsôpa nata taikulô ta a tobi ta, ngôh nyu, hmo pasichhihpa nata chyhsa apheikhei a hmâna hmô puapata a biepa chaba ta;
5 a khi liata bienyupa; “Babylaw khihpi rônahpa, alei liata sihrypazy nata hmo pasichhihpazy nô,” tahpata moh ropa y ta.
6 Cha chanô cha mopathaihpazy thisaih nata Zisu mâty sahlao thisaih ta a paripa hmô na ta. Ei hmô patanahta ei noâh ngaita kaw ta.
7 Vâlyuhchâpa chata ei hnohta, “Khâpa vâta e na no a âh? Chanô nata a phaotuhpa sahrâhpa, luh sari nata ki hrawh a hneipa bienyupa cha ei cha chho aw.
8 Sahrâpa na hmôpa kha vaw y ta, y khao leipata, aleichiepa khaotlô tawhta kaw pua aw ta, leidiana lâta a sie aw; alei liata a pahrâpazy, aleilô tao tua no tawhtapa hrona châbu liata moh ro leipazy chata sahrâhpa cha ama hmô tita, y haw ta, y khao leipata, a vy heih awpa cha ama no a âh aw.
9 He liana heta palôhrupa sona a hneipa a lâ theina a y: luh saripazy cha chanô a tyuna tlâh sarizy cha ama châ.
10 Abei pasari chhao châ ei ta; papangawhzy cha lei haw ei ta, pakha cha y ta, pakha hropa cha vaw y mâh leipata, a vaw y tita cha bohpi leipata a y awpa a châ.
11 Sahrâhpa vaw y ta, a y khao leipa tlai kha a pa chariena châ ta, pasaripazy hrytahpa kha cha, leidiana liata a sie aw.
12 Ki hrawh na hmôpazy kha abei pahrawh biehneina a hnei mâh leipa châ ei ta; dawh kha chhôh deikua cha sahrâhpa nata abeizy hawhta biehneina ama hnei aw.
13 Chazy chata palôhrupa miakha phaopata ama hmotaotheina nata biehneina cha sahrâhpa ama pie aw;
14 chazy chata Mietahkupa Taw cha a dyuh aw ei ta, Mietahkupa Taw cha hyutuhpazy Hyutuhpa nata abeizy Beipa a châpa vâta âmo cha pahnie aw ta; a hnohta a ypa, a awpazy, â tlypazy, ngâchhihpazy chata ama pahnie hra aw,” tah ta.
15 Ano lilaw chata ei hnohta, “Sihrypa atyuna tizy na hmôpa kha, chyhsazy zawpizy, phozy, reihzy châ ta.
16 Ki hrawh na hmôpa nata sahrâhpa nata cha chyhsazy chata sihrypa cha a hao aw ei ta, khâpahma hnei leipata nata thluahruapata tao aw ei ta, a sa chhao nie aw ei ta, mei ta a tlôna taih ama rao aw.
17 Khazohpa biezy cha patlôpata a y hlâ lei cha a khopa ama tao nawpa nata palôhrupa miakha ama phao nawpa nata ama râh cha sahrâhpa hnohta ama pie nawpata Khazohpa ta ama pathipalôh liata soh tlôh ta.
18 Chatawhcha chanô na hmôpa kha khihpi rônahpa, alei liata abeizy chô liata ryureituhpa cha a châ,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | ||||||